Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 3:1-35

3  Esaa ebote kpeehe ko, ni nuu ko yɛ jɛmɛ ní enine kome egbo.  No hewɔ lɛ, amɛkwɛ lɛ gãa akɛ ebaatsa nuu lɛ yɛ Hejɔɔmɔ Gbi lɛ nɔ lo, bɔ ni afee ni amɛkɛ sane afɔ̃ enɔ.  Ekɛɛ nuu ní nine egbo lɛ akɛ: “Tee shi ni obadamɔ teŋ.”  No sɛɛ lɛ ekɛɛ amɛ akɛ: “Ani Hejɔɔmɔ Gbi lɛ nɔ lɛ, mla ŋmɛɔ gbɛ akɛ afeɔ nɔ kpakpa aloo ayeɔ mɔ ko awui, akɛ abaa wala* ko yi, aloo agbeɔ mɔ?” Shi amɛtswaaa amɛsɛŋ.  Be ni ekwɛ amɛ kɛkpe lɛ, emli fu, ni ewerɛ ho ehe waa yɛ amɛtsuiŋwalɛ lɛ hewɔ, ni ekɛɛ nuu lɛ akɛ: “Kpã onine mli.” Ni ekpã mli, ni enine lɛ hi ekoŋŋ.  Kɛkɛ ni Farisifoi lɛ je kpo, ni amrɔ lɛ, amɛkɛ Herode sɛɛfilɔi lɛ yabɔi eyi nɔ apamtoo koni amɛgbe lɛ.  Shi Yesu kɛ ekaselɔi lɛ shi kɛtee ŋshɔ lɛ naa, ni asafoku babaoo ko jɛ Galilea kɛ Yudea banyiɛ esɛɛ.  Asafoku babaoo ko po jɛ Yerusalem kɛ Idumea kɛ Yordan sɛɛ kɛ Tiro kɛ Sidon niiaŋ ba eŋɔɔ, be ni amɛnu nibii babaoo ni efeɔ lɛ.  Ni ekɛɛ ekaselɔi lɛ koni amɛtao lɛlɛ bibioo ko amɛma shi amɛhã lɛ koni asafoku lɛ akamia lɛ. 10  Akɛni etsa mɛi babaoo hewɔ lɛ, mɛi fɛɛ ni yeyeɔ helai ni naa wawai lɛ ké yuu kɛba eŋɔɔ koni amɛbatara ehe. 11  Mumɔi ni he tseee lɛ po, be fɛɛ be ni amɛbaana lɛ lɛ, amɛhoɔ amɛgbeɔ shi yɛ ehiɛ ni amɛbolɔɔ akɛ: “Bo ji Nyɔŋmɔ Bi lɛ.” 12  Shi bei pii lɛ, efãa amɛ kɛ hiɛdɔɔ akɛ amɛkahã mɛi le mɔ ni eji. 13  Ekwɔ kɛtee gɔŋ ko nɔ, ni etsɛ mɛi ni etaoɔ lɛ, ni amɛba eŋɔɔ. 14  Ni eto* mɛi nyɔŋma kɛ enyɔ kuu ko, mɛi ni etsɛ amɛ bɔfoi hu lɛ, mɛi ni baafata ehe ni ebaatsu amɛ hu koni amɛyashiɛ 15  ni ebaahã amɛ hegbɛ ni amɛkɛfãmɔ daimonioi lɛ. 16  Ni mɛi nyɔŋma kɛ enyɔ kuu lɛ ni eto* lɛ ji Simon, mɔ ni ewo lɛ gbɛ́i hu akɛ Petro lɛ, 17  Yakobo, Zebedeo binuu lɛ, kɛ Yohane, Yakobo nyɛmi nuu lɛ (ewo mɛi nɛɛ hu gbɛ́i akɛ Boanerges, ni eshishi ji “Nugbɔshiimɔ Bii”), 18  Andrea, Filipo, Bartolomeo, Mateo, Toma, Yakobo ni ji Alfeo binuu lɛ, Tadeo, Simon, hiɛdɔlɔ lɛ, 19  kɛ Yuda Iskariot, mɔ ni sɛɛ mli lɛ ejie lɛ ehã lɛ. Ni ebote shĩa ko mli, 20  ni asafoku lɛ babua amɛhe naa ekoŋŋ, ni no hewɔ lɛ, amɛnyɛɛɛ nii po amɛye. 