Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 7:1-50

YITSEI LƐ AMLI SAJI

  • Asraafoiatsɛ ko hemɔkɛyeli (1-10)

  • Yesu tee yoo okulafo ko binuu shi yɛ Nain (11-17)

  • Ajie Yohane Baptisilɔ lɛ yi (18-30)

  • Abu yinɔ ní booo toi lɛ fɔ (31-35)

  • Akɛ yoo efɔŋfeelɔ ko he eshai fa lɛ (36-50)

    • Mɛi ni hiɛ nyɔmɔ ahe nɔkwɛmɔnɔ lɛ (41-43)

7  Be ni egbe nɔ ni eyɔɔ mɛi lɛ kɛɛmɔ lɛ naa lɛ, ebote Kapernaum.  No mli lɛ, asraafoiatsɛ* ko nyɔŋ ni eshwɛɛɛ ehe lɛ he miiye waa ni eehe egbo.  Be ni enu Yesu he lɛ, etsu Yudafoi lɛ anukpai komɛi kɛtee eŋɔɔ koni amɛyakpa lɛ fai akɛ eba ni ebatsa enyɔŋ lɛ.  Amɛba Yesu ŋɔɔ ni amɛbabɔi lɛ faikpamɔ kɛ hiɛdɔɔ amɛkɛɛ: “Esa mɔ ni ofeɔ enɛ ohãa lɛ,  ejaakɛ esumɔɔ wɔmaŋ lɛ, ni lɛ ema wɔkpeehe lɛ.”  No hewɔ lɛ, Yesu kɛ amɛ tee. Shi be ni eshwɛ fioo ni ebaashɛ shĩa lɛ, no mli lɛ asraafoiatsɛ lɛ etsu enanemɛi momo koni amɛbakɛɛ lɛ akɛ: “Onukpa, kaagba ohe naa, ejaakɛ misaaa mɔ ni obaa mishĩa.  No hewɔ ni mibuuu mihe akɛ misa mɔ ni baa oŋɔɔ lɛ. Shi hã wiemɔ lɛ ajɛ onaa, ni ohã mitsulɔ lɛ he awa lɛ.  Ejaakɛ mi hu gbɔmɔ ni yɔɔ mɔ ko shishi ji mi moŋ, shi miyɛ asraafoi yɛ mishishi, ni mikɛɔ mɔ nɛ akɛ, ‘Yaa!’ ni eyaa, ni mikɛɔ mɔ kroko akɛ, ‘Ba!’ ni ebaa, ni mikɛɔ minyɔŋ akɛ, ‘Feemɔ enɛ!’ ni efeɔ.”  Be ni Yesu nu enɛ lɛ, ehe fee lɛ naakpɛɛ, ni etsɔ ehe ehã asafoku ni nyiɛ esɛɛ lɛ, ni ekɛɛ amɛ akɛ: “Miikɛɛ nyɛ akɛ, minako mɔ ko yɛ Israel tete ni hemɔkɛyeli da tamɔ nɛkɛ dã.” 10  Ni be ni mɛi ni atsu amɛ lɛ ku amɛsɛɛ kɛtee shĩa lɛ, amɛyana nyɔŋ lɛ ni ehe ewa lɛ. 11  No sɛɛ etsɛɛɛ lɛ, efã gbɛ kɛtee maŋ ko ni atsɛɔ lɛ Nain lɛ mli, ni ekaselɔi lɛ kɛ asafoku babaoo ko fata ehe kɛfã gbɛ lɛ. 12  Be ni ebɛŋkɛ maŋ lɛ agbó lɛ naa lɛ, naa! atere nuu ko ni egbo kɛmiije kpo, ni enyɛ bi kome pɛ* ji lɛ. Kɛfata he lɛ, okulafo ji yoo lɛ. Ni maŋ lɛŋ bii pii hu fata yoo lɛ he. 13  Be ni Nuŋtsɔ lɛ hiŋmɛi gba yoo lɛ nɔ lɛ, emusuŋ tsɔ lɛ yɛ ehe, ni ekɛɛ lɛ akɛ: “Kpa yaafo.” 14  Kɛkɛ ni etsi ebɛŋkɛ nɔ ni gbonyo lɛ kã nɔ lɛ,* ni eta he, ni mɛi ni tere lɛ lɛ wa damɔ shi. Ni ekɛɛ akɛ: “Oblanyo, miikɛɛ bo akɛ, tee shi!” 15  Ni mɔ ni egbo lɛ te shi eta shi ni ebɔi wiemɔ, ni Yesu kɛ lɛ hã enyɛ. 16  Ni gbeyei mɔmɔ amɛ fɛɛ, ni amɛbɔi Nyɔŋmɔ hiɛnyamwoo amɛkɛɛ: “Atee gbalɔ kpele ko shi yɛ wɔteŋ,” ni “Nyɔŋmɔ egbala ejwɛŋmɔ kɛba emɛi lɛ anɔ.” 17  Ni ehe sane nɛɛ gbɛ shwã Yudea fɛɛ kɛ jɛmɛ niiaŋ fɛɛ. 18  Agbɛnɛ, Yohane kaselɔi lɛ yabɔ lɛ nibii nɛɛ fɛɛ he amaniɛ. 