Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 18:1-43

18  Kɛkɛ ni etsa nɔ egba amɛ nɔkwɛmɔnɔ* ko kɛtsɔɔ akɛ esa akɛ amɛsɔle daa ni amɛkaŋmɛɛ nibii ahe hu,  ekɛɛ akɛ: “Kojolɔ ko hi maŋ ko nɔ, esheee Nyɔŋmɔ gbeyei, ni ebuuu gbɔmɔ hu.  Yoo okulafo ko hu yɛ nakai maŋ lɛ mli, ni etee eŋɔɔ shii abɔ eyakɛɛ akɛ, ‘Kwɛmɔ ni oye jalɛ sane ohã mi yɛ mɔ ni mikɛyeɔ sane lɛ dɛŋ.’  Anɔkwa, ekpɛlɛɛɛ aahu kɛyashi be ko, shi sɛɛ mli lɛ ekɛɛ yɛ eyiŋ akɛ, ‘Eyɛ mli akɛ misheee Nyɔŋmɔ gbeyei ni mibuuu gbɔmɔ moŋ,  shi akɛni yoo okulafo nɛɛ kã he eegba minaa hewɔ lɛ, makwɛ ni maye jalɛ sane mahã lɛ koni ekakã he eba miŋɔɔ ni ekɛ enibimɔ lɛ basu mitsui kɛyashi mimumɔ naa tã.’”*  Ni Nuŋtsɔ lɛ kɛɛ: “Nyɛboa nɔ ni kojolɔ ni ejeee jalɔ lɛ po kɛɛ lɛ toi!  Belɛ, yɛ anɔkwale mli lɛ, ani Nyɔŋmɔ yeŋ jalɛ sane ehãŋ emɛi ni ehala ni bolɔɔ tsɛɔ lɛ shwane kɛ nyɔɔŋ lɛ, be mli ni etoɔ etsui shi ehãa amɛ lɛ?  Miikɛɛ nyɛ akɛ, ebaaye jalɛ sane ehã amɛ oya. Fɛɛ sɛɛ lɛ, kɛ́ gbɔmɔ Bi lɛ ba lɛ, ani ebaaba ebana hemɔkɛyeli nɛɛ* yɛ shikpɔŋ lɛ nɔ lɛɛlɛŋ?”  Agbɛnɛ hu, egba nɔkwɛmɔnɔ* nɛɛ etsɔɔ mɛi komɛi ni ŋɔɔ amɛhiɛ amɛfɔ̃ɔ amɛ diɛŋtsɛ amɛjalɛ nɔ ni amɛbuɔ mɛi krokomɛi akɛ amɛjeee nɔ ko lɛ akɛ: 10  “Hii enyɔ kwɔ kɛtee sɔlemɔwe lɛ koni amɛyasɔle, mɔ kome lɛ Farisifonyo ji lɛ, ni mɔ kroko lɛ, toohelɔ ni. 11  Farisifonyo lɛ ho edamɔ shi ni ebɔi sɔlemɔ yɛ eyiŋ ewie nibii nɛɛ, ‘Oo Nyɔŋmɔ, miida bo shi akɛ mitamɔɔɔ mɛi krokomɛi lɛ—ojotswalɔi, mɛi ni ejaaa, gbalafitelɔi*—loo tamɔ toohelɔ nɛɛ po. 12  Mihiɔ ŋmaa shii enyɔ daa otsi; miŋɔɔ nibii fɛɛ ni mináa lɛ mlijaa nyɔŋma mihãa.’ 