Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 14:1-35

YITSEI LƐ AMLI SAJI

  • Atsa nuu ko ni miiye fuumɔ hela yɛ Hejɔɔmɔ Gbi lɛ nɔ (1-6)

  • Ba ohe shi yɛ okpɔlɔŋmɛɛ shishi (7-11)

  • Fɔ̃ɔ mɛi ni nyɛŋ bo najiaŋ amɛto lɛ nine (12-14)

  • Mɛi ni afɔ̃ amɛ nine ní jiejie amɛnaa lɛ ahe nɔkwɛmɔnɔ lɛ (15-24)

  • Nɔ ni abiɔ ni kaselɔ kɛshã afɔle (25-33)

  • Ŋoo ni mli hewalɛ etã (34, 35)

14  Be kroko lɛ, Yesu tee Farisifoi lɛ ahiɛnyiɛlɔi lɛ ateŋ mɔ kome shĩa yɛ Hejɔɔmɔ Gbi lɛ nɔ koni eyaye nii, ni amɛkwɛ lɛ gãa.  Ni naa! nuu ko yɛ ehiɛ ni miiye fuumɔ hela ko.*  No hewɔ lɛ, Yesu bi mɛi ni le Mla lɛ jogbaŋŋ lɛ kɛ Farisifoi lɛ akɛ: “Ani Hejɔɔmɔ Gbi lɛ nɔ lɛ, mla ŋmɛɔ gbɛ akɛ atsaa mɔ aloo mla eŋmɛɛɛ gbɛ?”  Shi amɛtswaaa amɛsɛŋ. Kɛkɛ ni emɔ nuu lɛ mli, ni etsa lɛ, ni ewo lɛ gbɛ.  Ni ekɛɛ amɛ akɛ: “Nyɛteŋ namɔ kɛ́ ebi loo etsinanuu gbee nubu mli lɛ, ejieŋ lɛ amrɔ nɔŋŋ yɛ Hejɔɔmɔ Gbi lɛ nɔ?”  Ni amɛnyɛɛɛ lɛ enɛ hetoo amɛhã.  Ni be ni eyɔse bɔ ni hii ni afɔ̃ amɛ nine lɛ halaa hiɛnaanɔbii agbɛhei amɛhãa amɛhe lɛ, egba amɛ nɔkwɛmɔnɔ* ko. Ekɛɛ amɛ akɛ:  “Kɛ́ mɔ ko fɔ̃ bo nine kɛtee yookpeemɔ okpɔlɔŋmɛɛ ko shishi lɛ, kaayata hiɛnaanɔbii agbɛhe lɛ. Ekolɛ, aleenɔ efɔ̃ mɔ ko ni hiɛ yɔɔ nyam fe bo hu nine.  Ni mɔ ni fɔ̃ okɛ lɛ fɛɛ nine lɛ baaba ebakɛɛ bo akɛ, ‘Hã mɔ nɛ ata ogbɛhe lɛ.’ No lɛ okɛ hiɛgbele baayata he ni baa shi kwraa lɛ. 10  Shi kɛ́ afɔ̃ bo nine lɛ, yaa ni oyata he ni baa shi kwraa lɛ, koni kɛ́ mɔ ni fɔ̃ bo nine lɛ ba lɛ, ekɛɛ bo akɛ, ‘Naanyo, yaa yitsogbɛ.’ No lɛ ohiɛ baaba nyam yɛ mɛi ni afɔ̃ okɛ amɛ nine lɛ fɛɛ hiɛ. 11  Ejaakɛ mɔ fɛɛ mɔ ni wóɔ ehe nɔ lɛ abaaba lɛ shi, ni mɔ fɛɛ mɔ ni baa ehe shi lɛ abaawó enɔ.” 12  No sɛɛ lɛ, ekɛɛ mɔ ni fɔ̃ lɛ nine lɛ hu akɛ: “Kɛ́ oŋmɛ shwane loo gbɛkɛ okpɔlɔ lɛ, kaatsɛ onanemɛi loo onyɛmimɛi loo owekumɛi loo okutsoŋ niiatsɛmɛi. Kɛjeee nakai lɛ, amɛ hu amɛaafɔ̃ bo nine lɛ eko, ni amɛkɛ no baato bo najiaŋ. 13  Shi kɛ́ oŋmɛ okpɔlɔ lɛ, fɔ̃ɔ ohiafoi, obubuafoi, akpakei, kɛ shwilafoi nine; 14  ni obaaná miishɛɛ, akɛni amɛbɛ nɔ ko ni amɛkɛbaato bo najiaŋ lɛ hewɔ. Ejaakɛ abaato bo najiaŋ yɛ jalɔi agbohiiashitee lɛ mli.” 15  Be ni mɛi ni afɔ̃ amɛ kɛ lɛ nine lɛ ateŋ mɔ kome nu enɛɛmɛi lɛ, ekɛɛ lɛ akɛ: “Mɔ ni yeɔ nii* yɛ Nyɔŋmɔ Maŋtsɛyeli lɛ mli lɛ yɛ miishɛɛ.” 