Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 16:1-28

16  Ni Farisifoi kɛ Sadukifoi lɛ tsi amɛbɛŋkɛ lɛ, ni bɔ ni afee ni amɛka lɛ lɛ, amɛbi lɛ koni efee okadi ko ni jɛ ŋwɛi etsɔɔ amɛ.  Ni ehere nɔ ekɛɛ amɛ akɛ: “Kɛ́ shɛ gbɛkɛnaashi lɛ, nyɛkɛɔ akɛ, ‘Jeŋ baatse, ejaakɛ ŋwɛi etsu,’  ni leebi lɛ nyɛkɛɔ akɛ, ‘Ŋmɛnɛ lɛ, jeŋ baajɔ ni nugbɔ baanɛ ejaakɛ ŋwɛi etsu, shi ehiɛ eha.’ Nyɛle ŋwɛi atatui lɛ ashishitsɔɔmɔ, shi bei lɛ ahe okadii lɛ, nyɛnyɛɛɛ shishi nyɛtsɔɔ.  Yinɔbii fɔji kɛ gbalafitelɔi* yaa nɔ amɛtaoɔ okadi ko, shi ahãŋ amɛ okadi ko akɛ ja Yona okadi lɛ.” Kɛkɛ ni eshi amɛ ni eyiŋ etee.  Agbɛnɛ, kaselɔi lɛ fo ŋshɔ lɛ kɛtee ŋshɔ lɛ sɛɛ, ni amɛhiɛ kpa nɔ akɛ amɛbaakɔlɔ aboloi kɛya.  Yesu kɛɛ amɛ akɛ: “Nyɛyaa nɔ nyɛgbɛa nyɛhiŋmɛiiaŋ, ni nyɛkwɛa jogbaŋŋ yɛ Farisifoi kɛ Sadukifoi lɛ amasha lɛ he.”  Kɛkɛ ni amɛbɔi niiahesusumɔ yɛ amɛteŋ amɛkɛɛ: “Wɔkɔɔɔ aboloo ko kwraa kɛbaaa.”  Akɛni Yesu le enɛ hewɔ lɛ, ekɛɛ akɛ: “Nyɛ ni nyɛhemɔkɛyeli faaa, mɛni hewɔ nyɛwiewieɔ yɛ nyɛteŋ akɛ nyɛhiɛɛɛ aboloo lɛ?  Ani nyɛnako oti lɛ lolo, aloo nyɛkaiii aboloi enumɔ ni akɛlɛ hii akpei enumɔ lɛ, kɛ kɛntɛŋi abɔ ni nyɛloo lɛ? 10  Aloo aboloi kpawo ni akɛlɛ hii akpei ejwɛ lɛ, kɛ kɛntɛŋi agboi* abɔ ni nyɛloo lɛ? 11  Te fee tɛŋŋ ni nyɛkɔɔɔ sɛɛ akɛ jeee aboloi ahe mikɛ nyɛ wie lɛ? Shi moŋ nyɛkwɛa jogbaŋŋ yɛ Farisifoi kɛ Sadukifoi lɛ amasha lɛ he.” 12  Kɛkɛ ni amɛkɔ sɛɛ akɛ ekɛɛ amɛkwɛ jogbaŋŋ yɛ Farisifoi kɛ Sadukifoi lɛ atsɔɔmɔ lɛ he, shi jeee yɛ aboloo masha he. 13  Be ni Yesu ba Kaisarea Filipi kpokpaa lɛ nɔ lɛ, ebi ekaselɔi lɛ akɛ: “Namɔ mɛi kɛɔ akɛ gbɔmɔ Bi lɛ ji?” 14  Amɛkɛɛ akɛ: “Mɛi komɛi kɛɔ akɛ Yohane Baptisilɔ lɛ, mɛi komɛi hu kɛɔ akɛ Elia, ni mɛi krokomɛi hu kɛɔ akɛ Yeremia loo gbalɔi lɛ ateŋ mɔ kome.” 15  Ekɛɛ amɛ akɛ: “Shi nyɛ lɛ, namɔ nyɛkɛɔ akɛ miji?” 16  Simon Petro hã hetoo akɛ: “Bo ji Kristo lɛ, Nyɔŋmɔ hiɛkãalɔ lɛ Bi lɛ.” 17  Yesu here lɛ nɔ akɛ: “Simon, Yona bi, oyɛ miishɛɛ, ejaakɛ jeee heloo kɛ lá* jie enɛ kpo tsɔɔ bo, shi moŋ mi-Tsɛ ni yɔɔ ŋwɛi lɛ ni. 18  Kɛfata he lɛ miikɛɛ bo akɛ: Bo ji Petro, ni tɛsaa nɛɛ nɔ matswa misafo lɛ mama, ni Gbonyo Bu* lɛ naa agbói lɛ nyɛŋ nɔ aye. 19  Maŋɔ ŋwɛi Maŋtsɛyeli lɛ naa samfei lɛ mahã bo, ni nɔ fɛɛ nɔ ni ooofi yɛ shikpɔŋ lɛ nɔ lɛ baafee nɔ ni afi yɛ ŋwɛi momo, ni nɔ fɛɛ nɔ ni ooofɛne yɛ shikpɔŋ lɛ nɔ lɛ baafee nɔ ni afɛne yɛ ŋwɛi momo.” 20  Kɛkɛ ni efã kaselɔi lɛ kɛ hiɛdɔɔ akɛ amɛkakɛɛ mɔ ko mɔ ko akɛ lɛ ji Kristo lɛ. 21  Kɛjɛ nakai be lɛ nɔ kɛyaa lɛ, Yesu bɔi ekaselɔi lɛ tsɔɔmɔ akɛ esa akɛ eya Yerusalem ni eyana nɔ babaoo yɛ onukpai lɛ kɛ osɔfoi tsiifoi lɛ kɛ woloŋmalɔi lɛ adɛŋ, ní agbe lɛ, ní yɛ gbi ni ji gbi etɛ lɛ nɔ lɛ, atee lɛ shi. 22  Kɛkɛ ni Petro ŋɔ lɛ kɛtee afã ni ebɔi ehiɛ kamɔ ekɛɛ: “Nuŋtsɔ, kaatsɛ efɔŋ ohã ohe;* enɛ baŋ onɔ kɔkɔɔkɔ.” 23  Shi etsɔ ehe ni ekɛɛ Petro akɛ: “Ho misɛɛ, Satan! Oji nanetɔ̃tɔmɔnɔ kɛhã mi ejaakɛ ojwɛŋŋŋ Nyɔŋmɔ jwɛŋmɔi shi moŋ gbɔmɛi ajwɛŋmɔi ojwɛŋɔ.” 24  Kɛkɛ ni Yesu kɛɛ ekaselɔi lɛ akɛ: “Kɛ́ mɔ ko miisumɔ akɛ enyiɛ misɛɛ lɛ, ekwa ehe ni ewó epiŋmɔ tso* lɛ ni eya nɔ enyiɛ misɛɛ. 25  Ejaakɛ mɔ fɛɛ mɔ ni miisumɔ akɛ ebaa ewala* yi lɛ, ebaaŋmɛɛ lɛ, shi mɔ fɛɛ mɔ ni ewala* ŋmɛɔ lɛ yɛ mihewɔ lɛ, enine baashɛ nɔ. 26  Anɔkwa, mɛɛ nɔ kpakpa gbɔmɔ baaná kɛ́ enine shɛ jeŋ muu lɛ fɛɛ nɔ shi ewala* ŋmɛɛ lɛ? Aloo mɛni gbɔmɔ baaŋɔ ehã kɛtsake ewala?* 27  Ejaakɛ gbɔmɔ Bi lɛ baaba yɛ e-Tsɛ lɛ anunyam lɛ mli kɛ ebɔfoi lɛ, kɛkɛ lɛ ebaahã mɔ fɛɛ mɔ nɔ ni sa lɛ yɛ enifeemɔ naa. 28  Lɛɛlɛŋ, miikɛɛ nyɛ akɛ mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɔkɔɔkɔ kɛyashi amɛbaana gbɔmɔ Bi lɛ miiba yɛ e-Maŋtsɛyeli lɛ mli dã.”

Shishigbɛ Niŋmaa

Aloo “mɛi ni yeee anɔkwa.”
Aloo “niyenii kɛntɛŋi.”
Aloo “ejaakɛ jeee gbɔmɔ.”
Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
Sht. ŋm., “omli ahi ahã ohe.”
Kwɛmɔ Wiemɔi Titrii Amligbalamɔ lɛ.
Aloo “esusuma.”
Aloo “esusuma.”
Aloo “esusuma.”
Aloo “esusuma.”