Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 6:1-49

6  Agbɛnɛ, yɛ hejɔɔmɔ gbi ko nɔ lɛ, eyatsɔ ŋmaa ŋmɔji amli, ni ekaselɔi lɛ kpɔlɔ ŋmaa lɛ ni amɛkposa yɛ amɛdɛŋ ni amɛkpe.  Kɛkɛ ni Farisifoi lɛ ekomɛi kɛɛ akɛ: “Mɛni hewɔ nyɛfeɔ nɔ ni mla eŋmɛɛɛ gbɛ akɛ afeɔ yɛ Hejɔɔmɔ Gbi lɛ nɔ lɛ?”  Shi Yesu here nɔ ekɛɛ amɛ akɛ: “Ani nyɛkaneko nɔ ni David fee be ni hɔmɔ ye lɛ kɛ hii ni fata ehe lɛ?  Bɔ ni ebote Nyɔŋmɔ we lɛ ni akɛ aboloi ni akɛma Nyɔŋmɔ hiɛ* lɛ hã lɛ ni eye ni ehã hii ni fata ehe lɛ hu eko lɛ, nɔ ko ni mla eŋmɛɛɛ gbɛ akɛ mɔ ko aye, akɛ ja osɔfoi lɛ kɛkɛ lɛ?”  Kɛkɛ ni ekɛɛ amɛ akɛ: “Gbɔmɔ Bi lɛ ji Hejɔɔmɔ Gbi lɛ Nuŋtsɔ.”  Yɛ hejɔɔmɔ gbi kroko nɔ lɛ, ebote kpeehe lɛ ni ebɔi nitsɔɔmɔ. Ni nuu ko yɛ jɛmɛ ni eninejurɔ egbo.  Agbɛnɛ, woloŋmalɔi lɛ kɛ Farisifoi lɛ miikwɛ Yesu gãa akɛ ebaatsa hela yɛ Hejɔɔmɔ Gbi lɛ nɔ lo, bɔ ni afee ni amɛná gbɛ ko nɔ amɛtsɔ amɛkɛ sane afɔ̃ enɔ.  Shi akɛni ele amɛsusumɔ hewɔ lɛ, ekɛɛ nuu ni nine egbo lɛ akɛ: “Tee shi ni obadamɔ teŋ.” Ni ete shi ebadamɔ jɛmɛ.  Kɛkɛ ni Yesu kɛɛ amɛ akɛ: “Mibabi nyɛ nɔ ko, Ani Hejɔɔmɔ Gbi lɛ nɔ lɛ, mla ŋmɛɔ gbɛ akɛ afeɔ nɔ kpakpa loo nɔ fɔŋ, akɛ abaa wala* ko yi aloo akpãtã ehiɛ?” 10  Ni be ni ekwɛ amɛ fɛɛ amɛhiɛiaŋ kɛkpe lɛ, ekɛɛ nuu lɛ akɛ: “Kpã onine mli.” Efee nakai, ni enine lɛ hi ekoŋŋ. 11  Shi amɛmli fu waa, ni amɛkɛ amɛhe bɔi wiemɔ yɛ nɔ ni amɛbaafee Yesu lɛ he. 12  Nakai gbii lɛ eko nɔ lɛ, etee gɔŋ lɛ nɔ koni eyasɔle, ni esɔle ehã Nyɔŋmɔ nyɔɔŋ lɛ mli fɛɛ. 13  Shi be ni je tsɛre lɛ, etsɛ ekaselɔi lɛ kɛba eŋɔɔ ni ehala amɛteŋ mɛi nyɔŋma kɛ enyɔ, mɛi ni etsɛ amɛ bɔfoi hu lɛ: 14  Simon, mɔ ni ewo lɛ Petro hu lɛ, kɛ enyɛmi Andrea, Yakobo, Yohane, Filipo, Bartolomeo, 