Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 15:1-39

15  Kɛkɛ ni Farisifoi kɛ woloŋmalɔi jɛ Yerusalem ba Yesu ŋɔɔ amɛbakɛɛ akɛ:  “Mɛni hewɔ okaselɔi lɛ kuɔ blematsɛmɛi lɛ akusum lɛ mli lɛ? Akɛ nɔkwɛmɔnɔ lɛ, amɛfɔɔɔ amɛdɛ̃* dani amɛyeɔ nii.”  Ehere nɔ ekɛɛ amɛ akɛ: “Mɛni hewɔ nyɛkuɔ Nyɔŋmɔ kitã lɛ mli yɛ nyɛkusum lɛ hewɔ lɛ?  Akɛ nɔkwɛmɔnɔ lɛ, Nyɔŋmɔ kɛɛ akɛ, ‘Wo otsɛ kɛ onyɛ,’ ni, ‘Mɔ ni wieɔ wiemɔi fɔji eshiɔ* etsɛ aloo enyɛ lɛ, agbe lɛ.’  Shi nyɛkɛɔ akɛ, ‘Mɔ fɛɛ mɔ ni kɛɔ etsɛ aloo enyɛ akɛ: “Nɔ fɛɛ nɔ ni miyɔɔ ni kulɛ obaaná he sɛɛ lɛ, eji nɔkeenɔ ni ajɔɔ nɔ ahã Nyɔŋmɔ” lɛ,  ehiaaa akɛ ewoɔ etsɛ kwraa.’ No hewɔ lɛ, nyɛgu Nyɔŋmɔ wiemɔ lɛ yɛ nyɛkusum lɛ hewɔ.  Osatofoi, eja pɛ akɛ Yesaia gba yɛ nyɛhe be ni ekɛɛ akɛ:  ‘Maŋ nɛɛ kɛ amɛnaabu woɔ mi, shi amɛtsuii etsi amɛhe kɛje mihe kɛtee shɔŋŋ.  Yakatswaa amɛyaa nɔ amɛjáa mi lɛ, ejaakɛ amɛtsɔɔ tsɔɔmɔi ni ji gbɔmɛi akitãi.’” 10  Ni etsɛ asafoku lɛ kɛbɛŋkɛ ni ekɛɛ amɛ akɛ: “Nyɛboa toi ni nyɛnua shishi: 11  Jeee nɔ ni boteɔ gbɔmɔ daaŋ ji nɔ ni buleɔ lɛ, shi moŋ nɔ ni jɛɔ edaaŋ lɛ ji nɔ ni buleɔ lɛ.” 12  Kɛkɛ ni kaselɔi lɛ ba eŋɔɔ amɛbakɛɛ lɛ akɛ: “Ole akɛ be ni Farisifoi lɛ nu nɔ ni owie lɛ amɛnane tɔ̃tɔ?”* 13  Ehere nɔ ekɛɛ: “Tso fɛɛ tso ni jeee miŋwɛi Tsɛ lɛ tɛo lɛ, abaafã. 14  Nyɛkadia amɛsɛɛ. Gbɛtsɔɔlɔi shwilafoi ji amɛ. Belɛ, kɛ́ shwilafo tsɔɔ shwilafo gbɛ lɛ, amɛyi enyɔ lɛ fɛɛ amɛbaayagbee bu mli.” 15  Petro here nɔ ekɛɛ: “Tsɔɔmɔ wɔ nɔkwɛmɔnɔ* lɛ mli.” 16  Kɛkɛ ni ekɛɛ akɛ: “Ani nyɛ hu nyɛnuuu nii ashishi lolo? 17  Ani nyɛleee akɛ nɔ fɛɛ nɔ ni boteɔ mɔ daaŋ lɛ, musuŋ eyaa ni ajieɔ awoɔ tiafi mli? 18  Shi nɔ fɛɛ nɔ ni jɛɔ daaŋ jeɔ kpo lɛ, tsui lɛ mli ejɛɔ, ni nomɛi buleɔ gbɔmɔ. 19  Akɛ nɔkwɛmɔnɔ lɛ, tsui lɛ mli susumɔi fɔji, gbɔmɔgbei, gbalafitemɔi, bɔlɛnamɔ jeŋba sha,* jui, amale odasei, kɛ musubɔi jɛɔ. 20  Enɛɛmɛi ji nibii ni buleɔ gbɔmɔ; shi dɛ̃ ni afɔɔɔ* dani ayeɔ nii lɛ, no buleee gbɔmɔ.” 21  Agbɛnɛ, Yesu shi jɛmɛ etee Tiro kɛ Sidon kpokpaa lɛ nɔ. 22  Ni naa! Foinike yoo ko ni jɛ nakai kpokpaa lɛ nɔ lɛ ba ebabolɔ ekɛɛ: “Naa mi mɔbɔ Nuŋtsɔ, David Bi. Daimonio miihao mibiyoo waa.” 23  Shi efooo edaaŋ. No hewɔ lɛ ekaselɔi lɛ ba eŋɔɔ amɛbakpa lɛ fai akɛ: “Wo lɛ gbɛ ni eya, ejaakɛ eebolɔ kɛmiinyiɛ wɔsɛɛ.” 24  Ehã hetoo ekɛɛ: “Atsuuu mi mɔ ko mɔ ko ŋɔɔ, akɛ ja Israel we gwantɛŋi ni elaaje lɛ aŋɔɔ kɛkɛ atsu mi.” 25  Shi yoo lɛ ba ni ebakoto lɛ ekɛɛ: “Nuŋtsɔ, ye obua mi!” 26  Ehã lɛ hetoo akɛ: “Ejaaa akɛ aŋɔɔ bii lɛ aboloo lɛ ashɛrɛɔ ashwieɔ gbei abii lɛ ahiɛ.” 27  Yoo lɛ kɛɛ akɛ: “Nuŋtsɔ, nakai ni, shi yɛ anɔkwale mli lɛ, gbei abii lɛ yeɔ fufuji ni jɛɔ amɛnuŋtsɔmɛi lɛ akpɔlɔ lɛ nɔ shwieɔ shi lɛ.” 28  Kɛkɛ ni Yesu here lɛ nɔ ekɛɛ: “Oo yoo, ohemɔkɛyeli da; bɔ ni otaoɔ lɛ, aba mli nakai ahã bo.” Ni ebiyoo lɛ he wa lɛ yɛ nakai ŋmɛlɛtswaa lɛ nɔ nɔŋŋ. 29  Ni Yesu je jɛmɛ eba Galilea Ŋshɔ lɛ naa gbɛ, ni be ni ekwɔ kɛtee gɔŋ lɛ nɔ lɛ, eyata shi yɛ jɛmɛ. 30  Kɛkɛ ni asafoku babaoo tsi amɛbɛŋkɛ lɛ, ni amɛkɛ akpakei, kpajelɔi, shwilafoi, mumuii, kɛ mɛi krokomɛi pii ba, ni amɛkɛ amɛ baŋmɛlɛ enaji anaa, ni etsa amɛ. 31  Ni be ni asafoku lɛ na akɛ mumuii miiwie, ni kpajelɔi ahe miiwa amɛ, ni akpakei miinyiɛ, ni shwilafoi miina nii lɛ, amɛnaa kpɛ amɛhe, ni amɛwo Israel Nyɔŋmɔ lɛ hiɛ nyam. 32  Shi Yesu tsɛ ekaselɔi lɛ kɛba eŋɔɔ ni ekɛɛ amɛ akɛ: “Mimusuŋ miitsɔ mi yɛ asafoku lɛ hewɔ, ejaakɛ gbii etɛ nɛ ní amɛkɛ mi ehi shi, ni amɛbɛ nɔ ko ni amɛbaaye. Misumɔɔɔ akɛ miwoɔ amɛ gbɛ kɛ hɔmɔ,* ejaakɛ ekolɛ, amɛbaayatɔ biti yɛ gbɛ lɛ nɔ.” 33  Shi kaselɔi lɛ kɛɛ lɛ akɛ: “Nɛgbɛ wɔbaaná aboloi ni fa bɔ ni baashɛ asafoku ni da nɛkɛ naa yɛ biɛ ni etse ehe banee nɛɛ?” 34  Kɛkɛ ni Yesu kɛɛ amɛ akɛ: “Aboloi enyiɛ nyɛyɔɔ?” Amɛkɛɛ akɛ: “Kpawo, kɛ nu mli loi bibii fioo ko.” 35  Ni be ni efã asafoku lɛ akɛ amɛtara shikpɔŋ lɛ, 36  ekɔlɔ aboloi kpawo kɛ loi lɛ, ni be ni eda shi lɛ, ekumɔ mli ni ekɛhã kaselɔi lɛ, ni kaselɔi lɛ hu kɛhã asafoku lɛ. 37  Ni amɛ fɛɛ amɛye ni amɛtɔrɔ, ni amɛkɔlɔ fufuji ni shwɛ lɛ, kɛntɛŋi agboi* kpawo obɔbɔ. 38  Ni mɛi ni ye nii lɛ ayibɔ ji hii akpei ejwɛ, kɛ yei kɛ gbekɛbii bibii hu. 39  Agbɛnɛ, be ni ewo asafoku lɛ gbɛ lɛ, ebote lɛlɛ mli ni eba Magadan kpokpaa lɛ nɔ.

Shishigbɛ Niŋmaa

Ni tsɔɔ akɛ, amɛtsuuu amɛhe yɛ kusum naa.
Aloo “Mɔ ni sopaa.”
Aloo “ewo amɛmli la.”
Aloo “abɛbua.”
Hela wiemɔkuli ni ji por·neiʹa lɛ piifeemɔ. Kwɛmɔ Wiemɔi Titrii Amligbalamɔ lɛ.
Ni tsɔɔ akɛ, he ni atsuuu yɛ kusum naa.
Aloo “ní amɛmiihi ŋmaa.”
Aloo “niyenii kɛntɛŋi.”