Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 9:1-50

9  Kɛfata he lɛ, ekɛɛ amɛ akɛ: “Lɛɛlɛŋ, miikɛɛ nyɛ akɛ, mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɔkɔɔkɔ kɛyashi amɛbaana Nyɔŋmɔ Maŋtsɛyeli lɛ ni eba yɛ hewalɛ mli dã.”  Gbii ekpaa sɛɛ lɛ, Yesu ŋɔ Petro kɛ Yakobo kɛ Yohane efata ehe, ni ekɛ amɛ pɛ kwɔ kɛtee gɔŋ ni kwɔ ko nɔ. Ni etsake yɛ amɛhiɛ;  etadei anɔhaanɔi lɛ bɔi kpɛlɛmɔ, ni amɛyɛ futafuta bɔ ni niiahefɔlɔ ko bɛ shikpɔŋ nɛɛ nɔ ni baanyɛ ahã amɛyɛ nakai.  Agbɛnɛ hu, amɛna Elia kɛ Mose ni amɛkɛ Yesu miigba sane.  Kɛkɛ ni Petro kɛɛ Yesu akɛ: “Rabi, ehi hã wɔ akɛ wɔyɛ biɛ. No hewɔ lɛ, hã wɔshĩ bui etɛ, onɔ ekome, Mose nɔ ekome, kɛ Elia nɔ ekome.”  Anɔkwa, Petro leee nɔ ni ebaafee ehe, ejaakɛ amɛmiishe gbeyei naakpa.  Ni atatu ko pue, ni eha amɛnɔ, ni gbee ko jɛ atatu lɛ mli kɛɛ: “Mɔ nɛ ji mi-Bi ni misumɔɔ lɛ lɛ. Nyɛboa lɛ toi.”  Ni amrɔ lɛ, amɛkwɛkwɛɛ amɛhe kɛkpe, ni amɛnaaa mɔ ko fata amɛhe dɔŋŋ akɛ ja Yesu.  Be ni amɛkpelekeɔ gɔŋ lɛ, efã amɛ kɛ hiɛdɔɔ akɛ amɛkagba mɔ ko mɔ ko nɔ ni amɛna lɛ kɛyashi gbɔmɔ Bi lɛ baate shi kɛjɛ gbohii ateŋ dã. 10  Amɛŋɔ wiemɔ lɛ amɛto amɛtsuii amli* shi amɛsusu nɔ ni nɛkɛ shitee kɛmiijɛ gbohii ateŋ nɛɛ tsɔɔ lɛ he yɛ amɛteŋ. 11  Ni amɛbɔi lɛ sanebimɔ akɛ: “Mɛni hewɔ woloŋmalɔi lɛ kɛɔ akɛ ja Elia eba dã lɛ?” 12  Ekɛɛ amɛ akɛ: “Elia baaba dã lɛɛlɛŋ ni ebaasaa nibii fɛɛ; shi mɛni hewɔ mɔ aŋma yɛ gbɔmɔ Bi lɛ he akɛ esa akɛ ena nɔ babaoo ni agbe ehe guɔ lɛ? 13  Shi miikɛɛ nyɛ akɛ, anɔkwa, Elia eba, ni amɛfee lɛ nɔ fɛɛ nɔ ni amɛsumɔɔ, taakɛ aŋma yɛ ehe lɛ.” 14  Be ni amɛba kaselɔi krokomɛi lɛ aŋɔɔ lɛ, amɛna asafoku babaoo ko bɔle amɛ, ni woloŋmalɔi kɛ amɛ miije ŋwane. 15  Shi be ni asafoku lɛ fɛɛ ahiŋmɛi gba enɔ nɔŋŋ lɛ, amɛnaa kpɛ amɛhe, ni amɛjo foi amɛyanina lɛ, ni amɛyaŋa lɛ. 16  No hewɔ lɛ, ebi amɛ akɛ: “Mɛni he ŋwane nyɛkɛ amɛ jeɔ lɛ?” 17  Ni asafoku lɛ mli bii lɛ ateŋ mɔ kome hã lɛ hetoo akɛ: “Tsɔɔlɔ, mikɛ mibinuu ba oŋɔɔ ejaakɛ eyɛ mumɔ ni hãa mɔ tsɔɔ mumui. 