Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 15:1-47

15  Be ni je tsɛre nɔŋŋ lɛ, osɔfoi tsiifoi lɛ kɛ onukpai lɛ, kɛ woloŋmalɔi lɛ, hɛɛ, Sanhedrin* muu lɛ fɛɛ tee ajina, ni amɛfi Yesu, ni amɛkpala lɛ kɛtee ni amɛkɛ lɛ yahã Pilato.  Ni Pilato bi lɛ akɛ: “Ani bo ji Yudafoi lɛ a-Maŋtsɛ lɛ?” Ni ehã lɛ hetoo akɛ: “Bo diɛŋtsɛ okɛɛ.”  Shi osɔfoi tsiifoi lɛ kɛ saji babaoo shwie enɔ.  Agbɛnɛ Pilato bɔi lɛ bimɔ ekoŋŋ akɛ: “Ani obɛ naajiemɔ ko? Kwɛmɔ saji babaoo ni amɛkɛshwieɔ onɔ.”  Shi Yesu hãaa hetoo ko dɔŋŋ, ni no hã Pilato naa kpɛ ehe.  Agbɛnɛ, gbi jurɔ fɛɛ gbi jurɔ nɔ lɛ, eŋmɛɔ gboklɛfonyo kome ni amɛbiɔ ni eŋmɛɛ ehe lɛ he ehãa amɛ.  No mli lɛ, awo nuu ko ni atsɛɔ lɛ Baraba lɛ kɛ maŋ hiɛ atuatselɔi komɛi ni gbe gbɔmɔ be ni amɛtseɔ atua lɛ tsuŋ.  No hewɔ lɛ, asafoku lɛ kwɔ kɛba ni amɛbabɔi Pilato faikpamɔ akɛ efee tamɔ bɔ ni efeɔ daa ehãa amɛ lɛ.  Ehã amɛ hetoo akɛ: “Ani nyɛmiisumɔ ni maŋmɛɛ Yudafoi lɛ a-Maŋtsɛ lɛ he mahã nyɛ?” 10  Ejaakɛ Pilato le akɛ enɔ ni osɔfoi tsiifoi lɛ klɔɔ lɛ hewɔ amɛŋɔ lɛ amɛhã lɛ. 11  Shi osɔfoi tsiifoi lɛ wo asafoku lɛ yiŋ koni amɛbi ni aŋmɛɛ Baraba moŋ he ahã amɛ. 12  Ni Pilato here nɔ ekɛɛ amɛ akɛ: “Belɛ, mɛni mifee mɔ ni nyɛtsɛɔ lɛ Yudafoi lɛ a-Maŋtsɛ lɛ mɔ?” 13  Amɛsaa amɛbolɔ amɛkɛɛ: “Gbee lɛ!”* 14  Shi Pilato tee nɔ ekɛɛ amɛ akɛ: “Mɛni hewɔ? Mɛɛ efɔŋ efee?” Kɛ̃lɛ, amɛtee nɔ amɛbolɔ fe tsutsu lɛ amɛkɛɛ: “Gbee lɛ!”* 15  Shi akɛni Pilato miitao esa asafoku lɛ hiɛ hewɔ lɛ, eŋmɛɛ Baraba he ehã amɛ; ni be ni ehã agwao Yesu lɛ, eŋɔ lɛ ehã koni ayagbe lɛ yɛ tso jaŋŋ nɔ. 16  Agbɛnɛ, asraafoi lɛ kpala lɛ kɛtee kpo lɛ nɔ, ni tsɔɔ akɛ, kɛtee amralo lɛ we lɛ, ni amɛtsɛ asraafoi akuu muu lɛ fɛɛ kɛbakpe. 17  Ni amɛwo lɛ atade afaseo ni amɛlo ŋmeii akekere ni amɛkɛbu lɛ; 18  ni amɛbɔi lɛ ŋamɔ amɛkɛɛ: “Wɔmiiŋa bo,* Yudafoi lɛ a-Maŋtsɛ!” 