Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Marko 1:1-45

1  Yesu Kristo, Nyɔŋmɔ Bi lɛ, he sane kpakpa lɛ shishijee:  Taakɛ aŋma yɛ gbalɔ Yesaia wolo lɛ mli lɛ: “(Naa! miitsu mibɔfo lɛ kɛmiitsɔ ohiɛ, mɔ ni baasaa ogbɛ lɛ eto lɛ.)  Mɔ ko gbee miibo yɛ ŋa lɛ nɔ* akɛ: ‘Nyɛsaa Yehowa* gbɛ lɛ! Nyɛfea etempɔŋi lɛ trɔmɔɔ.’”  Yohane Baptisilɔ lɛ yɛ ŋa lɛ nɔ,* eeshiɛ baptisimɔ ni feɔ tsuitsakemɔ kɛhã eshaifaa he okadi lɛ.  Ni mɛi ni yɔɔ Yudea niiaŋ fɛɛ, kɛ Yerusalembii fɛɛ yaa eŋɔɔ, ni ebaptisiɔ amɛ* yɛ Yordan Faa lɛ mli, be ni amɛjajeɔ amɛhe eshai lɛ kpetekplee lɛ.  Ni Yohane lɛ, ewoɔ yoma hetsɔi atade ni ekɛ kooloo hewolo hɛfiinɔ fiɔ ehɛ ni eyeɔ baalabii kɛ ŋa mli wo.  Ni eshiɛɔ ekɛɔ akɛ: “Mɔ ko ni he wa fe mi miiba yɛ misɛɛ, misaaa mɔ ni kotoɔ shi fɛneɔ etokotai anaa kpãi.  Nu mikɛbaptisi nyɛ, shi lɛ lɛ ekɛ mumɔ krɔŋkrɔŋ baabaptisi nyɛ.”  Nakai gbii lɛ amli lɛ, Yesu jɛ Nazaret yɛ Galilea eba, ni Yohane baptisi lɛ yɛ Yordan mli. 10  Ni be ni eje kpo kɛjɛ nu lɛ mli lɛ, amrɔ lɛ, ena akɛ ŋwɛi naa egbele ni mumɔ lɛ miikpeleke shi tamɔ okpo kɛmiiba enɔ. 11  Ni gbee ko jɛ ŋwɛi kɛɛ: “Bo ji mi-Bi ni misumɔɔ lɛ lɛ; mikpɛlɛ onɔ.” 12  Ni amrɔ lɛ, mumɔ lɛ tsirɛ lɛ koni eya ŋa lɛ nɔ.* 13  No hewɔ lɛ, etee nɔ ehi ŋa lɛ nɔ* gbii nyɔŋmai ejwɛ, ni Satan ka lɛ. Ekɛ ŋa mli kooloi lɛ yɔɔ jɛmɛ, ni ŋwɛibɔfoi lɛ sɔmɔ lɛ. 14  Agbɛnɛ, be ni amɔ Yohane sɛɛ lɛ, Yesu tee Galilea eyashiɛ Nyɔŋmɔ sane kpakpa lɛ 15  ni ekɛɛ: “Be ni ato lɛ eshɛ, ni Nyɔŋmɔ Maŋtsɛyeli lɛ ebɛŋkɛ nyɛ. Nyɛtsakea nyɛtsui, ni nyɛnáa hemɔkɛyeli yɛ sane kpakpa lɛ mli.” 16  Be ni enyiɛ Galilea Ŋshɔ* lɛ naa lɛ, ena Simon kɛ Simon nyɛmi nuu Andrea, ni amɛmiifɔ̃ amɛyai lɛ amɛmiiwo ŋshɔ lɛŋ, ejaakɛ wolɛi ji amɛ. 17  No hewɔ lɛ, Yesu kɛɛ amɛ akɛ: “Nyɛbanyiɛa misɛɛ, ni mafee nyɛ wolɛi ni baahɛ gbɔmɛi.” 18  Ni amrɔ lɛ, amɛshi amɛyai lɛ ni amɛnyiɛ esɛɛ. 19  Be ni etee hiɛ fioo lɛ, ena Yakobo, Zebedeo bi lɛ kɛ enyɛmi nuu Yohane, ni amɛyɛ amɛlɛlɛ mli amɛmiikpɛ amɛyai, 20  ni eshashaooo shi kwraa, ni etsɛ amɛ. No hewɔ lɛ, amɛshi amɛtsɛ Zebedeo kɛ apaafoi lɛ yɛ lɛlɛ lɛ mli ni amɛyanyiɛ esɛɛ. 21  Ni amɛbote Kapernaum. Be ni Hejɔɔmɔ Gbi lɛ shɛ nɔŋŋ lɛ, ebote kpeehe* lɛ ni ebɔi nitsɔɔmɔ. 