Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 12:1-44

12  Kɛkɛ ni eje shishi ekɛ nɔkwɛmɔnii* tsu nii kɛwie etsɔɔ amɛ akɛ: “Nuu ko fee wein ŋmɔ ni efo afabaŋ ewo he kɛkpe, ni etsa weinŋaa bu yɛ mli, ni ema mɔɔ; kɛkɛ ni ekɛhã okwaafoi apaayeli, ni efã gbɛ.  Be ni shɛ weinkpamɔ be lɛ, etsu nyɔŋ ko kɛtee okwaafoi lɛ aŋɔɔ koni eyaŋɔ wein ŋmɔ lɛ mli yibii lɛ eko kɛjɛ amɛŋɔɔ kɛba.  Shi amɛmɔ lɛ, amɛyi lɛ, ni amɛshwie lɛ kɛ edɛ̃ folo.  Esaa etsu nyɔŋ kroko kɛtee amɛŋɔɔ, ni lɛ lɛ amɛtswa eyitso nɔ ni amɛshwie ehiɛ shi.  Ni etsu mɔ kroko, ni lɛ lɛ amɛgbe lɛ, ni etsu mɛi krokomɛi babaoo hu, shi amɛyi mɛi nɛɛ ateŋ mɛi komɛi, ni amɛgbe amɛteŋ mɛi komɛi.  Eshwɛ mɔ kome, ebinuu ni esumɔɔ. Naagbee lɛ, etsu lɛ kɛtee amɛŋɔɔ ekɛɛ, ‘Amɛbaabu mibinuu lɛ.’  Shi nakai okwaafoi lɛ kɛɛkɛɛ amɛhe akɛ, ‘Niyelɔ lɛ nɛ. Nyɛbaa, nyɛhãa wɔgbea lɛ, ni gboshinii lɛ baatsɔ wɔnɔ.’  No hewɔ lɛ, amɛmɔ lɛ ni amɛgbe lɛ, ni amɛshɛ lɛ amɛfɔ̃ wein ŋmɔ lɛ sɛɛ.  Mɛni wein ŋmɔtsɛ lɛ baafee? Ebaaba ebagbe okwaafoi lɛ, ni ekɛ wein ŋmɔ lɛ baahã mɛi krokomɛi. 10  Ani nyɛkaneko ŋmalɛ nɛɛ dã akɛ: ‘Tɛ lɛ ni tsũtswalɔi lɛ kpoo lɛ, no nɔŋŋ ebatsɔ koŋtɛ titri* lɛ. 11  Yehowa* dɛŋ enɛ jɛ kɛba, ni eyɛ naakpɛɛ yɛ wɔhiŋmɛiiaŋ’?” 12  Enɛ hewɔ lɛ, amɛmiitao amɛmɔ lɛ, shi amɛmiishe asafoku lɛ gbeyei, ejaakɛ amɛkɔ sɛɛ akɛ amɛ hewɔ egba nɔkwɛmɔnɔ* lɛ. No hewɔ lɛ, amɛshi lɛ amɛtee. 13  No sɛɛ lɛ, amɛtsu Farisifoi lɛ ateŋ mɛi komɛi kɛ Herode sɛɛfilɔi kɛtee eŋɔɔ, bɔ ni afee ni amɛtsɔ nɔ ni ebaawie lɛ nɔ amɛdũ lɛ. 14  Be ni amɛyashɛ lɛ, mɛi nɛɛ kɛɛ lɛ akɛ: “Tsɔɔlɔ, wɔle akɛ owieɔ anɔkwale ni otaooo gbɔmɔ ko hiɛ nyam, ejaakɛ okwɛɛɛ bɔ ni mɛi ji yɛ kponɔgbɛ, shi moŋ otsɔɔ Nyɔŋmɔ gbɛ lɛ yɛ anɔkwale mli. Ani mla ŋmɛɔ gbɛ* akɛ awo yi too ahã Kaisare aloo mla eŋmɛɛɛ gbɛ? 15  Ani wɔwo aloo wɔkawo?” Akɛni eyɔse amɛsatofeemɔ lɛ hewɔ lɛ, ekɛɛ amɛ akɛ: “Mɛni hewɔ nyɛkaa mi? Nyɛkɛ denario abaa ni makwɛa.” 