Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 2:1-28

YITSEI LƐ AMLI SAJI

  • Yesu tsa nuu ko ní ekumɔ (1-12)

  • Yesu tsɛ Levi (13-17)

  • Abi ŋmaahilɛ he sane (18-22)

  • Yesu, ‘Hejɔɔmɔ Gbi lɛ Nuŋtsɔ’ (23-28)

2  Shi gbii komɛi asɛɛ lɛ, etee Kapernaum ekoŋŋ, ni wiemɔ gbɛ shwã akɛ eyɛ shĩa.  Ni mɛi babaoo babua amɛhe naa, ni jɛmɛ tsĩ ni anaaa gbɛ yɛ shinaa lɛ naa po, ni eje shishi ewie wiemɔ lɛ etsɔɔ amɛ.  Ni akɛ mɔ ko ni ekumɔ ni mɛi ejwɛ tere lɛ ba eŋɔɔ.  Shi asafoku lɛ hewɔ lɛ amɛnyɛɛɛ amɛkɛ lɛ aba Yesu ŋɔɔ tɛ̃ɛ, ni no hewɔ lɛ, amɛfã tsũ ni Yesu yɔɔ mli lɛ yiteŋ, ni amɛgbu fɔlɔ, ni amɛshiu saa ni mɔ ni ekumɔ lɛ kã nɔ lɛ kɛtsɔ jɛmɛ kɛyi shi.  Be ni Yesu na amɛhemɔkɛyeli lɛ, ekɛɛ mɔ ni ekumɔ lɛ akɛ: “Bi, aŋɔ ohe eshai lɛ afa bo.”  Ni woloŋmalɔi lɛ ekomɛi yɛ jɛmɛ, ni amɛtara shi amɛmiisusu yɛ amɛtsuiiaŋ akɛ:  “Mɛni hewɔ mɔ nɛɛ wieɔ yɛ nɛkɛ gbɛ nɔ? Eebɔ musu. Namɔ baanyɛ ekɛ eshai afa akɛ ja Nyɔŋmɔ kome pɛ?”  Shi Yesu lɛ, akɛni amrɔ lɛ emumɔ lɛ hã eyɔse akɛ amɛmiisusu nɛkɛ yɛ amɛteŋ hewɔ lɛ, ekɛɛ amɛ akɛ: “Mɛni hewɔ nyɛsusuɔ nibii nɛɛ yɛ nyɛtsuii amli lɛ?  Te enɛɛmɛi amli nɔ ni waaa, ni aaakɛɛ mɔ ni ekumɔ lɛ akɛ, ‘Aŋɔ ohe eshai lɛ afa bo,’ aloo ni aaakɛɛ akɛ, ‘Tee shi ni owó osaa lɛ ni onyiɛ’? 10  Shi bɔ ni afee ni nyɛle akɛ gbɔmɔ Bi lɛ yɛ hegbɛ akɛ eŋɔɔ eshai efaa yɛ shikpɔŋ lɛ nɔ lɛ—” ekɛɛ mɔ ni ekumɔ lɛ akɛ: 11  “Miikɛɛ bo akɛ, Tee shi, wó osaa lɛ, ni oya oshĩa.” 12  Kɛkɛ ni ete shi, ni amrɔ lɛ ewó esaa lɛ ni enyiɛ kɛje kpo yɛ amɛ fɛɛ amɛhiɛ. Ni amɛ fɛɛ amɛnaa kpɛ amɛhe waa, ni amɛwo Nyɔŋmɔ hiɛ nyam amɛkɛɛ: “Wɔnako nɔ ko ni tamɔ nɛkɛ pɛŋ.” 13  Eje kpo kɛtee ŋshɔ lɛ naa ekoŋŋ, ni asafoku lɛ fɛɛ kã he amɛba eŋɔɔ, ni ebɔi amɛ nitsɔɔmɔ. 14  Ni be ni ehoɔ eyaa lɛ, ehiŋmɛi gba Levi, Alfeo binuu lɛ nɔ akɛ eta toohemɔhe lɛ, ni ekɛɛ lɛ akɛ: “Baatsɔ misɛɛnyiɛlɔ.” Ni ete shi ni enyiɛ esɛɛ. 15  Sɛɛ mli lɛ, Yesu yata niyeniiashi* yɛ Levi shĩa lɛ, ni toohelɔi kɛ eshafeelɔi babaoo hu ba ni amɛkɛ Yesu kɛ ekaselɔi lɛ baye nii,* ejaakɛ amɛteŋ mɛi babaoo ebatsɔmɔ esɛɛnyiɛlɔi. 