Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 12:1-50

12  Nakai be lɛ mli lɛ, Yesu yatsɔ ŋmaa ŋmɔji amli yɛ Hejɔɔmɔ Gbi lɛ nɔ. Hɔmɔ ye ekaselɔi lɛ, ni amɛbɔi ŋmaa lɛ kpɔlɔmɔ kɛ kpemɔ.  Be ni Farisifoi lɛ na enɛ lɛ, amɛkɛɛ lɛ akɛ: “Naa! Okaselɔi lɛ miifee nɔ ni mla eŋmɛɛɛ gbɛ akɛ afeɔ yɛ Hejɔɔmɔ Gbi lɛ nɔ.”  Ekɛɛ amɛ akɛ: “Ani nyɛkaneko nɔ ni David fee be ni hɔmɔ ye lɛ kɛ hii ni fata ehe lɛ?  Bɔ ni ebote Nyɔŋmɔ we lɛ, ni amɛye aboloi ni akɛma Nyɔŋmɔ hiɛ* lɛ, nɔ ko ni mla eŋmɛɛɛ gbɛ akɛ lɛ loo mɛi ni fata ehe lɛ yeɔ, akɛ ja osɔfoi lɛ kɛkɛ lɛ?  Aloo nyɛkaneko yɛ Mla lɛ mli akɛ Hejɔɔmɔ Gbii lɛ anɔ lɛ, osɔfoi ni yɔɔ sɔlemɔwe lɛ buleɔ Hejɔɔmɔ Gbi lɛ, ni kɛ̃lɛ amɛyeee fɔ?  Shi miikɛɛ nyɛ akɛ nɔ ko ni fe sɔlemɔwe lɛ yɛ biɛ.  Shi, eji nyɛnu wiemɔ ni ji, ‘Mɔbɔnalɛ mitaoɔ shi jeee afɔle’ lɛ shishi kulɛ, nyɛbuŋ mɛi ni yeee fɔ lɛ afɔ.  Ejaakɛ gbɔmɔ Bi lɛ ji Hejɔɔmɔ Gbi lɛ Nuŋtsɔ.”  Be ni eshi jɛmɛ lɛ, ebote amɛkpeehe lɛ, 10  ni naa! nuu ko yɛ jɛmɛ ní enine kome egbo! No hewɔ lɛ, amɛbi lɛ akɛ, “Ani mla ŋmɛɔ gbɛ akɛ atsaa mɔ ko yɛ Hejɔɔmɔ Gbi lɛ nɔ?” koni amɛkɛ sane afɔ̃ enɔ. 11  Ekɛɛ amɛ akɛ: “Kɛ́ oyɛ gwantɛŋ kome, ni nakai gwantɛŋ lɛ gbee bu mli yɛ Hejɔɔmɔ Gbi lɛ nɔ lɛ, namɔ yɔɔ nyɛteŋ ní emɔŋ emli ní ejie lɛ? 12  Kwɛ bɔ ni gbɔmɔ jara wa kwraa fe gwantɛŋ! No hewɔ lɛ, mla ŋmɛɔ gbɛ akɛ afeɔ nɔ ko kpakpa yɛ Hejɔɔmɔ Gbi lɛ nɔ.” 13  Kɛkɛ ni ekɛɛ nuu lɛ akɛ: “Kpã onine mli.” Ni ekpã mli, ni ehi ekoŋŋ tamɔ nine kroko lɛ. 14  Shi Farisifoi lɛ je kpo ni amɛtee eyi nɔ apam koni amɛgbe lɛ. 15  Be ni Yesu ná ele enɛ lɛ, eshi jɛmɛ. Mɛi babaoo hu nyiɛ esɛɛ, ni etsa amɛ fɛɛ, 16  shi efã amɛ kɛ hiɛdɔɔ akɛ amɛkahã mɛi le mɔ ni eji, 17  bɔ ni afee ni nɔ ni atsɔ gbalɔ Yesaia nɔ awie lɛ aba mli akɛ: 18  “Naa! Mitsulɔ ni mihala, mɔ ni misumɔɔ, ni mikpɛlɛ enɔ!* Mikɛ mimumɔ lɛ baaŋmɛ enɔ, ni nɔ ni ji jalɛ sane lɛ, ebaahã efee faŋŋ ehã jeŋmaji lɛ. 19  Ebéŋ, ni ebolɔŋ hu, asaŋ mɔ ko nuŋ egbee yɛ gbɛjegbɛi titrii lɛ anɔ. 20  Ekuŋ gãlã ko ni mli edɔ, ni egbeŋ kane mli tako ko ni tsoɔ sulii, kɛyashi ebaahã jalɛ sane aye kunim. 21  Anɔkwa, egbɛ́i lɛ nɔ jeŋmaji lɛ baatsɔ aná hiɛnɔkamɔ.” 