Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 14:1-36

YITSEI LƐ AMLI SAJI

  • Afo Yohane Baptisilɔ lɛ yitso (1-12)

  • Yesu lɛ mɛi 5,000 (13-21)

  • Yesu nyiɛ nu hiɛ (22-33)

  • Atsa mɛi yɛ Genesaret (34-36)

14  Nakai be lɛ mli lɛ, Herode, ni ji kpokpaa nɔyelɔ* lɛ, nu Yesu he sane  ni ekɛɛ etsuji lɛ akɛ: “Yohane Baptisilɔ lɛ ni. Atee lɛ shi kɛjɛ gbohii ateŋ, ni no hewɔ ni enyɛɔ etsuɔ hewalɛ nitsumɔi nɛɛ.”  Ejaakɛ Herode* emɔ Yohane ni efimɔ lɛ, ni ewo lɛ tsuŋ yɛ Herodia, ni ji enyɛmi nuu Filipo ŋa lɛ hewɔ.  Ejaakɛ no mli lɛ, Yohane kɛɔ lɛ akɛ: “Mla eŋmɛɛɛ gbɛ akɛ oŋɔɔ lɛ akɛ oŋa.”  Eyɛ mli akɛ eesumɔ ni egbe lɛ moŋ, shi eeshe asafoku lɛ gbeyei, ejaakɛ amɛbuɔ lɛ gbalɔ.  Shi be ni ayeɔ Herode fɔmɔ gbi lɛ, Herodia biyoo lɛ bajo yɛ nifeemɔ lɛ shishi, ni esa Herode hiɛ jogbaŋŋ aahu  akɛ ekã oblayoo lɛ kitã akɛ, nɔ fɛɛ nɔ ni ebaabi lɛ lɛ, ebaahã lɛ.  Kɛkɛ ni enyɛ wo lɛ ŋaa, ni ebakɛɛ akɛ: “Ŋɔɔ Yohane Baptisilɔ lɛ yitso ofɔ̃ kã nɛɛ mli ohã mi.”  Enɛ dɔ maŋtsɛ lɛ moŋ, shi yɛ kitãi ni ekamɔ lɛ, kɛ mɛi ni kɛ lɛ tara niyenii lɛ ashi* lɛ ahewɔ lɛ, efã akɛ akɛhã lɛ. 10  No hewɔ lɛ, etsu ni ayafo Yohane yitso yɛ tsuŋwoohe lɛ. 11  Akɛ eyitso lɛ fɔ̃ kã mli ni akɛbahã oblayoo lɛ, ni lɛ hu ekɛyahã enyɛ. 12  Sɛɛ mli lɛ, ekaselɔi lɛ ba ni amɛbawó egbonyo lɛ, ni amɛyafu lɛ; ni amɛba amɛbabɔ Yesu amaniɛ. 13  Be ni Yesu nu enɛ lɛ, ebote lɛlɛ mli ni eshi jɛmɛ kɛtee koni ekome eyahɔ he ko banee. Shi be ni asafoku lɛ nu lɛ, amɛtswa nantu kɛjɛ maji lɛ amli kɛnyiɛ esɛɛ. 14  Be ni ebashɛ ŋshɔ lɛ naa lɛ, ena asafoku babaoo, ni emusuŋ tsɔ lɛ yɛ amɛ hewɔ, ni etsa amɛteŋ helatsɛmɛi lɛ. 15  Shi be ni shɛ gbɛkɛnaashi lɛ, ekaselɔi lɛ ba eŋɔɔ amɛbakɛɛ lɛ akɛ: “Biɛ etse ehe banee, ni je ena momo; wó asafoku lɛ gbɛ koni amɛya akrowai lɛ amli amɛyahé niyenii.” 16  Shi Yesu kɛɛ amɛ akɛ: “Ehiaaa ni amɛshi; nyɛ nyɛhãa amɛ nɔ ko amɛyea.” 