15  Mateo, Toma, Yakobo ni ji Alfeo binuu lɛ; Simon, mɔ ni atsɛɔ lɛ “hiɛdɔlɔ lɛ,” 16  Yuda, ni ji Yakobo binuu lɛ, kɛ Yuda Iskariot, mɔ ni tsɔ sɛɛgbɛtsɔɔlɔ lɛ. 17  Ni ekɛ amɛ kpeleke shi kɛba ni ebadamɔ he ko ni yɔɔ trɛnɛɛ, ni ekaselɔi lɛ babaoo kɛ asafoku babaoo ni jɛ Yudea kɛ Yerusalem, kɛ Tiro kɛ Sidon ni ji ŋshɔnaa kpokpaa lɛ niiaŋ fɛɛ lɛ yɛ jɛmɛ, ni amɛba lɛ toiboo kɛ agbɛnɛ hu, koni etsa amɛhelai lɛ ehã amɛ. 18  Ni atsa mɛi ni mumɔi ni he tseee haoɔ amɛ lɛ po. 19  Ni asafoku lɛ fɛɛ miitao ehe ata, ejaakɛ no mli lɛ hewalɛ miije kpo kɛmiijɛ emli ni eetsa amɛ fɛɛ. 20  Ni ehole ehiŋmɛii anɔ ekwɛ ekaselɔi lɛ ni ebɔi kɛɛmɔ akɛ: “Nyɛ mɛi ni nyɛji ohiafoi lɛ, nyɛyɛ miishɛɛ ejaakɛ nyɛnɔ ji Nyɔŋmɔ Maŋtsɛyeli lɛ. 21  “Nyɛ mɛi ni hɔmɔ yeɔ nyɛ amrɔ nɛɛ, nyɛyɛ miishɛɛ ejaakɛ nyɛbaatɔrɔ. “Nyɛ mɛi ni nyɛfoɔ amrɔ nɛɛ, nyɛyɛ miishɛɛ ejaakɛ nyɛbaaŋmɔ. 22  “Nyɛyɛ miishɛɛ kɛji gbɔmɛi nyɛ nyɛ, kɛji amɛkɛ nyɛ tserɛ mli, amɛbɔ nyɛ ahora, ni amɛgbe nyɛgbɛ́i he guɔ* akɛ nyɛji mɛi fɔji yɛ gbɔmɔ Bi lɛ hewɔ. 23  Nyɛnyaa yɛ nakai gbi lɛ nɔ ni nyɛmli afilia nyɛ, ejaakɛ naa! nyɛjuromɔnɔ lɛ fa babaoo yɛ ŋwɛi, ejaakɛ nakai nɔŋŋ amɛtsɛmɛi lɛ fee gbalɔi lɛ. 24  “Shi nyɛ mɛi ni nyɛji niiatsɛmɛi lɛ, kpoo hã nyɛ ejaakɛ nyɛná nyɛmiishɛjemɔ lɛ fɛɛ momo. 25  “Kpoo hã nyɛ mɛi ni nyɛtɔrɔ amrɔ nɛɛ, ejaakɛ hɔmɔ baaye nyɛ. “Kpoo hã nyɛ mɛi ni nyɛŋmɔɔ amrɔ nɛɛ, ejaakɛ nyɛbaaye awerɛho ni nyɛbaafofoi. 26  “Kpoo hã nyɛ kɛji gbɔmɛi fɛɛ wieɔ nyɛhe ekpakpa, ejaakɛ nakai nɔŋŋ amɛtsɛmɛi lɛ fee amale gbalɔi lɛ. 27  “Shi miikɛɛ nyɛ mɛi ni nyɛboɔ toi nɛɛ akɛ: Nyɛyaa nɔ nyɛsumɔa nyɛhenyɛlɔi, nyɛfea mɛi ni nyɛɔ nyɛ lɛ ekpakpa, 28  nyɛjɔa mɛi ni lomɔɔ nyɛ lɛ, nyɛsɔlea nyɛhãa mɛi ni