22  Kɛkɛ ni amɛkɛ nuu ko ni yɔɔ daimonio, ni eji shwilafo kɛ mumui fɛɛ ba eŋɔɔ, ni etsa lɛ, ni nuu ni ji mumui lɛ wie, ni ena nii. 23  Ojogbaŋŋ, asafoku lɛ fɛɛ naa kpɛ amɛhe waa ni amɛbɔi kɛɛmɔ akɛ: “Ani aleenɔ jeee David Bi lɛ nɛ?” 24  Be ni Farisifoi lɛ nu enɛ lɛ, amɛkɛɛ akɛ: “Jeee nɔ ko nɔ ko gbɔmɔ nɛɛ kɛfãmɔɔ daimonioi lɛ akɛ ja Beelzebul,* daimonioi lɛ anɔyelɔ lɛ hewalɛ naa.” 25  Akɛni ele amɛsusumɔi hewɔ lɛ, ekɛɛ amɛ akɛ: “Maŋtsɛyeli fɛɛ maŋtsɛyeli ni kɛ lɛ diɛŋtsɛ ehe shiɔ mple lɛ hiɛ kpãtãa, ni maŋ fɛɛ maŋ loo shĩa fɛɛ shĩa ni kɛ lɛ diɛŋtsɛ ehe shiɔ mple lɛ damɔŋ shi. 26  Nakai nɔŋŋ kɛ́ Satan fã Satan lɛ, ekɛ lɛ diɛŋtsɛ ehe miishi mple; belɛ, te aaafee tɛŋŋ ni emaŋtsɛyeli lɛ aaadamɔ shi? 27  Kɛfata he lɛ, kɛ́ Beelzebul hewalɛ mikɛfãmɔɔ daimonioi lɛ, namɔ hewalɛ nyɛbihii* lɛ kɛfãmɔɔ amɛ mɔ? Enɛ hewɔ ni amɛbaakojo nyɛ* lɛ. 28  Shi kɛ́ Nyɔŋmɔ mumɔ lɛ mikɛfãmɔɔ daimonioi lɛ, no lɛ Nyɔŋmɔ Maŋtsɛyeli lɛ ebati nyɛ shi diɛŋtsɛ. 29  Aloo te aaafee tɛŋŋ ni mɔ ko aaabote nuu hewalɔ ko shĩa ni eyashɔ̃ enibii, akɛ ja efimɔ nuu hewalɔ lɛ dã? No dani ebaanyɛ eha eshĩa lɛ mli nibii lɛ. 30  Mɔ fɛɛ mɔ ni bɛ migbɛfaŋ lɛ, ete shi ewo mi, ni mɔ fɛɛ mɔ ni kɛ mi buaaa naa lɛ, egbɛɔ eshwãa. 31  “Enɛ hewɔ lɛ, miikɛɛ nyɛ akɛ, esha fɛɛ esha, loo musubɔɔ fɛɛ musubɔɔ lɛ, abaaŋɔfa gbɔmɛi, shi musu ni abɔɔ ashiɔ mumɔ lɛ, akɛfaŋ. 32  Akɛ nɔkwɛmɔnɔ lɛ, mɔ fɛɛ mɔ ni baawie wiemɔ ko eshi gbɔmɔ Bi lɛ, akɛbaafa lɛ; shi mɔ fɛɛ mɔ ni baawie eshi mumɔ krɔŋkrɔŋ lɛ, akɛfaŋ lɛ, dabi, jeee yɛ shihilɛ gbɛjianɔtoo nɛɛ* mli, loo yɛ nɔ ni baaba lɛ mli. 33  “Kɛ́ nyɛhã tso lɛ fee tso kpakpa lɛ, eyibii lɛ baafee ekpakpa, asaŋ kɛ́ nyɛhã tso lɛ kpɔtɔ lɛ, eyibii lɛ baakpɔtɔ, ejaakɛ tso lɛ yibii akɛleɔ lɛ. 34  Shikpãi ashwiei, te aaafee tɛŋŋ ni nyɛ ni nyɛji mɛi fɔji lɛ, nyɛaanyɛ nibii kpakpai nyɛwie lɛ? Ejaakɛ nɔ ni eyi tsui lɛ kɛteke nɔ lɛ, no naabu lɛ wieɔ. 35  Gbɔmɔ kpakpa jɛɔ jwetrii kpakpai ní ebua naa lɛ amli ekɛ nibii kpakpai hãa, ni gbɔmɔ fɔŋ hu jɛɔ jwetrii fɔji ní ebua naa lɛ amli ekɛ nibii fɔji hãa. 36  Miikɛɛ nyɛ akɛ wiemɔ fɛɛ wiemɔ ni sɛɛnamɔ bɛ he ni mɛi baawie lɛ, amɛbaabu he akɔntaa yɛ Kojomɔ Gbi lɛ nɔ; 37  ejaakɛ owiemɔi anaa abaabu bo jalɔ yɛ, ni owiemɔi anaa abaabu bo fɔ yɛ.” 38  Kɛkɛ ni woloŋmalɔi lɛ kɛ Farisifoi lɛ ateŋ mɛi komɛi hã lɛ hetoo akɛ: “Tsɔɔlɔ, wɔmiitao oninenaa okadi ko wɔkwɛ.” 