Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 6:1-56

6  Eshi jɛmɛ ni eba emaŋ lɛ mli, ni ekaselɔi lɛ nyiɛ esɛɛ.  Be ni Hejɔɔmɔ Gbi lɛ shɛ lɛ, ebɔi nitsɔɔmɔ yɛ kpeehe lɛ, ni mɛi ni nu ewiemɔ lɛ ateŋ mɛi babaoo ahe jɔ̃ amɛhe ni amɛkɛɛ: “Nɛgbɛ nuu nɛɛ ná nibii nɛɛ kɛjɛ? Ni mɛni hewɔ esa akɛ aŋɔ hiɛshikamɔ nɛɛ ahã lɛ, ni atsɔ enine nɔ atsu hewalɛ nitsumɔi nɛɛ?  Mɔ nɛɛ ji kapintafonyo lɛ, Maria bi lɛ, kɛ Yakobo, Yosef, Yuda kɛ Simon nyɛmi lɛ, aloo jeee nakai? Ni enyɛmimɛi yei lɛ kɛ wɔ yɔɔ biɛ lɛ, aloo jeee nakai?” No hewɔ lɛ, amɛnane bɔi tɔ̃tɔmɔ yɛ ehewɔ.  Shi Yesu kɛɛ amɛ akɛ: “Awoɔ gbalɔ hiɛ nyam yɛ he fɛɛ he, ja emaŋ kɛ ewekumɛi ateŋ kɛ lɛ diɛŋtsɛ eshĩa kɛkɛ.”  Ni enyɛɛɛ hewalɛ nitsumɔ ko etsu yɛ jɛmɛ fe akɛ ekɛ eniji ŋmɛlɛ helatsɛmɛi fioo komɛi anɔ, ni etsa amɛ.  Anɔkwa, hemɔkɛyeli ni amɛbɛ lɛ hã enaa kpɛ ehe. Ni eyakpa akrowai lɛ fɛɛ mli, ni etsɔɔ nii.  Agbɛnɛ, etsɛ Mɛi Nyɔŋma kɛ Enyɔ lɛ kɛba eŋɔɔ ni ebɔi amɛ tsumɔ enyɔnyɔɔnyɔ, ni ehã amɛ hegbɛ yɛ mumɔi ni he tseee lɛ anɔ.  Agbɛnɛ hu, ekɛ famɔi hã amɛ akɛ amɛkahiɛ nɔ ko kɛhã gbɛfãa lɛ ja dɛhiɛmɔ tso pɛ—amɛkahiɛ aboloo,* amɛkahiɛ niyenii kotoku, amɛkahiɛ shika* yɛ amɛhɛfiinii lɛ amli—  shi moŋ amɛwo tokotai, ni amɛkawo atadei enyɔ.* 10  Kɛfata he lɛ, ekɛɛ amɛ akɛ: “He fɛɛ he ni nyɛbaabote shĩa ko mli yɛ lɛ, nyɛhia jɛmɛ kɛyashi nyɛbaashi nakai he lɛ. 11  Ni he fɛɛ he ni ahereee nyɛ aloo abooo nyɛ toi yɛ lɛ, kɛ́ nyɛmiishi jɛmɛ lɛ, nyɛkpokpoa nyɛnaji ahe shia lɛ nyɛshwiea* koni no afee odase kɛhã amɛ.” 12  Kɛkɛ ni amɛyi mli amɛtee, ni amɛshiɛ koni mɛi atsake amɛtsui, 13  ni amɛfãmɔ daimonioi babaoo, ni amɛkpakpaa helatsɛmɛi babaoo amu ni amɛtsa amɛ. 14  Agbɛnɛ, Maŋtsɛ Herode nu enɛ he, ejaakɛ Yesu gbɛ́i lɛ egbɛ eshwã, ni mɛi miikɛɛ akɛ: “Atee Yohane Baptisilɔ lɛ shi kɛjɛ gbohii ateŋ, ni no hewɔ ni enyɛɔ etsuɔ hewalɛ nitsumɔi lɛ.” 15  Shi mɛi krokomɛi miikɛɛ akɛ: “Elia ni.” Ni mɛi krokomɛi hu miikɛɛ akɛ: “Gbalɔ ji lɛ, tamɔ blema gbalɔi lɛ ateŋ mɔ kome.” 16  Shi be ni Herode nu he lɛ, ekɛɛ: “Yohane ni mifo eyi lɛ, lɛ atee lɛ shi lɛ.” 17  Ejaakɛ Herode diɛŋtsɛ tsu ni ayamɔ Yohane, ni ehã afimɔ lɛ ni awo lɛ tsuŋ yɛ Herodia, ni ji enyɛmi nuu Filipo ŋa lɛ hewɔ, ejaakɛ ekɛ Herodia ebote gbalashihilɛ mli. 18  Ejaakɛ Yohane kɛɔ Herode akɛ: “Mla eŋmɛɛɛ gbɛ akɛ oŋɔɔ onyɛmi lɛ ŋa lɛ.” 19  Enɛ hewɔ lɛ, Herodia bɛ lɛ ewo emli ni eetao lɛ egbe, shi enyɛɛɛ. 20  Ejaakɛ Herode sheɔ Yohane gbeyei, akɛni ele akɛ jalɔ kɛ gbɔmɔ krɔŋkrɔŋ ji lɛ lɛ hewɔ, ni ekɛ lɛ to shweshweeshwe. Be fɛɛ be ni ebaabo lɛ toi lɛ, eleee nɔ kwraa ni ebaafee, kɛ̃lɛ eyaa nɔ eboɔ lɛ toi kɛ miishɛɛ. 21  Shi gbi ni sa lɛ bashɛ, be ni Herode ŋmɛ ebladei kɛ tatsɛmɛi kɛ Galilea hiɛnaanɔbii lɛ okpɔlɔ gbɛkɛ ko yɛ efɔmɔ gbi nɔ lɛ. 22  Ni Herodia biyoo ba ebajo ni esa Herode kɛ mɛi ni kɛ lɛ ta niyenii lɛ ashi* lɛ ahiɛ. Ni maŋtsɛ lɛ kɛɛ oblayoo lɛ akɛ: “Bi mi nɔ fɛɛ nɔ ni otaoɔ, ni mahã bo.” 23  Hɛɛ, ekã lɛ kitã akɛ: “Nɔ fɛɛ nɔ ni obaabi mi lɛ, mahã bo, kɛ́ mimaŋtsɛyeli lɛ fã tete.” 24  No hewɔ lɛ, eje kpo ni eyakɛɛ enyɛ akɛ: “Mɛni mibi?” Ekɛɛ akɛ: “Yohane Baptisilɔ lɛ yitso.” 25  Amrɔ lɛ, esha foi kɛtee maŋtsɛ lɛ ŋɔɔ ni ekɛ enibimɔ lɛ yafɔ̃ ehiɛ ekɛɛ: “Miisumɔ ni oŋɔ Yohane Baptisilɔ lɛ yitso ofɔ̃ kã mli ohã mi bianɛ nɔŋŋ.” 26  Eyɛ mli akɛ enɛ dɔ maŋtsɛ lɛ waa moŋ, shi kitãi ni ekamɔ lɛ kɛ egbɔi* lɛ ahewɔ lɛ, esumɔɔɔ akɛ ekamaa lɛ enibimɔ lɛ. 27  No hewɔ lɛ, amrɔ lɛ maŋtsɛ lɛ tsu bulɔ ko, ni efã lɛ koni eyaŋɔ Yohane yitso kɛba. No hewɔ lɛ, etee eyafo eyi yɛ tsuŋwoohe lɛ 28  ni ekɛ eyitso lɛ fɔ̃ kã mli kɛba. Ekɛbahã oblayoo