Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 13:1-37

13  Be ni eeje kpo yɛ sɔlemɔwe lɛ, ekaselɔi lɛ ateŋ mɔ kome kɛɛ lɛ akɛ: “Tsɔɔlɔ, kwɛmɔ! mɛɛ tɛi kɛ tsũi fɛfɛji po nɛ!”  Shi Yesu kɛɛ lɛ akɛ: “Oona tsũi kpeteŋkpelei nɛɛ? Ashiŋ tɛ kome yɛ eko nɔ yɛ biɛ kɔkɔɔkɔ, ní atsiŋ atswaŋ shi.”  Be ni eta shi yɛ Oliv Gɔŋ lɛ nɔ ni eena sɔlemɔwe lɛ, Petro, Yakobo, Yohane, kɛ Andrea pɛ tee eŋɔɔ ni amɛyabi lɛ akɛ:  “Kɛɛmɔ wɔ, mɛɛ be nibii nɛɛ baaba mli, ni mɛni baafee okadi lɛ, be ni nibii nɛɛ fɛɛ miiba naagbee lɛ?”  No hewɔ lɛ, Yesu bɔi amɛ kɛɛmɔ akɛ: “Nyɛkwɛa jogbaŋŋ koni mɔ ko akalaka nyɛ.  Mɛi babaoo baaba yɛ migbɛ́i mli abakɛɛ akɛ, ‘Mi ni,’ ni amɛkɛbaalaka mɛi babaoo.  Kɛfata he lɛ, kɛ́ nyɛnu tai kɛ tai amaniɛbɔi ahe lɛ, nyɛtsui akafãa; esa akɛ nibii nɛɛ aba mli, shi naagbee lɛ shɛko.  “Ni jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli; shikpɔŋhosomɔi baaba yɛ heihei; hɔji hu baaba. Enɛɛmɛi ji kɔmɔmɔi lɛ abɔimɔ.  “Nyɛ lɛ, nyɛkwɛa nyɛhe nɔ jogbaŋŋ. Mɛi baaŋɔ nyɛ amɛhã kojolɔi, ni abaayi nyɛ yɛ kpeehei, ni akɛ nyɛ baayadamɔ amralofoi kɛ maŋtsɛmɛi ahiɛ yɛ mihewɔ, koni akɛye amɛ odase. 10  Kɛfata he lɛ, abaashiɛ sane kpakpa lɛ yɛ jeŋmaji fɛɛ mli klɛŋklɛŋ. 11  Ni kɛ́ amɛkɛ nyɛ miiya koni amɛyaŋɔ nyɛ amɛhã lɛ, nyɛkafea yeyeeye kɛtsɔa hiɛ yɛ nɔ ni nyɛbaawie lɛ he; shi nɔ fɛɛ nɔ ni abaaŋɔ ahã nyɛ yɛ nakai ŋmɛlɛtswaa lɛ nɔ lɛ, no nyɛwiea, ejaakɛ jeee nyɛ nyɛwieɔ lɛ, shi moŋ mumɔ krɔŋkrɔŋ lɛ ni. 12  Kɛfata he lɛ, nyɛmi nuu baaŋɔ nyɛmi nuu ehã gbele, ni tsɛ baaŋɔ bi ehã, ni bii baate shi awo fɔlɔi ni amɛbaahã agbe amɛ. 13  Ni mɛi fɛɛ baanyɛ nyɛ yɛ migbɛ́i lɛ hewɔ. Shi mɔ ni efi shi kɛyawula shi* lɛ, abaahere eyiwala. 14  “Shi kɛ́ nyɛhiŋmɛi gba nihiinii ni kɛ amaŋfɔfeemɔ baa lɛ nɔ akɛ edamɔ he ni esaaa akɛ edamɔɔ lɛ (mɔ ni kaneɔ lɛ, ekɛ sanesɛɛkɔmɔ atsu nii), no lɛ mɛi ni yɔɔ Yudea lɛ abɔi foijee kɛya gɔji lɛ anɔ. 15  Mɔ ni yɔɔ tsu yiteŋ lɛ akakpeleke shi, asaŋ ekabote eshĩa lɛ mli eyakɔ nɔ ko; 16  ni mɔ ni yɔɔ ŋmɔ mli lɛ, ekaku esɛɛ kɛtee nibii ni eshi yɛ esɛɛ lɛ ahe eyakɔ etade nɔhaanɔ. 