19  Agbɛnɛ hu, amɛkɛ gãlã tswia eyiteŋ ni amɛfɛ̃ lajɔ̃ amɛshwie ehe ni amɛkotokotoo lɛ. 20  Agbɛnɛ, be ni amɛye ehe fɛo amɛgbe naa lɛ, amɛjie atade afaseo lɛ yɛ ehe ni amɛkɛ etadei anɔhaanɔi lɛ wo lɛ. Ni amɛkpala lɛ kɛtee koni amɛyakala lɛ amɛkpɛtɛ tso jaŋŋ lɛ he. 21  Kɛfata he lɛ, amɛnyɛ Kirenenyo ko ni atsɛɔ lɛ Simon ni eji Aleksandro kɛ Rufo tsɛ, ni jɛ kosɛɛ eeba lɛ nɔ akɛ etere epiŋmɔ tso* lɛ. 22  Ni amɛkpala lɛ kɛtee he ni atsɛɔ jɛmɛ Golgota, ní eshishi ji, “Yitsoŋoŋohe” lɛ. 23  Biɛ ni amɛbɔ mɔdɛŋ akɛ amɛhã lɛ wein ni akɛ mire efutu mli, shi enuuu. 24  Ni amɛkala lɛ amɛkpɛtɛ tso jaŋŋ lɛ he ni amɛfɔ̃ etadei anɔhaanɔi lɛ anɔ oshiki kɛna nɔ ni mɔ fɛɛ mɔ baakɔ, ni amɛjara amɛhã amɛhe. 25  Ŋmɛlɛtswaa ni ji etɛ* lɛ nɔ amɛkala lɛ amɛkpɛtɛ tso jaŋŋ lɛ he. 26  Ni amɛŋma sane ni amɛkɛfɔ̃ enɔ lɛ akɛ: “Yudafoi lɛ a-Maŋtsɛ lɛ.” 27  Kɛfata he lɛ, amɛsɛŋ ojoyelɔi enyɔ yɛ tsei jaŋŋi anɔ yɛ emasɛi, mɔ kome yɛ eninejurɔ nɔ ni mɔ kome hu yɛ ebɛku nɔ. 28  —— 29  Ni mɛi ni hoɔ lɛ wie wiemɔi fɔji amɛshi lɛ, ni amɛhoso amɛyitsei amɛkɛɛ: “Ei! Bo ni kulɛ obaakumɔ sɔlemɔwe lɛ ni okɛ gbii etɛ ama lɛ, 30  jee piŋmɔ tso* lɛ nɔ okpeleke shi ni okɛhere bo diɛŋtsɛ oyiwala.” 31  Nakai nɔŋŋ osɔfoi tsiifoi lɛ hu kɛ woloŋmalɔi lɛ ye ehe fɛo yɛ amɛteŋ, ni amɛkɛɛ: “Ehere mɛi krokomɛi ayiwala; shi lɛ diɛŋtsɛ lɛ, enyɛɛɛ eyiwala ehere! 32  Agbɛnɛ, hã Kristo lɛ, Israel Maŋtsɛ lɛ, akpeleke shi kɛjɛ piŋmɔ tso* lɛ nɔ koni wɔna ni wɔhe lɛ wɔye.” Mɛi ni asɛŋ amɛ yɛ tsei jaŋŋi anɔ yɛ emasɛi lɛ po bɔ lɛ ahora. 33  Be ni shɛ ŋmɛlɛtswaa ni ji ekpaa* lɛ, duŋ wo yɛ shikpɔŋ lɛ nɔ fɛɛ kɛyashi ŋmɛlɛtswaa ni ji nɛɛhu* lɛ nɔ. 34  Ni ŋmɛlɛtswaa ni ji nɛɛhu lɛ nɔ lɛ, Yesu bo kɛ gbee ni wa ekɛɛ: “Eli, Eli, lama sabaktani?” ni eshishi ji: “Mi-Nyɔŋmɔ, mi-Nyɔŋmɔ, mɛni hewɔ okwa mi?” 35  Ni be ni mɛi ni damɔ jɛmɛ lɛ ateŋ mɛi komɛi nu enɛ lɛ, amɛbɔi kɛɛmɔ akɛ: “Naa! Eetsɛ Elia.” 36  Kɛkɛ ni mɔ ko jo foi ekɛ kotsa yatsɔ wein ni joɔ mli, ni ekɛma gãlã naa, ni ekɛhã lɛ akɛ enu, ekɛɛ: “Nyɛshia lɛ! Nyɛhãa wɔkwɛa akɛ Elia baaba ebajie lɛ lo.” 37  Shi Yesu bo waa ni eŋmɛɛ emumɔ he.