Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 4:1-41

YITSEI LƐ AMLI SAJI

  • MAŊTSƐYELI LƐ HE NƆKWƐMƆNII (1-34)

    • Nidulɔ lɛ (1-9)

    • Nɔ hewɔ ni Yesu kɛ nɔkwɛmɔnii tsu nii (10-12)

    • Etsɔɔ nidulɔ lɛ he nɔkwɛmɔnɔ lɛ mli (13-20)

    • Akɛ kane emaaa kɛntɛŋ shishi (21-23)

    • Susumɔnɔ ni okɛsusuɔ ohãa mɛi (24, 25)

    • Nidulɔ ni yawɔɔ lɛ (26-29)

    • Sinapi wu lɛ (30-32)

    • Nɔkwɛmɔnii kɛnitsumɔ (33, 34)

  • Yesu hã ahum ko ŋmɛ dɛmm (35-41)

4  Ebɔi nitsɔɔmɔ ekoŋŋ yɛ ŋshɔ lɛ naa, ni asafoku babaoo ko babua amɛhe naa yɛ emasɛi. No hewɔ lɛ, ekwɔ lɛlɛ ko ni eta mli yɛ ŋshɔ lɛ hiɛ, shi asafoku lɛ fɛɛ yɛ ŋshɔ lɛ naa.  Ni ekɛ nɔkwɛmɔnii* tsu nii kɛbɔi amɛ nibii babaoo tsɔɔmɔ, ni be ni etsɔɔ amɛ nii lɛ, ekɛɛ akɛ:  “Nyɛboa toi. Naa! Nidulɔ lɛ yiŋ etee nidumɔ.  Be ni eduɔ nii lɛ, dumɔwui lɛ ekomɛi yashwie gbɛ he, ni loofɔji ba amɛbakɔlɔ amɛye.  Ekrokomɛi yashwie tɛsai anɔ, he ni amɛnáaa sũ babaoo yɛ, ni amrɔ lɛ amɛkwɛ̃kwɛ̃ɛ ejaakɛ sũ lɛ mli kwɔɔɔ.  Shi be ni hulu lɛ te shi lɛ eshã amɛ, ni akɛni amɛbɛ shishifã hewɔ lɛ, amɛŋala.  Dumɔwui krokomɛi yashwie ŋmeii ateŋ ni ŋmeii lɛ hole amɛhe nɔ ni amɛmia amɛ, ni amɛwooo yibii.  Shi ekrokomɛi yashwie sũ kpakpa nɔ, ni amɛkwɛ̃kwɛ̃ɛ ni amɛdara ni amɛbɔi yibiiwoo, ni amɛwo nyɔŋmai etɛ, nyɔŋmai ekpaa, kɛ oha.”  Kɛkɛ ni ekɛshi sɛɛ akɛ: “Mɔ ni yɔɔ toi ni ekɛaabo toi lɛ, hã ebo toi.” 10  Agbɛnɛ, be ni shwɛ ekome too lɛ, mɛi ni yɔɔ emasɛi lɛ kɛ Mɛi Nyɔŋma kɛ Enyɔ lɛ bɔi lɛ sanebimɔ yɛ nɔkwɛmɔnii* lɛ ahe. 11  Ekɛɛ amɛ akɛ: “Nyɛ lɛ akɛhã nyɛ akɛ nyɛnu Nyɔŋmɔ Maŋtsɛyeli lɛ he teemɔŋ sane krɔŋkrɔŋ lɛ shishi, shi mɛi ni yɔɔ sɛɛ lɛ, nibii fɛɛ ni amɛnuɔ lɛ ji nɔkwɛmɔnii* kɛkɛ kɛhã amɛ, 12  no hewɔ lɛ, kwɛmɔ lɛ amɛbaakwɛ moŋ nɛ, shi amɛnaŋ, ni nu lɛ amɛbaanu moŋ nɛ, shi amɛnuŋ shishi; asaŋ amɛkpaleŋ koni amɛná eshaifaa.” 