Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 13:1-35

13  Nakai be lɛ mli lɛ, mɛi komɛi ni yɔɔ jɛmɛ lɛ bɔ lɛ Galileabii ni Pilato kɛ amɛlá futu amɛfɔlei amli lɛ ahe amaniɛ.  Ni ehere nɔ ekɛɛ amɛ akɛ: “Ani nyɛsusuɔ akɛ nakai Galileabii lɛ ji eshafeelɔi fe Galileabii krokomɛi fɛɛ akɛni amɛna nɔ nɛɛ hewɔ?  Dabi, miikɛɛ nyɛ akɛ; kɛ́ nyɛtsakeee nyɛtsui lɛ, nyɛ fɛɛ nyɛhiɛ baakpãtã nakai nɔŋŋ.  Aloo nyɛsusuɔ akɛ mɛi nyɔŋma kɛ kpaanyɔ lɛ ni mɔɔ ni yɔɔ Siloam lɛ kumɔ shwie amɛnɔ, ni egbe amɛ lɛ yeɔ fɔ fe mɛi krokomɛi fɛɛ ni yɔɔ Yerusalem?  Dabi, miikɛɛ nyɛ akɛ; kɛ́ nyɛtsakeee nyɛtsui lɛ, nyɛ fɛɛ nyɛhiɛ baakpãtã tamɔ bɔ ni amɛhiɛ kpãtã lɛ.”  Kɛkɛ ni etee nɔ egba nɔkwɛmɔnɔ* nɛɛ: “Nuu ko yɛ agbami tso yɛ ewein ŋmɔ mli, ni eba enɔ yibii taomɔ, shi enáaa eko.  Kɛkɛ ni ekɛɛ wein ŋmɔsaalɔ lɛ akɛ, ‘Afii etɛ nɛ ni mibɔi yibii taomɔ yɛ agbami tso nɛɛ nɔ, shi mináaa eko. Toomɔ ofɔ̃ shi! Mɛni hewɔ esa akɛ ehã shikpɔŋ lɛ afee yaka?’  Ehere lɛ nɔ akɛ, ‘Nuŋtsɔ, hã ema shi afi kome hu kɛfata he kɛyashi matsa ehewɔ kɛkpe ni mawo eshishi tumo.  Kɛ́ ewo yibii wɔsɛɛ lɛ, no lɛ, ehi jogbaŋŋ; shi kɛjeee nakai lɛ, ní otoo ofɔ̃ shi.’” 10  Be ko lɛ, eetsɔɔ nii yɛ kpeehei lɛ eko mli yɛ Hejɔɔmɔ Gbi lɛ nɔ. 11  Ni naa! yoo ko yɛ jɛmɛ ni mumɔ ni hãa mɔ gbedeɔ* ehi emli afii nyɔŋma kɛ kpaanyɔ; ni edɔ kɔmɔɔ ni enyɛɛɛ emli ekpã kwraa. 12  Be ni Yesu na lɛ lɛ etsɛ lɛ ni ekɛɛ lɛ akɛ: “Yoo, afɛne bo kɛjɛ ogbedemɔ lɛ mli.” 13  Ni ekɛ eniji shwie enɔ, ni amrɔ lɛ ejaje trɔmɔɔ ni ebɔi Nyɔŋmɔ hiɛnyamwoo. 14  Shi onukpa ni kwɛɔ kpeehe lɛ nɔ lɛ mli fu ejaakɛ Yesu tsa mɔ yɛ Hejɔɔmɔ Gbi lɛ nɔ, ni ekɛɛ asafoku lɛ akɛ: “Gbii ekpaa yɔɔ ni sa akɛ atsuɔ nii yɛ mli; no hewɔ lɛ, nakai gbii lɛ anɔ lɛ, nyɛbaa ni atsaa nyɛ, shi jeee yɛ Hejɔɔmɔ Gbi lɛ nɔ.” 15  Shi Nuŋtsɔ lɛ hã lɛ hetoo ekɛɛ: “Osatofoi, Hejɔɔmɔ Gbi lɛ nɔ lɛ, ani nyɛteŋ mɔ fɛɛ mɔ fɛneee etsinanuu loo eteji yɛ kooloi atsũ lɛ mli ni ekɛ lɛ aya eyahã lɛ nɔ ko enu? 16  Nɛkɛ yoo nɛɛ, ni ji Abraham biyoo ni Satan efi lɛ afii nyɔŋma kɛ kpaanyɔ lɛ, ani esaaa mɔ ni ajieɔ gboklɛ nɛɛ yɛ ehe yɛ Hejɔɔmɔ Gbi lɛ nɔ?” 17  Anɔkwa, be ni ewie nibii nɛɛ, mɛi ni teɔ shi amɛwoɔ lɛ lɛ fɛɛ ahiɛ bɔi gboimɔ, shi asafoku lɛ fɛɛ bɔi nyamɔ yɛ anunyam nibii ni efee lɛ fɛɛ hewɔ. 18  No hewɔ lɛ, etee nɔ ekɛɛ akɛ: “Mɛni Nyɔŋmɔ Maŋtsɛyeli lɛ tamɔ, ni mɛni he mikɛbaato? 