Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 9:1-62

9  Kɛkɛ ni etsɛ Mɛi Nyɔŋma kɛ Enyɔ lɛ kɛkpe ni ehã amɛ hewalɛ kɛ hegbɛ koni amɛkɛye daimonioi lɛ fɛɛ nɔ, ni amɛkɛtsa helai hu.  Ni etsu amɛ koni amɛyashiɛ Nyɔŋmɔ Maŋtsɛyeli lɛ ni amɛtsa helai,  ni ekɛɛ amɛ akɛ: “Nyɛkahiɛa nɔ ko kɛhã gbɛfãa lɛ, dɛhiɛmɔ tso jio, niyenii kotoku jio, aboloo jio, shika* jio; asaŋ nyɛkaŋɔa atadei enyɔ.*  Shi he fɛɛ he ni nyɛbaabote shĩa ko mli yɛ lɛ, nyɛhia jɛmɛ ni nyɛjɛa jɛmɛ nyɛshia kɛyaa.  Ni he fɛɛ he ni mɛi hereee nyɛ yɛ lɛ, kɛ́ nyɛmiishi nakai maŋ lɛ mli lɛ, nyɛkpokpoa nyɛnaji ahe mulu lɛ nyɛshwiea* koni no afee odase eshi amɛ.”  Kɛkɛ ni amɛyiŋ amɛtee ni amɛyakpa shikpɔŋkuku lɛ mli fɛɛ, kɛjɛ akrowa kome mli kɛtee akrowa kroko mli, ni amɛjaje sane kpakpa lɛ ni amɛtsa mɛi yɛ he fɛɛ he.  Agbɛnɛ Herode,* ni ji kpokpaa nɔyelɔ* lɛ, nu nibii ni yaa nɔ lɛ fɛɛ, ni eyiŋ futu lɛ naakpa ejaakɛ mɛi komɛi miikɛɛ akɛ atee Yohane shi kɛjɛ gbohii ateŋ,  shi mɛi krokomɛi miikɛɛ akɛ Elia epue, ni mɛi krokomɛi hu miikɛɛ akɛ blema gbalɔi lɛ ateŋ mɔ kome ete shi.  Herode kɛɛ akɛ: “Yohane lɛ, mifo eyi. Belɛ, namɔ ji mɔ ni minunuɔ nɛkɛ saji yɛ ehe nɛɛ?” No hewɔ lɛ, etao akɛ ena lɛ. 10  Be ni bɔfoi lɛ ku amɛsɛɛ lɛ, amɛbabɔ Yesu nibii fɛɛ ni amɛfee lɛ he amaniɛ. Ni eŋɔ amɛ ni ekɛ amɛ pɛ yahɔ he ko yɛ maŋ ni atsɛɔ lɛ Betsaida lɛ mli. 11  Shi be ni asafoku lɛ ná amɛle lɛ, amɛtiu lɛ. Ni ehere amɛ hiɛmɛɛ ni ebɔi Nyɔŋmɔ Maŋtsɛyeli lɛ he wiemɔ kɛ amɛ tsɔɔmɔ, ni etsa amɛteŋ mɛi ni tsamɔ he ehia amɛ lɛ. 12  Ni je bɔi namɔ. Agbɛnɛ, Mɛi Nyɔŋma kɛ Enyɔ lɛ tsi amɛbɛŋkɛ lɛ ni amɛkɛɛ lɛ akɛ: “Wo asafoku lɛ gbɛ koni amɛya akrowai kɛ koiasɛɛ ni jwere wɔhewɔ lɛ amli ni amɛyatao wɔɔhei kɛ niyenii, ejaakɛ he ni wɔyɔɔ nɛɛ etse ehe banee.” 13  Shi ekɛɛ amɛ akɛ: “Nyɛ nyɛhãa amɛ nɔ ko amɛyea.” Amɛkɛɛ akɛ: “Wɔbɛ nɔ ko fe aboloi enumɔ kɛ nu mli loi enyɔ, ja ekolɛ wɔ diɛŋtsɛ wɔtee wɔyahé niyenii wɔhã mɛi nɛɛ fɛɛ.” 14  Anɔkwa, amɛyi aaafee hii akpei enumɔ. Shi ekɛɛ ekaselɔi lɛ akɛ: “Nyɛhãa amɛtaraa shi kuikui aaafee mɛi nyɔŋmai enumɔ enumɔ.” 