Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 22:1-71

YITSEI LƐ AMLI SAJI

  • Osɔfoi tee Yesu yi nɔ apam akɛ amɛbaagbe lɛ (1-6)

  • Hesaamɔi kɛhã naagbee Hehoo lɛ (7-13)

  • Ato Nuŋtsɔ lɛ Gbɛkɛ Niyeli lɛ shishi (14-20)

  • ‘Mɔ ni baajie mi ehã lɛ kɛ mi yɛ okpɔlɔ lɛ he’ (21-23)

  • Ŋwanejee shɛii yɛ mɔ ni ji agbo fe fɛɛ lɛ he (24-27)

  • Yesu kpaŋmɔ kɛhã maŋtsɛyeli ko (28-30)

  • Yesu gba efɔ̃ shi akɛ Petro baakwa lɛ (31-34)

  • Nɔ hewɔ ni esa akɛ asaa he ato; klantei enyɔ lɛ (35-38)

  • Sɔlemɔ ni Yesu sɔle yɛ Oliv Gɔŋ lɛ nɔ lɛ (39-46)

  • Amɔ Yesu (47-53)

  • Petro kwa Yesu (54-62)

  • Aye Yesu he fɛo (63-65)

  • Aye Yesu sane yɛ Sanhedrin lɛ hiɛ (66-71)