13  Kɛfata he lɛ, ekɛɛ amɛ akɛ: “Nyɛleee nɔ ni nɔkwɛmɔnɔ* nɛɛ tsɔɔ, belɛ te nyɛaafee tɛŋŋ nyɛnu nɔkwɛmɔnii* krokomɛi lɛ fɛɛ shishi? 14  “Nidulɔ lɛ duɔ wiemɔ lɛ. 15  Belɛ nɔ ni yashwie gbɛ lɛ he, he ni adu wiemɔ lɛ yɛ lɛ nɛ; amɛji mɛi ni nuɔ wiemɔ lɛ, shi amrɔ lɛ, Satan baa ni ebajieɔ wiemɔ ni adu yɛ amɛmli lɛ kɛyaa lɛ. 16  Nakai nɔŋŋ nɔ ni adu yɛ tɛsai anɔ lɛ nɛ; amɛji mɛi ni nuɔ wiemɔ lɛ, ni amrɔ lɛ amɛkɛ miishɛɛ kpɛlɛɔ nɔ. 17  Kɛ̃lɛ, akɛni amɛbɛ shishifã yɛ amɛ diɛŋtsɛ amɛmli hewɔ lɛ, amɛhiɛɔ mli be fioo; kɛkɛ lɛ kɛ́ amanehulu loo yiwaa te shi yɛ wiemɔ lɛ hewɔ lɛ, amrɔ lɛ amɛnane tɔ̃tɔɔ. 18  Ekrokomɛi hu yɛ ni adu yɛ ŋmeii ateŋ. Mɛnɛɛmɛi ji mɛi ni nuɔ wiemɔ lɛ, 19  shi shihilɛ gbɛjianɔtoo nɛɛ* mli yeyeeyefeemɔi lɛ kɛ ninámɔ lakamɔ lɛ kɛ nibii krokomɛi fɛɛ ni eshwɛ lɛ ahe akɔnɔi lɛ boteɔ amɛmli, ni amɛmiaa wiemɔ lɛ, ni ewooo yibii. 20  Naagbee lɛ, nɔ ni adu yɛ sũ kpakpa nɔ lɛ ji mɛi ni boɔ wiemɔ lɛ toi ni amɛmɔɔ mli jogbaŋŋ, ni amɛwoɔ yibii—nyɔŋmai etɛ, nyɔŋmai ekpaa, kɛ oha.” 21  Agbɛnɛ hu, ekɛɛ amɛ akɛ: “Ani akɛ kane maa kɛntɛŋ* loo saatso shishi? Ani jeee kanetso nɔ akɛmaa? 22  Ejaakɛ nɔ ko nɔ ko bɛ ni aŋɔtee ni akpaŋ he mama; nɔ ko nɔ ko bɛ ni atsĩ nɔ jogbaŋŋ ni ejeŋ kpo yɛ faŋŋ. 23  Mɔ fɛɛ mɔ ni yɔɔ toi ni ekɛaabo toi lɛ, hã ebo toi.” 24  Etsa nɔ ekɛɛ amɛ akɛ: “Nyɛjwɛŋmɔ ahia nɔ ni nyɛnuɔ lɛ nɔ. Susumɔnɔ ni nyɛkɛsusuɔ nyɛhãa mɛi lɛ, akɛbaasusu ahã nyɛ, hɛɛ, akɛ eko baafata he ahã nyɛ. 25  Ejaakɛ mɔ fɛɛ mɔ ni yɔɔ nɔ ko lɛ, abaahã lɛ eko afata he, shi mɔ fɛɛ mɔ ni bɛ nɔ ko lɛ, nɔ ni eyɔɔ tete lɛ abaashɔ̃ yɛ edɛŋ.” 26  Ni etee nɔ ekɛɛ akɛ: “Belɛ, Nyɔŋmɔ Maŋtsɛyeli lɛ tamɔ be ni nuu ko ŋɔɔ dumɔwui eshwãa shikpɔŋ. 27  Eyawɔɔ gbɛkɛ, ni kɛ́ je tsɛre lɛ eteɔ shi, ni dumɔwui lɛ kwɛ̃ɔ ni amɛdaraa—shi eleee bɔ ni feɔ ni ebaa lɛ nakai. 