Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 11:1-54

YITSEI LƐ AMLI SAJI

  • Bɔ ni asɔleɔ (1-13)

    • Sɔlemɔ he nɔkwɛmɔnɔ (2-4)

  • Ekɛ Nyɔŋmɔ wao fãmɔ daimonioi (14-23)

  • Mumɔ ni he tseee lɛ ku esɛɛ (24-26)

  • Anɔkwa miishɛɛ (27, 28)

  • Yona okadi lɛ (29-32)

  • Gbɔmɔtso lɛ kane (33-36)

  • Kpoo hã jamɔŋ osatofoi (37-54)

11  Agbɛnɛ, eyɛ he ko eesɔle, ni be ni efɔ̃ɔ lɛ, ekaselɔi lɛ ateŋ mɔ kome kɛɛ lɛ akɛ: “Nuŋtsɔ, tsɔɔmɔ wɔ bɔ ni asɔleɔ, tamɔ bɔ ni Yohane hu tsɔɔ ekaselɔi lɛ.”  No hewɔ lɛ, ekɛɛ amɛ akɛ: “Be fɛɛ be ni nyɛbaasɔle lɛ, nyɛkɛa akɛ: ‘Ataa, ogbɛ́i lɛ he atse.* O-Maŋtsɛyeli lɛ aba.  Daa gbi lɛ, hã wɔ wɔboloo yɛ wɔhiamɔ nii kɛhã gbi lɛ naa.  Ni okɛ wɔhe eshai afa wɔ, ejaakɛ wɔ diɛŋtsɛ hu wɔkɛfaa mɔ fɛɛ mɔ ni feɔ esha shiɔ wɔ lɛ;* ni okɛ wɔ akaya kaa* mli.’”  Kɛkɛ ni ekɛɛ amɛ akɛ: “Nyɛŋɔa lɛ akɛ nyɛteŋ mɔ kome yɛ naanyo ko, ni etee eŋɔɔ nyɔɔŋteŋ eyakɛɛ lɛ akɛ, ‘Naanyo, faa mi aboloi etɛ,  ejaakɛ bianɛ nɔŋŋ minanemɛi lɛ ateŋ mɔ kome jɛ gbɛfãa mli eba miŋɔɔ ni mibɛ nɔ ko ni mikɛbaahã lɛ.’  Shi nakai mɔ lɛ here nɔ kɛjɛ tsũ lɛ mli ekɛɛ: ‘Kpa minaagbamɔ. Aŋa shinaa lɛ momo, ni mi kɛ mibii bibii lɛ kamɔ saa nɔ. Minyɛŋ shi mate ni mahã bo nɔ ko.’  Miikɛɛ nyɛ akɛ, kɛ́ yɛ enaanyo ni eji lɛ hewɔ po lɛ, eteŋ shi ni ebahã lɛ nɔ ko lɛ, ekã shi faŋŋ akɛ akɛni efɔ̃ɔɔ enaagbamɔ hewɔ lɛ, ebaate shi ni ehã lɛ nɔ fɛɛ nɔ ni he hiaa lɛ lɛ.  No hewɔ lɛ, miikɛɛ nyɛ akɛ, nyɛyaa nɔ nyɛbia, ni abaahã nyɛ; nyɛyaa nɔ nyɛtaoa, ni nyɛbaana; nyɛyaa nɔ nyɛshia, ni abaagbele ahã nyɛ. 10  Ejaakɛ mɔ fɛɛ mɔ ni biɔ lɛ nine shɛɔ nɔ, ni mɔ fɛɛ mɔ ni taoɔ lɛ naa, ni mɔ fɛɛ mɔ ni shiɔ lɛ, abaagbele ahã lɛ. 11  Anɔkwa, mɛɛ tsɛ yɔɔ nyɛteŋ ni kɛ́ ebi bi lɛ nu mli loo lɛ, ebaahã lɛ onufu moŋ fe nu mli loo? 12  Aloo kɛ́ ebi lɛ wɔlɔ hu lɛ, ebaahã lɛ nyɔŋmɔŋkrakro? 13  No hewɔ lɛ, kɛji nyɛ, ni nyɛji mɛi fɔji po lɛ, nyɛle bɔ ni nyɛfeɔ nyɛŋɔɔ nikeenii kpakpai nyɛhãa nyɛbii lɛ, enyiɛ nɔŋŋ Tsɛ ni yɔɔ ŋwɛi lɛ eŋɔŋ mumɔ krɔŋkrɔŋ ehãŋ mɛi ni biɔ lɛ lɛ!” 14  Sɛɛ mli lɛ, efã mumɔ ko ni hãa mɔ tsɔɔ mumui. Be ni daimonio lɛ je kpo lɛ, nuu mumui lɛ wie, ni asafoku lɛ anaa kpɛ amɛhe. 