jɛɔ nyɛ lɛ. 29  Mɔ ni baagba otoi kome mli lɛ, tsɔ ekroko lɛ hu ohã lɛ; ni mɔ ni baashɔ̃ otade nɔhaanɔ lɛ, kaakama lɛ atade ni owo yɛ otade shishi lɛ hu. 30  Mɔ fɛɛ mɔ ni biɔ bo nii lɛ hã lɛ, ni mɔ ni shɔ̃ɔ onibii kɛyaa lɛ, kaabi ni akɛ nibii lɛ aku sɛɛ kɛba. 31  “Agbɛnɛ hu, bɔ pɛ ni nyɛtaoɔ akɛ mɛi afee ahã nyɛ lɛ, nyɛfea nakai nɔŋŋ nyɛhãa amɛ. 32  “Kɛ́ nyɛsumɔɔ mɛi ni sumɔɔ nyɛ lɛ, mɛɛ shidaa nyɛyɔɔ? Ejaakɛ eshafeelɔi po sumɔɔ mɛi ni sumɔɔ amɛ. 33  Ni kɛ́ nyɛfeɔ mɛi ni feɔ nyɛ ekpakpa lɛ ekpakpa lɛ, mɛɛ shidaa nyɛyɔɔ? Eshafeelɔi po feɔ nakai nɔŋŋ. 34  Agbɛnɛ hu, kɛ́ nyɛkɛ nii faa* mɛi ni nyɛhiɛ kã nɔ akɛ nyɛnine baashɛ nɔ ekoŋŋ lɛ, mɛɛ shidaa nyɛyɔɔ? Eshafeelɔi po kɛ nii faa eshafeelɔi bɔ ni afee ni amɛku sɛɛ amɛná babaoo. 35  Moŋ lɛ, nyɛyaa nɔ nyɛsumɔa nyɛhenyɛlɔi ni nyɛfea ekpakpa, ni nyɛkɛ nii afaa ni nyɛhiɛ kãaa nɔ akɛ nyɛnine baasaa ashɛ nɔ ko nɔ; ni nyɛjuromɔnɔ lɛ baafa babaoo, ni nyɛbaatsɔmɔ Mɔ ni Nɔ Kwɔ Fe Fɛɛ lɛ bii, ejaakɛ emli hi yɛ trumui kɛ mɛi fɔji fɛɛ nɔ. 36  Nyɛyaa nɔ nyɛnaa mɔbɔ, tamɔ bɔ ni nyɛ-Tsɛ lɛ naa mɔbɔ lɛ. 37  “Kɛfata he lɛ, nyɛkpaa kojomɔ, ni akojoŋ nyɛ kɔkɔɔkɔ; nyɛkpaa fɔ ni nyɛbuɔ lɛ, ni abuŋ nyɛ fɔ kɔkɔɔkɔ. Nyɛyaa nɔ nyɛkɛfaa,* ni akɛbaafa nyɛ.* 38  Nyɛyaa nɔ nyɛhãa, ni mɛi baahã nyɛ. Amɛkɛ nii ni asusu jogbaŋŋ ni anyɛmɔ nɔ, ni ahoso, ni eyi obɔ kɛteke nɔ baawo nyɛtadei amli. Ejaakɛ susumɔnɔ ni nyɛkɛsusuɔ nyɛhãa mɛi lɛ, no nɔŋŋ amɛbaaku sɛɛ amɛkɛsusu amɛhã nyɛ.” 39  Agbɛnɛ hu, egba amɛ nɔkwɛmɔnɔ* ko akɛ: “Shwilafo ko nyɛŋ atsɔɔ shwilafo ko gbɛ, aloo jeee nakai? Amɛyi enyɔ lɛ fɛɛ amɛbaayagbee bu mli, aloo jeee nakai? 