15  Ni amɛfee nakai, ni amɛhã amɛ fɛɛ amɛtara shi. 16  Ni ekɔlɔ aboloi enumɔ kɛ loi enyɔ lɛ, ni ekwɛ ŋwɛi, ni ejɔɔ nɔ. Ni ekumɔ mli ni ekɛbɔi kaselɔi lɛ hãmɔ koni amɛkɛmamɔ asafoku lɛ hiɛ. 17  No hewɔ lɛ, amɛ fɛɛ amɛye ni amɛtɔrɔ, ni amɛkɔlɔ fufuji ni shwɛ lɛ, kɛntɛŋi nyɔŋma kɛ enyɔ. 18  Sɛɛ mli be ni ekome too esɔleɔ lɛ, kaselɔi lɛ ba eŋɔɔ, ni ebi amɛ akɛ: “Namɔ asafoku lɛ kɛɔ akɛ miji?” 19  Amɛhere nɔ amɛkɛɛ: “Yohane Baptisilɔ lɛ, shi mɛi komɛi kɛɔ akɛ Elia, ni mɛi krokomɛi hu kɛɔ akɛ blema gbalɔi lɛ ateŋ mɔ kome ete shi.” 20  Kɛkɛ ni ekɛɛ amɛ akɛ: “Shi nyɛ lɛ, namɔ nyɛkɛɔ akɛ miji?” Petro hã hetoo akɛ: “Kristo lɛ, mɔ ni Nyɔŋmɔ etsu lɛ lɛ.” 21  Kɛkɛ ni efã amɛ kɛ hiɛdɔɔ akɛ amɛkakɛɛ mɔ ko mɔ ko sane nɛɛ, 22  shi ekɛɛ: “Esa akɛ gbɔmɔ Bi lɛ ana nɔ babaoo ni onukpai lɛ, osɔfoi tsiifoi lɛ, kɛ woloŋmalɔi lɛ akpoo lɛ ni agbe lɛ, ní yɛ gbi ni ji gbi etɛ lɛ nɔ lɛ, atee lɛ shi.” 23  Kɛkɛ ni etsa nɔ ekɛɛ mɛi lɛ fɛɛ akɛ: “Kɛ́ mɔ ko miisumɔ akɛ enyiɛ misɛɛ lɛ, ekwa ehe, ni ewó epiŋmɔ tso* lɛ gbi fɛɛ gbi, ni eya nɔ enyiɛ misɛɛ. 24  Ejaakɛ mɔ fɛɛ mɔ ni miisumɔ akɛ ebaa ewala* yi lɛ, ebaaŋmɛɛ lɛ, shi mɔ fɛɛ mɔ ni ewala* ŋmɛɔ lɛ yɛ mihewɔ lɛ, lɛ ji mɔ ni baabaa yi. 25  Anɔkwa, kɛ́ gbɔmɔ nine shɛ jeŋ muu lɛ fɛɛ nɔ shi ewala ŋmɛɛ lɛ aloo ekpãtã ewala hiɛ lɛ, mɛɛ nɔ kpakpa baajɛ mli aba kɛhã lɛ? 26  Ejaakɛ mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele lɛ, mɔ nɛɛ he baafee gbɔmɔ Bi lɛ hiɛgbele be ni eba yɛ lɛ diɛŋtsɛ enunyam lɛ kɛ e-Tsɛ nɔ lɛ kɛ ŋwɛibɔfoi krɔŋkrɔŋi lɛ anɔ lɛ mli lɛ. 27  Shi miikɛɛ nyɛ anɔkwale akɛ, mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɔkɔɔkɔ kɛyashi amɛbaana Nyɔŋmɔ Maŋtsɛyeli lɛ dã.” 28  Anɔkwa, be ni ewie wiemɔi nɛɛ sɛɛ aaafee gbii kpaanyɔ lɛ, eŋɔ Petro, Yohane, kɛ Yakobo efata ehe ni amɛkwɔ kɛtee gɔŋ lɛ nɔ koni eyasɔle. 29  Ni be ni esɔleɔ lɛ, ehiɛ su tsake ni etadei lɛ yɛ futafuta ni amɛkpɛlɛ kaŋkaŋ. 30  Ni naa! hii enyɔ kɛ lɛ miigba sane; amɛji Mose kɛ Elia. 31  Mɛi nɛɛ pue kɛ anunyam ni amɛbɔi eshimɔ kɛyaa ní eeba ebawo lɛ obɔ yɛ Yerusalem lɛ he wiemɔ. 