15  Shi amɛteŋ mɛi komɛi kɛɛ: “Beelzebul,* daimonioi lɛ anɔyelɔ lɛ, hewalɛ ekɛfãmɔɔ daimonioi lɛ.” 16  Ni mɛi krokomɛi lɛ, bɔ ni afee ni amɛka lɛ lɛ, amɛbɔi lɛ bimɔ koni efee okadi ko ni jɛ ŋwɛi etsɔɔ amɛ. 17  Akɛni ele amɛsusumɔi hewɔ lɛ, ekɛɛ amɛ akɛ: “Maŋtsɛyeli fɛɛ maŋtsɛyeli ni kɛ lɛ diɛŋtsɛ ehe shiɔ mple lɛ hiɛ kpãtãa, ni shĩa fɛɛ shĩa ni kɛ lɛ diɛŋtsɛ ehe shiɔ mple lɛ kumɔɔ shwieɔ shi. 18  Nakai nɔŋŋ kɛ́ Satan hu kɛ lɛ diɛŋtsɛ ehe miishi mple lɛ, te aaafee tɛŋŋ ni emaŋtsɛyeli lɛ aaadamɔ shi? Ejaakɛ nyɛkɛɛ Beelzebul hewalɛ mikɛfãmɔɔ daimonioi lɛ. 19  Kɛ́ Beelzebul hewalɛ mikɛfãmɔɔ daimonioi lɛ, namɔ hewalɛ nyɛbihii lɛ kɛfãmɔɔ amɛ mɔ? Enɛ hewɔ ni amɛbaakojo nyɛ lɛ. 20  Shi kɛ́ Nyɔŋmɔ wao mikɛfãmɔɔ daimonioi lɛ, no lɛ Nyɔŋmɔ Maŋtsɛyeli lɛ ebati nyɛ shi diɛŋtsɛ. 21  Kɛ́ nuu hewalɔ ko ni kɛ tawuu nii ewula ehe jogbaŋŋ miibu ewe he lɛ, enibii yɛ shweshweeshwe. 22  Shi kɛ́ mɔ ko ni he wa fe lɛ batutua lɛ ni eye enɔ kunim lɛ, nakai nuu lɛ shɔ̃ɔ etawuu nii ni ekɛ ehiɛ fɔ̃ɔ nɔ lɛ fɛɛ, ni ejaraa nibii ni eshɔ̃ yɛ edɛŋ lɛ. 23  Mɔ fɛɛ mɔ ni bɛ migbɛfaŋ lɛ, ete shi ewo mi, ni mɔ fɛɛ mɔ ni kɛ mi buaaa naa lɛ, egbɛɔ eshwãa. 24  “Kɛ́ mumɔ ni he tseee ko je gbɔmɔ mli lɛ, eyatsɔɔ hei ni nu bɛ kɛtaoɔ hejɔɔmɔhe, ni kɛ́ enáaa eko lɛ, ekɛɔ akɛ, ‘Maku misɛɛ maya mishĩa ni mifã yɛ mli lɛ.’ 25  Ni kɛ́ eyashɛ lɛ, enaa akɛ abɛɛ shĩa lɛ mli, ni awula mli. 26  Kɛkɛ lɛ eyaa ni eyaŋɔɔ mumɔi krokomɛi kpawo ni feɔ efɔŋ fe lɛ kɛfataa ehe, ni kɛ́ amɛbote mli lɛ, amɛhiɔ jɛmɛ. No hewɔ lɛ, nakai mɔ lɛ naagbee shihilɛ tsɔɔ efɔŋ fe klɛŋklɛŋ nɔ lɛ.” 27  Agbɛnɛ, be ni ewieɔ nibii nɛɛ, yoo ko jɛ asafoku lɛ teŋ ni ewó egbee nɔ ekɛɛ lɛ akɛ: “Musu ni hiɛ bo kɛ fufɔ ni oye lɛ yɛ miishɛɛ!” 28  Shi ekɛɛ akɛ: “Dabi, moŋ lɛ, mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɛ miishɛɛ!” 29  Be ni asafoku lɛ miibua amɛhe naa lɛ, ebɔi kɛɛmɔ akɛ: “Yinɔ nɛɛ ji yinɔ fɔŋ; etaoɔ okadi, shi ahãŋ lɛ okadi ko akɛ ja Yona okadi lɛ. 30  Ejaakɛ tamɔ bɔ ni Yona tsɔ okadi kɛhã Ninivebii lɛ, nakai nɔŋŋ gbɔmɔ Bi lɛ hu baatsɔ okadi kɛhã yinɔ nɛɛ. 31  Abaatee wuoyigbɛ maŋnyɛ lɛ kɛ yinɔbii nɛɛ ashi yɛ kojomɔ lɛ mli ni ebaabu amɛ fɔ, ejaakɛ ejɛ shikpɔŋ lɛ naagbeehei lɛ eba ebabo Solomon hiɛshikamɔ lɛ toi. Shi naa! mɔ ko ni fe Solomon yɛ biɛ. 32  Ninivebii lɛ kɛ nɛkɛ yinɔ nɛɛ baate shi yɛ kojomɔ lɛ mli ni amɛbaabu lɛ fɔ, ejaakɛ amɛtsake amɛtsui yɛ Yona shiɛmɔ lɛ naa. Shi naa! nɔ ko ni fe Yona yɛ biɛ. 33  Kɛ́ mɔ ko su kane lɛ, ekɛmaaa teemɔhe ko, ni asaŋ ekɛmaaa kɛntɛŋ* shishi, shi moŋ ekɛmaa kanetso nɔ koni mɛi ni baa mli lɛ ana la lɛ. 34  Gbɔmɔtso lɛ kane ji ohiŋmɛi lɛ. Kɛ́ ohiŋmɛi kwɛɔ nɔ kome* lɛ, ogbɔmɔtso muu lɛ fɛɛ hu kpɛɔ;* shi kɛ́ eklɔɔ mɔ nɔ* lɛ, ogbɔmɔtso lɛ hu woɔ duŋ. 35  No hewɔ lɛ, kwɛmɔ ni oná nɔmimaa akɛ la ni yɔɔ omli lɛ, jeee duŋ ni. 36  No hewɔ lɛ, kɛ́ ogbɔmɔtso