Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 14:1-72

14  Agbɛnɛ, eshwɛ gbii enyɔ ni abaaye Hehoo lɛ kɛ Aboloo ni Akɛ Ma ni Eshako Feɔ lɛ Gbi Jurɔ lɛ. Ni osɔfoi tsiifoi lɛ kɛ woloŋmalɔi lɛ miitao bɔ ni amɛbaafee amɛtsɔ ŋaa gbɛ nɔ amɛmɔ lɛ* ní amɛgbe lɛ;  ejaakɛ amɛkɛɛ akɛ: “Jeee gbi jurɔ lɛ nɔ; ekolɛ maŋbii lɛ baawo maŋ lɛ mli hirihiri.”  Ni be ni eyɔɔ Betania, ni eta niyeniiashi* yɛ Simon, tsutsu kpitiyelɔ lɛ shĩa lɛ, yoo ko ba, ni ehiɛ alabastro tɔ kɛ emli mu ni jeɔ ŋma, ni ji nardo mu krɔŋŋ ni jara wa naakpa. Ejwa alabastro tɔ lɛ naa ni ebɔi fɔsemɔ kɛ Yesu yiteŋ shwiemɔ.  Enɛ hewɔ lɛ, amɛteŋ mɛi komɛi kɛ mlifu kɛɛkɛɛ amɛhe akɛ: “Mɛni hewɔ afite mu ni jeɔ ŋma nɛɛ?  Ejaakɛ kulɛ abaanyɛ ahɔ̃ɔ mu ni jeɔ ŋma nɛɛ ni aná fe denarioi ohai etɛ ni akɛ shika lɛ ahã ohiafoi!” Ni yoo lɛ he wo amɛmli la waa.*  Shi Yesu kɛɛ: “Nyɛshia lɛ. Mɛni hewɔ nyɛgbaa yoo lɛ naa? Etsu nitsumɔ kpakpa ehã mi.  Ejaakɛ ohiafoi lɛ nyɛkɛ amɛ yɛ daa, ni be fɛɛ be ni nyɛsumɔɔ lɛ, nyɛbaanyɛ nyɛfee amɛ ekpakpa, shi mi lɛ jeee daa mikɛ nyɛ baahi shi.  Efee nɔ ni ebaanyɛ; etsɔ hiɛ efɔse mu ni jeɔ ŋma eshwie migbɔmɔtso lɛ nɔ kɛhã mifuu lɛ.  Lɛɛlɛŋ, miikɛɛ nyɛ akɛ, he fɛɛ he ni abaashiɛ sane kpakpa lɛ yɛ, yɛ jeŋ fɛɛ lɛ, abaagba nɔ ni yoo nɛɛ fee nɛɛ hu ni akɛkai lɛ.” 10  Ni Yuda Iskariot, Mɛi Nyɔŋma kɛ Enyɔ lɛ ateŋ mɔ kome lɛ, tee osɔfoi tsiifoi lɛ aŋɔɔ bɔ ni afee ni eyajie lɛ ehã amɛ. 11  Be ni amɛnu lɛ, amɛná miishɛɛ naakpa, ni amɛwo lɛ shi akɛ amɛbaahã lɛ jwiɛtɛi shika. No hewɔ lɛ, eje shishi etao hegbɛ koni ekɛjie lɛ ehã. 12  Agbɛnɛ, yɛ Aboloo ni Akɛ Ma ni Eshako Feɔ lɛ gbii juji lɛ amli klɛŋklɛŋ gbi lɛ nɔ, be mli ni yɛ kusum naa lɛ, amɛŋɔɔ Hehoo afɔle lɛ amɛhãa lɛ, ekaselɔi lɛ kɛɛ lɛ akɛ: “Nɛgbɛ osumɔɔ akɛ wɔya ni wɔyasaa wɔto bo koni oyaye Hehoo