Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 13:1-58

13  Nakai gbi lɛ nɔ lɛ, Yesu je shĩa lɛ ni eyata ŋshɔ lɛ naa.  Ni asafoku babaoo babua amɛhe naa yɛ eŋɔɔ, no hewɔ lɛ, ekwɔ lɛlɛ ko ni eta mli, ni asafoku lɛ fɛɛ damɔ ŋshɔ lɛ naa.  Kɛkɛ ni ekɛ nɔkwɛmɔnii* tsu nii kɛwie nibii pii etsɔɔ amɛ ekɛɛ: “Naa! Nidulɔ ko yiŋ etee nidumɔ.  Be ni eduɔ nii lɛ, dumɔwui lɛ ekomɛi yashwie gbɛ he, ni loofɔji ba amɛbakɔlɔ amɛye.  Ekrokomɛi yashwie tɛsai anɔ, he ni amɛnáaa sũ babaoo yɛ, ni amrɔ lɛ amɛkwɛ̃kwɛ̃ɛ ejaakɛ sũ lɛ mli kwɔɔɔ.  Shi be ni hulu lɛ te shi lɛ eshã amɛ, ni akɛni amɛbɛ shishifã hewɔ lɛ, amɛŋala.  Ekrokomɛi yashwie ŋmeii ateŋ ni ŋmeii lɛ hole amɛhe nɔ ni amɛmia amɛ.  Ni ekrokomɛi hu yashwie sũ kpakpa nɔ, ni amɛbɔi yibiiwoo, eko wo oha, eko wo nyɔŋmai ekpaa, ni ekroko hu wo nyɔŋmai etɛ.  Mɔ ni yɔɔ toi lɛ, hã ebo toi.” 10  No hewɔ lɛ, kaselɔi lɛ ba eŋɔɔ amɛbabi lɛ akɛ: “Mɛni hewɔ okɛ nɔkwɛmɔnii* tsuɔ nii kɛwieɔ otsɔɔ amɛ lɛ?” 11  Ehere nɔ akɛ: “Nyɛ lɛ akɛhã nyɛ akɛ nyɛnu ŋwɛi Maŋtsɛyeli lɛ he teemɔŋ saji krɔŋkrɔŋi lɛ ashishi, shi amɛ lɛ akɛhãko amɛ. 12  Ejaakɛ mɔ fɛɛ mɔ ni yɔɔ nɔ ko lɛ, abaahã lɛ eko afata he, ni abaahã ená ni eteke nɔ; shi mɔ fɛɛ mɔ ni bɛ nɔ ko lɛ, nɔ ni eyɔɔ tete lɛ, abaashɔ̃ yɛ edɛŋ. 13  Enɛ hewɔ mikɛ nɔkwɛmɔnii* tsuɔ nii kɛwieɔ tsɔɔ amɛ lɛ; ejaakɛ amɛkwɛɔ nii moŋ, shi yakatswaa amɛkwɛɔ lɛ, ni amɛnuɔ moŋ, shi yakatswaa amɛnuɔ lɛ, asaŋ amɛnuuu shishi. 14  Ni Yesaia gbalɛ lɛ miiba mli yɛ amɛgbɛfaŋ. Ekɛɔ akɛ: ‘Nu lɛ nyɛbaanu moŋ nɛ, shi nyɛnuŋ shishi kɔkɔɔkɔ, ni kwɛmɔ lɛ nyɛbaakwɛ moŋ nɛ, shi nyɛnaŋ kɔkɔɔkɔ. 15  Ejaakɛ mɛi nɛɛ atsui ekpiliŋ, ni amɛkɛ amɛtoii nuɔ moŋ shi amɛfeee he nɔ ko, ni amɛŋamɔ amɛhiŋmɛii koni amɛkɛ amɛhiŋmɛii akana ni amɛkɛ amɛtoii akanu ni amɛkɛ amɛtsui akanu shishi ni amɛkakpale, ni mitsa amɛ.’ 16  “Shi nyɛhiŋmɛii yɛ miishɛɛ ejaakɛ amɛmiina nii, kɛ nyɛtoii hu, ejaakɛ amɛmiinu nii. 17  Ejaakɛ lɛɛlɛŋ, miikɛɛ nyɛ akɛ, gbalɔi kɛ jalɔi babaoo shwe akɛ amɛna nibii ni nyɛnaa nɛɛ, shi amɛyanaaa, asaŋ amɛshwe akɛ amɛnu nibii ni nyɛnuɔ nɛɛ, shi amɛyanuuu. 