Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 10:1-52

10  Ni ete shi yɛ jɛmɛ ni eba Yudea husui lɛ anaa yɛ Yordan sɛɛ, ni asafoku ko bua amɛhe naa ekoŋŋ kɛba eŋɔɔ. Ni ebɔi amɛ nitsɔɔmɔ ekoŋŋ, taakɛ efɔɔ feemɔ lɛ.  Ni Farisifoi ba eŋɔɔ, ni akɛni amɛmiitao amɛka lɛ hewɔ lɛ, amɛbi kɛji mla ŋmɛɔ gbɛ ni nuu ashwie eŋa.*  Ehã amɛ hetoo akɛ: “Mɛɛ kitã Mose wo nyɛ?”  Amɛkɛɛ akɛ: “Mose hã hegbɛ akɛ aŋma shwiemɔ wolo ni ashwie yoo lɛ.”  Shi Yesu kɛɛ amɛ akɛ: “Nyɛtsuiŋwalɛ lɛ hewɔ ni eŋma kitã nɛɛ ehã nyɛ lɛ.  Shi kɛjɛ adebɔɔ shishijee lɛ, ‘Nuu kɛ yoo ebɔ amɛ.  Enɛ hewɔ lɛ, nuu baashi etsɛ kɛ enyɛ,  ni amɛyi enyɔ lɛ fɛɛ amɛbaatsɔ heloo kome,’ belɛ amɛjeee mɛi enyɔ dɔŋŋ, shi moŋ heloo kome.  No hewɔ lɛ, nɔ ni Nyɔŋmɔ eŋɔtsa lɛ,* gbɔmɔ ko akagbala mli.” 10  Be kroko be ni amɛyɔɔ shĩa lɛ, kaselɔi lɛ bɔi lɛ enɛ he sanebimɔ. 11  Ekɛɛ amɛ akɛ: “Mɔ fɛɛ mɔ ni shwieɔ eŋa ni ekɛ mɔ kroko boteɔ gbalashihilɛ mli lɛ, efite gbãla,* etɔ̃ yoo lɛ nɔ, 12  ni kɛji yoo ko tse ewu gbãla ni no sɛɛ lɛ, ekɛ mɔ kroko bote gbalashihilɛ mli lɛ, efite gbãla.”* 13  Agbɛnɛ, mɛi kɛ gbekɛbii bibii bɔi eŋɔɔ baa koni etara amɛhe, shi kaselɔi lɛ kã amɛhiɛ. 14  Be ni Yesu na enɛ lɛ, edɔ lɛ waa, ni ekɛɛ amɛ akɛ: “Nyɛhãa gbekɛbii bibii lɛ abaa miŋɔɔ; nyɛkatsĩa amɛ gbɛ, ejaakɛ mɛi ni tamɔ nɛkɛ lɛ anɔ ji Nyɔŋmɔ Maŋtsɛyeli lɛ. 15  Lɛɛlɛŋ, miikɛɛ nyɛ akɛ, mɔ fɛɛ mɔ ni hereee Nyɔŋmɔ Maŋtsɛyeli lɛ tamɔ gbekɛ bibioo ko lɛ, eboteŋ mli kɔkɔɔkɔ.” 16  Ni eloo gbekɛbii lɛ atuu ni ekɛ eniji ŋmɛlɛ amɛnɔ ni ebɔi amɛ jɔɔmɔ. 17  Be ni eyi gbɛ eyaa lɛ, nuu ko jo foi ebakula shi yɛ ehiɛ ni ebi lɛ akɛ: “Tsɔɔlɔ Kpakpa, mɛni esa akɛ mafee koni maná naanɔ wala?”* 18  Yesu kɛɛ lɛ akɛ: “Mɛni hewɔ otsɛɔ mi mɔ kpakpa? Mɔ ko mɔ ko bɛ ni ji mɔ kpakpa, akɛ ja mɔ kome pɛ, Nyɔŋmɔ. 19  Ole kitãi lɛ: ‘Kaagbe gbɔmɔ, kaafite gbãla,* kaaju, kaaye amale odase, kaashishiu mɔ ko, wo otsɛ kɛ onyɛ.’” 20  Nuu lɛ kɛɛ lɛ akɛ: “Tsɔɔlɔ, miye enɛɛmɛi fɛɛ nɔ kɛjɛ migbekɛbiiashi.” 21  Yesu kwɛ lɛ, ni ená suɔmɔ ehã lɛ, ni ekɛɛ, “Eshwɛ bo nɔ kome: Yaahɔ̃ɔ nii ni oyɔɔ lɛ ni okɛhã ohiafoi, ni obaaná jwetri yɛ ŋwɛi; ni oba obatsɔ misɛɛnyiɛlɔ.” 