lɛ yɛ?” 13  Kɛkɛ ni etsu ekaselɔi lɛ ateŋ mɛi enyɔ ni ekɛɛ amɛ akɛ: “Nyɛyaa maŋ lɛ mli, ni nuu ko ni tere nugbɛ́ kɛ nyɛ baakpe. Nyɛnyiɛa esɛɛ, 14  ni he fɛɛ he ni ebaayabote lɛ, nyɛkɛa shĩatsɛ lɛ akɛ, ‘Tsɔɔlɔ lɛ kɛɛ: “Nɛgbɛ gbɔiatsũ lɛ ni mi kɛ mikaselɔi lɛ baaye Hehoo lɛ yɛ mli lɛ yɔɔ?”’ 15  Ni ebaatsɔɔ nyɛ ŋwɛi asa agbo ko, awula mli momo. Nyɛsaa Hehoo lɛ nyɛtoa wɔ yɛ jɛmɛ.” 16  No hewɔ lɛ, kaselɔi lɛ je kpo amɛtee, ni amɛbote maŋ lɛ mli, ni amɛyana lɛ bɔ ni ekɛɛ amɛ lɛ pɛpɛɛpɛ, ni amɛsaa Hehoo lɛ amɛto. 17  Be ni shɛ gbɛkɛ lɛ, ekɛ Mɛi Nyɔŋma kɛ Enyɔ lɛ ba. 18  Ni be ni amɛtara okpɔlɔ lɛ he amɛyeɔ nii lɛ, Yesu kɛɛ: “Lɛɛlɛŋ, miikɛɛ nyɛ akɛ, nyɛ mɛi ni nyɛkɛ mi yeɔ nii lɛ ateŋ mɔ kome baajie mi ehã.” 19  Amɛwerɛ bɔi amɛhe hoo ni amɛkɛɛ lɛ ekomekome akɛ: “Mi ni lo?” 20  Ekɛɛ amɛ akɛ: “Mɛi Nyɔŋma kɛ Enyɔ lɛ ateŋ mɔ kome, mɔ ni kɛ mi tsɔɔ nii yɛ kã lɛ mli lɛ ni. 21  Ejaakɛ gbɔmɔ Bi lɛ miishi kɛmiiya taakɛ aŋma yɛ ehe lɛ moŋ, shi kpoo hã nakai mɔ ni abaatsɔ enɔ ajie gbɔmɔ Bi lɛ ahã lɛ! Afɔɔɔ nakai mɔ lɛ moŋ kulɛ, ehi hã lɛ.” 22  Ni be ni amɛkã he amɛyeɔ nii lɛ, ekɔ aboloo,* ni esɔle,* ni ekumɔ mli, ni ekɛhã amɛ, ni ekɛɛ: “Nyɛhea; enɛ damɔ shi kɛhã* migbɔmɔtso.” 23  Ni ewó kpulu, ni eda shi, ni ekɛhã amɛ, ni amɛ fɛɛ amɛnu kpulu lɛ naa. 24  Ni ekɛɛ amɛ akɛ: “Enɛ damɔ shi kɛhã milá ni ji ‘kpaŋmɔ lɛ lá’ ni abaafɔse ashwie shi ahã mɛi babaoo lɛ. 25  Lɛɛlɛŋ, miikɛɛ nyɛ akɛ, minuŋ wein ko dɔŋŋ kɛyashi gbi nɔ ni manu lɛ ehee yɛ Nyɔŋmɔ Maŋtsɛyeli lɛ mli.” 26  Naagbee lɛ, amɛlá yijiemɔ lalai, ni no sɛɛ lɛ, amɛje kpo kɛtee Oliv Gɔŋ lɛ nɔ. 27  Ni Yesu kɛɛ amɛ akɛ: “Nyɛ fɛɛ nyɛnane baatɔ̃tɔ, ejaakɛ aŋma akɛ: ‘Matswa tookwɛlɔ lɛ nɔ, ni gwantɛŋi lɛ baagbɛ ashwã.’ 28  Shi kɛ́ atee mi shi lɛ, matsɔ nyɛhiɛ kɛya Galilea.” 