Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 19:1-48

19  Kɛkɛ ni ebote Yeriko, ni eetsɔ jɛmɛ kɛya.  Ni nuu ko yɛ jɛmɛ ni atsɛɔ lɛ Zakeo; toohelɔnukpa ji lɛ, ni eji niiatsɛ.  Anɔkwa, eetao ena mɔ ni nɛkɛ Yesu nɛɛ ji, shi asafoku lɛ hewɔ lɛ, enyɛɛɛ lɛ ena ejaakɛ gbɔmɔ kpitioo ji lɛ.  No hewɔ lɛ, esha foi kɛtsɔ hiɛ, ni eyakwɔ sikamore tso* ko koni enyɛ ena lɛ ejaakɛ eeba ebatsɔ jɛmɛ.  Agbɛnɛ, be ni Yesu shɛ jɛmɛ lɛ, ewó ehiɛ nɔ ekwɛ lɛ ni ekɛɛ lɛ akɛ: “Zakeo, ohe afee oya ni okpeleke shi, ejaakɛ owe lɛ esa akɛ mato ŋmɛnɛ.”  Ni ehe fee oya ni ekpeleke shi ni ekɛ miishɛɛ here lɛ akɛ gbɔ.  Be ni amɛna enɛ lɛ, amɛ fɛɛ amɛtɔke amɛkɛɛ: “Eyato nuu eshafeelɔ we akɛ gbɔ.”  Shi Zakeo te shi edamɔ shi ni ekɛɛ Nuŋtsɔ lɛ akɛ: “Nuŋtsɔ, Naa! Miiŋɔ nibii ni miyɔɔ lɛ fã miihã ohiafoi, ni nɔ fɛɛ nɔ ni mishɔ̃* yɛ mɔ ko dɛŋ lɛ, miiku miibɔ he toi ejwɛ miihã lɛ.”  Kɛkɛ ni Yesu kɛɛ lɛ akɛ: “Ŋmɛnɛ lɛ, yiwalaheremɔ eba shĩa nɛɛ, ejaakɛ lɛ hu Abraham bi ji lɛ. 10  Ejaakɛ gbɔmɔ Bi lɛ ba nɔ ni elaaje lɛ taomɔ kɛ eyiwalaheremɔ.” 11  Be ni amɛboɔ nibii nɛɛ atoi lɛ, egba nɔkwɛmɔnɔ* kroko, ejaakɛ ebɛŋkɛ Yerusalem, ni amɛsusu akɛ Nyɔŋmɔ Maŋtsɛyeli lɛ baapue amrɔ nɔŋŋ. 12  No hewɔ lɛ, ekɛɛ: “Ablade ko fã gbɛ kɛtee he ko ni yɔɔ shɔŋŋ koni eyaŋɔ maŋtsɛyeli hewalɛ ehã ehe koni eku esɛɛ eba. 13  Etsɛ enyɔji nyɔŋma ni ehã amɛ minai* nyɔŋma ni ekɛɛ amɛ akɛ, ‘Nyɛkɛ enɛɛmɛi ayea guɔ kɛyashi maba.’ 14  Shi emaŋbii lɛ nyɛ lɛ ni amɛtsu maŋ bɔfoi akuu ko kɛtiu lɛ amɛyakɛɛ, ‘Wɔsumɔɔɔ akɛ nuu nɛɛ bayeɔ wɔnɔ maŋtsɛ.’ 15  “Naagbee lɛ, be ni enine shɛ maŋtsɛyeli hewalɛ lɛ* nɔ ni eku esɛɛ eba lɛ, efã akɛ atsɛ nyɔji ni ehã amɛ shika* lɛ kɛba koni ena nɔ ni amɛná yɛ amɛguɔyeli lɛ mli. 16  No hewɔ lɛ, klɛŋklɛŋ mɔ lɛ ba ebakɛɛ, ‘Nuŋtsɔ, omina lɛ efɔ minai nyɔŋma kɛfata he.’ 17  Ekɛɛ lɛ akɛ, ‘Aekoo, nyɔŋ kpakpa! Akɛni ohã ana akɛ anɔkwafo ji bo yɛ nɔ ko bibioo kwraa mli hewɔ lɛ, ye maji nyɔŋma nɔ.’ 18  Agbɛnɛ, mɔ ni ji enyɔ nɔ lɛ ba ebakɛɛ, ‘Nuŋtsɔ, omina lɛ efɔ minai enumɔ kɛfata he.’ 19  Ekɛɛ mɔ nɛ hu akɛ, ‘Bo hu, kwɛmɔ maji enumɔ nɔ.’ 20  Shi mɔ kroko ba ebakɛɛ, ‘Nuŋtsɔ, omina ni mikɛwo mama mli kɛto lɛ nɛ. 21  Ole, no mli lɛ miishe bo gbeyei, ejaakɛ oji nuu ni sane wa; okɔɔ nɔ ni okɛfɔ̃ko shi, ni okpaa nɔ ni oduko.’ 22  Ekɛɛ lɛ akɛ, ‘Nyɔŋ fɔŋ, bo diɛŋtsɛ owiemɔ mikɛkojoɔ bo. Ole akɛ miji nuu ni sane wa, ni kɔɔ nɔ ni mikɛfɔ̃ko shi, ni mikpaa nɔ ni miduko? 23  Belɛ, mɛni hewɔ mɔ ni okɛ mishika* lɛ eyafɔ̃ɔɔ shikatoohe? Kɛkɛ lɛ, kɛ́ miba lɛ, kulɛ mibahe kɛ ehe kpa.’ 24  “Kɛkɛ ni ekɛɛ mɛi ni damɔ emasɛi lɛ akɛ, ‘Nyɛhea mina lɛ yɛ edɛŋ ni nyɛŋɔhãa mɔ ni yɔɔ minai nyɔŋma lɛ.’ 25  Shi amɛkɛɛ lɛ akɛ, ‘Nuŋtsɔ, eyɛ minai nyɔŋma!’— 26  ‘Miikɛɛ nyɛ akɛ, mɔ fɛɛ mɔ ni yɔɔ nɔ ko lɛ, abaahã lɛ eko afata he, shi mɔ ni bɛ nɔ ko lɛ, abaahe nɔ ni eyɔɔ lɛ tete yɛ edɛŋ. 27  Kɛfata he lɛ, nyɛkɛ mihenyɛlɔi nɛɛ ni sumɔɔɔ akɛ miyeɔ amɛnɔ maŋtsɛ lɛ abaa biɛ ni nyɛbagbea amɛ yɛ mihiɛ.’” 28  Be ni ewie nibii nɛɛ sɛɛ lɛ, etsa egbɛfãa lɛ nɔ, ní eekwɔ kɛmiiya Yerusalem. 29  Ni be ni ebɛŋkɛ Betfage kɛ Betania, yɛ gɔŋ ni atsɛɔ lɛ Oliv Gɔŋ lɛ he lɛ, etsu kaselɔi lɛ ateŋ mɛi enyɔ 30  ekɛɛ: “Nyɛyaa akrowa ni nyɛnaa lɛ mli, ni kɛ́ nyɛbote mli lɛ, nyɛbaana teji bi ni aŋmɔ lɛ shi, ni mɔ ko mɔ ko tako enɔ pɛŋ. Nyɛfɛnea lɛ ni nyɛkɛ lɛ abaa biɛ. 31  Shi kɛ́ mɔ ko bi nyɛ akɛ, ‘Mɛni hewɔ nyɛfɛneɔ lɛ?’ lɛ, esa akɛ nyɛkɛɛ akɛ, ‘Ehe miihia Nuŋtsɔ lɛ.’” 32  No hewɔ lɛ, mɛi ni atsu lɛ yiŋ amɛtee, ni amɛyana lɛ bɔ ni ekɛɛ amɛ lɛ pɛpɛɛpɛ. 