40  Nikaselɔ* efeee etsɔɔlɔ, shi mɔ fɛɛ mɔ ni atsɔɔ lɛ nii jogbaŋŋ kɛwula shi lɛ baatamɔ etsɔɔlɔ lɛ. 41  Belɛ, mɛni hewɔ okwɛɔ jwɛi hwiaa ni yɔɔ onyɛmi hiŋmɛi mli lɛ, shi oyɔseee mplaŋ ni yɔɔ bo diɛŋtsɛ ohiŋmɛi mli lɛ? 42  Te feɔ tɛŋŋ ni okɛɔ onyɛmi akɛ, ‘Anyɛmi, hã majie jwɛi hwiaa lɛ yɛ ohiŋmɛi mli,’ be mli ni onaaa mplaŋ ni yɔɔ bo diɛŋtsɛ ohiŋmɛi mli lɛ? Osatofo! Jiemɔ mplaŋ lɛ yɛ bo diɛŋtsɛ ohiŋmɛi mli klɛŋklɛŋ, kɛkɛ lɛ, obaana faŋŋ bɔ ni ooofee ojie jwɛi hwiaa ni yɔɔ onyɛmi lɛ hiŋmɛi mli lɛ. 43  “Ejaakɛ tso kpakpa ko bɛ ni woɔ yibii ni ekpɔtɔ, ni tso ni ekpɔtɔ ko bɛ ni woɔ yibii kpakpa. 44  Ejaakɛ tso fɛɛ tso diɛŋtsɛ yibii akɛleɔ lɛ. Akɛ nɔkwɛmɔnɔ lɛ, mɛi tseee agbamii yɛ ŋmei tsei anɔ, asaŋ amɛtseee wein yibii yɛ ŋmei tso nɔ. 45  Gbɔmɔ kpakpa jɛɔ jwetrii kpakpai ni ekɛto etsui mli lɛ amli ekɛ nibii kpakpai hãa, shi gbɔmɔ fɔŋ jɛɔ jwetrii fɔji ni ekɛto lɛ amli ekɛ nibii fɔji hãa; ejaakɛ nɔ ni eyi tsui kɛteke nɔ lɛ, no enaabu wieɔ. 46  “Belɛ, mɛni hewɔ nyɛtsɛɔ mi ‘Nuŋtsɔ! Nuŋtsɔ!’ shi nyɛfeee nibii ni mikɛɔ lɛ? 47  Mɔ fɛɛ mɔ ni baa miŋɔɔ ni enuɔ miwiemɔi lɛ ni ekɛtsuɔ nii lɛ, matsɔɔ nyɛ mɔ ni etamɔ: 48  Etamɔ nuu ko ni be ni emaa tsũ lɛ etsa shi kwɔŋkwɔŋ ni etswa faneshi lɛ yɛ tɛsaa nɔ. No hewɔ lɛ, be ni nu afua ba lɛ, faa lɛ shimɔ nakai tsũ lɛ, shi enaawalɛ lɛ nyɛɛɛ tsũ lɛ ahoso, ejaakɛ ama tsũ lɛ jogbaŋŋ. 49  Nɔ ni tamɔɔɔ nakai lɛ, mɔ fɛɛ mɔ ni nuɔ ni efeee nɔ ko yɛ he lɛ, etamɔ nuu ko ni ma tsũ yɛ shikpɔŋ hiɛ ni etswaaa faneshi ko. Ni faa lɛ shimɔ tsũ lɛ, ni amrɔ lɛ ewule, ni nakai tsũ lɛ hiɛ kpãtã kwraa.”

Shishigbɛ Niŋmaa

Aloo “aboloi ní akɛtsɔɔ.”
Aloo “susuma.”
Aloo “amɛjie nyɛgbɛ́i lɛ amɛshɛ amɛfɔ̃.”
Ni tsɔɔ akɛ, nyɛheee he kpa.
Aloo “Nyɛyaa nɔ nyɛŋmɛa he.”
Aloo “abaaŋmɛɛ nyɛhe.”
Aloo “abɛbua.”
Aloo “Kaselɔ.”