29  Shi Petro kɛɛ lɛ akɛ: “Kɛ́ mɛi krokomɛi lɛ fɛɛ nane tɔ̃tɔ po lɛ, mi lɛ, minane etɔ̃tɔŋ.” 30  Kɛkɛ ni Yesu kɛɛ lɛ akɛ: “Lɛɛlɛŋ, miikɛɛ bo akɛ ŋmɛnɛ, hɛɛ nyɔɔŋ nɛɛ mli nɔŋŋ lɛ, dani wuɔ baagbɛɛ shii enyɔ lɛ, obaakwa mi shii etɛ.” 31  Shi etee nɔ ema nɔ mi veveeve akɛ: “Kɛ́ esa akɛ mikɛ bo agbo po lɛ, mikwaŋ bo kɔkɔɔkɔ.” Ni kaselɔi krokomɛi lɛ fɛɛ hu bɔi nakai nɔŋŋ kɛɛmɔ. 32  Ni amɛbashɛ he ko ni atsɛɔ jɛmɛ akɛ Getsemane, ni ekɛɛ ekaselɔi lɛ akɛ: “Nyɛtaraa shi yɛ biɛ, miyasɔle.” 33  Ni eŋɔ Petro kɛ Yakobo kɛ Yohane efata ehe, ni ewerɛ bɔi ehe hoo waa* ni ehe jara lɛ babaoo. 34  Ekɛɛ amɛ akɛ: “Miwerɛ eho mihe* waa, kɛyashi gbele mli tete. Nyɛhia biɛ ni nyɛyaa nɔ nyɛbua.” 35  Ni etee hiɛ fioo, ni eho ebu shi ni ebɔi sɔlemɔ akɛ kɛ́ aaahi lɛ, ŋmɛlɛtswaa lɛ aho ehe aya. 36  Ni ekɛɛ: “Aba,* Ataa, onyɛɔ nii fɛɛ ofeɔ; jiemɔ kpulu nɛɛ kɛje minɔ. Kɛ̃lɛ, jeee bɔ ni mi misumɔɔ, shi moŋ bɔ ni bo osumɔɔ.” 37  Eku esɛɛ eba ni ebana akɛ amɛmiiwɔ, ni ekɛɛ Petro akɛ: “Simon, wɔ owɔɔ lɛ? Ani obɛ nyɛmɔ ni okɛbaaya nɔ obu ŋmɛlɛtswaa kome? 38  Nyɛyaa nɔ nyɛbua ni nyɛsɔlea daa, koni nyɛkabote kaa* mli. Anɔkwa, mumɔ lɛ miisumɔ waa, shi heloo lɛ egbede.” 39  Ni eyiŋ etee ekoŋŋ eyasɔle, ni ewie nɔ kome lɛ nɔŋŋ. 40  Ni eba ekoŋŋ ebana akɛ amɛmiiwɔ, ejaakɛ amɛhiŋmɛii etsii, ni no hewɔ lɛ, amɛleee nɔ hetoo ni amɛbaahã lɛ. 41  Ni eku esɛɛ eba nɔ ni ji shii etɛ nɔ, ni ekɛɛ amɛ akɛ: “Ŋmɛlɛtswaa ni tamɔ nɛkɛ nɔ nyɛwɔɔ ni nyɛjɔɔ nyɛhe nɛɛ! Efa! Ŋmɛlɛtswaa lɛ eshɛ! Naa! Aajie gbɔmɔ Bi lɛ aawo eshafeelɔi adɛŋ. 42  Nyɛtea shi, nyɛhãa wɔyaa. Naa! Mɔ ni baajie mi ehã lɛ eshɛ shi etã.” 43  Ni amrɔ lɛ, be ni ekã he ewieɔ lɛ, Yuda, Mɛi Nyɔŋma kɛ Enyɔ lɛ ateŋ mɔ kome lɛ ba, ni asafoku ko ni jɛ osɔfoi tsiifoi lɛ kɛ woloŋmalɔi lɛ kɛ onukpai lɛ aŋɔɔ lɛ fata ehe, ni amɛhiɛ klantei kɛ kpotii. 