19  No hewɔ lɛ, Yohane tsɛ ekaselɔi lɛ ateŋ mɛi enyɔ kɛba eŋɔɔ ni etsu amɛ Nuŋtsɔ lɛ ŋɔɔ koni amɛyabi lɛ akɛ: “Ani bo ji Mɔ ni Baa lɛ, aloo wɔkpa mɔ kroko gbɛ?” 20  Be ni hii lɛ ba Yesu ŋɔɔ lɛ, amɛkɛɛ akɛ: “Yohane Baptisilɔ lɛ tsu wɔ oŋɔɔ koni wɔbabi akɛ, ‘Ani bo ji Mɔ ni Baa lɛ, aloo wɔkpa mɔ kroko hu gbɛ?’” 21  Nakai ŋmɛlɛtswaa lɛ nɔ lɛ, etsa mɛi pii ni he tseee amɛ kɛ mɛi ni yeɔ helai ni naa wawai, efãmɔ mumɔi fɔji, ni eduro mɛi babaoo ni eshwila lɛ ni amɛna nii. 22  Ni ehere nɔ ekɛɛ amɛ akɛ: “Nyɛyaa ni nyɛyagbaa Yohane nɔ ni nyɛna kɛ nɔ ni nyɛnu nɛɛ akɛ: Shwilafoi miina nii, akpakei miinyiɛ, aahã kpitiyelɔi ahe miitse, toimulɔi miinu nii, aatee gbohii ashi, ni aajaje sane kpakpa lɛ aatsɔɔ ohiafoi. 23  Mɔ ni nane etɔ̃tɔko yɛ mihewɔ lɛ yɛ miishɛɛ.” 24  Be ni Yohane bɔfoi lɛ etee lɛ, Yesu bɔi asafoku lɛ kɛɛmɔ yɛ Yohane he akɛ: “Mɛni nyɛtee ŋa lɛ nɔ* koni nyɛyakwɛ? Gãlã ni kɔɔyɔɔ hosoɔ? 25  Belɛ, mɛni mɔ nyɛtee kwɛmɔ? Nuu ni esaa ehe kɛ atadei bɔdɔbɔdɔi?* Naa! mɛi ni woɔ atade fɛfɛo ni amɛyɔɔ ogbɔjɔ shihilɛ mli lɛ, maŋtsɛmɛiawei amɛyɔɔ. 26  Belɛ, mɛni kwraa nyɛtee kwɛmɔ mɔ? Gbalɔ? Hɛɛ, miikɛɛ nyɛ akɛ nakai ni, ni efe gbalɔ tete. 27  Mɔ nɛ ji mɔ ni aŋma yɛ ehe akɛ: ‘Naa! miitsu mibɔfo lɛ kɛmiitsɔ ohiɛ, mɔ ni baasaa ogbɛ lɛ eto bo lɛ.’ 28  Miikɛɛ nyɛ akɛ, mɛi ni yei fɔ amɛ lɛ ateŋ mɔ ko bɛ ni fe Yohane, shi mɔ ni baa shi yɛ Nyɔŋmɔ Maŋtsɛyeli lɛ mli lɛ fe lɛ.” 29  (Be ni mɛi lɛ fɛɛ kɛ toohelɔi lɛ nu enɛ lɛ, amɛjaje akɛ Nyɔŋmɔ ji jalɔ, akɛni abaptisi amɛ kɛ Yohane baptisimɔ lɛ hewɔ. 30  Shi Farisifoi lɛ kɛ mɛi ni le Mla lɛ jogbaŋŋ lɛ ebuuu yiŋ ni Nyɔŋmɔ eto ehã amɛ lɛ,* akɛni Yohane ebaptisiko amɛ lɛ hewɔ.) 31  “No hewɔ lɛ, namɔ he mikɛ nɛkɛ yinɔbii nɛɛ baato, ni namɔ amɛtamɔ? 32  Amɛtamɔ gbekɛbii bibii ni tara jara nɔ, ni bolɔɔ amɛtsɛtsɛɔ amɛhe ni amɛkɛɔ akɛ: ‘Wɔkpã bɛlɛ wɔhã nyɛ, shi nyɛjooo; wɔwo yara, shi nyɛfooo.’ 33  Nakai nɔŋŋ Yohane Baptisilɔ lɛ eba, eyeee aboloo, asaŋ enuuu wein, shi nyɛkɛɔ akɛ: ‘Eyɛ daimonio.’ 34  Gbɔmɔ Bi lɛ eba, eyeɔ nii ni enuɔ nɔ ko, shi nyɛkɛɔ akɛ: ‘Naa! Nuu fufeelɔ kɛ weinnulɔ, toohelɔi kɛ eshafeelɔi anaanyo!’ 