16  Amɛkɛ ekome ba, ni ekɛɛ amɛ akɛ: “Namɔ mfoniri kɛ niŋmaa nɛ?” Amɛkɛɛ lɛ akɛ: “Kaisare nɔ ni.” 17  Kɛkɛ ni Yesu kɛɛ akɛ: “Nyɛŋɔa Kaisare nibii nyɛhãa Kaisare, shi nyɛkɛ Nyɔŋmɔ nibii ahãa Nyɔŋmɔ.” Ni amɛnaa kpɛ amɛhe yɛ ehewɔ. 18  Agbɛnɛ, Sadukifoi lɛ, mɛi ni kɛɔ akɛ gbohiiashitee ko bɛ lɛ, ba ni amɛbabi lɛ akɛ: 19  “Tsɔɔlɔ, Mose ŋma hã wɔ akɛ kɛ́ mɔ ko nyɛmi nuu gbo ni eshi eŋa yɛ esɛɛ, shi eshiii bi ko yɛ esɛɛ lɛ, esa akɛ enyɛmi nuu lɛ aŋɔ eŋa lɛ ni ekɛ lɛ awo shwiei ehã enyɛmi nuu lɛ. 20  Nyɛmimɛi hii kpawo hi shi. Klɛŋklɛŋ mɔ lɛ kpee yoo, shi be ni egbo lɛ eshiii bi ko yɛ esɛɛ. 21  Ni mɔ ni ji enyɔ nɔ lɛ kɛ yoo lɛ bote gbalashihilɛ mli, shi egbo ni eshiii bi ko yɛ esɛɛ, ni mɔ ni ji etɛ nɔ lɛ hu nakai nɔŋŋ. 22  Ni mɛi kpawo lɛ fɛɛ shiii bi ko yɛ amɛsɛɛ. Naagbee kwraa lɛ, yoo lɛ hu gbo. 23  Yɛ gbohiiashitee lɛ mli lɛ, namɔ ŋa yoo lɛ baatsɔ? Ejaakɛ mɛi kpawo lɛ fɛɛ kɛ yoo lɛ bote gbalashihilɛ mli.” 24  Yesu kɛɛ amɛ akɛ: “Ani jeee Ŋmalɛi lɛ kɛ Nyɔŋmɔ hewalɛ lɛ ni nyɛleee lɛ hewɔ nyɛtɔ̃ɔ nɛɛ? 25  Ejaakɛ kɛ́ amɛte shi kɛjɛ gbohii ateŋ lɛ, hii boteŋ gbalashihilɛ mli, asaŋ akɛ yei hãŋ gbãla, shi moŋ amɛbaatamɔ bɔfoi ni yɔɔ ŋwɛi lɛ. 26  Shi gbohii lɛ, akɛ abaatee amɛ shi lɛ, ani nyɛkaneko yɛ Mose wolo lɛ mli, yɛ ŋmei tso lɛ he sane lɛ mli akɛ Nyɔŋmɔ kɛɛ lɛ akɛ: ‘Miji Abraham Nyɔŋmɔ lɛ, kɛ Isak Nyɔŋmɔ lɛ, kɛ Yakob Nyɔŋmɔ lɛ’? 27  Jeee gbohii a-Nyɔŋmɔ ni, shi moŋ, hiɛkãalɔi a-Nyɔŋmɔ ni. Nyɛmiitɔ̃ babaoo.” 28  Be ni woloŋmalɔi lɛ ateŋ mɔ kome ni ba jɛmɛ ni nu akɛ amɛmiitaa naa lɛ na akɛ ehã amɛ hetoo jogbaŋŋ lɛ, ebi lɛ akɛ: “Te nɔ ni ji kitãi lɛ fɛɛ ateŋ klɛŋklɛŋ nɔ* lɛ?” 29  Yesu hã hetoo akɛ: “Klɛŋklɛŋ nɔ lɛ ji, ‘Bo toi, Oo Israel, Yehowa* wɔ-Nyɔŋmɔ lɛ, Yehowa* kome ni, 30  ni esa akɛ osumɔ Yehowa* o-Nyɔŋmɔ lɛ kɛ otsui muu fɛɛ kɛ osusuma* muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.’ 31  Nɔ ni ji enyɔ lɛ nɛ, ‘Esa akɛ osumɔ onaanyo gbɔmɔ tamɔ bo diɛŋtsɛ ohe.’ Kitã ko bɛ ni he hiaa fe enɛɛmɛi.” 