44  Agbɛnɛ, mɔ ni baajie lɛ ehã lɛ eto amɛ okadi ko akɛ: “Mɔ naa ni mashɔ lɛ, lɛ ni; nyɛmɔa lɛ, ni nyɛhãa bulɔi akpalaa lɛ kɛyaa.” 45  Ni eba eŋɔɔ tɛ̃ɛ ni etsi ebɛŋkɛ lɛ ni ekɛɛ, “Rabi!” ni ekɛ suɔmɔ shɔ enaa. 46  Ni amɛmɔ lɛ. 47  Shi mɛi ni damɔ jɛmɛ lɛ ateŋ mɔ kome gbala eklante ni ekɛbã osɔfonukpa lɛ nyɔŋ lɛ, ni efo etoi. 48  Shi Yesu fã enaa ni ekɛɛ amɛ akɛ: “Mi mɔmɔ nyɛba kɛ klantei kɛ kpotii tamɔ amɔɔ ojoyelɔ ko nɛɛ? 49  Daa gbi lɛ, mikɛ nyɛ yɛ sɔlemɔwe lɛ miitsɔɔ nii, ni kɛ̃lɛ nyɛmɔɔɔ mi. Fɛɛ sɛɛ lɛ, enɛ ba lɛ nakai bɔ ni afee ni Ŋmalɛi lɛ aba mli.” 50  Ni amɛ fɛɛ amɛshi lɛ, ni amɛjo foi. 51  Shi oblanyo ko ni kɛ klala kpakpa ko kɛkɛ eha eyayaiaŋ bɔi esɛɛ nyiɛmɔ, ni amɛbɔ mɔdɛŋ akɛ amɛmɔ lɛ, 52  shi eshi eklala lɛ ni ejo foi kɛ ehe yayai.* 53  Agbɛnɛ amɛkpala Yesu kɛtee osɔfonukpa lɛ ŋɔɔ, ni osɔfoi tsiifoi lɛ kɛ onukpai lɛ kɛ woloŋmalɔi lɛ fɛɛ bua amɛhe naa. 54  Shi Petro nyiɛ esɛɛ yɛ shɔŋŋ aahu kɛyashi osɔfonukpa lɛ kpo lɛ nɔ; ni ekɛ shĩa lɛŋ sɔɔlɔi lɛ yatara shi, ni eewere la. 55  Nakai be lɛ mli lɛ, osɔfoi tsiifoi lɛ kɛ Sanhedrin* muu lɛ fɛɛ miitao odase amɛshi Yesu koni amɛgbe lɛ, shi amɛnáaa eko. 56  Anɔkwa, mɛi pii baye amale odase amɛshi lɛ, shi amɛdasei lɛ kpãaa gbee. 57  Kɛfata he lɛ, mɛi krokomɛi te shi amɛye amale odase amɛshi lɛ amɛkɛɛ: 58  “Wɔnu ni eekɛɛ akɛ, ‘Makumɔ sɔlemɔwe nɛɛ ni akɛ niji fee lɛ, ni yɛ gbii etɛ mli lɛ, mama ekroko ni jeee niji akɛfee.’” 59  Shi yɛ enɛɛmɛi agbɛfaŋ po lɛ, amɛdasei lɛ kpãaa gbee. 60  Kɛkɛ ni osɔfonukpa lɛ te shi damɔ shi yɛ amɛteŋ ni ebi Yesu akɛ: “Ani obɛ naajiemɔ ko? Mɛni oyɔɔ kɛɛmɔ yɛ odase ni hii nɛɛ yeɔ shiɔ bo lɛ he?” 61  Shi etswaaa esɛŋ ni ehãaa hetoo ko kwraa. Ni osɔfonukpa lɛ bɔi lɛ bimɔ ekoŋŋ ni ekɛɛ lɛ akɛ: “Ani bo ji Kristo lɛ, Mɔ ni Ajɔɔ Lɛ lɛ Bi lɛ?” 62  Kɛkɛ ni Yesu kɛɛ: “Mi ni; ni nyɛbaana gbɔmɔ Bi lɛ ta hewalɛ ninejurɔ nɔ ni ekɛ ŋwɛi atatui lɛ miiba.” 