17  Amɛkɛɛ lɛ akɛ: “Wɔbɛ nɔ ko yɛ biɛ akɛ ja aboloi enumɔ kɛ nu mli loi enyɔ.” 18  Ekɛɛ akɛ: “Nyɛkɛbahãa mi yɛ biɛ.” 19  Ni ekɛ gbɛtsɔɔmɔi hã asafoku lɛ koni amɛtarataraa shi yɛ jwɛii lɛ anɔ. Kɛkɛ ni ekɔlɔ aboloi enumɔ kɛ loi enyɔ lɛ, ni ekwɛ ŋwɛi, ni esɔle,* ni no sɛɛ lɛ ekumɔ aboloi lɛ amli, ni ekɛhã kaselɔi lɛ, ni kaselɔi lɛ hu kɛhã asafoku lɛ. 20  Ni amɛ fɛɛ amɛye ni amɛtɔrɔ, ni amɛkɔlɔ fufuji ni shwɛ lɛ, kɛntɛŋi nyɔŋma kɛ enyɔ obɔbɔ. 21  No mli lɛ mɛi ni ye nii lɛ aaafee hii akpei enumɔ, kɛ yei kɛ gbekɛbii bibii hu. 22  Kɛkɛ ni amrɔ lɛ, ehã ekaselɔi lɛ bote lɛlɛ lɛ mli ní amɛtsɔ ehiɛ kɛya ŋshɔ lɛ sɛɛgbɛ, koni ewo asafoku lɛ gbɛ. 23  Be ni ewo asafoku lɛ gbɛ egbe naa lɛ, ekome too ekwɔ kɛtee gɔŋ lɛ nɔ koni eyasɔle. Be ni je na lɛ, ekome too eyɔɔ jɛmɛ. 24  Be nɛɛ mli lɛ, lɛlɛ lɛ kɛ ŋshɔ lɛ naa jekɛ* ni ŋshɔkei lɛ miihɛlɛ lɛlɛ lɛ, ejaakɛ eekpee kɔɔyɔɔ. 25  Shi nyɔɔŋ buu be ni ji ejwɛ* lɛ nɔ lɛ, enyiɛ ŋshɔ lɛ hiɛ kɛba amɛŋɔɔ. 26  Be ni ekaselɔi lɛ ahiŋmɛi gba enɔ akɛ enyiɛ ŋshɔ lɛ hiɛ lɛ, amɛtsui fã amɛkɛɛ: “Ninaa nɛ!” Ni gbeyeishemɔ hã amɛbolɔ. 27  Shi amrɔ lɛ, Yesu kɛɛ amɛ akɛ: “Nyɛnáa ekãa! Mi ni; nyɛkashea gbeyei.” 28  Petro hã lɛ hetoo akɛ: “Nuŋtsɔ, kɛ́ bo ni lɛ, fã mi koni matsɔ nu lɛ hiɛ kɛba oŋɔɔ.” 29  Ni ekɛɛ: “Ba!” Ni Petro je lɛlɛ lɛ mli, ni enyiɛ nu lɛ hiɛ kɛmiiya Yesu ŋɔɔ. 30  Shi be ni ena bɔ ni kɔɔyɔɔ lɛ tswaa waa lɛ, eshe gbeyei. Ni be ni ebɔi shiumɔ lɛ, ebo ekɛɛ: “Nuŋtsɔ, heremɔ mi!” 31  Ni amrɔ lɛ, Yesu kpã enine mli ni emɔ emli, ni ekɛɛ lɛ akɛ: “Bo ni ohemɔkɛyeli faaa, mɛni hewɔ ohã oyiŋ fee bo kɔshikɔshi?” 32  Be ni amɛbote lɛlɛ lɛ mli lɛ, kɔɔyɔɔ lɛ fɔ̃ɔ tswaa. 33  Kɛkɛ ni mɛi ni yɔɔ lɛlɛ lɛ mli lɛ kotokotoo lɛ amɛkɛɛ: “Nyɔŋmɔ Bi ji bo lɛɛlɛŋ.” 34  Ni amɛfo ŋshɔ lɛ, ni amɛba Genesaret shikpɔŋ lɛ nɔ. 35  Be ni hii ni yɔɔ jɛmɛ lɛ yoo lɛ lɛ, amɛtsu akɛ wiemɔ tee jɛmɛ niiaŋ fɛɛ, ni mɛi ŋɔ helatsɛmɛi fɛɛ kɛba eŋɔɔ. 36  Ni amɛkpa lɛ fai akɛ ehã amɛtara etade nɔhaanɔ lɛ naamuu lɛ he kɛkɛ, ni mɛi fɛɛ ni tara he lɛ ahe wa amɛ kwraa.

Shishigbɛ Niŋmaa

Hela mli lɛ, “tetrarke.”
Ni ji, Herode Antipa. Kwɛmɔ Wiemɔi Titrii Amligbalamɔ lɛ.
Aloo “mɛi ni kɛ lɛ tara okpɔlɔ lɛ he.”
Sht. ŋm., “ejɔɔ.”
Sht. ŋm., “stadioi babaoo.” Stadio kome feɔ m 185 (nat 606.95).
Ni tsɔɔ akɛ, aaafee maŋkɛ ŋmɛji 3 kɛyashi aaafee leebi ŋmɛji 6.