Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 8:1-56

8  Enɛ sɛɛ etsɛɛɛ lɛ, eyakpa maji kɛ akrowai amli eshiɛ ni ejaje Nyɔŋmɔ Maŋtsɛyeli lɛ he sane kpakpa lɛ. Ni Mɛi Nyɔŋma kɛ Enyɔ lɛ fata ehe,  ni yei komɛi ni afãmɔ mumɔi fɔji yɛ amɛmli, ni atsa amɛhelai hu fata ehe: Maria ni atsɛɔ lɛ Magdalena, mɔ ni daimonioi kpawo je emli lɛ;  Yohana, Herode tsulɔnukpa Kusa ŋa lɛ; Susana; kɛ yei krokomɛi babaoo, mɛi ni kɛ amɛnibii sɔmɔɔ amɛ lɛ.  Agbɛnɛ, be ni asafoku babaoo ko kɛ mɛi ni fata ehe be ni ekpaa maji lɛ amli lɛ anaa bakpe shi lɛ, ekɛ nɔkwɛmɔnɔ* ko tsu nii kɛwie ekɛɛ:  “Nidulɔ ko yiŋ etee eyadu edumɔwui. Be ni eduɔ lɛ, ekomɛi yashwie gbɛ he ni anaanaa nɔ, ni ŋwɛi loofɔji baye.  Ekrokomɛi yashwie tɛsaa nɔ, ni be ni amɛkwɛ̃ lɛ, amɛŋala ejaakɛ amɛnáaa nu.  Ekrokomɛi yashwie ŋmeii ateŋ, ni ŋmeii lɛ ni kɛ amɛ dara lɛ mia amɛ.  Shi ekrokomɛi yashwie sũ kpakpa nɔ, ni be ni amɛkwɛ̃ lɛ, amɛwo yibii oha oha.” Be ni ewie nibii nɛɛ, ewó egbee nɔ ekɛɛ: “Mɔ ni yɔɔ toi ni ekɛaabo toi lɛ, hã ebo toi.”  Shi ekaselɔi lɛ bi lɛ nɔ ni nɔkwɛmɔnɔ* nɛɛ tsɔɔ. 10  Ekɛɛ akɛ: “Nyɛ lɛ akɛhã nyɛ akɛ nyɛnu Nyɔŋmɔ Maŋtsɛyeli lɛ he teemɔŋ saji krɔŋkrɔŋi lɛ ashishi, shi mɛi ni eshwɛ lɛ, awieɔ atsɔɔ amɛ yɛ nɔkwɛmɔnii* amli, no hewɔ lɛ, amɛkwɛɔ nii moŋ nɛ, shi yakatswaa amɛkwɛɔ lɛ, ni amɛnuɔ moŋ nɛ, shi amɛnuuu shishi. 11  Agbɛnɛ, nɔkwɛmɔnɔ* lɛ shishi nɛ: Dumɔwu lɛ ji Nyɔŋmɔ wiemɔ lɛ. 12  Nɔ ni yɔɔ gbɛ lɛ he lɛ ji mɛi ni nuɔ, ni no sɛɛ lɛ, Abonsam baa ebaŋɔɔ wiemɔ lɛ kɛjɛɔ amɛtsuii amli koni amɛkahe amɛye ni ahere amɛyiwala. 13  Nɔ ni yɔɔ tɛsaa lɛ nɔ lɛ ji mɛi ni kɛ́ amɛnu wiemɔ lɛ, amɛkɛ miishɛɛ mɔɔ mli, shi mɛi nɛɛ bɛ shishifã. Amɛheɔ amɛyeɔ be fioo, shi yɛ kaa be mli lɛ, amɛkwaa hemɔkɛyeli lɛ. 14  Shi nɔ ni yashwie ŋmeii ateŋ lɛ ji mɛi ni nuɔ, shi shihilɛ nɛɛ mli yeyeeyefeemɔi, ninámɔ, kɛ ŋɔɔmɔyelii lɛ gbalaa amɛ, ni emiaa amɛ kwraa ni amɛnyɛɛɛ amɛwo yibii ni saa kɛgbeɔ naa. 15  Shi nɔ ni adu yɛ sũ kpakpa nɔ lɛ ji mɛi ni kɛ́ amɛkɛ tsui kpakpa ni yɔɔ krɔŋŋ nu wiemɔ lɛ, amɛhiɛɔ mli ni amɛkɛ shifimɔ woɔ yibii. 