Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 24:1-53

24  Shi otsi lɛ klɛŋklɛŋ gbi lɛ nɔ lɛ, amɛba gbonyo bu* lɛ he leebi maŋkpa, ni amɛkɛ tsofai ni jeɔ ŋma ni amɛsaa amɛto lɛ ba.  Shi amɛna akɛ akoklo tɛ lɛ kɛje gbonyo bu* lɛ naa,  ni be ni amɛbote mli lɛ, amɛnaaa Nuŋtsɔ Yesu gbonyo lɛ.  Be ni amɛhiɛ efee amɛ yaa yɛ enɛ he lɛ, naa! hii enyɔ ni wo atadei ni kpɛlɛɔ badamɔ amɛmasɛi.  Gbeyei mɔmɔ yei lɛ, ni amɛmamɔ amɛhiɛ shi, ni no hewɔ lɛ, hii lɛ kɛɛ amɛ akɛ: “Mɛni hewɔ nyɛtaoɔ mɔ ni hiɛ kã lɛ yɛ gbohii ateŋ?  Ebɛ biɛ, shi moŋ atee lɛ shi. Nyɛkaia nɔ ni ekɛɛ nyɛ be ni eyɔɔ Galilea lolo lɛ,  akɛ esa akɛ aŋɔ gbɔmɔ Bi lɛ awo eshafeelɔi adɛŋ ni agbe lɛ yɛ tso jaŋŋ nɔ ni gbi ni ji gbi etɛ lɛ nɔ lɛ ete shi.”  Kɛkɛ ni amɛkai ewiemɔi lɛ,  ni amɛku amɛsɛɛ kɛjɛ gbonyo bu* lɛ naa ni amɛbagba nibii nɛɛ fɛɛ amɛtsɔɔ Mɛi Nyɔŋma kɛ Ekome lɛ kɛ mɛi ni eshwɛ lɛ fɛɛ. 10  Amɛji Maria Magdalena, Yohana, kɛ Yakobo nyɛ Maria. Agbɛnɛ hu, yei ni eshwɛ ni fata amɛhe lɛ bagba bɔfoi lɛ nibii nɛɛ. 11  Shi wiemɔi nɛɛ fee tamɔ yaka wiemɔi kɛhã amɛ, ni amɛheee yei lɛ amɛyeee. 12  Shi Petro te shi ni esha foi kɛtee gbonyo bu* lɛ he, ni be ni edɔ emli ekwɛ lɛ, ena klalai lɛ pɛ. No hewɔ lɛ, eyiŋ etee, ni enaa kpɛ ehe yɛ nɔ ni eba lɛ hewɔ. 13  Shi naa! nakai gbi lɛ nɔ nɔŋŋ lɛ, amɛteŋ mɛi enyɔ yi mli kɛmiiya akrowa ko ni atsɛɔ lɛ Emao ni kɛ Yerusalem jekɛmɔ aaafee shitoi kpawo* lɛ mli, 14  ni amɛmiigbagbaa nibii ni eba nɛɛ fɛɛ he sane yɛ amɛteŋ. 15  Agbɛnɛ, be ni amɛmiigba sane ni amɛmiisusu nibii nɛɛ ahe lɛ, Yesu diɛŋtsɛ tsi ebɛŋkɛ ni ekɛ amɛ bɔi nyiɛmɔ, 16  shi atsimɔ amɛhiŋmɛii agbɛ koni amɛkayoo lɛ. 17  Ekɛɛ amɛ akɛ: “Mɛɛ saji nyɛkɛ hiɛdɔɔ susuɔ he yɛ nyɛteŋ be ni nyɛnyiɛ gbɛ lɛ nɔ lɛ?” Ni amɛwa amɛdamɔ shi kɛ amɛhiɛ mɔbɔmɔbɔ. 