21  Shi be ni ewekumɛi lɛ nu he lɛ, amɛtee lɛ mɔmɔ, ejaakɛ amɛkɛɛ akɛ: “Ejwɛŋmɔ tsuuu nii jogbaŋŋ.” 22  Agbɛnɛ hu, woloŋmalɔi lɛ ni kpeleke shi kɛjɛ Yerusalem amɛba lɛ miikɛɛ akɛ: “Eyɛ Beelzebul,* ni daimonioi lɛ anɔyelɔ lɛ hewalɛ ekɛfãmɔɔ daimonioi lɛ.” 23  No hewɔ lɛ, etsɛ amɛ kɛba eŋɔɔ, ni ekɛ nɔkwɛmɔnii* tsu nii kɛwie etsɔɔ amɛ akɛ: “Te Satan aaafee tɛŋŋ afã Satan lɛ? 24  Kɛ́ maŋtsɛyeli ko kɛ ehe shi mple lɛ, nakai maŋtsɛyeli lɛ nyɛŋ adamɔ shi; 25  ni kɛ́ shĩa ko kɛ ehe shi mple lɛ, nakai shĩa lɛ nyɛŋ adamɔ shi. 26  Agbɛnɛ hu, kɛ́ Satan ete shi ewo lɛ diɛŋtsɛ ehe ni ekɛ ehe miishi mple lɛ, enyɛŋ edamɔ shi, shi moŋ enaagbee miiba. 27  Anɔkwa, mɔ ko mɔ ko bɛ ni baanyɛ abote nuu hewalɔ ko shĩa ni eyaju enibii, akɛ ja efimɔ nuu hewalɔ lɛ dã. No dani ebaanyɛ eha eshĩa lɛ mli nibii lɛ. 28  Lɛɛlɛŋ, miikɛɛ nyɛ akɛ, abaaŋɔ nibii fɛɛ afa gbɔmɛi abii, ekɔɔɔ he eko eshai ni amɛbaafee, kɛ musubɔɔ wiemɔi ni amɛbaawie. 29  Shi mɔ fɛɛ mɔ ni bɔɔ musu eshiɔ mumɔ krɔŋkrɔŋ lɛ, enáŋ eshaifaa kɛmiiya naanɔ, shi moŋ esha fɔbuu kã enɔ kɛmiiya naanɔ.” 30  Ewie enɛ ejaakɛ amɛmiikɛɛ akɛ: “Eyɛ mumɔ ni he tseee.” 31  Ni enyɛ kɛ enyɛmimɛi hii lɛ ba, ni be ni amɛdamɔ agbó lɛ naa lɛ, amɛtsu mɔ ko koni eyatsɛ lɛ. 32  Ni eba lɛ akɛ, asafoku ko tara shi ni amɛbɔle ehe, ni amɛkɛɛ lɛ akɛ: “Naa! Onyɛ kɛ onyɛmimɛi hii lɛ yɛ agbó lɛ naa, ni amɛmiitao bo.” 33  Shi ehere nɔ ekɛɛ amɛ akɛ: “Namɛi ji minyɛ kɛ minyɛmimɛi hii?” 34  Kɛkɛ ni ekwɛ mɛi ni tara shi ni amɛbɔle ehe kɛkpe lɛ ni ekɛɛ akɛ: “Naa, minyɛ kɛ minyɛmimɛi hii nɛ! 35  Mɔ fɛɛ mɔ ni feɔ Nyɔŋmɔ suɔmɔnaa nii lɛ, lɛ ji minyɛmi nuu kɛ minyɛmi yoo kɛ minyɛ.”

Shishigbɛ Niŋmaa

Aloo “susuma.”
Aloo “ehala.”
Aloo “ehala.”
Eji gbɛ́i ni akɛtsɛɔ Satan.
Aloo “abɛbuai.”