28  Fiofio lɛ, shikpɔŋ lɛ diɛŋtsɛ woɔ yibii, klɛŋklɛŋ lɛ, ekwɛ̃ɔ jwɛi fɔ lɛ, no sɛɛ lɛ, ŋmaa tso lɛ, naagbee lɛ ŋmaa lɛ woɔ yɛ ŋmaa tso lɛ yi. 29  Shi kɛ́ yibii lɛ sa lɛ, amrɔ lɛ, egbalaa nikpamɔ kakla lɛ ewoɔ mli, ejaakɛ nikpamɔ be lɛ eshɛ.” 30  Ni etee nɔ ekɛɛ akɛ: “Mɛni he wɔkɛ Nyɔŋmɔ Maŋtsɛyeli lɛ baato, loo mɛɛ nɔkwɛmɔnɔ* wɔkɛbaatsɔɔ mli? 31  Etamɔ sinapi wu ni be ni adu yɛ shikpɔŋ lɛ, eji shikpɔŋ lɛ nɔ dumɔwui lɛ ateŋ bibioo fe fɛɛ. 32  Shi kɛ́ adu lɛ, ekwɛ̃ɔ ni edaa fe yelibaa tsei krokomɛi fɛɛ, ni egbalaa niji wuji, ni no hewɔ lɛ, ŋwɛi loofɔji nyɛɔ amɛbahiɔ ehɔɔŋ lɛ shishi.” 33  Ekɛ nɔkwɛmɔnii* babaoo tamɔ enɛɛmɛi tsuɔ nii kɛwieɔ wiemɔ lɛ etsɔɔ amɛ, bɔ ni amɛbaanyɛ amɛnu shishi. 34  Anɔkwa, ekɛ amɛ ewieee ni ekɛ nɔkwɛmɔnɔ* tsuuu nii, shi kɛ́ shwɛ lɛ kɛ ekaselɔi lɛ pɛ lɛ, egbalaa nibii fɛɛ mli etsɔɔ amɛ. 35  Ni nakai gbi lɛ nɔ, be ni shɛ gbɛkɛ lɛ, ekɛɛ amɛ akɛ: “Nyɛhãa wɔfoa ŋshɔ lɛ kɛyaa ŋshɔ lɛ sɛɛgbɛ.” 36  No hewɔ lɛ, be ni amɛwo asafoku lɛ gbɛ lɛ, amɛkɛ lɛ tee, bɔ ni eyɔɔ lɛ nɔŋŋ, yɛ lɛlɛ lɛ mli, ni lɛji krokomɛi fata he. 37  Agbɛnɛ, ahum kpele ko tswa, ni ŋshɔkei lɛ miikumɔ miiwo lɛlɛ lɛ mli, ni lɛlɛ lɛ miihe ayi. 38  Shi lɛ lɛ eyɛ lɛlɛ lɛ sɛɛgbɛ, etsɔle sune ewɔ. No hewɔ lɛ, amɛtsĩɛ lɛ ni amɛkɛɛ lɛ akɛ: “Tsɔɔlɔ, ni wɔhiɛ miihe akpãtã nɛɛ, ani jeee ohe sane ko ni?” 39  Kɛkɛ ni ete shi, ni ekã kɔɔyɔɔ lɛ hiɛ, ni ekɛɛ ŋshɔ lɛ akɛ: “Bu onaa! Feemɔ diŋŋ!” Ni kɔɔyɔɔ lɛ kpa tswaa, ni eŋmɛ dɛmm. 40  No hewɔ lɛ, ekɛɛ amɛ akɛ: “Mɛni hewɔ nyɛsheɔ gbeyei* nɛkɛ? Ani nyɛbɛ hemɔkɛyeli ko kwraa lolo?” 41  Shi gbeyei mɔmɔ amɛ naakpa, ni amɛkɛɛkɛɛ amɛhe akɛ: “Namɔ tuuntu nɛ? Kɔɔyɔɔ kɛ ŋshɔ tete boɔ lɛ toi.”

Shishigbɛ Niŋmaa

Aloo “abɛbuai.”
Aloo “abɛbuai.”
Aloo “abɛbuai.”
Aloo “abɛbua.”
Aloo “abɛbuai.”
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “nisusumɔ kɛntɛŋ.”
Aloo “abɛbua.”
Aloo “abɛbuai.”
Aloo “abɛbua.”
Aloo “nyɛtsui efã.”