18  Amɛteŋ mɔ kome ni atsɛɔ lɛ Kleopa lɛ hã lɛ hetoo ekɛɛ: “Ani gbɔ ji bo ni okome oyɔɔ he ko yɛ Yerusalem ni oleee* nibii ni etee nɔ yɛ jɛmɛ yɛ gbii nɛɛ amli lɛ?” 19  Ebi amɛ akɛ: “Mɛɛ nibii?” Amɛkɛɛ lɛ akɛ: “Nibii ni kɔɔ Yesu, Nazarenyo lɛ ni batsɔ gbalɔ ni yɔɔ hewalɛ yɛ nifeemɔ kɛ wiemɔ mli yɛ Nyɔŋmɔ kɛ mɛi lɛ fɛɛ hiɛ lɛ, he lɛ; 20  kɛ bɔ ni wɔsɔfoi tsiifoi lɛ kɛ wɔnɔyelɔi lɛ ŋɔ lɛ amɛhã ni abu lɛ gbele fɔ, ni akala lɛ akpɛtɛ tso jaŋŋ lɛ he lɛ. 21  Shi no mli lɛ wɔhiɛ kã nɔ akɛ nuu nɛɛ ji mɔ ni ato akɛ ebaakpɔ̃ Israel lɛ. Hɛɛ, ni enɛɛmɛi fɛɛ sɛɛ lɛ, ŋmɛnɛ ji gbi etɛ ni nibii nɛɛ ba. 22  Agbɛnɛ hu, yei komɛi ni jɛ wɔteŋ lɛ hu hã wɔnaa kpɛ wɔhe, ejaakɛ amɛtee gbonyo bu* lɛ he mra mli 23  ni be ni amɛyanaaa egbonyo lɛ, amɛbakɛɛ akɛ ŋwɛibɔfoi hu jie amɛhe kpo tsɔɔ amɛ, ni amɛkɛɛ akɛ ehiɛ kã. 24  Kɛkɛ ni mɛi ni kɛ wɔ yɔɔ lɛ ateŋ mɛi komɛi tee gbonyo bu* lɛ he, ni amɛyana akɛ nɔ ni yei lɛ kɛɛ lɛ, nakai nɔŋŋ ni, shi amɛnaaa lɛ.” 25  No hewɔ lɛ, ekɛɛ amɛ akɛ: “Oo mɛi ni bɛ jwɛŋmɔ ni nyɛyɔɔ shɔ̃ɔ yɛ nyɛtsui mli akɛ nyɛaahe nibii fɛɛ ni gbalɔi lɛ wie lɛ nyɛye! 26  Ani jeee sa esa akɛ Kristo lɛ ana nɔ nɛɛ ni ebote enunyam lɛ mli?” 27  Ni eje shishi kɛjɛ Mose kɛ Gbalɔi lɛ fɛɛ nɔ, ni etsɔɔ amɛ nibii ni kɔɔ lɛ diɛŋtsɛ ehe ni yɔɔ Ŋmalɛi lɛ fɛɛ mli lɛ ashishi. 28  Naagbee lɛ, amɛbɛŋkɛ akrowa ni amɛyaa mli lɛ, ni efee tamɔ nɔ ni eetsa nɔ kɛmiiya ehiɛgbɛ. 29  Shi amɛnyɛ enɔ ni ekɛ amɛ ahi shi amɛkɛɛ: “Okɛ wɔ ahi shi ejaakɛ je miina ni gbi lɛ miihe aba naagbee.” Kɛkɛ ni etee mli ni ekɛ amɛ yahi shi. 30  Ni be ni ekɛ amɛ tara shi amɛyeɔ nii* lɛ, ekɔ aboloo lɛ, ejɔɔ nɔ, ekumɔ mli, ni ekɛbɔi amɛ hãmɔ. 31  Kɛkɛ ni amɛhiŋmɛii gbele kwraa, ni amɛyoo lɛ; shi elaaje yɛ amɛhiɛ. 32  Ni amɛkɛɛkɛɛ amɛhe akɛ: “Ani wɔtsuii ahe edɔɔɔ la be ni ekɛ wɔ wieɔ yɛ gbɛ lɛ nɔ, ni egbeleɔ Ŋmalɛi lɛ anaa kwraa* etsɔɔ wɔ lɛ?” 33  Ni nakai ŋmɛlɛtswaa lɛ nɔ nɔŋŋ lɛ, amɛte shi ni amɛku amɛsɛɛ kɛtee Yerusalem, ni amɛyana Mɛi Nyɔŋma kɛ Ekome lɛ kɛ mɛi ni kɛ amɛ ekpe kutuu lɛ, 34  ni mɛi ni ekpe kutuu lɛ kɛɛ: “Eji anɔkwale akɛ atee Nuŋtsɔ lɛ shi, ni ejie ehe kpo etsɔɔ Simon!” 