16  “Mɔ ko esuuu kane, kɛkɛ lɛ ekɛ nɔ ko ebu nɔ loo ekɛma saatso shishi, shi moŋ ekɛmaa kanetso nɔ, koni mɛi ni baa mli lɛ ana la lɛ. 17  Ejaakɛ nɔ ko nɔ ko bɛ ni aŋɔtee ni ajieŋ lɛ kpo, asaŋ nɔ ko nɔ ko bɛ ni atsimɔ nɔ jogbaŋŋ ni aleŋ, ni ejeŋ kpo yɛ faŋŋ. 18  No hewɔ lɛ, nyɛjwɛŋmɔ ahia bɔ ni nyɛboɔ nii toi nyɛhãa lɛ nɔ, ejaakɛ mɔ fɛɛ mɔ ni yɔɔ nɔ ko lɛ, abaahã lɛ eko afata he, shi mɔ fɛɛ mɔ ni bɛ nɔ ko lɛ, nɔ ni esusuɔ akɛ eyɔɔ tete lɛ abaashɔ̃ yɛ edɛŋ.” 19  Ni enyɛ kɛ enyɛmimɛi hii lɛ ba eŋɔɔ, shi asafoku lɛ hewɔ lɛ, amɛnyɛɛɛ emasɛi amɛshɛ. 20  No hewɔ lɛ, abɔ lɛ amaniɛ akɛ: “Onyɛ kɛ onyɛmimɛi hii lɛ damɔ agbó lɛ naa amɛmiitao amɛna bo.” 21  Ni ehere nɔ ekɛɛ amɛ akɛ: “Minyɛ kɛ minyɛmimɛi hii ji mɛnɛɛmɛi ni nuɔ Nyɔŋmɔ wiemɔ lɛ ni amɛkɛtsuɔ nii lɛ.” 22  Gbi ko lɛ, ekɛ ekaselɔi lɛ bote lɛlɛ ko mli, ni ekɛɛ amɛ akɛ: “Nyɛhãa wɔfoa kpaakpo lɛ kɛyaa esɛɛgbɛ.” No hewɔ lɛ, amɛfã lɛlɛ lɛ. 23  Shi be ni amɛnyiɛ nu lɛ hiɛ kɛyaa lɛ, wɔ ŋɔ lɛ. Ni ahum ko ni naa wa tswa yɛ kpaakpo lɛ nɔ, ni lɛlɛ lɛ bɔi yimɔ kɛ nu, ni no hã amɛyaje oshara mli. 24  No hewɔ lɛ, amɛtee ni amɛyatsĩɛ lɛ amɛkɛɛ: “Tsɔɔlɔ, Tsɔɔlɔ, wɔhiɛ miihe akpãtã!” Kɛkɛ ni ete shi, ni ekã kɔɔyɔɔ lɛ kɛ nu ni efee hamahama lɛ hiɛ, ni amɛfee diŋŋ ni amɛŋmɛ dɛmm. 25  Kɛkɛ ni ekɛɛ amɛ akɛ: “Nɛgbɛ nyɛhemɔkɛyeli yɔɔ?” Shi gbeyei mɔmɔ amɛ ni amɛhe jɔ̃ amɛhe, ni amɛkɛɛkɛɛ amɛhe akɛ: “Namɔ tuuntu nɛ? Ejaakɛ efãa kɔɔyɔi kɛ nu tete, ni amɛboɔ lɛ toi.” 26  Ni amɛyakpeleke yɛ Gerasabii lɛ akpokpaa ni yɔɔ Galilea ŋɛlɛ nɔ lɛ ŋshɔ lɛ naa. 27  Be ni Yesu yi shi kɛba shikpɔŋ lɛ, nuu ko ni jɛ maŋ lɛ mli ni yɔɔ daimonioi lɛ kɛ lɛ bakpe. No mli lɛ, ehi shi be kplaŋŋ ni ewooo atade, ni ehiii shĩa, shi moŋ gbohii abui* ateŋ eyɔɔ. 28  Be ni ehiŋmɛi gba Yesu nɔ lɛ, ebo waa ni eho egbee ehiɛ, ni ekɛ gbee ni wa kɛɛ akɛ: “Mɛni mikɛ bo yɔɔ feemɔ, Yesu, Nyɔŋmɔ ni Nɔ Kwɔ Fe Fɛɛ lɛ Bi? Miikpa bo fai, kaapiŋ mi.” 29  (Ejaakɛ no mli lɛ Yesu miifã mumɔ ni he tseee lɛ yi akɛ eje nuu lɛ mli. No mli lɛ emɔɔ lɛ kpitiokpitio,* ni awo lɛ gboklɛi kɛ kɔsɔŋkɔsɔi shii abɔ, ni mɛi buɔ ehe, shi etserɛɔ nii ni akɛfimɔɔ lɛ lɛ amli, ni daimonio lɛ kpalaa lɛ kɛyaa hei ni etse amɛhe banee.) 30  Yesu bi lɛ akɛ: “Te atsɛɔ bo tɛŋŋ?” Ekɛɛ akɛ: “Lejio,”* ejaakɛ daimonioi pii ebote emli. 31  Ni amɛtee nɔ amɛkpa lɛ fai akɛ ekafã amɛ akɛ amɛyabote bu kwɔŋkwɔŋ lɛ mli. 32  No mli lɛ, kpolotoi akuu babaoo ko miiye nii yɛ jɛmɛ yɛ gɔŋ lɛ nɔ, no hewɔ lɛ, amɛkpa lɛ fai ni eŋmɛ amɛ gbɛ ni amɛyabote kpolotoi lɛ amli, ni eŋmɛ amɛ gbɛ. 33  Kɛkɛ ni daimonioi lɛ je nuu lɛ mli ni amɛyabote kpolotoi lɛ amli ni kpolotoi akuu lɛ wó foi gidigidi kɛjɛ gɔŋkpɔ lɛ nɔ kɛyabote kpaakpo lɛ mli ni amɛgboi. 34  Shi be ni kpolotoi akwɛlɔi lɛ na nɔ ni etee nɔ lɛ, amɛjo foi ni amɛyabɔ he amaniɛ yɛ maŋ lɛ mli kɛ koiasɛɛ. 35  Kɛkɛ ni mɛi je kpo koni amɛyakwɛ nɔ ni etee nɔ lɛ. Amɛba Yesu ŋɔɔ ni amɛbana nuu ni daimonioi lɛ eje emli lɛ, ewo atade ni ejwɛŋmɔ miitsu nii jogbaŋŋ, eta Yesu najiashi, ni amɛshe gbeyei. 36  Mɛi ni na enɛ lɛ bɔ amɛ bɔ ni fee ni ahã nuu ni yɔɔ daimonioi lɛ he wa lɛ lɛ he amaniɛ. 37  Kɛkɛ ni mɛi babaoo ni jɛ Gerasabii lɛ akpokpaa lɛ nɔ lɛ kpa Yesu fai akɛ eje amɛŋɔɔ ni eya, ejaakɛ gbeyei emɔmɔ amɛ naakpa. Ni eyabote lɛlɛ lɛ mli koni eshi eya. 38  Shi nuu lɛ ni daimonioi lɛ eje emli lɛ tee nɔ ekpa lɛ fai koni ekɛ lɛ aya, shi Yesu wo nuu lɛ gbɛ ekɛɛ: 39  “Kuu osɛɛ oya shĩa, ni oya nɔ ogba nɔ ni Nyɔŋmɔ efee ehã bo lɛ.” No hewɔ lɛ, eyiŋ etee, ni eyajaje nɔ ni Yesu fee ehã lɛ lɛ yɛ maŋ lɛ mli fɛɛ. 40  Be ni Yesu ku esɛɛ lɛ, asafoku lɛ here lɛ hiɛmɛɛ, ejaakɛ no mli lɛ amɛ fɛɛ amɛmiikpa lɛ gbɛ. 41  Shi naa! nuu ko ni atsɛɔ lɛ Yairo lɛ ba; nuu nɛɛ, onukpai ni kwɛɔ kpeehe lɛ nɔ lɛ ateŋ mɔ kome ni. Ni eho egbee Yesu naji