Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 12:1-59

12  Nakai be lɛ mli lɛ, be ni mɛi akpei babaoo ebabua amɛhe naa akɛ asafoku ni mɛi miinaanaa mɛi anɔ lɛ, klɛŋklɛŋ lɛ, ebɔi ekaselɔi lɛ kɛɛmɔ akɛ: “Nyɛkwɛa jogbaŋŋ yɛ Farisifoi lɛ amasha, ni ji osatofeemɔ lɛ he.  Shi nɔ ko nɔ ko bɛ ni atsimɔ nɔ jogbaŋŋ ni ajieŋ lɛ kpo, ni teemɔŋ sane ko bɛ ni aleŋ.  No hewɔ lɛ, nɔ fɛɛ nɔ ni nyɛwieɔ yɛ duŋ mli lɛ abaanu yɛ la hiɛ, ni nɔ ni nyɛwoɔ toiŋ nyɛwieɔ yɛ piai amli lɛ, abaashiɛ yɛ tsũi ayiteŋ.  Kɛfata he lɛ, minanemɛi, miikɛɛ nyɛ akɛ, nyɛkashea mɛi ni gbeɔ gbɔmɔtso lɛ ni no sɛɛ lɛ amɛnyɛɛɛ nɔ ko amɛfee dɔŋŋ lɛ gbeyei.  Shi matsɔɔ nyɛ mɔ gbeyei ni nyɛshe: Nyɛshea mɔ ni kɛ́ egbe sɛɛ lɛ eyɔɔ hegbɛ akɛ eshɛɔ efɔ̃ɔ Gehena* lɛ gbeyei. Hɛɛ, miikɛɛ nyɛ akɛ, mɔ nɛ gbeyei nyɛshea.  Ani afilimatai enumɔ lɛ, jeee kapɛji enyɔ* ni shɛɛɛ nɔ ko ahɔ̃ɔ ahéɔ? Kɛ̃lɛ, Nyɔŋmɔ hiɛ kpaaa* amɛteŋ ekome folo po nɔ.  Shi nyɛyiteŋtsɔi tete lɛ akane fɛɛ. Nyɛkashea gbeyei; nyɛjara wa fe afilimatai babaoo.  “Miikɛɛ nyɛ akɛ, mɔ fɛɛ mɔ ni tsĩɔ mitã yɛ mɛi ahiɛ lɛ, gbɔmɔ Bi lɛ hu baatsĩ etã yɛ Nyɔŋmɔ bɔfoi lɛ ahiɛ.  Shi mɔ fɛɛ mɔ ni kwaa mi yɛ mɛi ahiɛ lɛ, abaakwa lɛ yɛ Nyɔŋmɔ bɔfoi lɛ ahiɛ. 10  Ni mɔ fɛɛ mɔ ni wieɔ wiemɔ ko eshiɔ gbɔmɔ Bi lɛ, akɛbaafa lɛ, shi mɔ fɛɛ mɔ ni bɔɔ musu eshiɔ mumɔ krɔŋkrɔŋ lɛ, akɛfaŋ lɛ. 11  Kɛ́ amɛkpala nyɛ kɛtee maŋ gwabɔi,* nɔyelɔi, kɛ mɛi ni yɔɔ hegbɛi ahiɛ lɛ, nyɛkafea yeyeeye yɛ bɔ ni loo nɔ ni nyɛbaawie kɛfã nyɛhe loo nɔ ni nyɛbaawie lɛ he, 12  ejaakɛ mumɔ krɔŋkrɔŋ lɛ baatsɔɔ nyɛ nibii ni esa akɛ nyɛwie lɛ yɛ nakai ŋmɛlɛtswaa lɛ nɔ nɔŋŋ.” 13  Kɛkɛ ni mɔ ko jɛ asafoku lɛ mli kɛɛ lɛ akɛ: “Tsɔɔlɔ, kɛɛmɔ minyɛmi lɛ ni ekɛ mi aja gboshinii lɛ.” 14  Ekɛɛ lɛ akɛ: “Nuu, namɔ wó mi kojolɔ loo sanebualɔ yɛ nyɛyi enyɔ lɛ teŋ?” 15  Kɛkɛ ni ekɛɛ amɛ akɛ: “Nyɛyaa nɔ nyɛgbɛa nyɛhiŋmɛiiaŋ, ni nyɛhiɛ ahia nyɛhe nɔ yɛ amimyeli* srɔtoi fɛɛ he, ejaakɛ kɛji gbɔmɔ ená nii babaoo ni eteke nɔ po lɛ, jeee nibii ni eyɔɔ lɛ hãa lɛ wala.” 16  Kɛkɛ ni egba amɛ nɔkwɛmɔnɔ* ko ekɛɛ: “Nuu niiatsɛ ko shikpɔŋ ba nii babaoo. 17  No hewɔ lɛ, ebɔi eyiŋ susumɔ ekɛɛ, ‘Amrɔ nɛɛ ni mibɛ he ko ni mabua minibaa nii lɛ anaa yɛ lɛ, mɛni esa akɛ mafee?’ 18  Ni ekɛɛ, ‘Nɔ ni mafee nɛ: Mibakumɔ minitoohei lɛ mashwie shi ni mamamɔ ewuji, ni mabua miŋmaa lɛ fɛɛ kɛ minii lɛ fɛɛ naa yɛ jɛmɛ, 19  ni makɛɛ mihe* akɛ: “Oyɛ* nibii kpakpai babaoo ni akɛto ahã bo afii pii; jɔɔmɔ ohe, ye ni onu, ni omii ashɛ ohe.”’ 20  Shi Nyɔŋmɔ kɛɛ lɛ akɛ, ‘Kwashia, nyɔɔŋ nɛɛ mli nɔŋŋ lɛ abaabi owala* shi yɛ odɛŋ. Belɛ, nibii ni obua naa oto lɛ, namɔ nɔ amɛbaatsɔ?’ 21  Nakai nɔŋŋ eji yɛ mɔ ni buaa jwetrii anaa ehãa ehe shi ejeee niiatsɛ yɛ Nyɔŋmɔ hiɛ lɛ gbɛfaŋ.” 22  Kɛkɛ ni ekɛɛ ekaselɔi lɛ akɛ: “Enɛ hewɔ ni miikɛɛ nyɛ akɛ, nyɛkpaa yeyeeyefeemɔ yɛ nyɛwala he* yɛ nɔ ni nyɛbaaye lɛ hewɔ, loo yɛ nyɛgbɔmɔtsei ahe yɛ nɔ ni nyɛbaawo lɛ hewɔ lɛ. 23  Ejaakɛ wala* jara wa fe niyenii, ni gbɔmɔtso lɛ hu jara wa fe atade. 24  Nyɛsusua kwaakwaalabitei ahe nyɛkwɛa: Amɛduuu nii, asaŋ amɛkpaaa nii; amɛbɛ aboŋo loo nitoohe; kɛ̃lɛ, Nyɔŋmɔ lɛɔ amɛ. Ani nyɛjara waaa kwraa fe loofɔji? 25  Nyɛteŋ namɔ baanyɛ ekɛ yeyeeyefeemɔ atsa ewalasɛɛkɛlɛ nɔ ninetalɔ kome? 26  No hewɔ lɛ, kɛ́ nyɛnyɛɛɛ nɔ ko bibioo tamɔ nɛkɛ nyɛfee lɛ, mɛni hewɔ nyɛfeɔ yeyeeye yɛ nibii ni eshwɛ lɛ ahe mɔ? 27  Nyɛsusua bɔ ni abɛbia fɔfɔii daraa lɛ he nyɛkwɛa: Amɛgbooo deŋme, asaŋ amɛtsɛ̃ɛɛ kpãa; shi miikɛɛ nyɛ akɛ, yɛ Solomon anunyam lɛ fɛɛ sɛɛ po lɛ, ewulaaa tamɔ enɛɛmɛi ateŋ ekome. 28  Agbɛnɛ, kɛji nɛkɛ Nyɔŋmɔ wulaa kwɛ̃ɛ nii ni yɔɔ koo mli, ní ŋmɛnɛ lɛ amɛyɛ ni wɔ́ lɛ aŋɔwo flɔnɔɔ mli lɛ, enyiɛ nɔŋŋ ni ewulaŋ nyɛ babaoo, nyɛ ni nyɛhemɔkɛyeli faaa! 29  No hewɔ lɛ, nyɛkpaa nɔ ni nyɛbaaye kɛ nɔ ni nyɛbaanu lɛ taomɔ, ni nyɛkpaa yeyeeyefeemɔ tuutu; 30  ejaakɛ nibii nɛɛ fɛɛ sɛɛ jeŋmaji ni yɔɔ je lɛ mli lɛ kɛ hiɛdɔɔ diɔ, shi nyɛ-Tsɛ lɛ le akɛ nibii nɛɛ ahe miihia nyɛ. 31  Moŋ lɛ, nyɛyaa nɔ nyɛtaoa e-Maŋtsɛyeli lɛ, ni abaaŋɔ nibii nɛɛ fɛɛ afata he ahã nyɛ. 32  “Nyɛkashea gbeyei, tooku bibioo, ejaakɛ nyɛ-Tsɛ lɛ ekpɛ mli akɛ ebaaŋɔ Maŋtsɛyeli lɛ ehã nyɛ. 33  Nyɛhɔ̃a nibii ni nyɛyɔɔ lɛ, ni nyɛfea ohiafoi ejurɔ.