Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 5:1-43

YITSEI LƐ AMLI SAJI

  • Yesu hã daimonioi yabote kpolotoi amli (1-20)

  • Yairo biyoo; yoo ko ta Yesu atadei anɔhaanɔi ahe (21-43)

5  Kɛkɛ ni amɛshɛ ŋshɔ lɛ sɛɛgbɛ yɛ Gerasabii lɛ akpokpaa lɛ nɔ.  Ni be ni Yesu je lɛlɛ lɛ mli lɛ, amrɔ lɛ, nuu ko ni mumɔ ni he tseee miiná enɔ hewalɛ jɛ gbohii abui* lɛ ateŋ kɛ lɛ bakpe.  Gbohii abui lɛ ateŋ ehiɔ, ni kɛbashi nakai be lɛ, mɔ ko mɔ ko kwraa nyɛko afimɔ lɛ kpɛŋŋ, kɛ kɔsɔŋkɔsɔ po.  Awo lɛ gboklɛi kɛ kɔsɔŋkɔsɔi shii abɔ, shi be fɛɛ be lɛ, etserɛɔ kɔsɔŋkɔsɔi lɛ ni ekumɔɔ gboklɛi lɛ; ni mɔ ko mɔ ko nyɛɛɛ ehe ajɔɔ.  Ni nyɔɔŋnyɔɔŋ kɛ shwaneshwane lɛ, eyaa nɔ ebolɔɔ yɛ gbohii abui lɛ amli kɛ gɔji lɛ anɔ ni ekɛ tɛi folɔɔ ehe.  Shi be ni ehiŋmɛi gba Yesu nɔ yɛ shɔŋŋ lɛ, ejo foi eyakula shi yɛ ehiɛ.  Kɛkɛ ni ebo kɛ gbee ni wa ekɛɛ: “Mɛni mikɛ bo yɔɔ feemɔ, Yesu, Nyɔŋmɔ ni Nɔ Kwɔ Fe Fɛɛ lɛ Bi? Kã Nyɔŋmɔ kitã akɛ opiŋŋŋ mi.”  Ejaakɛ no mli lɛ Yesu miikɛɛ lɛ akɛ: “Jee nuu lɛ mli, bo mumɔ ni he tseee.”  Shi Yesu bi lɛ akɛ: “Te atsɛɔ bo tɛŋŋ?” Ni ehere nɔ ekɛɛ: “Atsɛɔ mi Lejio,* ejaakɛ wɔyi fa.” 10  Ni ekpa lɛ fai shii abɔ akɛ ekashwie mumɔi lɛ kɛjɛ jɛmɛ niiaŋ. 11  No mli lɛ, kpolotoi akuu kpele ko miiye nii yɛ gɔŋ lɛ nɔ yɛ jɛmɛ. 12  No hewɔ lɛ, mumɔi lɛ kpa lɛ fai amɛkɛɛ: “Hã wɔya kpolotoi lɛ amli, koni wɔyabote amɛmli.” 13  Ni eŋmɛ amɛ gbɛ. Kɛkɛ ni mumɔi ni he tseee lɛ je kpo ni amɛyabote kpolotoi lɛ amli, ni kpolotoi akuu lɛ wó foi gidigidi kɛjɛ gɔŋkpɔ lɛ nɔ kɛyabote ŋshɔ lɛ mli, amɛyibɔ aaafee akpei enyɔ, ni amɛ fɛɛ amɛgboi yɛ ŋshɔ lɛ mli. 14  Shi kpolotoi lɛ akwɛlɔi lɛ jo foi, ni amɛyabɔ he amaniɛ yɛ maŋ lɛ mli kɛ koiasɛɛ, ni mɛi ba koni amɛbakwɛ nɔ ni etee nɔ lɛ. 15  No hewɔ lɛ, amɛba Yesu ŋɔɔ, ni amɛbana nuu ni no mli lɛ eyɔɔ daimonioi Lejio* lɛ ta shi ni ewo atade, ni ejwɛŋmɔ miitsu nii jogbaŋŋ, ni amɛshe gbeyei. 