22  Shi ewerɛ ho ehe yɛ hetoo lɛ hewɔ ni eyiŋ etee kɛ dɔlɛ, ejaakɛ eyɛ nii pii. 23  Yesu kwɛ ehewɔ kɛkpe, ni ekɛɛ ekaselɔi lɛ akɛ: “Kwɛ bɔ ni ebaawa kɛhã mɛi ni yɔɔ shika lɛ akɛ amɛbaabote Nyɔŋmɔ Maŋtsɛyeli lɛ mli!” 24  Shi kaselɔi lɛ anaa kpɛ amɛhe yɛ ewiemɔi lɛ ahewɔ. Kɛkɛ ni Yesu here nɔ ekɛɛ akɛ: “Bii, nyɛkwɛa bɔ ni ewa akɛ aaabote Nyɔŋmɔ Maŋtsɛyeli lɛ mli! 25  Ewaaa hãaa yoma akɛ eeetsɔ abui hiŋmɛi mli fe nɔ ni niiatsɛ aaabote Nyɔŋmɔ Maŋtsɛyeli lɛ mli.” 26  Kɛ̃lɛ, amɛhe jɔ̃ amɛhe fe tsutsu lɛ, ni amɛkɛɛ lɛ* akɛ: “Namɔ yiwala abaanyɛ ahere mɔ?” 27  Yesu kwɛ amɛhiɛ tɛ̃ɛ ni ekɛɛ: “Gbɔmɛi agbɛfaŋ lɛ anyɛŋ enɛ afee, shi jeee nakai eji yɛ Nyɔŋmɔ gbɛfaŋ, ejaakɛ Nyɔŋmɔ nyɛɔ nii fɛɛ efeɔ.” 28  Ni Petro bɔi lɛ kɛɛmɔ akɛ: “Naa! Wɔshi nibii fɛɛ ni wɔbanyiɛ osɛɛ.” 29  Yesu kɛɛ akɛ: “Lɛɛlɛŋ, miikɛɛ nyɛ akɛ, mɔ ko mɔ ko bɛ ni eshi shĩa loo nyɛmimɛi hii loo nyɛmimɛi yei loo nyɛ loo tsɛ loo bii loo ŋmɔji yɛ mihewɔ kɛ sane kpakpa lɛ hewɔ 30  ní amrɔ nɛɛ enáŋ shĩai, nyɛmimɛi hii, nyɛmimɛi yei, nyɛmɛi, bii, kɛ ŋmɔji toi oha, kɛ yiwai hu, yɛ be nɛɛ mli, kɛ naanɔ wala hu yɛ shihilɛ gbɛjianɔtoo ni baaba lɛ* mli. 31  Shi klɛŋklɛŋ bii babaoo baatsɔmɔ sɛɛkpeebii, ni sɛɛkpeebii baatsɔmɔ klɛŋklɛŋ bii.” 32  Agbɛnɛ, amɛnyiɛ gbɛ lɛ nɔ, ni amɛmiikwɔ kɛmiiya Yerusalem, ni Yesu nyiɛ amɛhiɛ, ni amɛnaa ekpɛ amɛhe, shi mɛi ni nyiɛ sɛɛ lɛ bɔi gbeyeishemɔ. Ni eŋɔ Mɛi Nyɔŋma kɛ Enyɔ lɛ ekoŋŋ kɛtee afã ni ebɔi amɛ nibii ni baaba enɔ lɛ kɛɛmɔ akɛ: 33  “Naa! Wɔmiikwɔ kɛmiiya Yerusalem, ni abaaŋɔ gbɔmɔ Bi lɛ awo osɔfoi tsiifoi lɛ kɛ woloŋmalɔi lɛ adɛŋ. Amɛbaabu lɛ gbele fɔ, ni amɛbaaŋɔ lɛ amɛhã jeŋmajiaŋbii lɛ, 34  ni mɛi nɛɛ baaye ehe fɛo ni amɛbaafɛ̃ lajɔ̃ amɛshwie ehe, ni amɛkɛ kpelebii baayi lɛ, ni amɛbaagbe lɛ, shi gbii etɛ sɛɛ lɛ, ebaate shi.” 35  Yakobo kɛ Yohane, Zebedeo bihii enyɔ lɛ ba eŋɔɔ amɛbakɛɛ lɛ akɛ: “Tsɔɔlɔ, wɔmiitao ni ofee nɔ fɛɛ nɔ ni wɔbaabi bo lɛ ohã wɔ.” 36  Ekɛɛ amɛ akɛ: “Mɛni nyɛtaoɔ ni mafee mahã nyɛ?” 37  Amɛhere nɔ akɛ: “Hã wɔtara shi, mɔ kome yɛ oninejurɔ nɔ kɛ mɔ kome yɛ obɛku nɔ, yɛ onunyam lɛ mli.” 38  Shi Yesu kɛɛ amɛ akɛ: “Nyɛleee nɔ ni nyɛbiɔ lɛ. Ani nyɛbaanyɛ kpulu ni miinu lɛ nyɛnu aloo