anaa ni ebɔi lɛ faikpamɔ koni eba ewe lɛ, 42  ejaakɛ ebiyoo kome pɛ* ní eye aaafee afii nyɔŋma kɛ enyɔ lɛ miihe agbo. Be ni Yesu nyiɛ gbɛ eyaa lɛ, asafoku lɛ fifia lɛ. 43  Agbɛnɛ, yoo ko yɛ ni lá eho lɛ afii nyɔŋma kɛ enyɔ, ni mɔ ko mɔ ko nyɛko atsa lɛ. 44  Yoo nɛɛ baje esɛɛgbɛ ni eta etade nɔhaanɔ lɛ naamuu lɛ he, ni amrɔ lɛ lá ni hoɔ yoo lɛ sɛɛ fo. 45  No hewɔ lɛ, Yesu kɛɛ: “Namɔ ta mihe lɛ?” Be ni amɛ fɛɛ amɛmiikɛɛ akɛ jeee amɛ ni lɛ, Petro kɛɛ: “Tsɔɔlɔ, asafoku lɛ ebɔle ohe ni amɛmiififia bo.” 46  Shi Yesu kɛɛ: “Mɔ ko eta mihe, ejaakɛ mile akɛ hewalɛ eje mimli.” 47  Be ni yoo lɛ na akɛ enyɛɛɛ ekɛ ehe atee lɛ, eba kɛ hekpokpomɔ ni ebagbee ehiɛ ni ebajaje nɔ hewɔ ni eta ehe lɛ kɛ bɔ ni atsa lɛ amrɔ nɔŋŋ lɛ yɛ mɛi lɛ fɛɛ hiɛ. 48  Shi ekɛɛ yoo lɛ akɛ: “Biyoo, ohemɔkɛyeli ehã ohe ewa bo. Yaa yɛ toiŋjɔlɛ mli.” 49  Be ni ekã he ewieɔ lɛ, onukpa ni kwɛɔ kpeehe lɛ nɔ lɛ najiaŋdamɔlɔ ko ba ebakɛɛ: “Obiyoo lɛ egbo; kaagba Tsɔɔlɔ lɛ naa dɔŋŋ.” 50  Be ni Yesu nu enɛ lɛ, ehã hetoo akɛ: “Kaashe gbeyei, ná hemɔkɛyeli kɛkɛ, ni abaahere eyiwala.” 51  Be ni eshɛ shĩa lɛ, eŋmɛɛɛ mɔ ko mɔ ko gbɛ ni ekɛ lɛ abote mli akɛ ja Petro, Yohane, Yakobo, kɛ gbekɛ yoo lɛ tsɛ kɛ enyɛ kɛkɛ. 52  Shi mɛi lɛ fɛɛ miifo ni amɛmiigbala amɛhe mai kɛmiitsɔɔ akɛ amɛmiiye awerɛho yɛ gbekɛ yoo lɛ hewɔ. No hewɔ lɛ ekɛɛ akɛ: “Nyɛkpaa yaafo, ejaakɛ egboko shi wɔ ewɔ.” 53  Kɛkɛ ni amɛbɔi lɛ ŋmɔɔ kɛ hefɛoyeli ejaakɛ amɛle akɛ egbo. 54  Shi emɔ gbekɛ yoo lɛ nineshi, ni etsɛ lɛ ekɛɛ: “Gbekɛ, tee shi!” 55  Ni emumɔ* ku sɛɛ ba emli, ni amrɔ lɛ ete shi, ni efã akɛ ahã gbekɛ yoo lɛ nɔ ko ni eye. 56  Anɔkwa, efɔlɔi lɛ amii shɛ amɛhe naakpa, shi efã amɛ akɛ amɛkahã mɔ ko le nɔ ni etee nɔ lɛ.

Shishigbɛ Niŋmaa

Aloo “abɛbua.”
Aloo “abɛbua.”
Aloo “abɛbuai.”
Aloo “abɛbua.”
Aloo “gbohii akaimɔ bui.”
Aloo eeenyɛ efee akɛ, “Ená enɔ hewalɛ be kplaŋŋ.”
Kwɛmɔ Mat 26:53 sh. niŋ.
Sht. ŋm., “ebiyoo koome.”
Aloo “ewala mumɔ.”