Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 2:1-52

YITSEI LƐ AMLI SAJI

  • Yesu fɔmɔ (1-7)

  • Ŋwɛibɔfoi jie amɛhe kpo amɛtsɔɔ tookwɛlɔi (8-20)

  • Ketiafoo kɛ hetsuumɔ (21-24)

  • Simeon na Kristo lɛ (25-35)

  • Hana wie gbekɛ lɛ he (36-38)

  • Amɛku amɛsɛɛ amɛtee Nazaret (39, 40)

  • Yesu yɛ sɔlemɔwe lɛ, be ni eye afii 12 (41-52)

2  Agbɛnɛ, nakai gbii lɛ amli lɛ, akpɔ ko jɛ Kaisare Augusto ŋɔɔ ba akɛ aŋma shikpɔŋ lɛ nɔ bii fɛɛ agbɛ́ii.  (Klɛŋklɛŋ gbɛ́iŋmaa nɛɛ tee nɔ be ni Kirenio ji Siria amralo lɛ.)  Ni mɛi fɛɛ tee koni amɛyaŋma amɛgbɛ́ii, mɔ fɛɛ mɔ tee lɛ diɛŋtsɛ emaŋ.  Anɔkwa, Yosef hu jɛ Nazaret maŋ lɛ mli yɛ Galilea, ni ekwɔ kɛtee Yudea, ni akɛni ejɛ David we lɛ kɛ eweku lɛ mli hewɔ lɛ, etee David maŋ ni atsɛɔ lɛ Betlehem lɛ mli.  Etee koni aŋma lɛ kɛ Maria ni aŋɔ lɛ ahã lɛ gbãla taakɛ awo shi lɛ, ní etsɛŋ ni ebaafɔ lɛ, agbɛ́ii.  Be ni amɛyɔɔ jɛmɛ lɛ, efɔmɔ be shɛ.  Ni efɔ binuu, ekromɔbi lɛ, ni eŋɔ mamai ebala ehe ni eŋɔ lɛ eŋmɛ kooloi aniyenii anɔ mli, ejaakɛ amɛnáaa tsũ yɛ gbɔiatoohe lɛ.  Tookwɛlɔi komɛi hu eyahi ŋa nɔ yɛ nakai kpokpaa lɛ nɔ nɔŋŋ, ni amɛmiibu amɛtookui ahe nyɔɔŋ.*  Trukaa lɛ, Yehowa* bɔfo* ko badamɔ amɛhiɛ, ni Yehowa* anunyam kpɛ kɛbɔle amɛ, ni amɛshe gbeyei naakpa. 10  Shi ŋwɛibɔfo lɛ kɛɛ amɛ akɛ: “Nyɛkashea gbeyei, ejaakɛ naa! miijaje sane kpakpa ni baahã mɛi fɛɛ aná miishɛɛ babaoo miitsɔɔ nyɛ. 11  Ejaakɛ ŋmɛnɛ lɛ afɔ yiwalaherelɔ ko, ni ji Kristo, Nuŋtsɔ lɛ, yɛ David maŋ lɛ mli ahã nyɛ. 12  Ni enɛ afee okadi ahã nyɛ: Nyɛbaana abifao ni aŋɔ mamai abala ehe ni ekã kooloi aniyenii anɔ mli.” 13  Trukaa lɛ, ŋwɛi ta kpele ko bafata ŋwɛibɔfo lɛ he, ni amɛjie Nyɔŋmɔ yi amɛkɛɛ: 14  “Anunyam ahã Nyɔŋmɔ yɛ ŋwɛi flooflo, ni toiŋjɔlɛ ahi mɛi ni yɔɔ ehiɛ duromɔ* lɛ ateŋ yɛ shikpɔŋ lɛ nɔ.” 15  Ni be ni ŋwɛibɔfoi lɛ shi amɛ kɛtee ŋwɛi lɛ, tookwɛlɔi lɛ kɛɛkɛɛ amɛhe akɛ: “Bɔ fɛɛ bɔ ni fee lɛ, nyɛhãa wɔyaa Betlehem ni wɔyakwɛa nɔ ni etee nɔ ní Yehowa* ehã wɔle nɛɛ.” 16  Ni amɛtee oya nɔŋŋ ni amɛyana Maria kɛ Yosef fɛɛ, kɛ abifao lɛ ni ekã kooloi aniyenii anɔ lɛ mli. 17  Be ni amɛna enɛ lɛ, amɛhã ale sane ni agba amɛ yɛ gbekɛ bibioo nɛɛ he lɛ. 18  Ni mɛi fɛɛ ni nu lɛ anaa kpɛ amɛhe yɛ nibii ni