Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 23:1-56

23  No hewɔ lɛ, asafoku lɛ fɛɛ te shi, ni amɛkpala lɛ kɛtee Pilato ŋɔɔ.  Ni amɛkɛ sane bɔi enɔfɔ̃ɔ amɛkɛɛ: “Wɔna nuu nɛɛ ni eefite wɔmaŋ lɛ jwɛŋmɔ, eegu too ni awoɔ ahãa Kaisare lɛ, ni ekɛɔ akɛ lɛ diɛŋtsɛ ji Kristo, maŋtsɛ ko.”  Agbɛnɛ, Pilato bi lɛ akɛ: “Ani bo ji Yudafoi lɛ a-Maŋtsɛ lɛ?” Ehã lɛ hetoo akɛ: “Bo diɛŋtsɛ ookɛɛ.”  Kɛkɛ ni Pilato kɛɛ osɔfoi tsiifoi lɛ kɛ asafoku lɛ akɛ: “Minaaa fɔbuu sane ko yɛ nuu nɛɛ he.”  Shi amɛma nɔ mi doo amɛkɛɛ: “Etsɔɔ nii yɛ Yudea fɛɛ kɛwoɔ maŋ lɛŋ hirihiri, ni ebɔi kɛjɛ Galilea kɛbashi biɛ po.”  Be ni Pilato nu enɛ lɛ, ebi kɛji Galileanyo ji nuu lɛ.  Be ni ená ele akɛ ejɛ kpokpaa ni Herode yeɔ nɔ lɛ nɔ lɛ, ehã akɛ lɛ tee Herode, mɔ hu ni no gbii lɛ amli lɛ eyɛ Yerusalem lɛ, ŋɔɔ.  Be ni Herode na Yesu lɛ, ená miishɛɛ naakpa. Ejaakɛ be saŋŋ nɛ ni eetao akɛ ena Yesu, ejaakɛ enu ehe saji pii, ni ehiɛ kã nɔ akɛ eeefee okadi ko ni ena.  No hewɔ lɛ, ebɔi lɛ saji pii bimɔ, shi ehãaa lɛ eko kwraa hetoo. 10  Shi osɔfoi tsiifoi lɛ kɛ woloŋmalɔi lɛ teɔ shi amɛdamɔɔ shi ni amɛkɛ saji shwieɔ enɔ kɛ mlifu. 11  Kɛkɛ ni Herode kɛ esraafoi lɛ gbe ehe guɔ, ni ekɛ atade fɛfɛo ko wo lɛ kɛye ehe fɛo, ni no sɛɛ lɛ, ehã akɛ lɛ ku sɛɛ kɛtee Pilato ŋɔɔ. 12  Nakai gbi lɛ nɔ nɔŋŋ lɛ, Herode kɛ Pilato, ni tsutsu ko lɛ amɛkɛ amɛhe yeee lɛ, batsɔmɔ nanemɛi. 13  Agbɛnɛ, Pilato tsɛ osɔfoi tsiifoi lɛ, nɔyelɔi lɛ, kɛ maŋbii lɛ kɛkpe 14  ni ekɛɛ amɛ akɛ: “Nyɛkɛ nuu nɛɛ ba mihiɛ akɛ eewo maŋbii lɛ ayiŋ ni amɛtse atua. Agbɛnɛ naa! Mitao emli yɛ nyɛhiɛ shi minaaa nɔ ko yɛ nuu nɛɛ he ni hãa eyeɔ fɔ yɛ saji ni nyɛkɛshwieɔ enɔ lɛ amli. 15  Anɔkwa, Herode hu enaaa eko, ejaakɛ ehã akɛ lɛ ku sɛɛ kɛba wɔŋɔɔ, ni naa! efeko nɔ ko ni sa gbele. 16  No hewɔ lɛ, magbala etoi ni maŋmɛɛ ehe.” 17  — 18  Shi asafoku muu lɛ fɛɛ bolɔ amɛkɛɛ: “Gbee nuu nɛɛ,* ni oŋmɛɛ Baraba he ohã wɔ!” 19  (Awo nuu nɛɛ tsuŋ yɛ atuatsemɔ ko ni ba yɛ maŋ lɛ mli kɛ gbɔmɔ ni egbe lɛ hewɔ.) 20  Pilato wó egbee nɔ ekɛ amɛ wie ekoŋŋ, ejaakɛ eetao eŋmɛɛ Yesu he. 21  Ni amɛbɔi bolɔmɔ amɛkɛɛ: “Gbee lɛ! Gbee lɛ!”