18  “Agbɛnɛ, nyɛboa nuu ni du nii lɛ he nɔkwɛmɔnɔ* lɛ mlitsɔɔmɔ lɛ toi. 19  Kɛ́ mɔ ko nu Maŋtsɛyeli lɛ he wiemɔ lɛ shi enuuu shishi lɛ, mɔ fɔŋ lɛ baa ebasháa nɔ ni adu yɛ etsui mli lɛ; enɛ ji nɔ ni adu yɛ gbɛ lɛ he lɛ. 20  Shi nɔ ni adu yɛ tɛsai anɔ lɛ ji mɔ ni nuɔ wiemɔ lɛ ni amrɔ lɛ ekɛ miishɛɛ kpɛlɛɔ nɔ. 21  Kɛ̃lɛ, akɛni ebɛ shishifã yɛ emli hewɔ lɛ, ehiɔ shi be fioo, ni kɛ́ amanehulu loo yiwaa te shi yɛ wiemɔ lɛ hewɔ lɛ, amrɔ lɛ enane tɔ̃tɔɔ. 22  Shi nɔ ni adu yɛ ŋmeii ateŋ lɛ ji mɔ ni nuɔ wiemɔ lɛ, shi shihilɛ gbɛjianɔtoo nɛɛ* mli yeyeeyefeemɔ lɛ kɛ ninámɔ lakamɔ lɛ miaa wiemɔ lɛ, ni ewooo yibii. 23  Shi nɔ ni adu yɛ sũ kpakpa lɛ nɔ lɛ ji mɔ ni nuɔ wiemɔ lɛ ni enuɔ shishi, ni ewoɔ yibii lɛɛlɛŋ, eko woɔ oha, eko woɔ nyɔŋmai ekpaa, ni ekroko hu woɔ nyɔŋmai etɛ.” 24  Egba amɛ nɔkwɛmɔnɔ* kroko ekɛɛ: “Ŋwɛi Maŋtsɛyeli lɛ tamɔ nuu ko ni du dumɔwu kpakpa yɛ eŋmɔ mli. 25  Be ni mɛi ewɔ lɛ, ehenyɛlɔ ba ni ebadu jwɛii kɛfutu ŋmaa lɛ ni eshi etee. 26  Be ni ŋmaa lɛ kwɛ̃ ni ewo yibii lɛ, kɛkɛ ni jwɛii lɛ hu pue. 27  No hewɔ lɛ shĩatsɛ lɛ nyɔji lɛ ba eŋɔɔ ni amɛbabi lɛ akɛ, ‘Nuŋtsɔ, ani jeee dumɔwu kpakpa odu yɛ oŋmɔ lɛ mli? Belɛ, nɛgbɛ jwɛii nɛɛ jɛ mɔ?’ 28  Ekɛɛ amɛ akɛ, ‘Henyɛlɔ ko, gbɔmɔ ko, bafee enɛ.’ Nyɔji lɛ kɛɛ lɛ akɛ, ‘Belɛ, ani oosumɔ ni wɔya wɔyafãmɔ amɛ?’ 29  Ekɛɛ akɛ, ‘Dabi, bɔ ni afee ni ekaba lɛ akɛ be ni nyɛfãmɔɔ jwɛii lɛ, nyɛaafãmɔ ŋmaa lɛ hu kɛfutu. 30  Nyɛhãa fɛɛ adaraa kɛyashi nikpamɔ be lɛ, ni nikpamɔ be lɛ mli lɛ, makɛɛ nikpalɔi lɛ akɛ: Klɛŋklɛŋ lɛ, nyɛfãmɔa jwɛii lɛ, ni nyɛfimɔa amɛ keikei, ni nyɛshãa; no sɛɛ lɛ, nyɛbuaa ŋmaa lɛ naa kɛyawoa minitoohe lɛ.’” 31  Egba amɛ nɔkwɛmɔnɔ* kroko ekɛɛ: “Ŋwɛi Maŋtsɛyeli lɛ tamɔ sinapi wu, ni mɔ ko kɔ ni eyadu yɛ eŋmɔ mli. 32  Anɔkwa, eji dumɔwui lɛ ateŋ bibioo fe