muu lɛ fɛɛ miikpɛ ni ehe ko he ko woko duŋ lɛ, ogbɔmɔtso muu lɛ fɛɛ baakpɛ tamɔ bɔ ni kane kpɛɔ ni ehãa onáa la lɛ.” 37  Be ni ewie enɛ lɛ, Farisifonyo ko kpa lɛ fai ní ekɛ lɛ abaye nii. No hewɔ lɛ, etee mli ni eyata okpɔlɔ lɛ he. 38  Shi be ni Farisifonyo lɛ na akɛ efɔflɔko eniji ahe* dani ebaaye nii lɛ, enaa kpɛ ehe. 39  Shi Nuŋtsɔ lɛ kɛɛ lɛ akɛ: “Bianɛ lɛ, nyɛ Farisifoi lɛ, nyɛtsuɔ kpulu kɛ kã he, shi nyɛmligbɛ lɛ, nyɛyimɔ obɔbɔ kɛ amimyeli kɛ efɔŋfeemɔ. 40  Kwashiai! Ani mɔ ni fee he lɛ, jeee lɛ nɔŋŋ efee mligbɛ lɛ hu? 41  Shi nyɛŋɔa nibii ni yɔɔ mligbɛ lɛ nyɛfea ohiafoi ejurɔ,* ni naa! nyɛhe nibii fɛɛ he baatse. 42  Shi kpoo hã nyɛ, Farisifoi, ejaakɛ nyɛhãa kowɛ kɛ peganon* kɛ yelibai krokomɛi* fɛɛ mlijaa nyɔŋmanyɔŋma, shi nyɛkuɔ nyɛhiɛ nyɛshwieɔ jalɛsaneyeli kɛ Nyɔŋmɔ suɔmɔ lɛ nɔ! Kulɛ eji nyɛgbɛnaa akɛ nyɛfeɔ enɛɛmɛi, shi esaaa akɛ nyɛkuɔ nyɛhiɛ nyɛshwieɔ nakai nibii krokomɛi lɛ hu anɔ. 43  Kpoo hã nyɛ, Farisifoi, ejaakɛ nyɛsumɔɔ hiɛgbɛ sɛii* ni yɔɔ kpeehei lɛ kɛ jaji anɔ ŋamɔi! 44  Kpoo hã nyɛ, ejaakɛ nyɛtamɔ nakai gbohii abui* ni anaaa amɛ faŋŋ,* ni no hewɔ lɛ, mɛi nyiɛɔ amɛnɔ ni amɛleee lɛ!” 45  Mɛi ni le Mla lɛ jogbaŋŋ lɛ ateŋ mɔ kome here nɔ ekɛɛ lɛ akɛ: “Tsɔɔlɔ, kɛ́ owie enɛɛmɛi lɛ, belɛ oojɛ wɔ hu.” 46  Kɛkɛ ni ekɛɛ: “Kpoo hã nyɛ mɛi ni nyɛle Mla lɛ jogbaŋŋ lɛ hu, ejaakɛ nyɛkɛ jatsui ni teremɔ jaraa tereɔ mɛi, shi nyɛ diɛŋtsɛ lɛ, nyɛkɛ nyɛwaobii lɛ ateŋ ekome po etaaa jatsui lɛ ahe! 47  “Kpoo hã nyɛ, ejaakɛ nyɛmamɔɔ gbalɔi lɛ agbohii abui* lɛ, shi nyɛtsɛmɛi lɛ gbe amɛ! 48  Ekã shi faŋŋ akɛ, nyɛji nyɛtsɛmɛi lɛ anifeemɔi lɛ ahe odasefoi, ni kɛ̃lɛ nyɛkpɛlɛɔ nɔ, ejaakɛ amɛgbe gbalɔi lɛ shi nyɛmiimamɔ amɛgbohii abui lɛ. 49  Enɛ hewɔ ni Nyɔŋmɔ hiɛshikamɔ lɛ hu kɛɛ: ‘Matsu gbalɔi kɛ bɔfoi kɛya amɛŋɔɔ, ni amɛbaagbe amɛteŋ mɛi komɛi, ni amɛbaawa amɛteŋ mɛi komɛi ayi, 50  koni akɛ gbalɔi lɛ fɛɛ alá ni afɔse ashwie shi kɛjɛ be ni ato je lɛ shishi lɛ* he sɔ̃yeli afɔ̃ yinɔ nɛɛ nɔ,* 51  kɛjɛ Habel lá lɛ nɔ aahu kɛyashi Zakaria, mɔ ni agbe lɛ yɛ afɔleshaa latɛ lɛ kɛ shĩa* lɛ teŋ lɛ, lá lɛ nɔ’ lɛ. Hɛɛ, miikɛɛ nyɛ akɛ, akɛ ehe sɔ̃yeli lɛ baafɔ̃ yinɔ nɛɛ nɔ.* 52  “Kpoo hã nyɛ mɛi ni nyɛle Mla lɛ jogbaŋŋ lɛ, ejaakɛ nyɛŋɔ nilee naa samfee lɛ. Nyɛ diɛŋtsɛ lɛ nyɛboteee mli, ni mɛi ni boteɔ mli lɛ hu, nyɛtsĩɔ amɛ gbɛ!” 53  No hewɔ lɛ, be ni eje jɛmɛ lɛ, woloŋmalɔi lɛ kɛ Farisifoi lɛ bɔi enaagbamɔ waa ni amɛbibii lɛ saji babaoo, 54  ni amɛkɛwo lɛ antɛo koni kɛ́ ewie nɔ ko lɛ, amɛtsɔ nɔ amɛdũ lɛ.

