Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 11:1-33

11  Agbɛnɛ, be ni amɛmiibɛŋkɛ Yerusalem, Betfage kɛ Betania, yɛ Oliv Gɔŋ lɛ he lɛ, etsu ekaselɔi lɛ ateŋ mɛi enyɔ  ni ekɛɛ amɛ akɛ: “Nyɛyaa akrowa ni nyɛnaa lɛ mli, ni kɛ́ nyɛbote mli nɔŋŋ lɛ, nyɛbaana teji bi ni aŋmɔ lɛ shi, ni mɔ ko mɔ ko tako enɔ pɛŋ kɛbashi amrɔ nɛɛ. Nyɛfɛnea lɛ ni nyɛkɛ lɛ abaa biɛ.  Ni kɛ́ mɔ ko kɛɛ nyɛ akɛ, ‘Mɛni hewɔ nyɛfeɔ enɛ?’ lɛ, nyɛkɛa akɛ, ‘Ehe miihia Nuŋtsɔ lɛ, ni etsɛŋ, ekɛbaaku sɛɛ kɛba biɛ.’”  No hewɔ lɛ, amɛtee ni amɛyana teji bi lɛ ni aŋmɔ lɛ shi yɛ shinaa ko naa, yɛ agbonaa yɛ gbɛ lɛ he, ni amɛfɛne lɛ.  Shi mɛi ni damɔ jɛmɛ lɛ ateŋ mɛi komɛi kɛɛ amɛ akɛ: “Mɛni nyɛfɛneɔ teji bi lɛ kɛyafee?”  Amɛkɛɛ amɛ nɔ ni Yesu kɛɛ lɛ pɛpɛɛpɛ, ni amɛŋmɛ amɛ gbɛ ni amɛtee.  Ni amɛkɛ teji bi lɛ bahã Yesu, ni amɛŋɔ amɛtadei anɔhaanɔi lɛ amɛshwie enɔ, ni eta nɔ.  Agbɛnɛ hu, mɛi pii ŋɔ amɛtadei anɔhaanɔi amɛha gbɛ lɛ nɔ, shi mɛi krokomɛi folɔ tsei aniji kɛjɛ jwɛiiaŋ.  Ni mɛi ni nyiɛ ehiɛ kɛ mɛi ni nyiɛ esɛɛ lɛ tee nɔ amɛbolɔ akɛ: “Ofainɛ, heremɔ eyiwala! Ajɔɔ mɔ ni baa yɛ Yehowa* gbɛ́i mli lɛ! 10  Ajɔɔ wɔtsɛ David Maŋtsɛyeli ni baa lɛ! Ofainɛ heremɔ eyiwala yɛ ŋwɛi flooflo!” 11  Ni ebote Yerusalem, ni etee sɔlemɔwe lɛ, ni ekwɛ nibii fɛɛ kɛkpe, shi akɛni je ena momo hewɔ lɛ, ekɛ Mɛi Nyɔŋma kɛ Enyɔ lɛ je kpo kɛtee Betania. 12  Enɔ jetsɛremɔ be ni amɛshiɔ Betania lɛ, enu hɔmɔ he. 13  Ni ehiŋmɛi gba agbami tso ko ni bai yɔɔ yi lɛ nɔ yɛ shɔŋŋ, ni etee eyakwɛ akɛ ebaana nɔ ko yɛ nɔ lo. Shi be ni eshɛ he lɛ, enaaa nɔ ko akɛ ja bai sɔŋŋ, ejaakɛ agbamiwoo be shɛko. 14  No hewɔ lɛ, ekɛɛ tso lɛ akɛ: “Mɔ ko mɔ ko yeŋ onɔ yibii dɔŋŋ.” No mli lɛ, ekaselɔi lɛ miibo toi. 15  Agbɛnɛ, amɛba Yerusalem. Ni eyabote sɔlemɔwe lɛ, ni ebɔi mɛi ni hɔ̃ɔ nii kɛ mɛi ni heɔ nii lɛ shwiemɔ yɛ sɔlemɔwe lɛ, ni etsirɛ shika tsakelɔi lɛ akpɔlɔi lɛ kɛ mɛi ni hɔ̃ɔ okpoi lɛ asɛii lɛ etswiatswiaa shi, 16  ni eŋmɛɛɛ gbɛ ni mɔ ko atere nɔ ko kɛtsɔ sɔlemɔwe lɛ. 17  Ni etsɔɔ amɛ nii ni ekɛɛ: “Ani aŋmako akɛ, ‘Abaatsɛ mishĩa lɛ sɔlemɔ shĩa kɛhã jeŋmaji lɛ fɛɛ’? Shi nyɛ lɛ, nyɛkɛfee ojotswalɔi atɛkplo.” 