Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 21:1-38

YITSEI LƐ AMLI SAJI

  • Yoo okulafo ohiafo lɛ kapɛji enyɔ lɛ (1-4)

  • NƆ NI BAABA LƐ HE OKADI (5-36)

    • Tai, shikpɔŋhosomɔi, tsɛŋemɔ helai, hɔji (10, 11)

    • Tabilɔi bɔle Yerusalem he kɛkpe (20)

    • Jeŋmaji lɛ abei ni ato lɛ (24)

    • Gbɔmɔ Bi lɛ baa lɛ (27)

    • Agbami tso he nɔkwɛmɔnɔ lɛ (29-33)

    • Nyɛyaa nɔ nyɛshia kpe (34-36)

  • Yesu tsɔɔ nii yɛ sɔlemɔwe lɛ (37, 38)

21  Agbɛnɛ, ewó ehiɛ nɔ, ni ena niiatsɛmɛi ni kɛ amɛnikeenii miiwo onia adekai lɛ amli.  Ni ena yoo okulafo ohiafo ko hu ni kɛ kapɛji bibii enyɔ ni shɛɛɛ nɔ ko* bawo mli yɛ jɛmɛ,  ni ekɛɛ: “Lɛɛlɛŋ, miikɛɛ nyɛ akɛ, yoo okulafo ohiafo nɛɛ kɛ babaoo ewo mli fe bɔ ni amɛ fɛɛ amɛfee lɛ.  Ejaakɛ mɛnɛɛmɛi fɛɛ kɛ amɛnii ni amɛná ni eteke nɔ lɛ eko bawo mli akɛ nikeenii, shi lɛ lɛ, ejɛ ehia mli ekɛ nibii ni eyɔɔ ni ekɛlɛɔ ehe lɛ fɛɛ bawo mli.”  Sɛɛ mli lɛ, be ni mɛi komɛi miiwie sɔlemɔwe lɛ he, bɔ ni akɛ tɛi kpakpai kɛ nibii ni ajɔɔ nɔ ahã Nyɔŋmɔ ewula lɛ lɛ,  ekɛɛ: “Nibii nɛɛ ni nyɛnaa amrɔ nɛɛ, gbii baaba ni ashiŋ tɛ kome yɛ eko nɔ, ní atsiŋ atswaŋ shi.”  Ni amɛbi lɛ akɛ: “Tsɔɔlɔ, mɛɛ be nibii nɛɛ baaba mli lɛɛlɛŋ, ni mɛni baafee be ni nibii nɛɛ baaba mli lɛ he okadi?”  Ekɛɛ: “Nyɛkwɛa jogbaŋŋ koni akalaka nyɛ, ejaakɛ mɛi babaoo baaba yɛ migbɛ́i mli abakɛɛ akɛ, ‘Mi ni,’ kɛ, ‘Be lɛ eshɛ etã.’ Nyɛkanyiɛa amɛsɛɛ.  Kɛfata he lɛ, kɛ́ nyɛnu tai kɛ basabasafeemɔi* ahe lɛ, nyɛtsui akafãa. Ejaakɛ esa akɛ nibii nɛɛ aba mli dã, shi naagbee lɛ baŋ amrɔ nɔŋŋ.” 10  Ni ekɛɛ amɛ akɛ: “Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli. 11  Shikpɔŋhosomɔi kpelei baaba, ni hɔji kɛ tsɛŋemɔ helai baaba yɛ heihei; ni abaana gbeyei nibii, ni okadii kpelei baajɛ ŋwɛi aba. 12  “Shi dani nibii nɛɛ fɛɛ baaba lɛ, mɛi baamɔmɔ nyɛ ni amɛbaawa nyɛ yi, amɛbaaŋɔ nyɛ amɛhã kpeehei kɛ tsuŋwoohei. Akɛ nyɛ baaya maŋtsɛmɛi kɛ amralofoi ahiɛ yɛ migbɛ́i lɛ hewɔ. 13  No baahã nyɛná hegbɛ kɛye odase. 14  No hewɔ lɛ, nyɛkpɛa mli yɛ nyɛtsuiiaŋ akɛ nyɛtsɔŋ hiɛ nyɛsusuŋ bɔ ni nyɛaafee nyɛfã nyɛhe lɛ he, 15  ejaakɛ maŋɔ wiemɔi kɛ hiɛshikamɔ mahã nyɛ, ni nyɛshiteekɛwolɔi lɛ fɛɛ kwa nyɛŋ atsĩ naa loo aku naa. 16  Kɛfata he lɛ, fɔlɔi kɛ nyɛmimɛi hii kɛ wekumɛi kɛ nanemɛi po baaŋɔ nyɛ amɛhã,* ni amɛbaagbe nyɛteŋ mɛi komɛi, 17  ni mɛi fɛɛ baanyɛ nyɛ yɛ migbɛ́i lɛ hewɔ. 18  Shi nyɛyiteŋtsɔi kome folo po hiɛ kpãtãŋ. 