Shishigbɛ Niŋmaa

Aloo “ahiɛ ogbɛ́i lɛ krɔŋkrɔŋ.”
Sht. ŋm., “mɔ fɛɛ mɔ ni hiɛ wɔ nyɔmɔ lɛ.”
Ni ji, efɔŋ he kaa.
Eji gbɛ́i ni akɛtsɛɔ Satan.
Aloo “nisusumɔ kɛntɛŋ.”
Aloo “nɔ tse; bɛ haŋtsii.”
Aloo “yiɔ obɔ kɛ la.”
Sht. ŋm., “kɛ́ ehiii; kɛ́ eji efɔŋ.”
Ni tsɔɔ akɛ, etsuuko ehe yɛ kusum naa.
Aloo “nyɛkɛ nibii ni yɔɔ mligbɛ lɛ akea ohiafoi.” Kwɛmɔ Wiemɔi Titrii Amligbalamɔ lɛ.
Hela, “peʹga·non.” Eji tso ni akɛfeɔ tsofa, ni akɛwoɔ niyenii mli hu koni ehã niyenii lɛ aŋɔɔ.
Aloo “abɔɔ mli bai krokomɛi.”
Aloo “sɛii ni hi fe fɛɛ.”
Aloo “gbohii akaimɔ bui.”
Aloo “gbohii abui ni akadiko amɛhe.”
Aloo “agbohii akaimɔ bui.”
Sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
Aloo “abi shi yɛ yinɔ nɛɛ dɛŋ.”
Aloo “sɔlemɔwe.”
Aloo “Abaabi shi yɛ yinɔ nɛɛ dɛŋ.”