32  No mli lɛ wɔ eŋɔ Petro kɛ mɛi ni fata ehe lɛ, shi be ni amɛhiɛ tsɛ̃ kwraa lɛ, amɛna enunyam lɛ kɛ hii enyɔ ni kɛ lɛ damɔ shi lɛ. 33  Ni be ni mɛi nɛɛ shiɔ lɛ amɛyaa lɛ, Petro kɛɛ Yesu akɛ: “Tsɔɔlɔ, ehi hã wɔ akɛ wɔyɛ biɛ. No hewɔ lɛ, hã wɔshĩ bui etɛ, onɔ ekome, Mose nɔ ekome, kɛ Elia nɔ ekome.” Shi eleee nɔ ni ewieɔ lɛ. 34  Shi be ni ewieɔ nibii nɛɛ, atatu ko pue ni ebɔi amɛnɔ haa. Be ni amɛbote atatu lɛ mli lɛ, amɛshe gbeyei. 35  Kɛkɛ ni gbee ko jɛ atatu lɛ mli kɛɛ: “Mɔ nɛ ji mi-Bi, mɔ ni ahala lɛ lɛ. Nyɛboa lɛ toi.” 36  Be ni gbee lɛ gbɛɛ lɛ, Yesu kome too ana. Shi amɛfee dioo ni nakai gbii lɛ amli lɛ, amɛbɔɔɔ mɔ ko mɔ ko nibii ni amɛna lɛ eko eko he amaniɛ. 37  Enɔ jetsɛremɔ, be ni amɛjɛ gɔŋ lɛ nɔ amɛkpeleke shi lɛ, asafoku babaoo ko kɛ lɛ bakpe. 38  Ni naa! nuu ko bo kɛjɛ asafoku lɛ teŋ ekɛɛ: “Tsɔɔlɔ, miikpa bo fai ni okwɛ mibinuu lɛ ejaakɛ mibi kome pɛ ji lɛ. 39  Ni naa! mumɔ ko ŋɔɔ lɛ, ni gbekɛ nuu lɛ bolɔɔ trukaa, ni mumɔ lɛ hãa ablami shaa lɛ ni enaa kwɛ̃ɔ afui, ni epilaa lɛ, ni ewa dani eshiɔ lɛ. 40  Mikpa okaselɔi lɛ fai koni amɛfã lɛ, shi amɛnyɛɛɛ.” 41  Yesu here nɔ ekɛɛ: “Oo yinɔbii ni bɛ hemɔkɛyeli ni bɛ amɛŋɛlɛ nɔ, be enyiɛ kwraa mikɛ nyɛ baahi shi ni maná nyɛhe tsui kɛyashi? Okɛ obi lɛ aba biɛ.” 42  Shi be ni gbekɛ nuu lɛ baa po lɛ, daimonio lɛ too lɛ etswa shi ni ehã ablami ni naa wa sha lɛ. Shi Yesu kã mumɔ ni he tseee lɛ hiɛ, ni etsa gbekɛ nuu lɛ, ni eŋɔ lɛ ehã etsɛ ekoŋŋ. 43  Ni amɛ fɛɛ amɛhe jɔ̃ amɛhe yɛ Nyɔŋmɔ hewalɛ kpele lɛ hewɔ. Be ni amɛ fɛɛ amɛnaa ekpɛ amɛhe yɛ nibii fɛɛ ni efeɔ lɛ hewɔ lɛ, ekɛɛ ekaselɔi lɛ akɛ: 44  “Nyɛboa toi jogbaŋŋ ni nyɛkaia wiemɔi nɛɛ, ejaakɛ abaajie gbɔmɔ Bi lɛ awo gbɔmɛi adɛŋ.” 45  Shi amɛnuuu nɔ ni ekɛɔ lɛ shishi. Anɔkwa, aŋɔtee amɛ koni amɛkanu shishi, ni amɛmiishe gbeyei akɛ amɛbaabi lɛ wiemɔ nɛɛ he sane. 46  Kɛkɛ ni ŋwanejee ko bate shi yɛ amɛteŋ yɛ mɔ ni ji agbo fe fɛɛ yɛ amɛteŋ lɛ he. 47  Akɛni Yesu le amɛtsuiiaŋ susumɔi hewɔ lɛ, eŋɔ gbekɛ bibioo ko, ni ekɛ lɛ badamɔ emasɛi, 