* Nyɛfea shika kotokui ni fiteee nyɛhãa nyɛhe, ni tsɔɔ akɛ nyɛbɔa jwetri ni etãaa yɛ ŋwɛi, he ni julɔ ko bɛŋkɛɛɛ, ni omlɛ̃gɛ̃ ko hu kpeee nii yɛ lɛ. 34  Ejaakɛ he ni nyɛjwetri yɔɔ lɛ, jɛmɛ nyɛtsuii hu baahi. 35  “Nyɛwoa nyɛtadei ni nyɛfea klalo* ni nyɛhãa nyɛkanei lɛ hu atsoa, 36  ni nyɛ diɛŋtsɛ hu nyɛfea tamɔ mɛi ni miimɛ koni amɛnuŋtsɔ ajɛ yookpeemɔ aba, koni kɛ́ eba ni eshi agbó lɛ, amɛgbele lɛ oya nɔŋŋ. 37  Nakai nyɔji lɛ ni be ni nuŋtsɔ lɛ baaba lɛ, ebaabana akɛ amɛmiibu lɛ yɛ miishɛɛ! Lɛɛlɛŋ, miikɛɛ nyɛ akɛ, ebaawo sɔɔmɔ atade* ni ebaahã amɛtara okpɔlɔ lɛ he ni ebaaba ebasɔmɔ amɛ. 38  Ni kɛ́ eba yɛ buu be ni ji enyɔ* lɛ nɔ, loo nɔ ni ji etɛ* lɛ nɔ po, ni ebana amɛ akɛ amɛfee klalo lɛ, amɛyɛ miishɛɛ! 39  Shi nyɛnáa nyɛlea enɛ akɛ, eji shĩatsɛ lɛ le ŋmɛlɛtswaa nɔ ni julɔ lɛ baaba kulɛ, eŋmɛŋ gbɛ ni agbu ewe lɛ awo mli. 40  Nyɛ hu, nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛhiɛ kãaa nɔ lɛ, gbɔmɔ Bi lɛ baaba.” 41  Ni Petro kɛɛ akɛ: “Nuŋtsɔ, oogba nɔkwɛmɔnɔ* nɛɛ ootsɔɔ wɔ pɛ aloo oogba ootsɔɔ mɔ fɛɛ mɔ hu?” 42  Ni Nuŋtsɔ lɛ kɛɛ akɛ: “Namɔ tuuntu ji shĩa nɔkwɛlɔ anɔkwafo lɛ, hiɛshikalɔ lɛ, mɔ ni enuŋtsɔ baaŋɔ lɛ eto esɔɔlɔi akuu lɛ nɔ* koni eya nɔ ehã amɛ amɛniyenii bɔ ni sa yɛ be ni sa mli lɛ? 43  Nakai nyɔŋ lɛ yɛ miishɛɛ kɛ́ enuŋtsɔ lɛ ba ni ebanina lɛ akɛ eefee nakai lɛ! 44  Miikɛɛ nyɛ yɛ anɔkwale mli akɛ, ebaaŋɔ lɛ eto nibii fɛɛ ni eyɔɔ lɛ nɔ. 45  Shi kɛ́ nakai nyɔŋ lɛ kɛɛ yɛ etsuiŋ akɛ, ‘Minuŋtsɔ lɛ miitsɛ kɛbaa,’ ni ebɔi tsuji hii kɛ yei lɛ yii, ni ebɔi niyeli kɛ ninumɔ kɛ dãatɔɔ lɛ, 46  nakai nyɔŋ lɛ nuŋtsɔ lɛ baaba yɛ gbi nɔ ni ekwɛɛɛ lɛ gbɛ, kɛ ŋmɛlɛtswaa nɔ ni eleee, ni ebaagbala etoi waa, ni ebaahã lɛ gbɛfaŋnɔ yɛ mɛi ni yeee anɔkwa lɛ ateŋ. 47  Kɛkɛ lɛ, nakai nyɔŋ lɛ ni nu enuŋtsɔ lɛ suɔmɔnaa nii lɛ shishi shi esaaa ehe etooo aloo efeee nɔ ni enuŋtsɔ lɛ bi ni efee* lɛ, abaayi lɛ kpãi babaoo. 