16  Agbɛnɛ hu, mɛi ni na lɛ gba amɛ nɔ ni ba nuu ni yɔɔ daimonioi lɛ kɛ kpolotoi lɛ anɔ lɛ. 17  No hewɔ lɛ, amɛbɔi Yesu faikpamɔ akɛ eje amɛkpokpaa lɛ nɔ eya. 18  Agbɛnɛ, be ni ekwɔɔ lɛlɛ lɛ, nuu ni no mli lɛ eyɔɔ daimonioi lɛ kpa lɛ fai akɛ ehã ekɛ lɛ aya. 19  Shi eŋmɛɛɛ lɛ gbɛ, moŋ lɛ ekɛɛ lɛ akɛ: “Yaa owekumɛi lɛ aŋɔɔ yɛ shĩa, ni oyagba amɛ nibii fɛɛ ni Yehowa* efee ehã bo, kɛ mɔbɔ ni ena bo lɛ.” 20  Ni nuu nɛɛ tee eyabɔi nibii fɛɛ ni Yesu fee hã lɛ lɛ shiɛmɔ yɛ Dekapoli,* ni mɛi lɛ fɛɛ anaa kpɛ amɛhe. 21  Be ni Yesu kɛ lɛlɛ lɛ fo ŋshɔ lɛ ekoŋŋ kɛku esɛɛ kɛtee ŋshɔ lɛ sɛɛ lɛ, asafoku babaoo ko bua amɛhe naa yɛ emasɛi, ni eyɛ ŋshɔ lɛ naa. 22  Kɛkɛ ni onukpai ni kwɛɔ kpeehe lɛ nɔ lɛ ateŋ mɔ kome ni atsɛɔ lɛ Yairo lɛ ba, ni be ni ehiŋmɛi gba enɔ lɛ, eho egbee enaji anaa. 23  Ekpa lɛ fai shii abɔ ekɛɛ: “Mibiyoo fioo he miiye waa.* Ofainɛ ba ni okɛ oniji abashwie enɔ koni ehe awa lɛ ni ená wala.” 24  Kɛkɛ ni Yesu kɛ lɛ tee, ni asafoku babaoo ko nyiɛ esɛɛ ni amɛmiififia lɛ. 25  Agbɛnɛ, yoo ko yɛ ni lá eho lɛ afii nyɔŋma kɛ enyɔ. 26  Ena nɔ babaoo yɛ helatsalɔi pii adɛŋ,* ni efite edɛŋ nii fɛɛ, ni kɛ̃lɛ ehiko hãko lɛ kwraa, moŋ lɛ, emli ewo wu. 27  Be ni enu Yesu he amaniɛbɔi lɛ, ebaje esɛɛgbɛ yɛ asafoku lɛ teŋ ni eta etade nɔhaanɔ lɛ he, 28  ejaakɛ etee nɔ ekɛɛ akɛ: “Kɛji mita etadei anɔhaanɔi lɛ ahe kɛkɛ lɛ, mihe baawa mi.” 29  Ni amrɔ lɛ, lá ni hoɔ lɛ lɛ sɛɛ fo, ni enu he yɛ egbɔmɔtso mli akɛ atsa hela ni ehã epiŋ waa lɛ. 30  Amrɔ lɛ, Yesu yɔse yɛ lɛ diɛŋtsɛ emli akɛ hewalɛ ko eje emli, ni etsɔ ehe yɛ asafoku lɛ teŋ ni ebi akɛ: “Namɔ ta mitadei anɔhaanɔi lɛ ahe lɛ?” 31  Shi ekaselɔi lɛ kɛɛ lɛ akɛ: “Oona