fɛɛ, shi kɛ́ eda lɛ, eji yelibaa tsei lɛ ateŋ nɔ ni da fe fɛɛ, ni ebatsɔɔ tso, ni no hewɔ lɛ, ŋwɛi loofɔji baa amɛbahiɔ eniji lɛ anɔ.” 33  Esaa egba amɛ nɔkwɛmɔnɔ* kroko ekɛɛ: “Ŋwɛi Maŋtsɛyeli lɛ tamɔ masha ni yoo ko ŋɔ efutu mamu* ni falɛ shɛɔ susumɔnii agboi etɛ mli kɛyashi fɛɛ sha.” 34  Nibii nɛɛ fɛɛ Yesu tsɔ nɔkwɛmɔnii* anɔ ekɛ asafoku lɛ wie. Anɔkwa, ekɛ amɛ ewieee ni ekɛ nɔkwɛmɔnɔ* tsuuu nii, 35  bɔ ni afee ni nɔ ni atsɔ gbalɔ lɛ nɔ awie lɛ aba mli akɛ: “Magbele minaa kɛ nɔkwɛmɔnii;* majaje nibii ni aŋɔtee kɛjɛ be ni ato shishi lɛ* matsɔɔ.” 36  Agbɛnɛ, be ni ewo asafoku lɛ gbɛ lɛ, etee shĩa lɛ mli. Ekaselɔi lɛ ba eŋɔɔ amɛbakɛɛ akɛ: “Tsɔɔmɔ wɔ ŋmɔ lɛ mli jwɛii lɛ he nɔkwɛmɔnɔ* lɛ shishi.” 37  Ehã hetoo akɛ: “Dumɔwu kpakpa lɛ dulɔ lɛ ji gbɔmɔ Bi lɛ; 38  ŋmɔ lɛ ji je lɛ. Dumɔwu kpakpa lɛ ji Maŋtsɛyeli lɛ bii lɛ, shi jwɛii lɛ ji mɔ fɔŋ lɛ bii lɛ, 39  ni henyɛlɔ ni du amɛ lɛ ji Abonsam. Nikpamɔ be lɛ ji shihilɛ gbɛjianɔtoo ko* naagbee gbii, ni nikpalɔi lɛ ji ŋwɛibɔfoi. 40  No hewɔ lɛ, bɔ ni abua jwɛii lɛ anaa ni ashã kɛ la lɛ, nakai nɔŋŋ ebaaba lɛ yɛ shihilɛ gbɛjianɔtoo lɛ* naagbee gbii lɛ amli. 41  Gbɔmɔ Bi lɛ baatsu ebɔfoi, ni amɛbaabua nanetɔ̃tɔmɔnii fɛɛ kɛ mɛi ni tsuɔ mlatɔmɔ nii lɛ anaa kɛjɛ e-Maŋtsɛyeli lɛ mli, 42  ni amɛbaashɛrɛ amɛ amɛshwie la flɔnɔɔ lɛ mli. Jɛmɛ ji he ni amɛbaafo ni amɛbaakpe amɛnyanyɔjiashi yɛ. 43  Nakai beiaŋ lɛ, jalɔi baakpɛ waa tamɔ hulu yɛ amɛ-Tsɛ lɛ Maŋtsɛyeli lɛ mli. Mɔ ni yɔɔ toi lɛ, hã ebo toi. 44  “Ŋwɛi Maŋtsɛyeli lɛ tamɔ jwetri ko ni aŋɔtee yɛ koo mli, ni nuu ko yana ni eŋɔtee; ni miishɛɛ ni ená lɛ sɔŋŋ hewɔ lɛ etee eyahɔ̃ɔ nibii fɛɛ ni eyɔɔ, ni eyahé nakai shikpɔŋ lɛ. 45  “Asaŋ ŋwɛi Maŋtsɛyeli lɛ tamɔ jarayelɔ gbɛfãlɔ ko ni miitao adiagbai kpakpai. 46  Be ni eyana adiagba kome ni jara wa lɛ, etee ni amrɔ lɛ eyahɔ̃ɔ nibii fɛɛ ni eyɔɔ lɛ ni eyahé. 