Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 10:1-42

10  Nibii nɛɛ asɛɛ lɛ, Nuŋtsɔ lɛ hala mɛi krokomɛi nyɔŋmai kpawo ni etsu amɛ enyɔnyɔɔnyɔ kɛtsɔ ehiɛ kɛtee maŋ fɛɛ maŋ kɛ he fɛɛ he ni lɛ diɛŋtsɛ ebaaya lɛ.  Kɛkɛ ni ebɔi amɛ kɛɛmɔ akɛ: “Anɔkwa, nikpamɔ lɛ fa, shi nitsulɔi lɛ faaa. No hewɔ lɛ, nyɛkpaa nikpamɔ Nuŋtsɔ lɛ fai koni etsu nitsulɔi kɛba enikpamɔ lɛ mli.  Nyɛyaa! Naa! miitsu nyɛ akɛ gwantɛŋbii yɛ klaji ateŋ.  Nyɛkahiɛa shika kotoku loo niyenii kotoku loo tokota, ni nyɛkaŋaa mɔ ko* yɛ gbɛ lɛ nɔ.  He fɛɛ he ni nyɛbaabote shĩa ko mli yɛ lɛ, klɛŋklɛŋ lɛ nyɛkɛa akɛ: ‘Toiŋjɔlɛ aba shĩa nɛɛ.’  Ni kɛ́ toiŋjɔlɛ bi ko yɛ jɛmɛ lɛ, nyɛtoiŋjɔlɛ lɛ baahi enɔ. Shi kɛjeee nakai lɛ, nyɛtoiŋjɔlɛ lɛ baaku sɛɛ eba nyɛŋɔɔ.  No hewɔ lɛ, nyɛhia nakai shĩa lɛ mli, ni nyɛyea ni nyɛnua nii ni amɛbaahã nyɛ lɛ, ejaakɛ nitsulɔ lɛ, enyɔmɔwoo sa lɛ. Nyɛkafãfãa kɛjɛa shĩa kome kɛyaa shĩa kroko.  “Agbɛnɛ hu, he fɛɛ he ni nyɛbaabote maŋ ko mli yɛ ni amɛbaahere nyɛ lɛ, nyɛyea nɔ ni akɛbaama nyɛhiɛ lɛ  ni nyɛtsaa helatsɛmɛi ni yɔɔ mli lɛ, ni nyɛkɛa amɛ akɛ: ‘Nyɔŋmɔ Maŋtsɛyeli lɛ ebɛŋkɛ nyɛ.’ 10  Shi he fɛɛ he ni nyɛbaabote maŋ ko mli yɛ ni amɛhereee nyɛ lɛ, nyɛjea kpo kɛyaa egbɛjegbɛi titrii lɛ anɔ nyɛyakɛa akɛ: 11  ‘Nyɛmaŋ nɛɛ mli mulu tete ni kpɛtɛ wɔnaji ahe lɛ, wɔmiikpala wɔmiishwie nyɛnɔ. Kɛ̃lɛ, nyɛnáa nyɛlea akɛ Nyɔŋmɔ Maŋtsɛyeli lɛ ebɛŋkɛ nyɛ.’ 12  Miikɛɛ nyɛ akɛ, ebaafee mlɛo ehã Sodom yɛ nakai gbi lɛ nɔ fe nakai maŋ lɛ. 13  “Kpoo hã bo, Korazin! Kpoo hã bo, Betsaida! ejaakɛ eji atsu hewalɛ nitsumɔi ni atsu yɛ nyɛmli lɛ yɛ Tiro kɛ Sidon kulɛ, amɛtsake amɛtsui jeeŋmɔ, ni amɛtara shi yɛ kpekpe kɛ lamulu mli. 14  No hewɔ lɛ, yɛ kojomɔ lɛ mli lɛ, ebaafee mlɛo ehã Tiro kɛ Sidon fe nyɛ. 15  Ni bo, Kapernaum, ani aaawó onɔ kɛya ŋwɛi? Gbonyo Bu* lɛ mli tɔ̃ɔ obaakpeleke shi kɛaatee! 16  “Mɔ fɛɛ mɔ ni boɔ nyɛ toi lɛ boɔ mi hu toi. Ni mɔ fɛɛ mɔ ni kwaa nyɛ lɛ kwaa mi hu. Kɛfata he lɛ, mɔ fɛɛ mɔ ni kwaa mi lɛ kwaa mɔ ni tsu mi lɛ hu.” 17  Kɛkɛ ni mɛi nyɔŋmai kpawo lɛ ku amɛsɛɛ amɛba kɛ miishɛɛ ni amɛbakɛɛ akɛ: “Nuŋtsɔ, ogbɛ́i lɛ ni wɔkɛtsuɔ nii lɛ hewɔ lɛ, aŋɔɔ daimonioi lɛ po awoɔ wɔshishi.” 18  Kɛkɛ ni ekɛɛ amɛ akɛ: “Miina Satan ni ejɛ ŋwɛi ebagbee shi momo tamɔ sarawa. 