18  Ni osɔfoi tsiifoi lɛ kɛ woloŋmalɔi lɛ nu, ni amɛje shishi amɛtao bɔ ni amɛbaafee amɛgbe lɛ; shi amɛmiishe lɛ gbeyei ejaakɛ asafoku lɛ fɛɛ ahe jɔ̃ amɛhe yɛ enitsɔɔmɔ lɛ hewɔ. 19  Be ni je na lɛ, amɛje maŋ lɛ mli. 20  Shi leebi maŋkpa be ni amɛmiiho lɛ, amɛna agbami tso lɛ ni eŋala kɛ eshishifã fɛɛ. 21  Petro kai, ni ekɛɛ lɛ akɛ: “Rabi, kwɛmɔ! agbami tso lɛ ni olomɔ lɛ eŋala.” 22  Yesu here nɔ ekɛɛ amɛ akɛ: “Nyɛnáa hemɔkɛyeli yɛ Nyɔŋmɔ mli. 23  Lɛɛlɛŋ, miikɛɛ nyɛ akɛ, mɔ fɛɛ mɔ ni baakɛɛ gɔŋ nɛɛ akɛ, ‘Fãa oyagbee ŋshɔ lɛŋ,’ ni ejeee ŋwane yɛ etsuiŋ shi moŋ eyɛ hemɔkɛyeli akɛ nɔ ni ekɛɔ lɛ baaba mli lɛ, ebaaba mli ehã lɛ. 24  Enɛ hewɔ ni mikɛɔ nyɛ akɛ, nibii fɛɛ ni nyɛbaasɔle nyɛbi lɛ, nyɛnáa hemɔkɛyeli akɛ nyɛnine eshɛ nɔ momo, ni nyɛbaaná lɛ. 25  Ni kɛ́ nyɛdamɔ shi nyɛmiisɔle lɛ, nyɛkɛ nɔ fɛɛ nɔ ni nyɛyɔɔ nyɛshi mɔ ko lɛ afaa lɛ, koni nyɛ-Tsɛ ni yɔɔ ŋwɛi lɛ hu kɛ nyɛtɔmɔi afa nyɛ.” 26  — 27  Amɛba Yerusalem ekoŋŋ. Ni be ni enyiɛ sɔlemɔwe lɛ, osɔfoi tsiifoi lɛ kɛ woloŋmalɔi lɛ kɛ onukpai lɛ ba 28  ni amɛbakɛɛ lɛ akɛ: “Mɛɛ hegbɛ okɛfeɔ nibii nɛɛ? Aloo namɔ hã bo nɛkɛ hegbɛ nɛɛ ni okɛfeɔ nibii nɛɛ?” 29  Yesu kɛɛ amɛ akɛ: “Mabi nyɛ sane kome. Nyɛhãa mi hetoo, ni mi hu makɛɛ nyɛ nɔ hegbɛ ni mikɛfeɔ nibii nɛɛ. 30  Yohane baptisimɔ lɛ, ŋwɛi ejɛ aloo gbɔmɛi adɛŋ ejɛ? Nyɛhãa mi hetoo.” 31  No hewɔ lɛ, amɛbɔi niiahesusumɔ yɛ amɛteŋ amɛkɛɛ: “Kɛ́ wɔkɛɛ, ‘Ejɛ ŋwɛi’ lɛ, ebaakɛɛ akɛ, ‘Belɛ, mɛni hewɔ mɔ ni nyɛheee lɛ nyɛyeee lɛ?’ 32  Shi te wɔɔfee tɛŋŋ wɔkɛɛ akɛ, ‘Ejɛ gbɔmɛi adɛŋ’ lɛ?” Amɛmiishe asafoku lɛ gbeyei, ejaakɛ amɛ fɛɛ amɛbuɔ Yohane akɛ eji gbalɔ lɛɛlɛŋ. 33  No hewɔ lɛ, amɛhã Yesu hetoo amɛkɛɛ: “Wɔleee.” Yesu kɛɛ amɛ akɛ: “Belɛ, mi hu mikɛɛɛ nyɛ nɔ hegbɛ ni mikɛfeɔ nibii nɛɛ.”

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.