Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 8:1-38

8  No gbii lɛ amli lɛ, asafoku babaoo ko bua amɛhe naa ekoŋŋ ni amɛbɛ nɔ ko ni amɛbaaye. No hewɔ lɛ, etsɛ kaselɔi lɛ ni ekɛɛ amɛ akɛ:  “Mimusuŋ miitsɔ mi yɛ asafoku lɛ hewɔ, ejaakɛ gbii etɛ nɛ ní amɛkɛ mi ehi shi, ni amɛbɛ nɔ ko ni amɛbaaye.  Kɛ́ miwo amɛ gbɛ koni amɛya amɛshĩai kɛ hɔmɔ lɛ,* amɛbaayatɔ biti yɛ gbɛ lɛ nɔ, ni amɛteŋ mɛi komɛi hu jɛ shɔŋŋ.”  Shi ekaselɔi lɛ hã lɛ hetoo amɛkɛɛ: “Nɛgbɛ mɔ ko baaná aboloo ni baanyɛ ashɛ mɛi nɛɛ anaa yɛ biɛ ni etse ehe banee nɛɛ?”  Kɛ̃lɛ, ebi amɛ akɛ: “Aboloi enyiɛ nyɛyɔɔ?” Amɛkɛɛ akɛ: “Kpawo.”  Ni efã asafoku lɛ akɛ amɛtara shikpɔŋ. Kɛkɛ ni ekɔlɔ aboloi kpawo lɛ, eda shi, ekumɔ mli, ni ekɛbɔi ekaselɔi lɛ hãmɔ koni amɛjara, ni amɛjara amɛhã asafoku lɛ.  No mli lɛ, amɛyɛ nu mli loi bibii fioo hu, ni be ni esɔle lɛ, ekɛɛ amɛ akɛ amɛjara nomɛi hu.  Ni amɛye ni amɛtɔrɔ, ni amɛkɔlɔ fufuji ni shwɛ lɛ, kɛntɛŋi agboi* kpawo obɔbɔ.  No mli lɛ, hii aaafee akpei ejwɛ yɔɔ jɛmɛ. Kɛkɛ ni ewo amɛ gbɛ. 10  Amrɔ lɛ, ekɛ ekaselɔi lɛ kwɔ lɛlɛ lɛ ni amɛba Dalmanuta kpokpaa lɛ nɔ. 11  Biɛ ni Farisifoi lɛ ba ni amɛkɛ lɛ babɔi ŋwanejee, ni amɛbi ni efee okadi ko ni jɛ ŋwɛi etsɔɔ amɛ koni amɛkɛka lɛ. 12  Ni ewerɛ ho ehe waa yɛ emumɔ mli ni ekɛɛ: “Mɛni hewɔ yinɔ nɛɛ taoɔ okadi ko? Lɛɛlɛŋ, miikɛɛ nyɛ akɛ, ahãŋ yinɔ nɛɛ okadi ko.” 13  Kɛkɛ ni eshi amɛ, ni ekwɔ lɛlɛ lɛ ekoŋŋ, ni efo kɛtee ŋshɔ lɛ sɛɛ. 14  Shi amɛhiɛ kpa nɔ akɛ amɛbaakɔlɔ aboloi kɛya, ni amɛhiɛɛɛ nɔ ko nɔ ko yɛ amɛhe yɛ lɛlɛ lɛ mli, akɛ ja aboloo kome kɛkɛ. 15  Ni ebɔ amɛ kɔkɔ ni mli kã shi faŋŋ akɛ: “Nyɛyaa nɔ nyɛgbɛa nyɛhiŋmɛiiaŋ; nyɛkwɛa jogbaŋŋ yɛ Farisifoi lɛ amasha lɛ kɛ Herode masha lɛ he.” 16  Ni amɛkɛ amɛhe bɔi ŋwanejee yɛ aboloi ni amɛhiɛɛɛ lɛ hewɔ. 17  Be ni eyɔse enɛ lɛ, ekɛɛ amɛ akɛ: “Mɛni hewɔ ni nyɛjeɔ ŋwane yɛ aboloi ni nyɛhiɛɛɛ lɛ hewɔ? Ani nyɛyooko sɛɛ ni nyɛnuko shishi lolo? Ani nyɛtsuii nyɛɛɛ anu shishi lolo? 18  ‘Nyɛyɛ hiŋmɛii moŋ nɛ, shi nyɛnaaa nii; nyɛyɛ toii moŋ nɛ, shi nyɛnuuu nii?’ Ani nyɛkaiii 19  be ni mikumɔ aboloi enumɔ lɛ mli mihã hii akpei enumɔ lɛ, kɛntɛŋi ni fufuji eyimɔ amɛ obɔbɔ enyiɛ naa nyɛbua?” Amɛkɛɛ lɛ akɛ: “Nyɔŋma kɛ enyɔ.” 20  “Be ni mikumɔ aboloi kpawo lɛ mli mihã hii akpei ejwɛ lɛ, kɛntɛŋi agboi* ni fufuji eyimɔ amɛ obɔbɔ enyiɛ nyɛhole?” Ni amɛkɛɛ lɛ akɛ: “Kpawo.” 