33  Shi be ni amɛfɛneɔ teji bi lɛ, teji bi lɛ nɔtsɛmɛi lɛ kɛɛ amɛ akɛ: “Mɛni hewɔ nyɛfɛneɔ teji bi lɛ?” 34  Amɛkɛɛ: “Ehe miihia Nuŋtsɔ lɛ.” 35  Ni amɛkɛ lɛ ba Yesu ŋɔɔ, ni amɛkɛ amɛtadei anɔhaanɔi shwie teji bi lɛ nɔ, ni amɛwó Yesu amɛta nɔ. 36  Be ni eyaa lɛ, belɛ, amɛkɛ amɛtadei anɔhaanɔi miiha gbɛ lɛ nɔ. 37  Be ni ebɛŋkɛ gbɛ ni kpelekeɔ shi kɛjɛɔ Oliv Gɔŋ lɛ nɔ lɛ, asafoku lɛ kɛ kaselɔi lɛ fɛɛ kɛ gbee ni wa bɔi nyamɔ kɛ Nyɔŋmɔ yijiemɔ yɛ hewalɛ nitsumɔi fɛɛ ni amɛna lɛ hewɔ 38  amɛkɛɛ: “Ajɔɔ mɔ ni baa akɛ Maŋtsɛ yɛ Yehowa* gbɛ́i mli lɛ! Toiŋjɔlɛ yɛ ŋwɛi, ni anunyam yɛ ŋwɛi flooflo!” 39  Shi Farisifoi lɛ ateŋ mɛi komɛi jɛ asafoku lɛ mli kɛɛ lɛ akɛ: “Tsɔɔlɔ, kã okaselɔi lɛ ahiɛ.” 40  Shi ehere nɔ ekɛɛ: “Miikɛɛ nyɛ akɛ, kɛ́ mɛnɛɛmɛi fee dioo lɛ, tɛi lɛ baabolɔ.” 41  Ni be ni ebɛŋkɛ lɛ, ekwɛ maŋ lɛ, ni efo eshwie nɔ 42  ekɛɛ: “Eji ŋmɛnɛ gbi nɛɛ, hɛɛ, eji okɔ nibii ni kɔɔ toiŋjɔlɛ he lɛ asɛɛ kulɛ—shi amrɔ nɛɛ aŋɔtee ohiŋmɛii. 43  Ejaakɛ gbii baaba, be ni ohenyɛlɔi lɛ kɛ tsei jaŋŋi kɛ amɛnaa piɔpiɔi baafo afabaŋ amɛwo ohe, ni amɛbaabɔle bo kɛkpe, ni amɛbaasa oyi* yɛ he fɛɛ he. 44  Amɛbaaŋɔ bo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ eko nɔ yɛ omli, ejaakɛ be ni abakwɛ omli lɛ, okɔɔɔ sɛɛ.” 45  Kɛkɛ ni ebote sɔlemɔwe lɛ ni ebɔi mɛi ni hɔ̃ɔ nii lɛ shwiemɔ, 46  ni ekɛɛ amɛ akɛ: “Aŋma akɛ, ‘Abaatsɛ mishĩa lɛ sɔlemɔ shĩa,’ shi nyɛ lɛ, nyɛkɛfee ojotswalɔi atɛkplo.” 47  Etee nɔ etsɔɔ nii yɛ sɔlemɔwe lɛ daa gbi. Shi osɔfoi tsiifoi lɛ kɛ woloŋmalɔi lɛ kɛ maŋ lɛ mli hiɛnaanɔbii lɛ miitao akɛ amɛgbe lɛ; 48  shi amɛnaaa gbɛ ko kwraa ni amɛbaatsɔ nɔ amɛfee enɛ, ejaakɛ mɛi lɛ fɛɛ tee nɔ amɛkpɛtɛ lɛ koni amɛbo lɛ toi.

Shishigbɛ Niŋmaa

Aloo “koo mli agbami tso.”
Aloo “mikɛ naafolɔmɔ eshɔ̃.”
Aloo “abɛbua.”
Hela mina kome tsiimɔ ji g 340, ni abuɔ akɛ efeɔ drakmai 100.
Aloo “maŋtsɛyeli lɛ.”
Sht. ŋm., “jwiɛtɛi.”
Sht. ŋm., “mijwiɛtɛi.”
Kwɛmɔ Wiemɔi Titrii Amligbalamɔ lɛ.
Aloo “amɛbaahao bo.”