13  Shi toohelɔ lɛ damɔ sɛɛ shɔŋŋ, ni esumɔɔɔ akɛ eholeɔ ehiŋmɛii anɔ kɛyaa ŋwɛi po, shi etee nɔ egbala etsitsi mai ekɛɛ, ‘Oo Nyɔŋmɔ, duromɔ mi,* mi eshafeelɔ nɛɛ.’ 14  Miikɛɛ nyɛ akɛ, nuu nɛɛ kpeleke shi kɛtee eshĩa akɛ jalɔ fe nakai Farisifonyo lɛ. Ejaakɛ mɔ fɛɛ mɔ ni wóɔ ehe nɔ lɛ, abaaba lɛ shi, shi mɔ fɛɛ mɔ ni baa ehe shi lɛ, abaawó enɔ.” 15  Agbɛnɛ, mɛi kɛ amɛbifabii hu miiba eŋɔɔ koni etara amɛhe, shi be ni kaselɔi lɛ na enɛ lɛ, amɛbɔi amɛhiɛ kamɔ. 16  Shi Yesu tsɛ abifabii lɛ kɛba eŋɔɔ ekɛɛ: “Nyɛhãa gbekɛbii bibii lɛ abaa miŋɔɔ, ni nyɛkatsĩa amɛ gbɛ, ejaakɛ mɛi ni tamɔ nɛkɛ lɛ anɔ ji Nyɔŋmɔ Maŋtsɛyeli lɛ. 17  Lɛɛlɛŋ, miikɛɛ nyɛ akɛ, mɔ fɛɛ mɔ ni hereee Nyɔŋmɔ Maŋtsɛyeli lɛ tamɔ gbekɛ bibioo ko lɛ, eboteŋ mli kɔkɔɔkɔ.” 18  Ni nɔyelɔi lɛ ateŋ mɔ kome bi lɛ akɛ: “Tsɔɔlɔ Kpakpa, mɛni esa akɛ mafee koni maná naanɔ wala?” 19  Yesu kɛɛ lɛ akɛ: “Mɛni hewɔ otsɛɔ mi mɔ kpakpa? Mɔ ko mɔ ko bɛ ni ji mɔ kpakpa, akɛ ja mɔ kome pɛ, Nyɔŋmɔ. 20  Ole kitãi lɛ: ‘Kaafite gbãla,* kaagbe gbɔmɔ, kaaju, kaaye amale odase, wo otsɛ kɛ onyɛ.’” 21  Kɛkɛ ni ekɛɛ: “Miye enɛɛmɛi fɛɛ nɔ kɛjɛ migbekɛbiiashi.” 22  Be ni Yesu nu enɛ lɛ, ekɛɛ lɛ akɛ, “Eshwɛ bo nɔ kome lolo: Yaahɔ̃ɔ nii ni oyɔɔ lɛ fɛɛ ni ojara nɔ ni obaaná lɛ ohã ohiafoi, ni obaaná jwetri yɛ ŋwɛi; ni oba obatsɔ misɛɛnyiɛlɔ.” 23  Be ni enu enɛ lɛ, ewerɛ ho ehe waa, ejaakɛ niiatsɛ kpanaa ji lɛ. 24  Yesu kwɛ lɛ ni ekɛɛ: “Kwɛ bɔ ni ebaawa kɛhã mɛi ni yɔɔ shika lɛ akɛ amɛaabote Nyɔŋmɔ Maŋtsɛyeli lɛ mli! 25  Anɔkwa, ewaaa hãaa yoma akɛ eeetsɔ nikpɛɛ abui hiŋmɛi mli fe nɔ ni niiatsɛ aaabote Nyɔŋmɔ Maŋtsɛyeli lɛ mli.” 26  Mɛi ni nu enɛ lɛ kɛɛ: “Namɔ yiwala abaanyɛ ahere mɔ?” 27  Ekɛɛ akɛ: “Nibii ni gbɔmɛi nyɛŋ afee lɛ, Nyɔŋmɔ lɛ enyɛɔ efeɔ.” 28  Shi Petro kɛɛ: “Naa! Wɔshi wɔnibii ni wɔbanyiɛ osɛɛ.” 29  Ekɛɛ amɛ akɛ: “Lɛɛlɛŋ, miikɛɛ nyɛ akɛ, mɔ ko mɔ ko bɛ ni eshi shĩa loo ŋa loo nyɛmimɛi hii loo fɔlɔi loo bii yɛ Nyɔŋmɔ Maŋtsɛyeli lɛ hewɔ 30  ni enáŋ toi abɔ yɛ be nɛɛ mli, kɛ naanɔ wala hu yɛ shihilɛ gbɛjianɔtoo ni baaba lɛ* mli.” 31  Kɛkɛ ni etsɛ Mɛi Nyɔŋma kɛ Enyɔ lɛ kɛtee afã ni ekɛɛ amɛ akɛ: “Naa! Wɔmiikwɔ kɛmiiya Yerusalem, ni nibii fɛɛ ni atsɔ gbalɔi lɛ anɔ aŋma yɛ gbɔmɔ Bi lɛ he lɛ baaba mli.* 32  Akɛ nɔkwɛmɔnɔ lɛ, abaaŋɔ lɛ awo jeŋmajiaŋbii lɛ adɛŋ ni abaaye ehe fɛo, abaafee lɛ niseniianii ni abaafɛ̃ lajɔ̃ ashwie ehe. 33  Ni be ni amɛkɛ kpelebii eyi lɛ amɛtã lɛ, amɛbaagbe lɛ, shi gbi ni ji gbi etɛ lɛ nɔ lɛ, ebaate shi.” 34  Shi amɛnuuu nibii nɛɛ eko eko shishi, ejaakɛ akɛ wiemɔi nɛɛ etee amɛ, ni amɛnuuu nibii ni ewie lɛ ashishi. 35  Agbɛnɛ, be ni Yesu bɛŋkɛɔ Yeriko lɛ, nuu shwilafo ko ta gbɛ lɛ he eeba nii. 36  Akɛni enu akɛ asafoku ko miiho hewɔ lɛ, ebɔi nɔ ni enɛ tsɔɔ lɛ bimɔ. 37  Amɛbɔ lɛ amaniɛ akɛ: “Yesu, Nazarenyo lɛ miiho!” 38  Ni ebo ekɛɛ: “Yesu, David Bi, naa mi mɔbɔ!” 39  Ni mɛi ni nyiɛ hiɛ lɛ bɔi ehiɛkamɔ, ni amɛkɛɛ lɛ akɛ efee diŋŋ, shi etee nɔ ebolɔ waa fe tsutsu lɛ ekɛɛ: “David Bi, naa mi mɔbɔ!” 40  Ni Yesu wa damɔ shi ni efã akɛ akɛ nuu lɛ aba eŋɔɔ. Be ni nuu lɛ bɛŋkɛ Yesu lɛ, Yesu bi lɛ akɛ: 41  “Mɛni otaoɔ ni mafee mahã bo?” Ni ekɛɛ: “Nuŋtsɔ, hã mana nii ekoŋŋ.” 42  No hewɔ lɛ, Yesu kɛɛ lɛ akɛ: “Naa nii; ohemɔkɛyeli ehã ohe ewa bo.” 43  Ni amrɔ lɛ ena nii, ni ebɔi Yesu sɛɛnyiɛmɔ ni ewo Nyɔŋmɔ hiɛ nyam. Agbɛnɛ hu, be ni mɛi lɛ fɛɛ na enɛ lɛ, amɛjie Nyɔŋmɔ yi.

Shishigbɛ Niŋmaa

Aloo “abɛbua.”
Aloo “ni ebagbala mi mai kɛyashi minyɛɛɛ naa madamɔ dɔŋŋ.”
Aloo “hemɔkɛyeli nɛɛ eko.” Sht. ŋm., “hemɔkɛyeli lɛ.”
Aloo “abɛbua.”
Kwɛmɔ Mat 5:27 sh. niŋ.
Aloo “naa mi mɔbɔ.”
Kwɛmɔ Mat 5:27 sh. niŋ.
Aloo “yinɔ ni baaba lɛ.” Kwɛmɔ Wiemɔi Titrii Amligbalamɔ lɛ.
Aloo “ni abaagbe nibii fɛɛ . . . naa.”