tookwɛlɔi lɛ gba amɛ lɛ ahewɔ, 19  shi Maria kɛ wiemɔi nɛɛ fɛɛ bɔi too, ni ejwɛŋɔ nɔ kɛmuɔ saji anaa yɛ etsui mli. 20  Ni tookwɛlɔi lɛ ku amɛsɛɛ, ní amɛmiiwo Nyɔŋmɔ hiɛ nyam ni amɛmiijie eyi yɛ nibii fɛɛ ni amɛnu ni amɛna lɛ ahewɔ, tamɔ bɔ pɛ ni agba amɛ lɛ. 21  Gbii kpaanyɔ sɛɛ, be ni be shɛ ni abaafo lɛ ketia lɛ, awo lɛ gbɛ́i akɛ Yesu, gbɛ́i ni ŋwɛibɔfo lɛ kɛhã dani aŋɔ lɛ hɔ lɛ. 22  Agbɛnɛ hu, be ni be kɛhã amɛhetsuumɔ yɛ Mose Mla lɛ naa lɛ shɛ lɛ, amɛkɛ lɛ kwɔ kɛtee Yerusalem koni amɛkɛ lɛ ayahã Yehowa,* 23  taakɛ aŋma yɛ Yehowa* Mla lɛ mli lɛ akɛ: “Kromɔ binuu fɛɛ kromɔ binuu* lɛ, esa akɛ atsɛ lɛ krɔŋkrɔŋ kɛhã Yehowa.”* 24  Ni amɛŋɔ afɔle amɛhã taakɛ awie yɛ Yehowa* Mla lɛ mli lɛ akɛ: “kosɛɛ okpoi enyɔ loo shĩa okpoi bibii enyɔ.” 25  Ni naa! nuu ko yɛ Yerusalem ni atsɛɔ lɛ Simeon, ni nuu nɛɛ, jalɔ ji lɛ ni esheɔ Nyɔŋmɔ gbeyei, ni eemɛ Israel miishɛjemɔ lɛ, ni mumɔ krɔŋkrɔŋ yɛ enɔ. 26  Kɛfata he lɛ, Nyɔŋmɔ etsɔ mumɔ krɔŋkrɔŋ lɛ nɔ ejie kpo etsɔɔ lɛ akɛ egboŋ, ja ena Kristo lɛ, mɔ ni Yehowa* etsu lɛ lɛ dã. 27  Agbɛnɛ, yɛ mumɔ lɛ hewalɛ naa lɛ, eba sɔlemɔwe lɛ, ni be ni gbekɛ bibioo Yesu lɛ fɔlɔi kɛ lɛ ba mli koni amɛbafee kusum ni Mla lɛ biɔ ni amɛfee amɛhã lɛ lɛ, 28  ehe gbekɛ lɛ efɔ̃ ekpɔkɔiaŋ ni ejie Nyɔŋmɔ yi ni ekɛɛ: 29  “Agbɛnɛ, Nuŋtsɔ Ofe, oohã onyɔŋ lɛ aya yɛ toiŋjɔlɛ mli, taakɛ ojaje lɛ, 30  ejaakɛ mihiŋmɛii ena gbɛ ni obaatsɔ nɔ ohere yiwala 31  ní osaa oto yɛ mɛi fɛɛ ahiɛ lɛ, 32  la ni akɛbaajie jeŋmaji lɛ ahiɛhaanɔ lɛ kɛya lɛ, ni eji omaŋ Israel anunyam.” 33  Ni gbekɛ lɛ tsɛ kɛ enyɛ anaa kpɛ amɛhe aahu yɛ nibii ni awieɔ yɛ ehe lɛ ahewɔ. 34  Agbɛnɛ hu, Simeon jɔɔ amɛ, ni ekɛɛ Maria, gbekɛ lɛ nyɛ lɛ akɛ: “Naa! Ahala gbekɛ nɛɛ kɛhã mɛi babaoo ashigbeemɔ kɛ amɛshitee ekoŋŋ yɛ Israel, kɛ agbɛnɛ hu, akɛ okadi ni abaawie ashi 35  (hɛɛ, akɛ klante kakadaŋŋ baagbu omli*), bɔ ni afee ni ajie mɛi pii atsuiiaŋ susumɔi akpo.” 36  Agbɛnɛ, gbalɔ yoo ko yɛ jɛmɛ ni atsɛɔ lɛ Hana, eji Fanuel biyoo, ni ejɛ Asher weku lɛ mli. Yoo nɛɛ eda yɛ afii amli, ni ekɛ ewu hi shi afii kpawo yɛ amɛgbalamlibotemɔ sɛɛ,* 37  ni eji yoo okulafo ni amrɔ nɛɛ eye afii nyɔŋmai kpaanyɔ kɛ ejwɛ. Enane kpaaa yɛ sɔlemɔwe lɛ, ni ekɛ sɔɔmɔ krɔŋŋ hãa nyɔɔŋ kɛ shwane, ni ehiɔ ŋmaa ni ekpaa fai kɛ hiɛdɔɔ. 