19  Kɛ́ nyɛfi shi lɛ, nyɛbaabaa nyɛwala yi.* 20  “Shi kɛ́ nyɛna akɛ tabilɔi ebɔ nsara ewo Yerusalem he kɛkpe lɛ, belɛ nyɛnáa nyɛlea akɛ emaŋfɔfeemɔ lɛ ebɛŋkɛ. 21  No lɛ, mɛi ni yɔɔ Yudea lɛ abɔi foijee kɛya gɔji lɛ anɔ, ni mɛi ni yɔɔ maŋ lɛ mli lɛ aje kpo, ni mɛi ni yɔɔ koiasɛɛ lɛ akabote maŋ lɛ mli, 22  ejaakɛ gbii nɛɛ ji gbii ni akɛbaaye jalɛ sane,* bɔ ni afee ni nibii ni aŋmala lɛ fɛɛ aba mli. 23  Kpoo hã yeihɔlɔi kɛ mɛi ni miihã fufɔ yɛ nakai gbii lɛ amli lɛ! Ejaakɛ haomɔ kpele baaba shikpɔŋ lɛ nɔ, ni mlifu baaba nɛkɛ maŋ nɛɛ nɔ. 24  Ni amɛbaanyɔnyɔi yɛ klante naa ni abaaŋɔ amɛ nom kɛya jeŋmaji lɛ fɛɛ mli; ni jeŋmaji lɛ baanaanaa Yerusalem nɔ kɛyashi jeŋmaji lɛ abei ni ato lɛ baaba naagbee. 25  “Agbɛnɛ hu, okadii baaba hulu kɛ nyɔɔŋtsere kɛ ŋulamii amli, ni jeŋmaji lɛ ahe baajara amɛ yɛ shikpɔŋ lɛ nɔ, ni amɛleŋ nɔ ni amɛbaafee yɛ ŋshɔ lɛ gbɛɛmɔ kɛ bɔ ni efeɔ hamahama lɛ hewɔ. 26  Nɔ baanyɔnyɔɔ mɛi anɔ yɛ gbeyeishemɔ kɛ nibii ni baaba shikpɔŋ lɛ nɔ lɛ agbɛkwɛmɔ hewɔ, ejaakɛ abaahoso ŋwɛi hewalɛi lɛ. 27  Kɛkɛ lɛ, amɛbaana gbɔmɔ Bi lɛ akɛ eeba yɛ atatu mli kɛ hewalɛ kɛ anunyam kpele. 28  Shi kɛ́ nibii nɛɛ bɔi baa lɛ, nyɛdamɔa shi jaŋŋ ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.” 29  Kɛkɛ ni egba amɛ nɔkwɛmɔnɔ* ko akɛ: “Nyɛkwɛa agbami tso lɛ kɛ tsei krokomɛi lɛ fɛɛ. 30  Kɛ́ amɛmiifũ bai lɛ, nyɛnaa, ni nyɛle akɛ latsaa be ebɛŋkɛ agbɛnɛ. 31  Nakai nɔŋŋ nyɛ hu kɛ́ nyɛna nibii nɛɛ miiba mli lɛ, nyɛnáa nyɛlea akɛ Nyɔŋmɔ Maŋtsɛyeli lɛ ebɛŋkɛ. 32  Lɛɛlɛŋ, miikɛɛ nyɛ akɛ, nɛkɛ yinɔ nɛɛ hoŋ eyaŋ kɔkɔɔkɔ kɛyashi nibii fɛɛ baaba mli. 33  Ŋwɛi kɛ shikpɔŋ baaho aya, shi miwiemɔi lɛ hoŋ eyaŋ kɔkɔɔkɔ. 34  “Shi nyɛhiɛ ahia nyɛhe nɔ koni fufeemɔ kɛ dãanumɔ babaoo kɛ shihilɛ mli yeyeeyefeemɔi akahe nyɛtsuii ni nakai gbi lɛ bati nyɛ shi trukaa 35  tamɔ tsɔne. Ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ. 36  Belɛ, nyɛyaa nɔ nyɛshia kpe, ni nyɛkɛ hiɛdɔɔ akpaa fai be fɛɛ be, koni nyɛnyɛ nibii nɛɛ fɛɛ ni baaba mli kɛ̃ lɛ mli nyɛje, ni nyɛnyɛ gbɔmɔ Bi lɛ hiɛ nyɛdamɔ.” 37  No hewɔ lɛ, kɛ́ je tsɛre lɛ, eyatsɔɔ nii yɛ sɔlemɔwe lɛ, shi kɛ́ shɛ gbɛkɛ lɛ, ejeɔ kpo ni eyahiɔ gɔŋ ni atsɛɔ lɛ Oliv Gɔŋ lɛ nɔ. 38  Ni mɛi lɛ fɛɛ baa eŋɔɔ yɛ sɔlemɔwe lɛ leebi maŋkpa koni amɛbabo lɛ toi.

Shishigbɛ Niŋmaa

Sht. ŋm., “leptoi enyɔ.”
Aloo “hirihirifeemɔi; atuatsemɔi.”
Aloo “baajie nyɛ amɛhã.”
Aloo “nyɛnine baashɛ nyɛsusumai anɔ.”
Aloo “ji oweletɔɔ gbii.”
Aloo “abɛbua.”