18  He fɛɛ he ni ebaamɔ lɛ yɛ lɛ, etsiɔ lɛ etswaa shi, ni enaa kwɛ̃ɔ afui, ni ekpeɔ enyanyɔji ashishi, ni ehewalɛ tãa. Mibi okaselɔi lɛ koni amɛfã lɛ, shi amɛnyɛɛɛ.” 19  Ni ehere nɔ ekɛɛ amɛ akɛ: “Oo yinɔbii ni bɛ hemɔkɛyeli, be enyiɛ kwraa mikɛ nyɛ baahi shi kɛyashi? Be enyiɛ kwraa maná nyɛhe tsui kɛyashi? Nyɛkɛ lɛ abaa miŋɔɔ.” 20  No hewɔ lɛ, amɛkɛ gbekɛ nuu lɛ ba eŋɔɔ, shi be ni mumɔ lɛ hiŋmɛi gba enɔ lɛ, amrɔ lɛ, ehã ablami ni naa wa sha gbekɛ lɛ. Be ni egbee shi lɛ, etee nɔ ekokolo shi, ni enaa kwɛ̃ afui. 21  Kɛkɛ ni Yesu bi etsɛ lɛ akɛ: “Be enyiɛ nɛ ni enɛ bɔi lɛ feemɔ?” Ekɛɛ lɛ akɛ: “Kɛjɛ egbekɛbiiashi, 22  ni eshɛɔ lɛ efɔ̃ɔ la mli kɛ nu mli kpitiokpitio koni ekpãtã ehiɛ. Shi kɛ́ obaanyɛ ofee he nɔ ko lɛ, omusuŋ atsɔ bo yɛ wɔhe ni oye obua wɔ.” 23  Yesu kɛɛ lɛ akɛ: “Okɛɛ, ‘Kɛ́ obaanyɛ’? Mɔ ni yɔɔ hemɔkɛyeli lɛ, nibii fɛɛ baanyɛ aba mli ahã lɛ.” 24  Amrɔ lɛ, gbekɛ bibioo lɛ tsɛ lɛ bolɔ ekɛɛ: “Miyɛ hemɔkɛyeli! He ni hemɔkɛyeli he hiaa mi yɛ lɛ, ye obua mi!” 25  Agbɛnɛ, be ni Yesu na akɛ asafoku lɛ miiké yuu kɛmiiba amɛŋɔɔ lɛ, ekã mumɔ ni he tseee lɛ hiɛ ekɛɛ: “Bo mumɔ ni hãa mɔ tsɔɔ mumui kɛ toimulɔ, miifã bo akɛ jee emli, ni okabote emli dɔŋŋ!” 26  Mumɔ lɛ bolɔ, ni ehã ablami ni naa wa sha gbekɛ lɛ, ni eje kpo, ni gbekɛ lɛ fee tamɔ mɔ ni egbo, ni amɛteŋ mɛi pii kɛɛ akɛ: “Egbo!” 27  Shi Yesu mɔ enineshi ni ewó enɔ, ni ete shi. 28  No hewɔ lɛ, be ni ebote shĩa ko mli lɛ, ekaselɔi lɛ bi lɛ yɛ afã akɛ: “Mɛni hewɔ wɔnyɛɛɛ lɛ wɔfã lɛ?” 29  Ekɛɛ amɛ akɛ: “Nɛkɛ henɔ nɛɛ, ja sɔlemɔ pɛ nɔ abaanyɛ atsɔ afã lɛ.” 30  Amɛje jɛmɛ, ni amɛyatsɔ Galilea, shi esumɔɔɔ akɛ mɔ ko ale enɛ. 31  Ejaakɛ no mli lɛ, eetsɔɔ ekaselɔi lɛ anii ni eekɛɛ amɛ akɛ: “Abaajie gbɔmɔ Bi lɛ awo gbɔmɛi adɛŋ, ni amɛbaagbe lɛ, shi gbe ni abaagbe lɛ lɛ fɛɛ sɛɛ lɛ, ebaate shi gbii etɛ sɛɛ.” 32  Shi amɛnuuu nɔ ni ekɛɔ lɛ shishi, ni amɛmiishe gbeyei hu akɛ amɛbaabi lɛ he sane. 33  Ni amɛba Kapernaum. Agbɛnɛ, be ni eyɔɔ shĩa lɛ mli lɛ, ebi amɛ akɛ: “Mɛni he ŋwane nyɛjeɔ yɛ gbɛ lɛ nɔ lɛ?” 34  Amɛtswaaa amɛsɛŋ, ejaakɛ be ni amɛnyiɛ gbɛ lɛ nɔ lɛ, amɛje ŋwane yɛ mɔ ni ji agbo fe fɛɛ yɛ amɛteŋ lɛ he. 35  No hewɔ lɛ, eho eta shi, ni etsɛ Mɛi Nyɔŋma kɛ Enyɔ lɛ ni ekɛɛ amɛ akɛ: “Kɛ́ mɔ ko miisumɔ akɛ etsɔ klɛŋklɛŋ mɔ lɛ, esa akɛ etsɔ mɛi fɛɛ asɛɛkpelɔ kɛ mɛi fɛɛ asɔɔlɔ.” 