22  Agbɛnɛ, Aboloo ni Akɛ Ma ni Eshako Feɔ lɛ Gbi Jurɔ, ní atsɛɔ lɛ Hehoo lɛ miibɛŋkɛ.  Ni osɔfoi tsiifoi lɛ kɛ woloŋmalɔi lɛ miitao gbɛ ko ni hi jogbaŋŋ amɛtsɔ nɔ amɛkpãtã ehiɛ, ejaakɛ amɛmiishe gbɔmɛi lɛ agbeyei.  Kɛkɛ ni Satan bote Yuda, mɔ ni atsɛɔ lɛ Iskariot lɛ, ni ji Mɛi Nyɔŋma kɛ Enyɔ lɛ ateŋ mɔ kome lɛ mli,  ni eyiŋ etee ni ekɛ osɔfoi tsiifoi lɛ kɛ sɔlemɔwe nɔkwɛlɔi lɛ yawie bɔ ni ebaafee ejie lɛ ehã amɛ lɛ he.  Amɛná enɛ he miishɛɛ naakpa, ni amɛkpɛlɛ nɔ akɛ amɛbaahã lɛ jwiɛtɛi shika.  No hewɔ lɛ, ekpɛlɛ nɔ, ni ebɔi hegbɛ ni sa ni ebaaŋɔ kɛjie lɛ ehã amɛ, be mli ni asafoku ko bɛ jɛmɛ lɛ taomɔ.  Aboloo ni Akɛ Ma ni Eshako Feɔ lɛ gbii juji lɛ amli klɛŋklɛŋ gbi lɛ, ni ji gbi ni esa akɛ aŋɔ Hehoo afɔle lɛ ahã lɛ, bashɛ agbɛnɛ;  no hewɔ lɛ, Yesu tsu Petro kɛ Yohane ni ekɛɛ: “Nyɛyaa ni nyɛyasaa Hehoo lɛ nyɛtoa wɔ koni wɔbaye.”  Amɛkɛɛ lɛ akɛ: “Nɛgbɛ osumɔɔ ni wɔyasaa Hehoo lɛ wɔto yɛ?” 10  Ekɛɛ amɛ akɛ: “Naa! Kɛ́ nyɛbote maŋ lɛ mli lɛ, nuu ko ni tere nugbɛ́ kɛ nyɛ baakpe. Nyɛnyiɛa esɛɛ kɛyaa shĩa ni ebaabote mli lɛ mli. 11  Ni nyɛkɛa shĩatsɛ lɛ akɛ, ‘Tsɔɔlɔ lɛ miikɛɛ bo akɛ: “Nɛgbɛ gbɔiatsũ lɛ ni mi kɛ mikaselɔi lɛ baaye Hehoo lɛ yɛ mli lɛ yɔɔ?”’ 12  Ni nakai nuu lɛ baatsɔɔ nyɛ ŋwɛi asa agbo ko ni awula mli. Jɛmɛ nyɛsaa Hehoo lɛ nyɛtoa yɛ.” 13  No hewɔ lɛ, amɛyiŋ amɛtee ni amɛyana lɛ bɔ ni ekɛɛ amɛ lɛ pɛpɛɛpɛ, ni amɛsaa nibii amɛto Hehoo lɛ. 14  No hewɔ lɛ, be ni ŋmɛlɛtswaa lɛ shɛ lɛ, eyata okpɔlɔ lɛ he, ni bɔfoi lɛ hu fata ehe. 15  Ni ekɛɛ amɛ akɛ: “Mishwe waa akɛ mikɛ nyɛ baaye Hehoo nɛɛ dani mana nɔ lɛ; 16  ejaakɛ miikɛɛ nyɛ akɛ, miyeŋ eko dɔŋŋ kɛyashi beyinɔ ni ebaaba mli yɛ Nyɔŋmɔ Maŋtsɛyeli lɛ mli.” 17  Ni ehe kpulu lɛ, ni eda shi ni ekɛɛ: “Nyɛhea enɛ ni nyɛkɛhãa mɔ fɛɛ mɔ ni yɔɔ nyɛteŋ lɛ, 18  ejaakɛ miikɛɛ nyɛ akɛ, kɛjɛ amrɔ nɛɛ kɛyaa lɛ, minuŋ wein ko dɔŋŋ kɛyashi Nyɔŋmɔ Maŋtsɛyeli lɛ baaba.” 19  Agbɛnɛ hu, ekɔ aboloo,* eda shi, ekumɔ mli, ni ekɛhã amɛ ekɛɛ: “Enɛ damɔ shi kɛhã* migbɔmɔtso, ni abaaŋɔ ahã yɛ nyɛhewɔ lɛ. Nyɛyaa nɔ nyɛfea enɛ kɛkaia mi.” 20  Ni efee nakai nɔŋŋ yɛ kpulu lɛ hu he be ni amɛye gbɛkɛ niyenii lɛ amɛtã lɛ, ni ekɛɛ: “Kpulu nɛɛ damɔ shi kɛhã kpaŋmɔ hee lɛ ni damɔ milá ni abaafɔse ashwie shi ahã nyɛ lɛ nɔ lɛ. 21  “Shi naa! mɔ ni baajie mi ehã lɛ nine kɛ mi yɛ okpɔlɔ lɛ he. 22  Ejaakɛ gbɔmɔ Bi lɛ miishi kɛmiiya taakɛ akpɛ mli ato lɛ lɛɛlɛŋ; fɛɛ sɛɛ lɛ, kpoo hã nakai mɔ ni abaatsɔ enɔ ajie lɛ ahã lɛ!” 23  No hewɔ lɛ, amɛbɔi he susumɔ yɛ amɛteŋ akɛ amɛteŋ namɔ kwraa baa ebafee enɛ lɛ. 24  Shi ŋwanejee shɛii ko hu bate shi yɛ amɛteŋ yɛ mɔ ni asusuɔ akɛ eji agbo fe fɛɛ yɛ amɛteŋ lɛ he. 25  Shi ekɛɛ amɛ akɛ: “Jeŋmaji lɛ anɔ maŋtsɛmɛi lɛ yeɔ amɛnɔ akɛ nuŋtsɔmɛi, ni mɛi ni yɔɔ hegbɛ yɛ amɛnɔ lɛ, atsɛɔ amɛ Ejurɔfeelɔi. 