lɛ, ni oblayoo lɛ hu kɛyahã enyɛ. 29  Be ni ekaselɔi lɛ nu he lɛ, amɛba amɛbawó egbonyo lɛ ni amɛkɛyaŋmɛ gbonyo bu* mli. 30  Bɔfoi lɛ bua amɛhe naa kɛbɔle Yesu ni amɛgba lɛ nibii ni amɛyafee kɛ nibii ni amɛyatsɔɔ lɛ fɛɛ. 31  Ni ekɛɛ amɛ akɛ: “Nyɛ sɔŋŋ nyɛbaa ni wɔyaa he ko banee ni nyɛyajɔa nyɛhe fioo.” Ejaakɛ mɛi babaoo miiba miiya, ni amɛnáaa dekã kɛye nii po. 32  No hewɔ lɛ, amɛta lɛlɛ mli kɛtee he ko banee koni amɛ sɔŋŋ amɛyahi jɛmɛ. 33  Shi mɛi na amɛ ni amɛmiiya, ni mɛi babaoo ná amɛle, ni amɛ fɛɛ amɛnyiɛ amɛnane nɔ kɛ foi kɛjɛ maji lɛ fɛɛ mli ni amɛyashɛ jɛmɛ klɛŋklɛŋ. 34  Agbɛnɛ, be ni eyi shi lɛ, ena asafoku babaoo, ni emusuŋ tsɔ lɛ yɛ amɛ hewɔ, ejaakɛ amɛtamɔ gwantɛŋi ni bɛ kwɛlɔ. Ni ebɔi amɛ nibii pii tsɔɔmɔ. 35  Be nɛɛ mli lɛ, je ena, ni ekaselɔi lɛ ba eŋɔɔ amɛbakɛɛ lɛ akɛ: “Biɛ etse ehe banee, ni je ena momo. 36  Wo amɛ gbɛ, koni amɛya koiasɛɛ kɛ akrowai ni jwere wɔhewɔ lɛ amli ni amɛyahé nɔ ko amɛye.” 37  Ehere nɔ ekɛɛ amɛ akɛ: “Nyɛ nyɛhãa amɛ nɔ ko amɛyea.” Ni amɛkɛɛ lɛ akɛ: “Ani wɔya wɔyahé aboloo denarioi ohai enyɔ ni wɔkɛbahã mɛi lɛ ni amɛye?” 38  Ekɛɛ amɛ akɛ: “Aboloi enyiɛ nyɛyɔɔ? Nyɛyaa nyɛyakwɛa!” Be ni amɛyakwɛ lɛ, amɛkɛɛ: “Enumɔ, kɛ nu mli loi enyɔ.” 39  Ni efã mɛi lɛ fɛɛ akɛ amɛtara shi kuikui yɛ jwɛi fɔ lɛ nɔ. 40  No hewɔ lɛ, amɛtara shi kuikui yɛ ohahai kɛ nyɔŋmai enumɔ enumɔi amli. 41  Agbɛnɛ, ekɔlɔ aboloi enumɔ kɛ loi enyɔ lɛ ni ekwɛ ŋwɛi ni esɔle.* Kɛkɛ ni ekumɔ aboloi lɛ amli ni ekɛbɔi ekaselɔi lɛ hãmɔ koni amɛkɛmamɔ mɛi lɛ ahiɛ, ni ejara loi enyɔ lɛ amli ehã amɛ fɛɛ. 42  Ni amɛ fɛɛ amɛye ni amɛtɔrɔ, 43  ni amɛkɔlɔ fufuji lɛ, kɛntɛŋi nyɔŋma kɛ enyɔ obɔbɔ, soro loi lɛ. 44  Mɛi ni ye aboloi lɛ ayibɔ ji hii akpei enumɔ. 