39  Ehere nɔ ekɛɛ amɛ akɛ: “Yinɔbii fɔji kɛ gbalafitelɔi* yaa nɔ amɛtaoɔ okadi ko, shi ahãŋ amɛ okadi ko akɛ ja gbalɔ Yona okadi lɛ. 40  Ejaakɛ bɔ ni Yona ye shwaneshwane kɛ nyɔɔŋnyɔɔŋ gbii etɛ yɛ ŋshɔŋ loo kpeteŋkpele lɛ musuŋ lɛ, nakai nɔŋŋ gbɔmɔ Bi lɛ baaye shwaneshwane kɛ nyɔɔŋnyɔɔŋ gbii etɛ yɛ shikpɔŋ lɛ tsui mli. 41  Ninivebii lɛ kɛ nɛkɛ yinɔ nɛɛ baate shi yɛ kojomɔ lɛ mli ni amɛbaabu lɛ fɔ ejaakɛ amɛtsake amɛtsui yɛ Yona shiɛmɔ lɛ naa. Shi naa! mɔ ko ni fe Yona yɛ biɛ. 42  Abaatee wuoyigbɛ maŋnyɛ lɛ kɛ yinɔ nɛɛ shi yɛ kojomɔ lɛ mli ni ebaabu lɛ fɔ, ejaakɛ ejɛ shikpɔŋ lɛ naagbeehei lɛ eba ebabo Solomon hiɛshikamɔ lɛ toi. Shi naa! mɔ ko ni fe Solomon yɛ biɛ. 43  “Kɛ́ mumɔ ni he tseee ko je gbɔmɔ mli lɛ, eyatsɔɔ hei ni nu bɛ kɛtaoɔ hejɔɔmɔhe, ni enáaa eko. 44  Kɛkɛ lɛ ekɛɔ akɛ, ‘Maku misɛɛ maya mishĩa ni mifã yɛ mli lɛ,’ ni kɛ́ eyashɛ lɛ, enaa akɛ shĩa lɛ kã shi efolo ni abɛɛ mli, ni awula mli. 45  Kɛkɛ lɛ eyaa ni eyaŋɔɔ mumɔi krokomɛi kpawo ni feɔ efɔŋ fe lɛ kɛfataa ehe, ni kɛ́ amɛbote mli lɛ, amɛhiɔ jɛmɛ; ni nakai mɔ lɛ naagbee shihilɛ tsɔɔ efɔŋ fe klɛŋklɛŋ nɔ lɛ. Nakai nɔŋŋ hu ebaaba lɛ yɛ yinɔ fɔŋ nɛɛ gbɛfaŋ.” 46  Be ni ekã he ekɛ asafoku lɛ wieɔ lɛ, no mli lɛ enyɛ kɛ enyɛmimɛi hii lɛ damɔ agbó lɛ naa amɛmiitao amɛkɛ lɛ awie. 47  No hewɔ lɛ, mɔ ko kɛɛ lɛ akɛ: “Naa! Onyɛ kɛ onyɛmimɛi hii lɛ damɔ agbó lɛ naa amɛmiitao amɛkɛ bo awie.” 48  Ehere nɔ ekɛɛ mɔ ni bakɛɛ lɛ lɛ akɛ: “Namɔ ji minyɛ, ni namɛi ji minyɛmimɛi hii?” 49  Ni ekpã enine mli kɛtsɔɔ ekaselɔi lɛ, ni ekɛɛ: “Naa! Minyɛ kɛ minyɛmimɛi hii nɛ! 50  Ejaakɛ mɔ fɛɛ mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ, nakai mɔ lɛ ji minyɛmi nuu kɛ minyɛmi yoo kɛ minyɛ.”

Shishigbɛ Niŋmaa

Aloo “aboloi ní akɛtsɔɔ.”
Aloo “misusuma ekpɛlɛ enɔ.”
Eji gbɛ́i ni akɛtsɛɔ Satan.
Aloo “nyɛkaselɔi.”
Aloo “amɛbaahã ana akɛ nyɛyeɔ fɔ.”
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “mɛi ni yeee anɔkwa.”