19  Etamɔ sinapi wu ni mɔ ko kɔ ni edu yɛ ebɔɔ mli, ni eda ni etsɔ tso, ni ŋwɛi loofɔji bahi eniji lɛ anɔ.” 20  Ni ekɛɛ ekoŋŋ akɛ: “Mɛni he mikɛ Nyɔŋmɔ Maŋtsɛyeli lɛ baato? 21  Etamɔ masha ni yoo ko ŋɔ efutu mamu* ni falɛ shɛɔ susumɔnii agboi* etɛ mli kɛyashi fɛɛ sha.” 22  Ni eyakpa maji kɛ akrowai amli etsɔɔ nii, ni etsa egbɛfãa lɛ nɔ kɛtee Yerusalem. 23  Agbɛnɛ, nuu ko kɛɛ lɛ akɛ: “Nuŋtsɔ, ani mɛi fioo kɛkɛ yiwala abaahere?” Ekɛɛ amɛ akɛ: 24  “Nyɛmiaa nyɛhiɛ waa kɛtsɔa shinaa fintɔŋŋ lɛ mli kɛbotea mli, ejaakɛ miikɛɛ nyɛ akɛ, mɛi babaoo baatao akɛ amɛbote mli shi amɛnyɛŋ. 25  Kɛ́ shĩatsɛ lɛ te shi ni eŋa shinaa lɛ, nyɛbaadamɔ shinaa lɛ naa ni nyɛbaabɔi shinaa lɛ shimɔ, ni nyɛbaakɛɛ akɛ, ‘Nuŋtsɔ, gbelemɔ wɔ.’ Shi ebaahã nyɛ hetoo akɛ: ‘Mileee he ni nyɛjɛ.’ 26  Ni nyɛbaabɔi kɛɛmɔ akɛ, ‘Wɔye nii ni wɔnu nii yɛ ohiɛ, ni otsɔɔ nii yɛ wɔgbɛjegbɛi titrii lɛ anɔ.’ 27  Shi ebaagbele enaa ekɛɛ nyɛ akɛ, ‘Mileee he ni nyɛjɛ. Nyɛjea minɔ nyɛyaa, nyɛ mɛi fɛɛ ni nyɛtsuɔ nibii ni ejaaa!’ 28  Kɛ́ nyɛna Abraham, Isak, Yakob, kɛ gbalɔi lɛ fɛɛ yɛ Nyɔŋmɔ Maŋtsɛyeli lɛ mli, shi nyɛ diɛŋtsɛ lɛ ashɛrɛ nyɛ ashwie agbonaa lɛ, jɛmɛ ji he ni nyɛbaafo ni nyɛbaakpe nyɛnyanyɔjiashi yɛ. 29  Kɛfata he lɛ, mɛi baajɛ boka kɛ anai, kɛ kooyi kɛ wuoyi amɛba, ni amɛbaatara okpɔlɔ lɛ he yɛ Nyɔŋmɔ Maŋtsɛyeli lɛ mli. 30  Ni naa! sɛɛkpeebii komɛi yɛ ni baatsɔmɔ klɛŋklɛŋ bii, ni klɛŋklɛŋ bii komɛi yɛ ni baatsɔmɔ sɛɛkpeebii.” 31  Nakai ŋmɛlɛtswaa lɛ nɔ nɔŋŋ lɛ, Farisifoi komɛi ba ni amɛbakɛɛ lɛ akɛ: “Jee kpo ni oshi biɛ oya, ejaakɛ Herode miitao bo egbe.” 32  Ni ekɛɛ amɛ akɛ: “Nyɛyaa nyɛyakɛa nakai osɔ lɛ akɛ, ‘Naa! miifãmɔ daimonioi ni miitsa mɛi ŋmɛnɛ kɛ wɔ́, ni gbi ni ji gbi etɛ lɛ nɔ lɛ magbe naa.’ 33  Kɛ̃lɛ, esa akɛ matsa migbɛfãa lɛ nɔ ŋmɛnɛ, wɔ́, kɛ wɔsɛɛ, ejaakɛ enyɛŋ eba lɛ akɛ* abaagbe gbalɔ ko yɛ he ko akɛ ja Yerusalem. 34  Yerusalem, Yerusalem, bo mɔ ni ogbeɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi—kwɛ bɔ ni mitao shii abɔ akɛ mabua obii lɛ anaa taakɛ wuɔ yoo buaa ebii anaa ewoɔ efiji ashishi lɛ! Shi nyɛsumɔɔɔ. 35  Naa! Ashi nyɛwe lɛ ahã nyɛ. Miikɛɛ nyɛ akɛ, nyɛnaŋ mi dɔŋŋ kɛyashi be ni nyɛaakɛɛ akɛ: ‘Ajɔɔ mɔ ni baa yɛ Yehowa* gbɛ́i mli lɛ!’”

Shishigbɛ Niŋmaa

Aloo “abɛbua.”
Aloo “mumɔ ni hãa mɔ gbɔjɔɔ.”
Mamu ji nibii tamɔ abele gbiŋ, omɔ gbiŋ, ŋmaa gbiŋ, kɛ amɛhenɔi ni agbɛlɛ lɛ mɔnyɔmɔnyɔ.
Sht. ŋm., “sea susumɔnii.” Sea kome feɔ L 7.33 (kwt gbiji 6.66).
Aloo “ebaŋ mli akɛ.”
Kwɛmɔ Wiemɔi Titrii Amligbalamɔ lɛ.