* 22  Nɔ ni ji shii etɛ nɔ lɛ, ekɛɛ amɛ akɛ: “Mɛni hewɔ? Mɛɛ efɔŋ nuu nɛɛ efee? Minaaa nɔ ko ni sa gbele yɛ ehe; no hewɔ lɛ, magbala etoi ni maŋmɛɛ ehe.” 23  Kɛkɛ ni amɛkɛ gbei ni naa wa ma nɔ mi veveeve akɛ agbe lɛ,* ni amɛgbei lɛ ye enɔ. 24  No hewɔ lɛ, Pilato bua sane lɛ akɛ afee nɔ ni amɛbiɔ lɛ ahã amɛ. 25  Eŋmɛɛ nuu ní awo lɛ tsuŋ yɛ atuatsemɔ kɛ gbɔmɔgbee hewɔ ní amɛmiibi koni aŋmɛɛ ehe lɛ he, shi eŋɔ Yesu ehã yɛ amɛsuɔmɔ naa. 26  Ni be ni amɛkpalaa lɛ kɛyaa lɛ, amɛmɔ Simon, Kirenenyo ko ni jɛ kosɛɛ eeba lɛ, ni amɛwó piŋmɔ tso* lɛ amɛtere lɛ koni etere kɛnyiɛ Yesu sɛɛ. 27  Mɛi babaoo ni yei hu fata he nyiɛ esɛɛ, ni amɛtee nɔ amɛgbala amɛhe mai kɛtsɔɔ akɛ amɛmiiye awerɛho ni amɛwo yara yɛ ehewɔ. 28  Yesu tsɔ ehe ehã yei lɛ ni ekɛɛ: “Yerusalem biyei, nyɛkpaa fo ni nyɛfoɔ nyɛhãa mi lɛ. Moŋ lɛ, nyɛfoa nyɛhãa nyɛ diɛŋtsɛ nyɛhe kɛ nyɛbii; 29  ejaakɛ naa! gbii miiba, be mli ni mɛi baakɛɛ akɛ, ‘Kenei, musui ni fɔɔɔ, kɛ fufɔi ni hãaa fufɔ lɛ yɛ miishɛɛ!’ 30  Kɛkɛ lɛ amɛbaabɔi gɔji lɛ akɛɛmɔ akɛ, ‘Nyɛbagbea wɔnɔ!’ kɛ ŋmeŋmei lɛ hu akɛ, ‘Nyɛbahaa wɔnɔ!’ 31  Kɛ́ amɛfee nibii nɛɛ be ni tso lɛ yɔɔ frɔ̃frɔ̃ lɛ, mɛni baaba kɛji egbi?” 32  No mli lɛ, aakpala hii krokomɛi enyɔ, ni ji efɔŋfeelɔi hu kɛmiiya ni ayagbe amɛ. 33  Ni be ni amɛshɛ he ni atsɛɔ jɛmɛ akɛ Yitsoŋoŋo lɛ, amɛkala lɛ amɛkpɛtɛ tso jaŋŋ lɛ he yɛ jɛmɛ yɛ efɔŋfeelɔi lɛ amasɛi, mɔ kome yɛ eninejurɔ nɔ ni mɔ kome hu yɛ ebɛku nɔ. 34  Shi Yesu kɛɛ: “Ataa, ŋɔɔ ofa amɛ, ejaakɛ amɛleee nɔ ni amɛfeɔ lɛ.” Kɛfata he lɛ, amɛfɔ̃ oshiki kɛjara etadei lɛ. 35  Ni mɛi lɛ damɔ shi amɛmiikwɛ. Shi nɔyelɔi lɛ miiye ehe fɛo ni amɛmiikɛɛ: “Ehere mɛi krokomɛi ayiwala; kɛ́ lɛ ji Mɔ ni Nyɔŋmɔ Efɔ Lɛ Mu lɛ,* Mɔ ni Ahala Lɛ lɛ, hã ehere lɛ diɛŋtsɛ eyiwala.” 36  Asraafoi lɛ po ye ehe fɛo, ni amɛba eŋɔɔ amɛbahã lɛ wein ni joɔ 37  ni amɛkɛɛ: “Kɛ́ bo ji Yudafoi lɛ a-Maŋtsɛ lɛ, heremɔ bo diɛŋtsɛ oyiwala.” 38  Agbɛnɛ hu, aŋma yɛ eyiteŋgbɛ akɛ: “Yudafoi lɛ a-Maŋtsɛ lɛ nɛ.” 39  Kɛkɛ ni efɔŋfeelɔi ni asɛŋ amɛ yɛ jɛmɛ lɛ ateŋ mɔ kome bɔi wiemɔ fɔŋ kɛ lɛ shimɔ ekɛɛ: “Bo ji Kristo lɛ, aloo jeee nakai? Heremɔ bo diɛŋtsɛ oyiwala kɛ wɔ hu!” 40  Ni mɔ kroko lɛ here nɔ ni ekã ehiɛ ekɛɛ: “Ani osheee Nyɔŋmɔ gbeyei kwraa, amrɔ nɛɛ ni bo hu ooná toigbalamɔ kome too lɛ nɔŋŋ lɛ? 41  Wɔ lɛ, wɔnɔ lɛ sa wɔ, ejaakɛ wɔmiiná nibii ni wɔfee lɛ ahe nyɔmɔwoo ni sa wɔ; shi nuu nɛɛ efeko nɔ ko ni esaaa.” 