22  Ni amɛhe jɔ̃ amɛhe yɛ gbɛ ni etsɔɔ nɔ etsɔɔ nii lɛ hewɔ, ejaakɛ etsɔɔ amɛ nii akɛ mɔ ni yɔɔ hegbɛ, shi jeee tamɔ woloŋmalɔi lɛ. 23  Nakai be lɛ mli nɔŋŋ lɛ, nuu ko yɛ amɛkpeehe lɛ ni mumɔ ni he tseee miiná enɔ hewalɛ, ni ebo ekɛɛ: 24  “Mɛni wɔkɛ bo yɔɔ feemɔ, Yesu, Nazarenyo? Oba wɔhiɛkpatamɔ? Mile mɔ tuuntu ni ji bo, Mɔ Krɔŋkrɔŋ ni jɛ Nyɔŋmɔ ŋɔɔ lɛ!” 25  Shi Yesu kã mumɔ lɛ hiɛ ekɛɛ: “Feemɔ diŋŋ, ni oje emli!” 26  Ni mumɔ ni he tseee lɛ hã ablami sha nuu lɛ, ni mumɔ ni he tseee lɛ bolɔ kɛ gbee ni wa, ni eje emli. 27  Anɔkwa, mɛi lɛ fɛɛ naa kpɛ amɛhe aahu akɛ amɛbɔi he susumɔ yɛ amɛteŋ amɛkɛɛ: “Mɛni nɛ? Tsɔɔmɔ hee nɛ! Ekɛ hewalɛ fãa mumɔi ni he tseee po ayi, ni amɛboɔ lɛ toi.” 28  Ni ehe sane gbɛ shwã oyayaayai yɛ he fɛɛ he yɛ Galilea kpokpaa lɛ nɔ fɛɛ. 29  Kɛkɛ ni amɛshi kpeehe lɛ ni Yakobo kɛ Yohane fata amɛhe kɛtee Simon kɛ Andrea shĩa lɛ. 30  No mli lɛ, Simon shaayoo kã shi kɛ atridii, ni amrɔ lɛ amɛkɛɛ lɛ yoo lɛ he sane. 31  Ni etee eŋɔɔ eyamɔ enine mli ni ewó enɔ. Atridii lɛ tse yɛ enɔ, ni ebɔi amɛ sɔɔmɔ. 32  Ni gbɛkɛ, be ni hulu enyɔ shi lɛ, mɛi lɛ kɛ helatsɛmɛi fɛɛ kɛ mɛi ni yɔɔ daimonioi bɔi eŋɔɔbaa; 33  ni maŋ muu lɛ fɛɛ babua amɛhe naa yɛ shinaa lɛ naa tuuntu. 34  Kɛkɛ ni etsa mɛi babaoo ni yeyeɔ helai srɔtoi lɛ, ni efãmɔ daimonioi babaoo, shi eŋmɛɛɛ daimonioi lɛ agbɛ ni amɛwie, ejaakɛ amɛle akɛ lɛ ji Kristo lɛ.* 35  Leebi maŋkpa be ni hiɛ gbeleko lɛ, ete shi ni eje kpo, ni eshi kɛtee he ko banee, ni ebɔi sɔlemɔ yɛ jɛmɛ. 36  Shi Simon kɛ mɛi ni fata ehe lɛ kpa shi amɛtao lɛ 37  ni amɛna lɛ, ni amɛkɛɛ lɛ akɛ: “Mɔ fɛɛ mɔ miitao bo.” 38  Shi ekɛɛ amɛ akɛ: “Nyɛhãa wɔyaa he kroko, maji ni bɛŋkɛ lɛ amli, koni mayashiɛ yɛ jɛmɛ hu, ejaakɛ enɛ hewɔ miba.” 39  Ni etee eyashiɛ yɛ amɛkpeehei lɛ yɛ Galilea niiaŋ fɛɛ ni efãmɔ daimonioi. 40  Kpitiyelɔ ko hu ba eŋɔɔ bakula shi ekpa lɛ fai ekɛɛ: “Kɛ́ oosumɔ lɛ, obaanyɛ ohã mihe atse.” 41  Kɛkɛ ni emusuŋ tsɔ lɛ ni ekpã enine mli eta ehe, ni ekɛɛ lɛ akɛ: “Miisumɔ! Ohe atse.” 42  Amrɔ lɛ kpiti lɛ tã yɛ ehe, ni ehe tse. 43  Ni ebɔ lɛ kɔkɔ kɛ hiɛdɔɔ, ni amrɔ lɛ, ewo lɛ gbɛ 44  ekɛɛ lɛ akɛ: “Kwɛmɔ ni okakɛɛ mɔ ko nɔ ko, shi moŋ yaa ni okɛ ohe ayatsɔɔ osɔfo lɛ, ní oŋɔ nibii ni Mose fã akɛ ahã lɛ ohã, yɛ ohe ni atsuu lɛ hewɔ, koni no afee odase kɛhã amɛ.” 45  Shi be ni nuu lɛ shi etee lɛ, eyabɔi sane lɛ gbaa babaoo ni ehã egbɛ eshwã hei babaoo, ni no hewɔ lɛ, Yesu nyɛɛɛ abote maŋ ko mli kpetekplee dɔŋŋ, shi ehi ŋa nɔ yɛ hei ni etse amɛhe banee. Kɛ̃lɛ, mɛi jɛɔ hei srɔtoi fɛɛ kɛbaa eŋɔɔ.

Shishigbɛ Niŋmaa

Kwɛmɔ Mat 3:1 sh. niŋ.
Kwɛmɔ Wiemɔi Titrii Amligbalamɔ lɛ.
Kwɛmɔ Mat 3:1 sh. niŋ.
Aloo “ekɛ amɛ woɔ nu mli; emuɔ amɛ mele.”
Kwɛmɔ Mat 3:1 sh. niŋ.
Kwɛmɔ Mat 3:1 sh. niŋ.
Kwɛmɔ Mat 4:18 sh. niŋ.
Kwɛmɔ Mat 4:23 sh. niŋ.
Aloo eeenyɛ efee akɛ, “amɛle mɔ ni eji.”