47  “Asaŋ ŋwɛi Maŋtsɛyeli lɛ tamɔ tsãani ni aŋmɛ yɛ ŋshɔ mli koni edũ ŋshɔŋ loi srɔtoi lɛ fɛɛ eko. 48  Be ni eyi lɛ, amɛgbala kɛba ŋshɔ lɛ naa, ni amɛtara shi amɛbua ekpakpai lɛ anaa amɛwo nii amli, shi nɔ ni ehiii lɛ amɛshɛrɛ amɛshwie. 49  Nakai ebaaba lɛ yɛ shihilɛ gbɛjianɔtoo lɛ* naagbee gbii lɛ amli. Ŋwɛibɔfoi lɛ baaya ni amɛyatse mɛi fɔji lɛ kɛje jalɔi lɛ ahe 50  ni amɛbaashɛrɛ amɛ amɛshwie la flɔnɔɔ lɛ mli. Jɛmɛ ji he ni amɛbaafo ni amɛbaakpe amɛnyanyɔjiashi yɛ. 51  “Ani nyɛnu nii nɛɛ fɛɛ shishi?” Amɛkɛɛ lɛ akɛ: “Hɛɛ.” 52  Kɛkɛ ni ekɛɛ amɛ akɛ: “Kɛ́ nakai ni lɛ, maŋ tsɔɔlɔ fɛɛ maŋ tsɔɔlɔ ní atsɔɔ lɛ ŋwɛi Maŋtsɛyeli lɛ he nii lɛ, etamɔ mɔ ko, shĩatsɛ ko, ni jieɔ nii hei kɛ nii memeji fɛɛ kɛjɛɔ ejwetritoohe lɛ.” 53  Be ni Yesu gba amɛ nɔkwɛmɔnii* nɛɛ egbe naa lɛ, eshi jɛmɛ etee. 54  Be ni eba emaŋ lɛ mli lɛ, ebɔi amɛ nitsɔɔmɔ yɛ amɛkpeehe lɛ, ni no hã amɛhe jɔ̃ amɛhe ni amɛkɛɛ: “Nɛgbɛ nuu nɛɛ ná hiɛshikamɔ kɛ hewalɛ nitsumɔi nɛɛ kɛjɛ? 55  Ani jeee kapintafonyo lɛ bi lɛ nɛ? Ani jeee enyɛ atsɛɔ lɛ Maria, ni enyɛmimɛi hii lɛ hu atsɛɔ amɛ Yakobo kɛ Yosef kɛ Simon kɛ Yuda lɛ? 56  Ni enyɛmimɛi yei lɛ, ani jeee amɛ fɛɛ amɛkɛ wɔ yɔɔ? Belɛ, nɛgbɛ nuu nɛɛ ná nii nɛɛ fɛɛ kɛjɛ mɔ?” 57  No hewɔ lɛ, amɛnane bɔi tɔ̃tɔmɔ yɛ ehewɔ. Shi Yesu kɛɛ amɛ akɛ: “Awoɔ gbalɔ hiɛ nyam yɛ he fɛɛ he, ja emaŋ kɛ lɛ diɛŋtsɛ eshĩa kɛkɛ.” 58  Ni etsuuu hewalɛ nitsumɔi babaoo yɛ jɛmɛ yɛ hemɔkɛyeli ni amɛbɛ lɛ hewɔ.

Shishigbɛ Niŋmaa

Aloo “abɛbuai.”
Aloo “abɛbuai.”
Aloo “abɛbuai.”
Aloo “abɛbua.”
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “abɛbua.”
Aloo “abɛbua.”
Aloo “abɛbua.”
Mamu ji nibii tamɔ abele gbiŋ, omɔ gbiŋ, ŋmaa gbiŋ, kɛ amɛhenɔi ni agbɛlɛ lɛ mɔnyɔmɔnyɔ.
Aloo “abɛbuai.”
Aloo “abɛbua.”
Aloo “abɛbuai.”
Aloo eeenyɛ efee akɛ, “be ni ato je lɛ shishi lɛ.”
Aloo “abɛbua.”
Aloo “yinɔ ko.” Kwɛmɔ Wiemɔi Titrii Amligbalamɔ lɛ.
Aloo “yinɔ lɛ.” Kwɛmɔ Wiemɔi Titrii Amligbalamɔ lɛ.
Aloo “yinɔ lɛ.” Kwɛmɔ Wiemɔi Titrii Amligbalamɔ lɛ.
Aloo “abɛbuai.”