36  Ni eŋɔ gbekɛ bibioo ko, ni ekɛ lɛ damɔ amɛteŋ; ni ekɛ eniji shwie ekɔɔji anɔ, ni ekɛɛ amɛ akɛ: 37  “Mɔ fɛɛ mɔ ni hereɔ gbekɛbii bibii tamɔ nɛkɛ lɛ ateŋ mɔ kome yɛ migbɛ́i mli lɛ hereɔ mi hu; ni mɔ fɛɛ mɔ ni hereɔ mi lɛ, jeee mi pɛ ehereɔ shi moŋ ehereɔ mɔ ni tsu mi lɛ hu.” 38  Yohane kɛɛ lɛ akɛ: “Tsɔɔlɔ, wɔna mɔ ko ni kɛ ogbɛ́i lɛ miifãmɔ daimonioi, ni wɔbɔ mɔdɛŋ akɛ wɔtsĩ lɛ gbɛ ejaakɛ enyiɛɛɛ wɔsɛɛ.” 39  Shi Yesu kɛɛ lɛ akɛ: “Nyɛkabɔa mɔdɛŋ akɛ nyɛbaatsĩ lɛ gbɛ, ejaakɛ mɔ ko bɛ ni baatsu hewalɛ nitsumɔ ko yɛ migbɛ́i mli ni baanyɛ awie nɔ ko fɔŋ yɛ mihe oya nɔŋŋ. 40  Ejaakɛ mɔ fɛɛ mɔ ni eteee shi ewooo wɔ lɛ yɛ wɔgbɛfaŋ. 41  Ni mɔ fɛɛ mɔ ni hãa nyɛ nu kpulu kome ni nyɛnu akɛni Kristo nii ji nyɛ hewɔ lɛ, lɛɛlɛŋ, miikɛɛ nyɛ akɛ, ejuromɔnɔ eŋmɛŋ lɛ kɔkɔɔkɔ. 42  Shi mɔ fɛɛ mɔ ni tɔ̃tɔɔ bibii nɛɛ ni heɔ yeɔ lɛ ateŋ mɔ kome nane lɛ, kulɛ ebaahi ehã lɛ moŋ kɛji akɛ wiɛtɛ ni teji gbalaa ŋmɔ ekuɛ ni ashɛ lɛ afɔ̃ ŋshɔ mli. 43  “Kɛ́ onine tɔ̃tɔɔ onane lɛ, foo. Ehi hã bo akɛ obaabote wala mli akɛ kpajelɔ fe nɔ ni okɛ niji enyɔ baaya Gehena,* la ni anyɛɛɛ agbe lɛ mli. 44  — 45  Ni kɛ́ onane tɔ̃tɔɔ onane lɛ, foo. Ehi hã bo akɛ obaabote wala mli akɛ akpake fe nɔ ni ohiɛ naji enyɔ ni abaashɛ bo afɔ̃ Gehena.* 46  — 47  Ni kɛ́ ohiŋmɛi tɔ̃tɔɔ onane lɛ, shɛ ofɔ̃. Ehi hã bo akɛ okɛ hiŋmɛi kome baabote Nyɔŋmɔ Maŋtsɛyeli lɛ mli fe nɔ ni oyɛ hiŋmɛii enyɔ ni abaashɛ bo afɔ̃ Gehena,* 48  he ni gɔgɔmi lɛ gbooo ni la lɛ hu gbooo yɛ lɛ. 49  “Ejaakɛ esa akɛ akɛ la awo mɔ fɛɛ mɔ ŋoo. 50  Ŋoo hi, shi kɛ́ ŋoo lɛ mli hewalɛ lɛ tã lɛ, mɛni nyɛkɛbaawo lɛ ŋoo dɔŋŋ? Nyɛhãa ŋoo ahia nyɛmli, ni nyɛkɛ nyɛhe ahia shi yɛ toiŋjɔlɛ mli.”

Shishigbɛ Niŋmaa

Aloo “Amɛwieee sane lɛ he amɛtsɔɔɔ mɛi krokomɛi.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.