63  Kɛkɛ ni osɔfonukpa lɛ gbala etadei ni ekɛɛ: “Mɛɛ odasefoi krokomɛi wɔtaoɔ dɔŋŋ? 64  Nyɛnu musubɔɔ lɛ. Mɛni ji nyɛyiŋkpɛɛ?”* Amɛ fɛɛ amɛbu lɛ fɔ akɛ esa gbele. 65  Ni amɛteŋ mɛi komɛi je shishi amɛfɛ̃ lajɔ̃ amɛshwie ehe ni amɛha ehiɛ ni amɛmamɔ lɛ atswɛrɛi ni amɛkɛɛ lɛ akɛ: “Gbaa!” Ni saneyelihe sɔɔlɔi lɛ gbala ehiɛ mai ni amɛŋɔ lɛ kɛtee. 66  Agbɛnɛ, be ni Petro yɔɔ shishi yɛ kpo lɛ nɔ lɛ, osɔfonukpa lɛ tsuji yei lɛ ateŋ mɔ kome ba. 67  Be ni ena akɛ Petro miiwere la lɛ, ekwɛ ehiɛ tɛ̃ɛ ni ekɛɛ lɛ akɛ: “Bo hu ofata Yesu, Nazarenyo lɛ, he.” 68  Shi etso ekɛɛ: “Mileee lɛ, asaŋ minuuu nɔ ni owieɔ lɛ shishi,” ni eje kpo etee he ni atsɔɔ kɛbaa mli lɛ.* 69  Tsulɔ yoo lɛ na lɛ yɛ jɛmɛ, ni ebɔi mɛi ni damɔ jɛmɛ lɛ kɛɛmɔ ekoŋŋ akɛ: “Amɛteŋ mɔ kome nɛ.” 70  Esaa etso ekoŋŋ. Ni be fioo sɛɛ lɛ, mɛi ni damɔ jɛmɛ lɛ hu bɔi Petro kɛɛmɔ ekoŋŋ akɛ: “Ekã shi faŋŋ akɛ, bo hu amɛteŋ mɔ kome ji bo, ejaakɛ, anɔkwa, Galileanyo ji bo.” 71  Shi ebɔi loomɔ kɛ kitãkamɔ akɛ: “Mileee gbɔmɔ ni nyɛwieɔ ehe nɛɛ!” 72  Amrɔ lɛ, wuɔ gbɛɛ nɔ ni ji shii enyɔ nɔ, ni Petro kai nɔ ni Yesu kɛɛ lɛ lɛ akɛ: “Dani wuɔ baagbɛɛ shii enyɔ lɛ, obaakwa mi shii etɛ.” Ni ewerɛ ho ehe ni ebɔi yaafo.

Shishigbɛ Niŋmaa

Aloo “amɛkɛ hiɛtɛ̃ɛ atsu nii kɛmɔ lɛ.”
Aloo “eta okpɔlɔ lɛ he.”
Aloo “amɛkɛ yoo lɛ wie kɛ mlifu; amɛsha yoo lɛ hiɛ.”
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Sht. ŋm., “ejɔɔ.”
Kwɛmɔ Mat 26:26 sh. niŋ.
Aloo “ejija.”
Aloo “Misusuma werɛ eho ehe.”
Aramaik wiemɔ ni shishi ji “Mitsɛ!”
Ni ji, efɔŋ he kaa.
Aloo “ejo foi ni ewo nɔ ko hatahata ko; ewo nɔ ko ni awoɔ yɛ atade shishi pɛ.”
Kwɛmɔ Mat 26:59 sh. niŋ.
Aloo “Te nyɛsusuɔ tɛŋŋ?”
Aloo “koi lɛ shi.”