* 38  Ni sɔlemɔtsu lɛŋ muhɔɔ* lɛ mli gba enyɔ, kɛjɛ ŋwɛi kɛbayi shi. 39  Agbɛnɛ, be ni asraafoiatsɛ* ni damɔ ehiɛ lɛ na akɛ eŋmɛɛ emumɔ he yɛ shihilɛi nɛɛ amli lɛ, ekɛɛ akɛ: “Lɛɛlɛŋ, Nyɔŋmɔ Bi nɛ.” 40  No mli lɛ, yei komɛi hu damɔ shɔŋŋ amɛmiikwɛ, amɛteŋ mɛi komɛi ji Maria Magdalena, kɛ Maria ni ji Yakobo Bibioo lɛ kɛ Yose nyɛ lɛ, kɛ Salome, 41  mɛi ni be ni eyɔɔ Galilea lɛ, amɛnyiɛɔ esɛɛ ni amɛsɔmɔɔ lɛ lɛ, kɛ yei krokomɛi pii ni kɛ lɛ ba Yerusalem lɛ. 42  Agbɛnɛ, akɛni je ena momo ni eji Hesaamɔkɛtoo Gbi, ni tsɔɔ akɛ, gbi ni tsɔɔ Hejɔɔmɔ Gbi lɛ hiɛ lɛ hewɔ lɛ, 43  Yosef ni jɛ Arimatia, ni ji Ajinafoi Akuu lɛ mli nyo ni abuɔ lɛ waa, ni lɛ diɛŋtsɛ hu eemɛ Nyɔŋmɔ Maŋtsɛyeli lɛ ba. Ni ekɛ ekãa tee Pilato hiɛ ni eyabi koni aŋɔ Yesu gbonyo lɛ ahã lɛ. 44  Shi Pilato miitao ele akɛ egbo momo lo, ni etsɛ asraafoiatsɛ lɛ, ni ebi lɛ kɛji egbo momo. 45  Ni be ni enu kɛjɛ asraafoiatsɛ lɛ naa akɛ egbo lɛ, eŋɔ gbonyo lɛ ehã Yosef. 46  Ni eyahé klala kpakpa, ni ejie lɛ kɛkpeleke shi, ni ekɛ klala kpakpa lɛ bala ehe, ni ekɛ lɛ yaŋmɛ gbonyo bu* ni akpɛ́ yɛ tɛsaa mli lɛ mli; no sɛɛ lɛ, ekoklo tɛ kɛtsĩ gbonyo bu lɛ naa. 47  Shi Maria Magdalena kɛ Maria, ni ji Yose nyɛ lɛ tee nɔ amɛkwɛ he ni akɛ lɛ eŋmɛ lɛ.

Shishigbɛ Niŋmaa

Kwɛmɔ Mat 26:59 sh. niŋ.
Aloo “Gbee lɛ yɛ tso jaŋŋ lɛ nɔ!”
Aloo “Gbee lɛ yɛ tso jaŋŋ lɛ nɔ!”
Aloo “Yijiemɔ ahã bo.”
Kwɛmɔ Wiemɔi Titrii Amligbalamɔ lɛ.
Ni tsɔɔ akɛ, aaafee leebi ŋmɛlɛ 9.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Ni tsɔɔ akɛ, aaafee shwane ŋmɛlɛ 12.
Ni tsɔɔ akɛ, aaafee shwane ŋmɛji 3.
Aloo “emu enaagbee mumɔ.”
Kwɛmɔ Mat 27:51 sh. niŋ.
Mɔ ni kwɛɔ asraafoi 100 nɔ.
Aloo “gbonyo kaimɔ bu.”