35  Ni amɛ hu amɛgba nibii ni tee nɔ yɛ gbɛ lɛ nɔ lɛ kɛ bɔ ni fee ni amɛyoo lɛ yɛ aboloo kuumɔ lɛ mli lɛ. 36  Be ni amɛwieɔ nibii nɛɛ ahe lɛ, lɛ diɛŋtsɛ ebadamɔ amɛteŋ ni ekɛɛ amɛ akɛ: “Toiŋjɔlɛ ahã nyɛ.” 37  Shi akɛni amɛtsui fã ni gbeyei mɔmɔ amɛ hewɔ lɛ, amɛsusu akɛ amɛmiina mumɔ ko. 38  No hewɔ lɛ, ekɛɛ amɛ akɛ: “Mɛni hewɔ nyɛhao, ni mɛni hewɔ nyɛtsuii amli feɔ nyɛ kɔshikɔshi? 39  Nyɛkwɛa miniji kɛ minaji, ejaakɛ mi diɛŋtsɛ ni; nyɛtaa mihe nyɛkwɛa, ejaakɛ mumɔ ko bɛ heloo kɛ wui tamɔ bɔ ni nyɛnaa akɛ miyɔɔ nɛɛ.” 40  Ni be ni ewie enɛ lɛ, ekɛ eniji kɛ enaji tsɔɔ amɛ. 41  Shi be ni amɛheee amɛyeee lolo yɛ amɛmii ni eshɛ amɛhe kɛ amɛnaa ni ekpɛ amɛhe lɛ hewɔ lɛ, ekɛɛ amɛ akɛ: “Ani nyɛyɛ nɔ ko ni ayeɔ yɛ biɛ?” 42  No hewɔ lɛ, amɛhã lɛ nu mli loo kuku ni ashã, 43  ni ehe ni eye yɛ amɛhiɛ. 44  Ni ekɛɛ amɛ akɛ: “Enɛɛmɛi ji miwiemɔi ni mikɛ nyɛ wie be ni mikɛ nyɛ yɔɔ lolo lɛ, akɛ esa akɛ nibii fɛɛ ni aŋma yɛ mihe yɛ Mose Mla lɛ kɛ Gbalɔi lɛ kɛ Lalai lɛ amli lɛ aba mli.” 45  Kɛkɛ ni egbele amɛjwɛŋmɔ naa kwraa koni amɛnu Ŋmalɛi lɛ ashishi, 46  ni ekɛɛ amɛ akɛ, “Nɛkɛ ji nɔ ni aŋma: akɛ Kristo lɛ baana nɔ, ni ebaate shi kɛjɛ gbohii ateŋ yɛ gbi ni ji gbi etɛ lɛ nɔ, 47  ni egbɛ́i mli abaashiɛ tsuitsakemɔ kɛhã eshaifaa yɛ, yɛ jeŋmaji lɛ fɛɛ mli—abaaje shishi kɛjɛ Yerusalem. 48  Nyɛbaafee nibii nɛɛ ahe odasefoi. 49  Ni naa! miitsu nɔ ni mi-Tsɛ wo he shi lɛ kɛmiiba nyɛnɔ. Shi nyɛ lɛ, nyɛhia maŋ lɛ mli kɛyashi abaajɛ ŋwɛi awula nyɛ kɛ hewalɛ.” 50  Kɛkɛ ni enyiɛ amɛhiɛ kɛje kpo kɛtee Betania tɔ̃ɔ ni ehole eniji anɔ ni ejɔɔ amɛ. 51  Be ni ejɔɔ amɛ lɛ, agbala ekɛ amɛ teŋ ni awó lɛ kɛtee ŋwɛi. 52  Ni amɛkoto lɛ, ni amɛku amɛsɛɛ amɛtee Yerusalem kɛ miishɛɛ babaoo. 53  Ni amɛyɛ sɔlemɔwe lɛ daa nɛɛ, ni amɛjieɔ Nyɔŋmɔ yi.

Shishigbɛ Niŋmaa

Aloo “gbonyo kaimɔ bu.”
Aloo “gbonyo kaimɔ bu.”
Aloo “gbonyo kaimɔ bu.”
Aloo “gbonyo kaimɔ bu.”
Aaafee km 11. Sht. ŋm., “stadioi 60.” Stadio kome feɔ m 185 (nat 606. 95).
Aloo eeenyɛ efee akɛ, “Ani okome pɛ ji gbɔ yɛ Yerusalem ní leee.”
Aloo “gbonyo kaimɔ bu.”
Aloo “gbonyo kaimɔ bu.”
Aloo “be ni ekɛ amɛ tara okpɔlɔ lɛ he.”
Aloo “egbalaa Ŋmalɛi lɛ amli faŋŋ.”