17  Kpoo hã yeihɔlɔi kɛ mɛi ni miihã fufɔ yɛ nakai gbii lɛ amli lɛ! 18  Nyɛyaa nɔ nyɛsɔlea koni ekaba mli yɛ fɛ̃i be mli; 19  ejaakɛ nakai gbii lɛ baafee amanehulu gbii ni anako nɔ dã kɛjɛ bɔɔ nii lɛ, ni ji nii ni Nyɔŋmɔ bɔ lɛ, shishijee kɛyashi nakai be lɛ, ni asaŋ eko baŋ dɔŋŋ. 20  Anɔkwa, kɛ́ Yehowa* efooo gbii lɛ anɔ kuku lɛ, ahereŋ heloo ko heloo ko yiwala. Shi halamɔbii ni ehala lɛ ahewɔ lɛ, ebaafo gbii lɛ anɔ kuku. 21  “Agbɛnɛ hu, kɛ́ mɔ ko kɛɛ nyɛ akɛ, ‘Naa! Kristo lɛ yɛ biɛ,’ loo, ‘Naa! Eyɛ jɛmɛ’ lɛ, nyɛkahea nyɛyea. 22  Ejaakɛ amale Kristoi kɛ amale gbalɔi baate shi ni amɛbaafee okadii kɛ naakpɛɛ nii koni amɛkɛhã mɛi adu gbɛ, kɛ́ aaahi lɛ mɛi ni ahala lɛ. 23  Belɛ, nyɛkwɛa nyɛhe nɔ jogbaŋŋ. Mikɛɛ nyɛ nibii fɛɛ mito. 24  “Shi no gbii lɛ amli, yɛ nakai amanehulu lɛ sɛɛ lɛ, hulu lɛ baawo duŋ, ni nyɔɔŋtsere lɛ kpɛŋ, 25  ni ŋulamii lɛ baajɛ ŋwɛi abatswiatswiaa shi, ni abaahoso hewalɛi ni yɔɔ ŋwɛi lɛ. 26  Kɛkɛ lɛ, amɛbaana gbɔmɔ Bi lɛ akɛ eeba yɛ atatui lɛ amli kɛ hewalɛ kɛ anunyam kpele. 27  Ni ebaatsu ŋwɛibɔfoi lɛ, ni amɛbaabua ehalamɔbii lɛ anaa kɛaajɛ kɔɔyɔi ejwɛ lɛ anɔ, kɛjɛ shikpɔŋ lɛ naagbeehe kɛyashi ŋwɛi naagbeehe. 28  “Agbɛnɛ, nyɛkasea agbami tso lɛ he nɔkwɛmɔnɔ* nɛɛ: Kɛ́ enine fɔ lɛ fee frɔ̃frɔ̃, ni efũ bai nɔŋŋ lɛ, nyɛle akɛ latsaa be eshɛ etã. 29  Nakai nɔŋŋ nyɛ hu, kɛ́ nyɛna akɛ nibii nɛɛ miiba mli lɛ, nyɛnáa nyɛlea akɛ eshɛ shinai lɛ anaa etã. 30  Lɛɛlɛŋ, miikɛɛ nyɛ akɛ, nɛkɛ yinɔ nɛɛ hoŋ eyaŋ kɔkɔɔkɔ kɛyashi nibii nɛɛ fɛɛ baaba mli. 31  Ŋwɛi kɛ shikpɔŋ baaho aya, shi miwiemɔi lɛ hoŋ eyaŋ kɔkɔɔkɔ. 32  “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ tete loo Bi lɛ tete leee, ja Tsɛ lɛ. 33  Nyɛyaa nɔ nyɛkwɛa, nyɛyaa nɔ nyɛshia kpe, ejaakɛ nyɛleee be ni ato lɛ. 34  Etamɔ nuu ko ni miifã gbɛ ni eshi eshĩa, ni ehã enyɔji lɛ hegbɛ yɛ nɔ, ni ehã mɔ fɛɛ mɔ enitsumɔ, ni efã shinaanaakwɛlɔ lɛ akɛ eya nɔ ebu. 35  No hewɔ lɛ, nyɛyaa nɔ nyɛbua, ejaakɛ nyɛleee gbi nɔ ni shĩa lɛ nuŋtsɔ lɛ baaba, gbɛkɛ jio, nyɔɔŋteŋ jio, maŋkɛ* jio loo leebi maŋkpa jio, 36  bɔ ni afee ni kɛ́ eba trukaa lɛ, ekabana nyɛ akɛ nyɛmiiwɔ. 37  Shi nɔ ni mikɛɔ nyɛ nɛɛ, mɛi fɛɛ mikɛɔ lɛ: Nyɛyaa nɔ nyɛbua.”

Shishigbɛ Niŋmaa

Aloo “mɔ ni fiɔ shi kɛyawulaa shi.”
Kwɛmɔ Wiemɔi Titrii Amligbalamɔ lɛ.
Aloo “abɛbua.”
Sht. ŋm., “wuɔgbɛɛmɔ be.”