26  Shi nyɛ lɛ, esaaa akɛ nyɛfeɔ nyɛnii yɛ nakai gbɛ nɔ. Shi moŋ, mɔ ni ji agbo fe fɛɛ yɛ nyɛteŋ lɛ atsɔ tamɔ gbekɛ kwraa, ni mɔ ni nyiɛɔ hiɛ lɛ hu atsɔ tamɔ mɔ ni miisɔmɔ. 27  Ejaakɛ te mɔ ni ji agbo lɛ, mɔ ni ta niyeniiashi* lɛ, aloo mɔ ni sɔmɔɔ lɛ? Ani jeee mɔ ni ta niyeniiashi* lɛ? Shi mi lɛ miyɛ nyɛteŋ akɛ mɔ ni miisɔmɔ. 28  “Shi nyɛji mɛi ni ekpɛtɛ mi yɛ mijaramɔ shihilɛi lɛ amli; 29  ni mikɛ nyɛ miifee kpaŋmɔ kɛhã maŋtsɛyeli ko, taakɛ mi-Tsɛ kɛ mi efee kpaŋmɔ lɛ, 30  koni nyɛye ni nyɛnu yɛ mikpɔlɔ lɛ he yɛ mi-Maŋtsɛyeli lɛ mli, ni nyɛtara maŋtsɛ sɛii anɔ nyɛkojo Israel wekui nyɔŋma kɛ enyɔ lɛ. 31  “Simon, Simon, naa! Satan ebi koni ahã esha nyɛ fɛɛ nyɛmli tamɔ ŋmaa. 32  Shi mikpa fai mihã bo koni ohemɔkɛyeli akatã; ni bo hu, kɛ́ okpale lɛ, wo onyɛmimɛi lɛ hewalɛ.” 33  Kɛkɛ ni ekɛɛ lɛ akɛ: “Nuŋtsɔ, misaa mihe mito akɛ kɛ́ tsuŋwoo jio, gbele mli jio, mikɛ bo baaya.” 34  Shi ekɛɛ: “Petro, miikɛɛ bo akɛ, ŋmɛnɛ lɛ, wuɔ naŋ agbɛɛ ni obaatso shii etɛ akɛ oleee mi.” 35  Esaa ekɛɛ amɛ akɛ: “Be ni mitsu nyɛ ni nyɛhiɛɛɛ shika kotoku kɛ niyenii kotoku kɛ tokota lɛ, ani nɔ ko he hia nyɛ?” Amɛkɛɛ: “Dabi!” 36  Kɛkɛ ni ekɛɛ amɛ akɛ: “Shi amrɔ nɛɛ, mɔ ni yɔɔ shika kotoku lɛ, hã ekɔ, nakai nɔŋŋ mɔ ni yɔɔ niyenii kotoku lɛ hu, ni mɔ ni bɛ klante lɛ, ehɔ̃ɔ etade nɔhaanɔ ni ekɛhé eko. 37  Ejaakɛ miikɛɛ nyɛ akɛ, esa akɛ nɔ ni aŋma lɛ aba mli yɛ minɔ, akɛ, ‘Abu lɛ ashi mlatɔlɔi anɔ.’ Ejaakɛ mihe saji lɛ miiba mli.” 38  Ni amɛkɛɛ: “Nuŋtsɔ, naa! klantei enyɔ nɛ.” Ekɛɛ amɛ akɛ: “Efa.” 39  Ni eje kpo, ni taakɛ efɔɔ feemɔ lɛ, etee Oliv Gɔŋ lɛ nɔ, ni kaselɔi lɛ hu nyiɛ esɛɛ. 40  Be ni eshɛ jɛmɛ lɛ, ekɛɛ amɛ akɛ: “Nyɛyaa nɔ nyɛsɔlea koni nyɛkabote kaa* mli.” 41  Ni egbala ehe shi kɛjɛ amɛhe aaafee tɛfɔ̃ɔ jekɛmɔ, ni eho ekula shi ni ebɔi sɔlemɔ 42  ekɛɛ: “Ataa, kɛ́ oosumɔ lɛ, jiemɔ kpulu nɛɛ kɛje minɔ. Kɛ̃lɛ, hã osuɔmɔnaa nii aba mli, jeee minɔ.” 43  Kɛkɛ ni bɔfo ko jɛ ŋwɛi bajie ehe kpo etsɔɔ lɛ ni ewo lɛ hewalɛ. 44  Shi ehe jara lɛ waa, aahu akɛ etee nɔ esɔle kɛ hiɛdɔɔ fe tsutsu lɛ; ni ehe latsaa tsɔ tamɔ lákulibii ni tsereɔ shwieɔ shikpɔŋ. 45  Be ni ete shi kɛjɛ sɔlemɔ lɛ mli, ni etee kaselɔi lɛ aŋɔɔ lɛ, eyana akɛ amɛmiiwɔ ejaakɛ awerɛhoyeli ehã etɔ amɛ bliboo. 