21  Ni ekɛɛ amɛ akɛ: “Ani nyɛnuuu shishi lolo?” 22  Agbɛnɛ, amɛyakpeleke yɛ Betsaida. Ni mɛi kɛ nuu shwilafo ko ba eŋɔɔ, ni amɛkpa lɛ fai ní eta ehe. 23  Ni emɔ shwilafo lɛ nineshi ni ekɛ lɛ je akrowa lɛ mli. Be ni etsɛ̃ lajɔ̃ eshwie ehiŋmɛii lɛ anɔ lɛ, ekɛ eniji ŋmɛlɛ enɔ ni ebi lɛ akɛ: “Oona nɔ ko lo?” 24  Nuu lɛ wó ehiɛ nɔ ni ekɛɛ: “Miina gbɔmɛi, shi amɛtamɔ tsei ní miinyiɛ kɛmiiya kɛmiiba.” 25  Ekɛ eniji ŋmɛlɛ nuu lɛ hiŋmɛii lɛ anɔ ekoŋŋ, ni nuu lɛ na nii jogbaŋŋ. Atsa ehiŋmɛii lɛ, ni enyɛɔ enaa nɔ fɛɛ nɔ faŋŋ. 26  Ni ewo lɛ gbɛ kɛtee ewe ekɛɛ: “Kaabote akrowa lɛ mli.” 27  Agbɛnɛ, Yesu kɛ ekaselɔi lɛ shi kɛtee Kaisarea Filipi akrowai lɛ amli, ni be ni amɛnyiɛ gbɛ amɛyaa lɛ, ebɔi ekaselɔi lɛ sanebimɔ ekɛɛ: “Namɔ mɛi kɛɔ akɛ miji?” 28  Amɛkɛɛ lɛ akɛ: “Yohane Baptisilɔ lɛ, shi mɛi komɛi kɛɔ akɛ, Elia, ni mɛi krokomɛi hu kɛɔ akɛ, gbalɔi lɛ ateŋ mɔ kome.” 29  Ni efɔ̃ sanebimɔ lɛ ehã amɛ akɛ: “Shi nyɛ lɛ, namɔ nyɛkɛɔ akɛ miji?” Petro hã lɛ hetoo akɛ: “Bo ji Kristo lɛ.” 30  Kɛkɛ ni efã kaselɔi lɛ kɛ hiɛdɔɔ akɛ amɛkakɛɛ mɔ ko mɔ ko ehe sane. 31  Agbɛnɛ hu, ebɔi amɛ tsɔɔmɔ akɛ esa akɛ gbɔmɔ Bi lɛ ana nɔ babaoo ni onukpai lɛ kɛ osɔfoi tsiifoi lɛ kɛ woloŋmalɔi lɛ akpoo lɛ ni agbe lɛ, ni gbii etɛ sɛɛ lɛ ete shi. 32  Anɔkwa, ewie nɛkɛ wiemɔ nɛɛ yɛ faŋŋ. Shi Petro ŋɔ lɛ kɛtee afã ni ebɔi ehiɛ kamɔ. 33  Ni etsɔ ehe ni ekwɛ ekaselɔi lɛ, ni ekã Petro hiɛ ekɛɛ: “Ho misɛɛ, Satan! ejaakɛ ojwɛŋŋŋ Nyɔŋmɔ jwɛŋmɔi, shi moŋ gbɔmɛi ajwɛŋmɔi ojwɛŋɔ.” 34  Agbɛnɛ, etsɛ asafoku lɛ kɛ ekaselɔi lɛ kɛba eŋɔɔ ni ekɛɛ amɛ akɛ: “Kɛ́ mɔ ko miisumɔ akɛ enyiɛ misɛɛ lɛ, ekwa ehe ni ewó epiŋmɔ tso* lɛ ni eya nɔ enyiɛ misɛɛ. 35  Ejaakɛ mɔ fɛɛ mɔ ni miisumɔ akɛ ebaa ewala* yi lɛ, ebaaŋmɛɛ lɛ, shi mɔ fɛɛ mɔ ni ewala* ŋmɛɔ lɛ yɛ mi kɛ sane kpakpa lɛ hewɔ lɛ, ebaabaa yi. 36  Anɔkwa, mɛɛ nɔ kpakpa gbɔmɔ baaná kɛ́ enine shɛ jeŋ muu lɛ fɛɛ nɔ ni ewala* ŋmɛɛ lɛ? 37  Anɔkwa, mɛni gbɔmɔ baaŋɔ ehã kɛtsake ewala?* 38  Ejaakɛ mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele yɛ yinɔbii gbalafitelɔi* kɛ eshafeelɔi nɛɛ ateŋ lɛ, lɛ hu ehe baafee gbɔmɔ Bi lɛ hiɛgbele be ni eba yɛ e-Tsɛ anunyam lɛ mli ni ŋwɛibɔfoi krɔŋkrɔŋi lɛ fata ehe lɛ.”

Shishigbɛ Niŋmaa

Aloo “ní amɛmiihi ŋmaa lɛ.”
Aloo “niyenii kɛntɛŋi.”
Aloo “niyenii kɛntɛŋi.”
Kwɛmɔ Wiemɔi Titrii Amligbalamɔ lɛ.
Aloo “esusuma.”
Aloo “esusuma.”
Aloo “esusuma.”
Aloo “esusuma.”
Aloo “ní yeee anɔkwa.”