nyɛbaanyɛ nyɛhã abaptisi nyɛ kɛ baptisimɔ ni akɛbaptisiɔ mi lɛ?” 39  Amɛkɛɛ lɛ akɛ: “Wɔbaanyɛ.” Kɛkɛ ni Yesu kɛɛ amɛ akɛ: “Kpulu ni miinu lɛ, nyɛbaanu, ni abaabaptisi nyɛ kɛ baptisimɔ ni akɛbaptisiɔ mi lɛ. 40  Shi mininejurɔ kɛ mibɛku nɔ taramɔ lɛ, jeee minɔŋ ni mikɛbaahã, shi moŋ mɛi ni asaa ato amɛ lɛ anɔ ni.” 41  Be ni mɛi nyɔŋma ni eshwɛ lɛ nu he lɛ, amɛmli wo la amɛwo Yakobo kɛ Yohane. 42  Shi Yesu tsɛ amɛ kɛba eŋɔɔ ni ekɛɛ amɛ akɛ: “Nyɛle akɛ mɛi ni abuɔ amɛ jeŋmaji lɛ anɔyelɔi lɛ yeɔ amɛnɔ akɛ nuŋtsɔmɛi, ni amɛgbɔmɛi agboi lɛ hu yɛ amɛnɔ hewalɛ. 43  Esaaa akɛ afeɔ nakai yɛ nyɛteŋ; moŋ lɛ, mɔ fɛɛ mɔ ni miisumɔ akɛ etsɔ agbo yɛ nyɛteŋ lɛ, esa akɛ etsɔ nyɛsɔɔlɔ, 44  ni mɔ fɛɛ mɔ ni miisumɔ akɛ etsɔ klɛŋklɛŋ mɔ yɛ nyɛteŋ lɛ, esa akɛ etsɔ nyɔŋ kɛhã mɛi fɛɛ. 45  Ejaakɛ gbɔmɔ Bi lɛ tete baaa koni asɔmɔ lɛ, shi eba sɔɔmɔ moŋ, koni ebaŋɔ ewala* ehã akɛ kpɔmɔnɔ kɛkpɔ̃ mɛi babaoo.” 46  Ni amɛba Yeriko. Shi be ni ekɛ ekaselɔi lɛ kɛ asafoku babaoo ko miishi Yeriko lɛ, Bartimeo (Timeo bi lɛ), ni ji shwilafo nibalɔ lɛ ta gbɛ lɛ he. 47  Be ni enu akɛ Yesu, Nazarenyo lɛ ni lɛ, ebɔi bolɔmɔ akɛ: “Yesu, David Bi, naa mi mɔbɔ!” 48  Kɛkɛ ni mɛi babaoo bɔi ehiɛ kamɔ, ni amɛkɛɛ lɛ akɛ efee diŋŋ, shi etee nɔ ebolɔ waa fe tsutsu lɛ ekɛɛ: “David Bi, naa mi mɔbɔ!” 49  No hewɔ lɛ, Yesu wa damɔ shi ni ekɛɛ: “Nyɛtsɛa lɛ nyɛhãa mi.” No hewɔ lɛ, amɛtsɛ nuu shwilafo lɛ amɛkɛɛ lɛ akɛ: “Hã otsui anyɔ omli!* Tee shi; eetsɛ bo.” 50  Ni eshɛ etade nɔhaanɔ lɛ efɔ̃, ni ehuru edamɔ shi ni etee Yesu ŋɔɔ. 51  Kɛkɛ ni Yesu kɛɛ lɛ akɛ: “Mɛni otaoɔ ni mafee mahã bo?” Nuu shwilafo lɛ kɛɛ lɛ akɛ: “Rabuni,* hã mana nii ekoŋŋ.” 52  Ni Yesu kɛɛ lɛ akɛ: “Yaa. Ohemɔkɛyeli ehã ohe ewa bo.” Ni amrɔ lɛ, ena nii ni ebɔi esɛɛnyiɛmɔ yɛ gbɛ lɛ nɔ.

Shishigbɛ Niŋmaa

Hela wiemɔ ni akɛtsu nii lɛ tsɔɔ gbalatsemɔ yɛ mla naa.
Sht. ŋm., “efi ekpɛtɛ kɔɔŋtso kome lɛ.”
Kwɛmɔ Mat 5:27 sh. niŋ.
Kwɛmɔ Mat 5:27 sh. niŋ.
Sht. ŋm., “maná naanɔ wala akɛ gboshinii.”
Kwɛmɔ Mat 5:27 sh. niŋ.
Aloo eeenyɛ efee akɛ, “amɛkɛɛkɛɛ amɛhe.”
Aloo “yinɔ ni baaba lɛ.” Kwɛmɔ Wiemɔi Titrii Amligbalamɔ lɛ.
Aloo “esusuma.”
Aloo “Ná ekãa!”
Eshishi ji “Tsɔɔlɔ.”