45  Kɛkɛ ni amrɔ lɛ, ehã ekaselɔi lɛ bote lɛlɛ lɛ mli koni amɛwó amɛhiɛ amɛwo Betsaida gbɛ ní amɛtsɔ ehiɛ kɛya ŋshɔ lɛ sɛɛgbɛ, be mli ni lɛ diɛŋtsɛ ewoɔ asafoku lɛ gbɛ lɛ. 46  Shi be ni ekɛ amɛ ye shɛɛ lɛ, eyi mli etee gɔŋ ko nɔ koni eyasɔle. 47  Be ni shɛ gbɛkɛ lɛ, lɛlɛ lɛ yɛ ŋshɔ lɛ teŋ, shi lɛ lɛ eshwɛ ekome too yɛ shikpɔŋ. 48  No hewɔ lɛ, be ni ena akɛ eetɔ amɛ kɛ wirimɔ akɛni amɛmiikpee kɔɔyɔɔ hewɔ lɛ, aaafee nyɔɔŋ buu be ni ji ejwɛ* lɛ nɔ lɛ, enyiɛ ŋshɔ lɛ hiɛ kɛmiiba amɛŋɔɔ; shi efee tamɔ eeho amɛhe.* 49  Be ni amɛhiŋmɛi gba enɔ akɛ enyiɛ ŋshɔ lɛ hiɛ lɛ, amɛsusu yɛ amɛyiŋ akɛ: “Ninaa nɛ!” Ni amɛbolɔ. 50  Ejaakɛ amɛ fɛɛ amɛna lɛ, ni amɛhao. Shi amrɔ lɛ, ekɛ amɛ wie ni ekɛɛ: “Nyɛnáa ekãa! Mi ni; nyɛkashea gbeyei.” 51  Kɛkɛ ni ekwɔ lɛlɛ lɛ ni eyafata amɛhe, ni kɔɔyɔɔ lɛ fɔ̃ɔ tswaa. Ni amɛnaa kpɛ amɛhe naakpa yɛ enɛ hewɔ, 52  ejaakɛ amɛnuko aboloi lɛ ahe sane lɛ shishi, ni amɛtsuii nyɛɛɛ anu nii ashishi lolo. 53  Be ni amɛfo ŋshɔ lɛ, amɛba Genesaret shikpɔŋ lɛ nɔ, ni amɛŋmɛ lɛlɛ lɛ sɛ́kɛ yɛ jɛmɛ gbɛ he ko. 54  Shi be ni amɛje lɛlɛ lɛ mli lɛ, amrɔ lɛ, mɛi yoo lɛ. 55  Amɛsha foi kɛyakpa nakai kpokpaa lɛ nɔ fɛɛ ni amɛkɛ mɛi ni he yeɔ lɛ ŋmɛlɛ sai anɔ, ni amɛkɛ amɛ bɔi he ni amɛnu akɛ eyɔɔ lɛ baa. 56  Ni he fɛɛ he ni ebaabote akrowai loo maji amli loo koiasɛɛ yɛ lɛ, amɛkɛ helatsɛmɛi bashwieɔ jaji lɛ anɔ, ni amɛkpaa lɛ fai akɛ ehã amɛtara etade nɔhaanɔ lɛ naamuu lɛ he kɛkɛ. Ni mɛi fɛɛ ni tara he lɛ ahe wa amɛ jogbaŋŋ.

Shishigbɛ Niŋmaa

Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Sht. ŋm., “akɔɔble.”
Aloo “amɛkaŋɔ atade kroko kɛfata nɔ ni amɛwo lɛ he.”
Kwɛmɔ Mat 10:14 sh. niŋ.
Aloo “tara okpɔlɔ lɛ he.”
Aloo “kɛ mɛi ni tara okpɔlɔ lɛ he.”
Aloo “gbonyo kaimɔ bu.”
Sht. ŋm., “ejɔɔ.”
Ni tsɔɔ akɛ, kɛjɛ aaafee maŋkɛ ŋmɛji 3 kɛyashi hulushitee aaafee ŋmɛji 6.
Aloo “shi eehe eho amɛhe.”