16  Shi be ni Farisifoi lɛ ateŋ woloŋmalɔi lɛ na akɛ ekɛ eshafeelɔi kɛ toohelɔi miiye nii lɛ, amɛbɔi ekaselɔi lɛ kɛɛmɔ akɛ: “Ani ekɛ toohelɔi kɛ eshafeelɔi yeɔ nii?” 17  Be ni Yesu nu enɛ lɛ, ekɛɛ amɛ akɛ: “Mɛi ni yɔɔ hewalɛ lɛ, helatsalɔ he ehiaaa amɛ, shi mɛi ni he yeɔ lɛ moŋ ehe hiaa. Mibaaa jalɔi atsɛmɔ, shi moŋ eshafeelɔi.” 18  No mli lɛ, Yohane kaselɔi lɛ kɛ Farisifoi lɛ fɔɔ ŋmaahilɛ. No hewɔ lɛ, amɛba amɛbakɛɛ lɛ akɛ: “Mɛni hewɔ Yohane kaselɔi lɛ kɛ Farisifoi lɛ akaselɔi lɛ fɔɔ ŋmaahilɛ, shi okaselɔi lɛ efɔɔɔ ŋmaahilɛ lɛ?” 19  No hewɔ lɛ, Yesu kɛɛ amɛ akɛ: “Be mli ni ayemforo wu lɛ kɛ enanemɛi lɛ yɔɔ lɛ, ehiaaa ni ayemforo wu lɛ nanemɛi lɛ ahi ŋmaa, aloo jeee nakai? Gbii abɔ ni ayemforo wu lɛ kɛ amɛ yɔɔ lɛ, amɛnyɛŋ amɛhi ŋmaa. 20  Shi gbii baaba ni abaaŋɔ ayemforo wu lɛ kɛaaje amɛteŋ kɛya, ni no lɛ amɛbaahi ŋmaa yɛ nakai gbi lɛ nɔ. 21  Mɔ ko mɔ ko kɛ mama hee* taaa atade momo. Kɛ́ efee nakai lɛ, mama hee lɛ baatse kɛje mama momo lɛ he, ni no baahã egba fe tsutsu lɛ. 22  Agbɛnɛ hu, mɔ ko mɔ ko kɛ wein hee wooo wein kotokui* memeji amli. Kɛ́ efee nakai lɛ, wein lɛ baahã wein kotokui lɛ afɛlɛ, ni wein lɛ kɛ wein kotokui lɛ fɛɛ baaŋmɛɛ lɛ. Shi akɛ wein hee woɔ wein kotokui hei amli.” 23  Agbɛnɛ, eyatsɔ ŋmaa ŋmɔji amli yɛ Hejɔɔmɔ Gbi lɛ nɔ, ni be ni amɛyaa lɛ, ekaselɔi lɛ bɔi ŋmaa lɛ kpɔlɔmɔ. 24  No hewɔ lɛ, Farisifoi lɛ kɛɛ lɛ akɛ; “Kwɛmɔ! Mɛni hewɔ amɛfeɔ nɔ ni mla eŋmɛɛɛ gbɛ akɛ afeɔ yɛ Hejɔɔmɔ Gbi lɛ nɔ lɛ?” 25  Shi ekɛɛ amɛ akɛ: “Ani nyɛkaneko nɔ ni David fee be ni ehia lɛ, ni hɔmɔ miiye lɛ kɛ hii ni fata ehe lɛ? 26  Bɔ ni yɛ sane ni kɔɔ osɔfonukpa Abiatar he lɛ mli lɛ, ebote Nyɔŋmɔ we lɛ, ni eye aboloi ni akɛma Nyɔŋmɔ hiɛ,* ni mla eŋmɛɛɛ gbɛ akɛ mɔ ko yeɔ akɛ ja osɔfoi lɛ kɛkɛ lɛ, ni ehã hii ni fata ehe lɛ hu eko lɛ?” 27  Ni ekɛɛ amɛ akɛ: “Gbɔmɔ hewɔ ato Hejɔɔmɔ Gbi lɛ, shi jeee Hejɔɔmɔ Gbi lɛ hewɔ abɔ gbɔmɔ. 28  No hewɔ lɛ, gbɔmɔ Bi lɛ ji Hejɔɔmɔ Gbi lɛ po Nuŋtsɔ.”

Shishigbɛ Niŋmaa

Aloo “ta okpɔlɔ lɛ he.”
Aloo “batara okpɔlɔ lɛ he.”
Ni ji, mama ni afɔko he, ni esuko.
Kotokui ni akɛ kooloo hewolo fee.
Aloo “aboloi ní akɛtsɔɔ.”