48  ni ekɛɛ amɛ akɛ: “Mɔ fɛɛ mɔ ni hereɔ gbekɛ bibioo nɛɛ yɛ migbɛ́i mli lɛ hereɔ mi hu; ni mɔ fɛɛ mɔ ni hereɔ mi lɛ, ehereɔ mɔ ni tsu mi lɛ hu. Ejaakɛ mɔ fɛɛ mɔ ni feɔ enii akɛ mɔ ni baa shi yɛ nyɛ fɛɛ nyɛteŋ lɛ, lɛ ji agbo.” 49  Yohane here nɔ ekɛɛ: “Tsɔɔlɔ, wɔna mɔ ko ni kɛ ogbɛ́i lɛ miifãmɔ daimonioi, ni wɔbɔ mɔdɛŋ akɛ wɔtsĩ lɛ gbɛ ejaakɛ efataaa wɔ mɛi ni wɔnyiɛ osɛɛ lɛ ahe.” 50  Shi Yesu kɛɛ lɛ akɛ: “Nyɛkabɔa mɔdɛŋ akɛ nyɛbaatsĩ lɛ gbɛ, ejaakɛ mɔ fɛɛ mɔ ni eteee shi ewooo nyɛ lɛ, eyɛ nyɛgbɛfaŋ.” 51  Be ni gbii ni abaaŋɔ lɛ kɛya ŋwɛi lɛ eshɛ etã lɛ,* etswa efai shi akɛ ebaaya Yerusalem. 52  No hewɔ lɛ, etsu bɔfoi kɛtsɔ ehiɛ. Ni amɛyiŋ amɛtee ni amɛyabote Samariabii akrowa ko mli, bɔ ni afee ni amɛyasaa nibii amɛto lɛ. 53  Shi amɛhereee lɛ ejaakɛ eŋmɔ eyiŋ kpɔ* akɛ ebaaya Yerusalem. 54  Be ni Yakobo kɛ Yohane, ni ji ekaselɔi lɛ na enɛ lɛ, amɛkɛɛ akɛ: “Nuŋtsɔ, ani oosumɔ ni wɔkɛɛ ni la ajɛ ŋwɛi abakpãtã amɛhiɛ?” 55  Shi etsɔ ehe ni ekã amɛhiɛ. 56  No hewɔ lɛ, amɛtee akrowa kroko mli. 57  Agbɛnɛ, be ni amɛnyiɛ gbɛ lɛ nɔ amɛyaa lɛ, mɔ ko kɛɛ lɛ akɛ: “He fɛɛ he ni obaaya lɛ, manyiɛ osɛɛ.” 58  Shi Yesu kɛɛ lɛ akɛ: “Osɔi yɛ bui, ni ŋwɛi loofɔji hu yɛ tsũi, shi gbɔmɔ Bi lɛ bɛ he ko ni ekɛ eyitso ŋmɛɔ.” 59  Kɛkɛ ni ekɛɛ mɔ kroko akɛ: “Baatsɔ misɛɛnyiɛlɔ.” Nuu lɛ kɛɛ: “Nuŋtsɔ, ŋmɛɛ mi gbɛ ni maya mayafu mitsɛ dã.” 60  Shi ekɛɛ lɛ akɛ: “Hã gbohii lɛ afu amɛgbohii, shi bo lɛ yaa ni oyashiɛ Nyɔŋmɔ Maŋtsɛyeli lɛ yɛ he fɛɛ he.” 61  Ni mɔ kroko hu kɛɛ: “Nuŋtsɔ, manyiɛ osɛɛ, shi ŋmɛɛ mi gbɛ ni maya ni mikɛ mɛi ni yɔɔ miwe lɛ ayaye shɛɛ dã.” 62  Yesu kɛɛ lɛ akɛ: “Mɔ ni kɛ enine mɔɔ tsina kɔi mli ni ekuɔ ekuɛ ekwɛɔ nibii ni yɔɔ sɛɛ lɛ, esaaa Nyɔŋmɔ Maŋtsɛyeli lɛ.”

Shishigbɛ Niŋmaa

Sht. ŋm., “jwiɛtɛi.”
Aloo “atade kroko kɛfata nɔ ni nyɛwo lɛ he.”
Kwɛmɔ Mat 10:14 sh. niŋ.
Ni ji, Herode Antipa. Kwɛmɔ Wiemɔi Titrii Amligbalamɔ lɛ.
Hela mli lɛ, “tetrarke.”
Kwɛmɔ Wiemɔi Titrii Amligbalamɔ lɛ.
Aloo “esusuma.”
Aloo “esusuma.”
Sht. ŋm., “miihe ayi obɔ lɛ.”
Sht. ŋm., “ehiɛ efee klalo.”