38  Nakai ŋmɛlɛtswaa lɛ nɔ nɔŋŋ lɛ, etsi ebɛŋkɛ ni ebɔi Nyɔŋmɔ shidaa, ni ewie gbekɛ lɛ he etsɔɔ mɛi fɛɛ ni miimɛ Yerusalem kpɔmɔ lɛ. 39  No hewɔ lɛ, be ni amɛfee nibii fɛɛ ni Yehowa* Mla lɛ biɔ lɛ amɛgbe naa lɛ, amɛku sɛɛ amɛtee amɛ diɛŋtsɛ amɛmaŋ Nazaret yɛ Galilea. 40  Ni gbekɛ bibioo lɛ tee nɔ eda ni ehe wa, ni eyi obɔ kɛ hiɛshikamɔ, ni Nyɔŋmɔ duromɔ tee nɔ ehi enɔ. 41  Agbɛnɛ, daa afi lɛ efɔlɔi yaa Yerusalem amɛyayeɔ Hehoo gbi jurɔ lɛ. 42  Ni be ni eye afii nyɔŋma kɛ enyɔ lɛ, amɛkwɔ kɛtee, taakɛ gbijurɔyeli lɛ kusum lɛ ji lɛ. 43  Be ni gbijurɔyeli gbii lɛ ba naagbee ni amɛmiiku amɛsɛɛ lɛ, gbekɛ nuu Yesu lɛ hi shi yɛ sɛɛ yɛ Yerusalem, ni efɔlɔi lɛ yɔseee. 44  Akɛni amɛsusu akɛ efutu mɛi ni efee ekome kɛfãa gbɛ lɛ hewɔ lɛ, amɛnyiɛ gbi kome gbɛ jekɛmɔ ni no sɛɛ lɛ, amɛbɔi lɛ taomɔ yɛ wekumɛi kɛ omaŋfoi lɛ ateŋ. 45  Shi be ni amɛnaaa lɛ lɛ, amɛku amɛsɛɛ kɛtee Yerusalem, ni amɛyatao lɛ fitsofitso. 46  Anɔkwa, gbii etɛ sɛɛ lɛ amɛyana lɛ yɛ sɔlemɔwe lɛ ni eta shi yɛ tsɔɔlɔi lɛ ateŋ eebo amɛ toi ni eebibii amɛ saji. 47  Shi mɛi fɛɛ ni boɔ lɛ toi lɛ anaa kpɛ amɛhe aahu yɛ eniiashishinumɔ kɛ hetoi ni ehãa lɛ ahewɔ. 48  Agbɛnɛ, be ni efɔlɔi lɛ na lɛ lɛ, amɛhe jɔ̃ amɛhe, ni enyɛ kɛɛ lɛ akɛ: “Mibi, mɛni hewɔ ofee wɔ nɛkɛ? Naa, mi kɛ otsɛ etao bo kɛ hejaramɔ babaoo.” 49  Shi ekɛɛ amɛ akɛ: “Mɛni hewɔ nyɛtaoɔ mi? Ani nyɛleee akɛ esa akɛ mahi mi-Tsɛ we lɛ?” 50  Shi amɛnuuu nɔ ni ekɛ amɛ wie lɛ shishi. 51  Ni ekɛ amɛ kpeleke shi kɛku sɛɛ kɛtee Nazaret, ni etee nɔ eŋɔ ehe ewo amɛshishi.* Kɛfata he lɛ, enyɛ kɛ wiemɔi nɛɛ fɛɛ to jogbaŋŋ yɛ etsui mli. 52  Ni Yesu tee ehiɛ yɛ hiɛshikamɔ kɛ gbɔmɔtsoŋ dalɛ mli, ni etee nɔ ená Nyɔŋmɔ kɛ gbɔmɛi ahiɛ duromɔ.

Shishigbɛ Niŋmaa

Enɛ kɔɔ nyɔɔŋ buu bei ejwɛ lɛ ahe.
Kwɛmɔ Wiemɔi Titrii Amligbalamɔ lɛ.
Aloo “ŋwɛibɔfo.”
Kwɛmɔ Wiemɔi Titrii Amligbalamɔ lɛ.
Aloo “mɛi ni ekpɛlɛɔ amɛnɔ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Sht. ŋm., “Nuu fɛɛ nuu ni gbeleɔ musu naa.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “bo diɛŋtsɛ osusuma mli.”
Sht. ŋm., “kɛjɛ be ni eji oblayoo fro.”
Kwɛmɔ Wiemɔi Titrii Amligbalamɔ lɛ.
Aloo “etee nɔ ebo amɛ toi.”