16  Yesu kɛɛ lɛ akɛ: “Nuu ko ŋmɛ okpɔlɔ kpeteŋkpele gbɛkɛ ko, ni efɔ̃ mɛi pii nine. 17  Be ni ŋmɛlɛtswaa lɛ shɛ kɛhã gbɛkɛ niyeli lɛ, etsu enyɔŋ koni eyakɛɛ mɛi ni afɔ̃ amɛ nine lɛ akɛ, ‘Nyɛbaa, ejaakɛ amrɔ nɛɛ, agbe nibii fɛɛ naa.’ 18  Shi amɛ fɛɛ amɛbɔi amɛnaajiemɔ yɛ gbɛ kome too lɛ nɔŋŋ nɔ. Klɛŋklɛŋ mɔ lɛ kɛɛ lɛ akɛ, ‘Mihé ŋmɔ ni esa akɛ maya ni mayakwɛ; ofainɛ, jiemɔ mi yɛ mli.’ 19  Ni mɔ kroko kɛɛ, ‘Mihé tsinai nyɔŋma ni akɛ kɔɔŋtsei ewo amɛ enyɔnyɔɔnyɔ, ni miiya mayaka amɛ makwɛ; ofainɛ, jiemɔ mi yɛ mli.’ 20  Mɔ kroko hu kɛɛ, ‘Mikpee yoo etsɛko, ni no hewɔ lɛ, minyɛŋ maba.’ 21  No hewɔ lɛ, nyɔŋ lɛ ba ni ebabɔ enuŋtsɔ lɛ nibii nɛɛ ahe amaniɛ. Ni shĩatsɛ lɛ mli fu ni ekɛɛ enyɔŋ lɛ akɛ, ‘Yaa gbɛjegbɛi titrii lɛ kɛ maŋ lɛ mli gbɛi leleoi lɛ ahe mramra, ni oyaŋɔ ohiafoi kɛ obubuafoi kɛ shwilafoi kɛ akpakei kɛba biɛ.’ 22  Sɛɛ mli lɛ, nyɔŋ lɛ kɛɛ, ‘Nuŋtsɔ, atsu ofamɔ lɛ he nii agbe naa, ni kɛ̃lɛ gbɛ yɛ lolo.’ 23  No hewɔ lɛ, nuŋtsɔ lɛ kɛɛ nyɔŋ lɛ akɛ, ‘Yaa gbɛjegbɛi lɛ kɛ gbɛi ni kamɔ afabaŋi ateŋ lɛ anɔ, ni oyawo amɛ hewalɛ waa ní amɛba, koni miwe lɛ ayi. 24  Ejaakɛ miikɛɛ nyɛ akɛ, mɛi ni afɔ̃ amɛ nine lɛ ateŋ mɔ ko kwraa esaŋ migbɛkɛ niyenii lɛ anaa.’” 25  Agbɛnɛ, asafoku babaoo ko fata ehe kɛmiifã gbɛ, ni etsɔ ehe ekɛɛ amɛ akɛ: 26  “Kɛ́ mɔ ko ba miŋɔɔ ni enyɛɛɛ* etsɛ kɛ enyɛ kɛ eŋa kɛ ebii kɛ enyɛmimɛi hii kɛ enyɛmimɛi yei, hɛɛ, kɛ lɛ diɛŋtsɛ ewala* po lɛ, enyɛŋ etsɔ mikaselɔ. 27  Mɔ fɛɛ mɔ ni wóoo epiŋmɔ tso* etere ní enyiɛ misɛɛ lɛ, enyɛŋ etsɔ mikaselɔ. 28  Akɛ nɔkwɛmɔnɔ lɛ, nyɛteŋ namɔ ni kɛ́ eetao ema mɔɔ lɛ, klɛŋklɛŋ lɛ, etaŋ shi ni ebu naa ekwɛ kɛji eyɛ nii ni fa bɔ ni sa ni ekɛbaagbe naa lo? 29  Kɛjeee nakai lɛ, eeetswa faneshi lɛ, shi enyɛŋ naa egbe, ni mɛi fɛɛ ni naa lɛ baabɔi ehe fɛoyeli 30  amɛkɛɛ: ‘Gbɔmɔ nɛɛ bɔi mɔɔ maa shi enyɛɛɛ naa egbe.’ 31  Aloo mɛɛ maŋtsɛ ni kɛ́ eeya ekɛ maŋtsɛ kroko ayawu ta lɛ, klɛŋklɛŋ lɛ, etaŋ shi ni eya ajina ekwɛ kɛji ebaanyɛ ekɛ asraafoi akpei nyɔŋma adamɔ mɔ ni hiɛ asraafoi akpei nyɔŋmai enyɔ kɛbaa enɔ lɛ naa lo? 32  Anɔkwa, kɛ́ enyɛŋ efee nakai lɛ, no lɛ be ni nakai mɔ lɛ yɔɔ shɔŋŋ lolo lɛ, ebaatsu maŋ bɔfoi akuu ko koni amɛyakpa fai kɛhã toiŋjɔlɛ. 33  Nakai nɔŋŋ nyɛnáa nyɛlea akɛ, nyɛteŋ mɔ fɛɛ mɔ ni shiii nibii ni eyɔɔ lɛ fɛɛ lɛ,* enyɛŋ etsɔ mikaselɔ. 34  “Ŋwanejee ko bɛ he akɛ, ŋoo hi. Shi kɛ́ ŋoo lɛ mli hewalɛ lɛ tã lɛ, mɛni akɛbaawo lɛ ŋoo dɔŋŋ? 35  Esaaa kɛhãaa sũ loo tumo. Mɛi tsiɔ amɛshwieɔ. Mɔ ni yɔɔ toi ni ekɛaabo toi lɛ, hã ebo toi.”

Shishigbɛ Niŋmaa

Aloo “edema,” ni ji hela ko ni hãa gbɔmɔtso lɛ mli nu tĩaa yɛ gbɔmɔtso lɛ he ko.
Aloo “abɛbua.”
Sht. ŋm., “yeɔ aboloo.”
Aloo “esumɔɔɔ mi fe.”
Aloo “esusuma.”
Kwɛmɔ Wiemɔi Titrii Amligbalamɔ lɛ.
Aloo “ni kɛ nibii ni eyɔɔ lɛ fɛɛ yeee shɛɛ lɛ.”