48  Shi mɔ ni nuuu shishi, ni kɛ̃lɛ efee nibii ni sa kpãi lɛ, abaayi lɛ fioo. Anɔkwa, mɔ fɛɛ mɔ ni aŋɔ babaoo ahã lɛ, abaabi babaoo shi yɛ edɛŋ, ni mɔ ni atu babaoo awo edɛŋ ni ekwɛ nɔ lɛ, abaabi nɔ ni teke nɔ shi yɛ edɛŋ. 49  “Miba ni mibawo la yɛ shikpɔŋ lɛ nɔ, shi kɛ́ ehere momo lɛ, mɛni mitaoɔ dɔŋŋ? 50  Anɔkwa, miyɛ baptisimɔ ko ni akɛbaabaptisi mi, ni kwɛ bɔ ni mihe hiaa mi kɛyashi be ni abaagbe naa! 51  Ani nyɛsusuɔ akɛ miba koni mikɛ toiŋjɔlɛ abahã yɛ shikpɔŋ lɛ nɔ? Dabi, miikɛɛ nyɛ akɛ, mligbalamɔ moŋ. 52  Ejaakɛ kɛjɛ be nɛɛ nɔ kɛyaa lɛ, mɛi enumɔ ni yɔɔ shĩa kome mli lɛ amli baagbala, mɛi etɛ baate shi awo mɛi enyɔ ni mɛi enyɔ baate shi awo mɛi etɛ. 53  Mligbalamɔ baaba amɛteŋ, tsɛ baate shi awo binuu ni binuu baate shi awo tsɛ, nyɛ baate shi awo biyoo ni biyoo baate shi awo nyɛ, shaayoo baate shi awo ebi ŋa, ni ŋa baate shi awo eshaayoo.” 54  Ni esaa ekɛɛ asafoku lɛ akɛ: “Kɛ́ nyɛna atatu miiwo yɛ anai lɛ, amrɔ lɛ nyɛkɛɔ akɛ, ‘Ahum baatswa kɛ nugbɔnɛmɔ,’ ni ebaa mli nakai. 55  Ni kɛ́ nyɛna akɛ wuoyi kɔɔyɔɔ miitswa lɛ, nyɛkɛɔ akɛ, ‘Jeŋ baadɔ waa,’ ni ebaa mli. 56  Osatofoi, nyɛle bɔ ni shikpɔŋ kɛ ŋwɛi yɔɔ hã lɛ mlipɛimɔ, shi mɛni hewɔ ni nyɛleee bɔ ni nyɛaafee nyɛpɛi be pɔtɛɛ nɛɛ mli lɛ? 57  Mɛni hewɔ nyɛ diɛŋtsɛ nyɛkojooo nɔ ni ja nyɛhãaa nyɛhe lɛ? 58  Akɛ nɔkwɛmɔnɔ lɛ, kɛ́ okɛ mɔ ni esãma bo miiya nɔyelɔ ko ŋɔɔ lɛ, be ni nyɛnyiɛ gbɛ lɛ, bɔɔ mɔdɛŋ ni okɛ lɛ asaa koni ekɛ bo akaya kojolɔ lɛ hiɛ, ni kojolɔ lɛ ŋɔ bo ehã saneyelihe tsulɔ lɛ, ni saneyelihe tsulɔ lɛ ŋɔ bo ewo tsuŋ. 59  Miikɛɛ bo akɛ, ojeŋ jɛmɛ kɔkɔɔkɔ kɛyashi ooowo onaagbee kapɛlɛ bibioo lɛ.”*

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Sht. ŋm., “asarion enyɔ.” Asarion kome ji gbi kome nyɔmɔwoo mlijaa nyɔŋma kɛ ekpaa mli ekome.
Aloo “ekuuu ehiɛ efɔ̃ɔɔ.”
Aloo “kɛtee kpeehei.”
Aloo “hiɛkɔ̃ɔ.”
Aloo “abɛbua.”
Aloo “misusuma.”
Aloo “Susuma, oyɛ.”
Aloo “osusuma.”
Aloo “nyɛsusumai ahe.”
Aloo “susuma lɛ.”
Aloo “ni nyɛkea ohiafoi anii.” Kwɛmɔ Wiemɔi Titrii Amligbalamɔ lɛ.
Sht. ŋm., “Nyɛfimɔa nyɛhɛ mli.”
Aloo “ebaafi ehɛ mli.”
Kɛjɛ aaafee gbɛkɛ ŋmɛlɛ 9 kɛyashi nyɔɔŋteŋ.
Kɛjɛ nyɔɔŋteŋ kɛyashi aaafee maŋkɛ ŋmɛji 3.
Aloo “abɛbua.”
Aloo “eto eshĩa lɛŋ tsuji lɛ anɔ.”
Aloo “efeee enuŋtsɔ lɛ suɔmɔnaa nii.”
Sht. ŋm., “naagbee lepto lɛ.”