46  Ekɛɛ amɛ akɛ: “Mɛni hewɔ nyɛwɔɔ? Nyɛtea shi ni nyɛyaa nɔ nyɛsɔlea koni nyɛkabote kaa* mli.” 47  Be ni ekã he ewieɔ lɛ, naa! asafoku ko, ni Mɛi Nyɔŋma kɛ Enyɔ lɛ ateŋ mɔ kome ni atsɛɔ lɛ Yuda lɛ nyiɛ amɛhiɛ, ni etsi ebɛŋkɛ Yesu koni eshɔ enaa. 48  Shi Yesu kɛɛ lɛ akɛ: “Yuda, ani okɛ naashɔmɔ miijie gbɔmɔ Bi lɛ oohã?” 49  Be ni mɛi ni yɔɔ emasɛi lɛ na nɔ ni baaba lɛ, amɛkɛɛ: “Nuŋtsɔ, wɔkɛ klante lɛ abãmɔ amɛ lo?” 50  Amɛteŋ mɔ kome po bã osɔfonukpa lɛ nyɔŋ lɛ, ni efo eninejurɔ toi. 51  Shi Yesu here nɔ ekɛɛ: “Efa.” Ni eta toi lɛ he ni etsa lɛ. 52  Kɛkɛ ni Yesu kɛɛ osɔfoi tsiifoi lɛ kɛ sɔlemɔwe lɛ nɔkwɛlɔi lɛ kɛ onukpai ni eba jɛmɛ koni amɛbamɔ lɛ lɛ akɛ: “Ani nyɛje kpo kɛba kɛ klantei kɛ kpotii tamɔ abaa ojoyelɔ nɔ nɛɛ? 53  Be mli ni mikɛ nyɛ yɔɔ sɔlemɔwe lɛ daa nɛɛ, nyɛmɔɔɔ mi. Shi nyɛŋmɛlɛtswaa lɛ kɛ duŋ hegbɛ lɛ nɛ.” 54  Kɛkɛ ni amɛmɔ lɛ, ni amɛkpala lɛ kɛtee, ni amɛkɛ lɛ ba osɔfonukpa lɛ shĩa lɛ; shi Petro nyiɛ sɛɛ yɛ shɔŋŋ. 55  Be ni amɛshɛre la yɛ kpo lɛ teŋ ni amɛho amɛtara he lɛ, Petro hu ta amɛteŋ. 56  Shi tsulɔ yoo ko na lɛ ta la lɛ he ni ekwɛ lɛ gãa ni ekɛɛ: “Nuu nɛɛ hu fata ehe.” 57  Shi etso ekɛɛ: “Oblayoo, mileee lɛ.” 58  Be fioo ko sɛɛ lɛ, mɔ kroko na lɛ ni ekɛɛ: “Bo hu amɛteŋ mɔ ko ji bo.” Shi Petro kɛɛ: “Papa, jeee amɛteŋ mɔ ko ji mi.” 59  Ni aaafee ŋmɛlɛtswaa kome sɛɛ lɛ, nuu kroko bɔi nɔmimaa veveeve akɛ: “Ekã shi faŋŋ akɛ, nuu nɛɛ hu fata ehe, ejaakɛ, anɔkwa, Galileanyo ji lɛ!” 60  Shi Petro kɛɛ: “Papa, mileee nɔ ni okɛɔ nɛɛ.” Ni amrɔ lɛ, be ni ekã he ewieɔ lɛ, wuɔ gbɛɛ. 61  Kɛkɛ ni Nuŋtsɔ lɛ tsɔ ehe ni ekwɛ Petro tɛ̃ɛ, ni Petro kai Nuŋtsɔ lɛ wiemɔ lɛ be ni ekɛɛ lɛ akɛ: “Dani wuɔ baagbɛɛ ŋmɛnɛ lɛ, obaakwa mi shii etɛ” lɛ. 62  Ni eje kpo eyafo kɛ dɔlɛ babaoo. 63  Agbɛnɛ, hii ni buɔ Yesu he lɛ bɔi ehe fɛoyeli, ni amɛgbala lɛ mai; 64  ni amɛha ehiɛ ni amɛbibii lɛ akɛ: “Gbaa! Namɔ gba bo ma lɛ?” 65  Ni amɛwie nibii krokomɛi babaoo kɛbɔ musu amɛshi lɛ. 66  Ni be ni je tsɛre lɛ, maŋ onukpai agwabɔɔ lɛ, osɔfoi tsiifoi lɛ kɛ woloŋmalɔi lɛ fɛɛ, bua amɛhe naa, ni amɛkpala lɛ kɛtee amɛ-Sanhedrin* asa lɛ nɔ, ni amɛkɛɛ: 67  “Kɛ́ bo ji Kristo lɛ, kɛɛmɔ wɔ.” Shi ekɛɛ amɛ akɛ: “Kɛ́ mikɛɛ nyɛ po lɛ, nyɛheŋ nyɛyeŋ kɔkɔɔkɔ. 68  Kɛfata he lɛ, kɛ́ mibi nyɛ sane lɛ, nyɛhãŋ hetoo. 69  Kɛ̃lɛ, kɛjɛ be nɛɛ kɛyaa lɛ gbɔmɔ Bi lɛ baata Nyɔŋmɔ ninejurɔ ni yɔɔ hewalɛ lɛ nɔ.” 70  Kɛkɛ ni amɛ fɛɛ amɛkɛɛ akɛ: “Belɛ bo ji Nyɔŋmɔ Bi lɛ lo?” Ekɛɛ amɛ akɛ: “Nyɛ diɛŋtsɛ nyɛmiikɛɛ akɛ mi ni.” 71  Amɛkɛɛ: “Mɛni hewɔ wɔtaoɔ odase kroko dɔŋŋ? Ejaakɛ wɔ diɛŋtsɛ wɔnu yɛ enaa.”

Shishigbɛ Niŋmaa

Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Kwɛmɔ Mat 26:26 sh. niŋ.
Aloo “ta okpɔlɔ lɛ he.”
Aloo “ta okpɔlɔ lɛ he.”
Ni ji, efɔŋ he kaa.
Ni ji, efɔŋ he kaa.
Kwɛmɔ Mat 26:59 sh. niŋ.