35  Fɛɛ mli lɛ, abuɔ hiɛshikamɔ jalɔ* yɛ ebii lɛ* fɛɛ naa.” 36  Ni Farisifoi lɛ ateŋ mɔ kome tee nɔ ekpa Yesu fai koni ekɛ lɛ abaye nii. No hewɔ lɛ, ebote Farisifonyo lɛ shĩa lɛ mli ni eyata okpɔlɔ lɛ he. 37  Ni naa! yoo ko ni ale lɛ yɛ maŋ lɛ mli akɛ eji eshafeelɔ lɛ ná ele akɛ eta niyeniiashi* yɛ Farisifonyo lɛ shĩa, ni ekɛ alabastro tɔ kɛ emli mu ni jeɔ ŋma ba. 38  Ebadamɔ Yesu najiashi yɛ esɛɛgbɛ, ni yoo lɛ fo ni ekɛ eyaafonui lɛ bɔi enaji ahe fɔɔ, ni ekɛ eyitsɔi tsumɔ yaafonui lɛ. Agbɛnɛ hu, yoo lɛ kɛ suɔmɔ shɔ enaji ahe ni efɔse mu ni jeɔ ŋma lɛ eshwie nɔ. 39  Be ni Farisifonyo ni fɔ̃ lɛ nine lɛ na enɛ lɛ, ekɛɛ yɛ emli akɛ: “Nuu nɛɛ, gbalɔ ji lɛ lɛɛlɛŋ kulɛ, ebaale nɔ gbɔmɔ kɛ nɔ yoo ni taa ehe lɛ, akɛ eshafeelɔ ji lɛ.” 40  Shi Yesu here nɔ ekɛɛ lɛ akɛ: “Simon, miyɛ nɔ ko ni makɛɛ bo.” Ekɛɛ akɛ: “Tsɔɔlɔ, kɛɛmɔ!” 41  “Hii enyɔ komɛi hiɛ nifalɔ ko nyɔmɔ; mɔ kome hiɛ nyɔmɔ denarioi ohai enumɔ, shi mɔ kroko lɛ, nyɔŋmai enumɔ. 42  Akɛni amɛbɛ nɔ ko ni amɛkɛbaawo lɛ nyɔmɔ hewɔ lɛ, ekɛke amɛyi enyɔ lɛ fɛɛ tswaa. No hewɔ lɛ, amɛteŋ namɔ baasumɔ lɛ waa?” 43  Simon hã hetoo akɛ: “Misusuɔ akɛ mɔ ni ekɛ babaoo ke lɛ lɛ.” Ekɛɛ akɛ: “Okojo jogbaŋŋ.” 44  Ni etsɔ ehiɛ ehã yoo lɛ ni ekɛɛ Simon akɛ: “Oona yoo nɛɛ? Mibote oshĩa lɛ mli; ohãaa mi nu ni mikɛfɔ minaji ahe. Shi yoo nɛɛ kɛ eyaafonui fɔ minaji ahe ni ekɛ eyitsɔi tsumɔ. 45  Oshɔɔɔ minaa, shi yoo nɛɛ, kɛjɛ ŋmɛlɛtswaa nɔ ni miba mli nɛɛ, efɔ̃ko minaji ahe shɔmɔ kɛ suɔmɔ. 46  Ofɔseee mu oshwieee miyiteŋ, shi yoo nɛɛ fɔse mu ni jeɔ ŋma eshwie minaji anɔ. 47  Enɛ hewɔ lɛ, miikɛɛ bo akɛ, eyɛ mli akɛ ehe eshai lɛ fa* moŋ, shi akɛfa lɛ ejaakɛ ejie suɔmɔ babaoo kpo. Shi mɔ ni akɛ fioo faa lɛ lɛ, ejieɔ suɔmɔ fioo kpo.” 48  Kɛkɛ ni ekɛɛ yoo lɛ akɛ: “Aŋɔ ohe eshai lɛ afa bo.” 49  Mɛi ni kɛ lɛ tara okpɔlɔ lɛ he lɛ bɔi amɛhe kɛɛmɔ akɛ: “Namɔ ji mɔ nɛɛ ni ŋɔɔ eshai po efaa lɛ?” 50  Shi ekɛɛ yoo lɛ akɛ: “Ohemɔkɛyeli ehere oyiwala; yaa yɛ toiŋjɔlɛ mli.”

Shishigbɛ Niŋmaa

Mɔ ni kwɛɔ asraafoi 100 nɔ.
Sht. ŋm., “bi koome.”
Aloo “gbonyo saa lɛ.”
Kwɛmɔ Mat 3:1 sh. niŋ.
Aloo “atadei kpakpai?”
Aloo “Nyɔŋmɔ gbɛtsɔɔmɔ lɛ.”
Aloo “bem.”
Aloo “yɛ yibii ni ewoɔ lɛ.”
Aloo “eta okpɔlɔ lɛ he.”
Aloo “dara.”