32  Woloŋmalɔ lɛ kɛɛ lɛ akɛ: “Tsɔɔlɔ, anɔkwale shiishi owie lɛ, ‘Mɔ Kome ni, ni mɔ kroko bɛ, ja lɛ kɛkɛ’; 33  ni akɛ mɔ baasumɔ lɛ kɛ etsui muu fɛɛ kɛ eniiashishinumɔ fɛɛ, kɛ enyɛmɔ fɛɛ, ni mɔ asumɔ enaanyo gbɔmɔ tamɔ esumɔɔ lɛ diɛŋtsɛ ehe lɛ jara wa kwraa fe shãa afɔlei kɛ afɔlei fɛɛ.” 34  Be ni Yesu na akɛ ehã hetoo kɛ hiɛshikamɔ lɛ, ekɛɛ lɛ akɛ: “Okɛ Nyɔŋmɔ Maŋtsɛyeli lɛ teŋ jekɛɛɛ.” Shi mɔ ko mɔ ko náaa ekãa kɛbi lɛ sane ko dɔŋŋ. 35  Shi be ni Yesu yaa nɔ etsɔɔ nii yɛ sɔlemɔwe lɛ, ekɛɛ akɛ: “Te feɔ tɛŋŋ ni woloŋmalɔi lɛ kɛɔ akɛ Kristo lɛ, David bi ni lɛ? 36  Mumɔ krɔŋkrɔŋ lɛ tsirɛ David diɛŋtsɛ ni ekɛɛ akɛ, ‘Yehowa* kɛɛ mi-Nuŋtsɔ lɛ akɛ: “Ta mininejurɔ nɔ kɛyashi be ni maŋɔ ohenyɛlɔi lɛ mawo onajiashi.”’ 37  Kɛ́ David diɛŋtsɛ tsɛɔ lɛ Nuŋtsɔ lɛ, belɛ te feɔ tɛŋŋ ni efeɔ ebi lɛ?” Ni asafoku babaoo lɛ miibo lɛ toi kɛ miishɛɛ. 38  Ni etsa nɔ yɛ enitsɔɔmɔ lɛ mli akɛ: “Nyɛkwɛa jogbaŋŋ yɛ woloŋmalɔi lɛ ahe, mɛi ni sumɔɔ akɛ amɛwo atadei yuuyui kɛnyiɛ ni amɛsumɔɔ jaji anɔ ŋamɔi 39  kɛ hiɛgbɛ sɛii* ni yɔɔ kpeehei lɛ anɔ taramɔ kɛ hiɛnaanɔbii agbɛhei ataramɔ yɛ gbɛkɛ okpɔlɔŋmɛi ashishi lɛ. 40  Amɛmiɔ yei okulafoi ashĩai,* ni bɔ ni afee ni mɛi ana amɛ lɛ,* amɛsɔleɔ sɔlemɔi kakadaji. Mɛnɛɛmɛi baaná fɔbuu kojomɔ ni naa wa waa.”* 41  Ni Yesu yata shi ni onia adekai lɛ mamɔ ehiɛgbɛ, ni ebɔi bɔ ni asafoku lɛ kɛ shika woɔ onia adekai lɛ amli lɛ kwɛmɔ, ni niiatsɛmɛi babaoo kɛ kapɛji babaoo miiwo mli. 42  Ni yoo okulafo ohiafo ko ba ni ekɛ kapɛji bibii enyɔ ni shɛɛɛ nɔ ko* bawo mli. 43  No hewɔ lɛ, etsɛ ekaselɔi lɛ kɛba eŋɔɔ ni ekɛɛ amɛ akɛ: “Lɛɛlɛŋ, miikɛɛ nyɛ akɛ yoo okulafo ohiafo nɛɛ kɛ babaoo ewo mli fe mɛi fɛɛ ni kɛ shika bawo onia adekai lɛ amli lɛ. 44  Ejaakɛ amɛ fɛɛ amɛkɛ nɔ ni amɛná ni eteke nɔ lɛ eko bawo mli, shi lɛ lɛ, ejɛ ehia mli ekɛ nii fɛɛ ni eyɔɔ, nɔ ni ekɛlɛɔ ehe lɛ fɛɛ, bawo mli.”

Shishigbɛ Niŋmaa

Aloo “abɛbuai.”
Sht. ŋm., “koŋ lɛ yitso.”
Kwɛmɔ Wiemɔi Titrii Amligbalamɔ lɛ.
Aloo “abɛbua.”
Aloo “eja.”
Aloo “nɔ ni he hiaa fe fɛɛ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “sɛii ni hi fe fɛɛ.”
Aloo “anibii.”
Aloo “amɛkwaa.”
Aloo “ni tsii waa.”
Sht. ŋm., “leptoi enyɔ ní naa shiɔ kwadra kome.”