42  Kɛkɛ ni ekɛɛ: “Yesu, kɛ́ oba o-Maŋtsɛyeli lɛ mli lɛ, kaimɔ mi.” 43  Ni ekɛɛ lɛ akɛ: “Lɛɛlɛŋ, miikɛɛ bo ŋmɛnɛ akɛ, obaafata mihe yɛ Paradeiso.” 44  Anɔkwa, no mli lɛ, eshɛ aaafee ŋmɛlɛtswaa ni ji ekpaa* lɛ nɔ, ni kɛ̃lɛ duŋ wo yɛ shikpɔŋ lɛ nɔ fɛɛ kɛyashi ŋmɛlɛtswaa ni ji nɛɛhu* lɛ nɔ 45  ejaakɛ hulu lɛ kpɛɛɛ; ni sɔlemɔtsu lɛŋ muhɔɔ* lɛ mli gba yɛ teŋ kɛbayi shi. 46  Ni Yesu bo kɛ gbee ni wa ekɛɛ: “Ataa, odɛŋ mituɔ mimumɔ miwoɔ nɛɛ.” Be ni ekɛɛ enɛ lɛ, eŋmɛɛ emumɔ he.* 47  Akɛni asraafoiatsɛ lɛ na nɔ ni eba lɛ hewɔ lɛ, ebɔi Nyɔŋmɔ hiɛnyamwoo ekɛɛ: “Jalɔ ji nuu nɛɛ lɛɛlɛŋ.” 48  Ni be ni asafoku lɛ fɛɛ ni ebabua amɛhe naa yɛ jɛmɛ kɛhã enɛ kwɛmɔ lɛ na nibii ni eba lɛ, amɛku amɛsɛɛ amɛtee shĩa, ni amɛgbala amɛtsitsi mai. 49  Ni mɛi fɛɛ ni le lɛ lɛ damɔ shɔŋŋ. Yei ni nyiɛ esɛɛ kɛjɛ Galilea lɛ hu yɛ jɛmɛ ni amɛna nibii nɛɛ. 50  Ni naa! nuu ko yɛ ni atsɛɔ lɛ Yosef, Ajinafoi Akuu lɛ mli nyo ni, ni eji gbɔmɔ kpakpa kɛ jalɔ. 51  (Nuu nɛɛ efɔ̃ɔɔ oshiki kɛfiii amɛŋaatsɔɔ kɛ amɛnifeemɔ lɛ sɛɛ.) Ejɛ Arimatia, Yudeabii lɛ amaŋ ko nɔ, ni eemɛ Nyɔŋmɔ Maŋtsɛyeli lɛ. 52  Nuu nɛɛ tee Pilato hiɛ ni eyabi koni aŋɔ Yesu gbonyo lɛ ahã lɛ. 53  Ni ejie gbonyo lɛ kɛkpeleke shi, ni ekɛ klala kpakpa bala he, ni ekɛ gbonyo lɛ yaŋmɛ gbonyo bu* ni akpɛ́ yɛ tɛsaa mli ni akɛ mɔ ko eŋmɛko mli dã lɛ mli. 54  Agbɛnɛ, nakai gbi lɛ ji Hesaamɔkɛtoo Gbi, ni Hejɔɔmɔ Gbi lɛ miishɛ. 55  Shi yei lɛ ni kɛ lɛ jɛ Galilea kɛba lɛ nyiɛ sɛɛ ni amɛbakwɛ gbonyo bu* lɛ ni amɛna bɔ ni akɛ egbonyo lɛ eŋmɛ shi ehã lɛ, 56  ni amɛku amɛsɛɛ amɛyasaa tsofai ni jeɔ ŋma kɛ mui ni jeɔ ŋma amɛto. Shi, anɔkwa, amɛjɔɔ amɛhe yɛ Hejɔɔmɔ Gbi lɛ nɔ taakɛ kitã lɛ biɔ lɛ.

Shishigbɛ Niŋmaa

Sht. ŋm., “Okɛ mɔ nɛɛ aya.”
Aloo “Gbee lɛ yɛ tso jaŋŋ lɛ nɔ! Gbee lɛ yɛ tso jaŋŋ lɛ nɔ!”
Aloo “agbe lɛ yɛ tso jaŋŋ lɛ nɔ.”
Kwɛmɔ Wiemɔi Titrii Amligbalamɔ lɛ.
Sht. ŋm., “Nyɔŋmɔ Kristo lɛ.”
Ni tsɔɔ akɛ, aaafee shwane ŋmɛlɛ 12.
Ni tsɔɔ akɛ, aaafee shwane ŋmɛji 3.
Kwɛmɔ Mat 27:51 sh. niŋ.
Aloo “emu enaagbee mumɔ.”
Aloo “gbonyo kaimɔ bu.”
Aloo “gbonyo kaimɔ bu.”