akɛ asafoku lɛ miififia bo, ni kɛ̃lɛ oobi akɛ, ‘Namɔ ta mihe lɛ?’” 32  Kɛ̃lɛ, efolɔ ehe ekwɛ akɛ ebaana mɔ ni fee nakai lɛ lo. 33  Yoo lɛ, akɛni ele nɔ ni eba enɔ lɛ hewɔ lɛ, eshe gbeyei ni ehe kpokpo, ni eba ebagbee ehiɛ ni egba lɛ anɔkwale lɛ fɛɛ. 34  Ekɛɛ yoo lɛ akɛ: “Biyoo, ohemɔkɛyeli ehã ohe ewa bo. Yaa yɛ toiŋjɔlɛ mli, ni hela ni ehã opiŋ nɛɛ akagba onaa dɔŋŋ.” 35  Be ni ekã he ewieɔ lɛ, hii komɛi jɛ onukpa ni kwɛɔ kpeehe lɛ nɔ lɛ shĩa lɛ ba amɛbakɛɛ akɛ: “Obiyoo lɛ egbo! Mɛni hewɔ ogbaa Tsɔɔlɔ lɛ naa lolo?” 36  Shi nɔ ni amɛwieɔ lɛ fo Yesu toi naa, ni ekɛɛ onukpa ni kwɛɔ kpeehe lɛ nɔ lɛ akɛ: “Kaashe gbeyei,* jiemɔ hemɔkɛyeli kpo kɛkɛ.” 37  Agbɛnɛ, ehãaa mɔ ko anyiɛ esɛɛ kɛya akɛ ja Petro, Yakobo, kɛ Yohane, Yakobo nyɛmi lɛ kɛkɛ. 38  No hewɔ lɛ, amɛba onukpa ni kwɛɔ kpeehe lɛ nɔ lɛ shĩa lɛ, ni ena hoofeemɔ lɛ, kɛ mɛi ni miifo ni amɛwo yara waa lɛ. 39  Be ni ebote mli lɛ, ekɛɛ amɛ akɛ: “Mɛni hewɔ nyɛfoɔ ni nyɛfeɔ hoo nɛkɛ? Gbekɛ lɛ gboko, shi wɔ ewɔ.” 40  Kɛkɛ ni amɛbɔi lɛ ŋmɔɔ kɛ hefɛoyeli. Shi ehã amɛ fɛɛ amɛje kpo, ni eŋɔ gbekɛ lɛ tsɛ kɛ enyɛ kɛ mɛi ni fata ehe lɛ, ni etee he ni gbekɛ lɛ yɔɔ lɛ. 41  Kɛkɛ ni emɔ gbekɛ lɛ nineshi, ni ekɛɛ lɛ akɛ: “Talita kuumi,” eshishi ji: “Gbekɛ yoo fioo, miikɛɛ bo akɛ, ‘Tee shi!’” 42  Ni amrɔ lɛ gbekɛ yoo lɛ te shi ni ebɔi nyiɛmɔ. (No mli lɛ, eye afii nyɔŋma kɛ enyɔ.) Ni amrɔ lɛ, amɛmii shɛ amɛhe naakpa. 43  Ni efã amɛ shii abɔ* akɛ amɛkahã mɔ ko le enɛ, ni ekɛɛ akɛ ahã gbekɛ yoo lɛ nɔ ko ni eye.

Shishigbɛ Niŋmaa

Aloo “gbohii akaimɔ bui.”
Kwɛmɔ Mat 26:53 sh. niŋ.
Kwɛmɔ Mat 26:53 sh. niŋ.
Kwɛmɔ Wiemɔi Titrii Amligbalamɔ lɛ.
Aloo “Maji Nyɔŋma Kpokpaa lɛ nɔ.”
Aloo “miihe agbo.”
Aloo “Helatsalɔi pii ehã epiŋ babaoo.”
Aloo “Kpa gbeyeishemɔ.”
Aloo “efã amɛ kɛ hiɛdɔɔ.”