19  Naa! mihã nyɛ hegbɛ koni nyɛkɛnaanaa onufui kɛ nyɔŋmɔŋkrakroi anɔ, kɛ hegbɛ yɛ henyɛlɔ lɛ hewalɛ lɛ fɛɛ nɔ, ni nɔ ko nɔ ko kwraa yeŋ nyɛ awui. 20  Kɛ̃lɛ, nyɛkanyaa akɛni aŋɔɔ mumɔi lɛ awoɔ nyɛshishi lɛ hewɔ, moŋ lɛ nyɛnyaa akɛni aŋmala nyɛgbɛ́ii yɛ ŋwɛi lɛ hewɔ.” 21  Nakai ŋmɛlɛtswaa lɛ mli nɔŋŋ lɛ, emli fili lɛ yɛ mumɔ krɔŋkrɔŋ lɛ mli ni ekɛɛ: “Miijie oyi yɛ faŋŋ, Ataa, ŋwɛi kɛ shikpɔŋ Nuŋtsɔ, ejaakɛ oŋɔ nibii nɛɛ otee hiɛshikalɔi kɛ nilelɔi jogbaŋŋ, ni ojie amɛ kpo otsɔɔ gbekɛbii bibii. Hɛɛ, Ataa, ejaakɛ enɛ ji gbɛ ni okpɛlɛ nɔ. 22  Mi-Tsɛ eŋɔ nii fɛɛ ewo midɛŋ, ni mɔ ko mɔ ko leee mɔ ni Bi lɛ ji, akɛ ja Tsɛ lɛ, ni mɔ ko mɔ ko leee mɔ ni Tsɛ lɛ ji, akɛ ja Bi lɛ, kɛ mɔ fɛɛ mɔ ni Bi lɛ sumɔɔ akɛ ejie lɛ shi etsɔɔ lɛ lɛ.” 23  Be ni ekɛ kaselɔi lɛ kome too yɔɔ lɛ, etsɔ ehe ehã amɛ ni ekɛɛ: “Hiŋmɛii ni naa nibii ni nyɛnaa nɛɛ yɛ miishɛɛ. 24  Ejaakɛ miikɛɛ nyɛ akɛ, gbalɔi kɛ maŋtsɛmɛi babaoo shwe akɛ amɛna nibii ni nyɛnaa nɛɛ shi amɛyanaaa, asaŋ amɛshwe akɛ amɛnu nibii ni nyɛnuɔ nɛɛ, shi amɛyanuuu.” 25  Ni naa! nuu ko ni le Mla lɛ jogbaŋŋ lɛ te shi koni eka lɛ, ni ekɛɛ: “Tsɔɔlɔ, mɛni esa akɛ mafee koni maná naanɔ wala?”* 26  Ekɛɛ lɛ akɛ: “Mɛni aŋma yɛ Mla lɛ mli? Te okaneɔ tɛŋŋ?” 27  Ehã hetoo akɛ: “‘Esa akɛ osumɔ Yehowa* o-Nyɔŋmɔ lɛ kɛ otsui muu fɛɛ, kɛ osusuma* muu fɛɛ, kɛ onyɛmɔ fɛɛ, kɛ ojwɛŋmɔ muu fɛɛ,’ kɛ ‘onaanyo gbɔmɔ tamɔ bo diɛŋtsɛ ohe.’” 28  Ekɛɛ lɛ akɛ: “Bɔ ni ohã hetoo lɛ ja; yaa nɔ ofee enɛ ni obaaná wala.” 29  Shi akɛni nuu lɛ miitao ebu ehe jalɔ hewɔ lɛ, ekɛɛ Yesu akɛ: “Namɔ tuuntu ji minaanyo?” 30  Yesu here nɔ ekɛɛ: “Nuu ko yiŋ kɛjɛ Yerusalem ni eekpeleke shi kɛmiiya Yeriko ni eyagbee ojoyelɔi ateŋ, amɛjie ehe atadei, amɛyi lɛ, ni amɛshi lɛ ni egbo fã kɛ fã. 31  Ni eba mli akɛ nakai be lɛ mli nɔŋŋ lɛ, osɔfo ko nyiɛ nakai gbɛ lɛ nɔ kɛmiikpeleke shi, shi be ni ena lɛ lɛ, etsɔ gbɛ lɛ afã kroko lɛ kɛho. 32  Nakai nɔŋŋ Levinyo ko hu, be ni eshɛ jɛmɛ ni ena lɛ lɛ, etsɔ gbɛ lɛ afã kroko lɛ kɛho. 33  Shi Samarianyo ko nyiɛ gbɛ lɛ nɔ kɛmiifã gbɛ ni ebati enɔ, ni be ni ena lɛ lɛ, emusuŋ tsɔ lɛ. 34  No hewɔ lɛ, etsi ebɛŋkɛ lɛ ni efimɔ epilamɔi lɛ anɔ, efɔse mu kɛ wein eshwie nɔ. Kɛkɛ ni ewó lɛ eta lɛ diɛŋtsɛ ekooloo lɛ nɔ ni ekɛ lɛ tee gbɔiatoohe ko, ni eyakwɛ lɛ. 35  Enɔ jetsɛremɔ lɛ, eŋɔ denarioi enyɔ ehã gbɔiatoohe nɔkwɛlɔ lɛ, ni ekɛɛ: ‘Kwɛmɔ lɛ, ni nɔ fɛɛ nɔ ni obaafite kɛfata enɛ he lɛ, kɛ́ miku misɛɛ miba lɛ, mato bo najiaŋ.’ 36  Mɛi etɛ nɛɛ ateŋ namɔ osusuɔ akɛ efee ehe nuu ni yagbee ojoyelɔi lɛ ateŋ lɛ naanyo?” 37  Ekɛɛ akɛ: “Mɔ ni jie mɔbɔnalɛ kpo etsɔɔ lɛ lɛ.” Ni Yesu kɛɛ lɛ akɛ: “Yaa, ni bo diɛŋtsɛ hu oyafee nakai nɔŋŋ.” 38  Agbɛnɛ, be ni amɛnyiɛ gbɛ kɛyaa lɛ, ebote akrowa ko mli. Biɛ ni yoo ko ni atsɛɔ lɛ Marta here lɛ akɛ gbɔ kɛtee eshĩa. 39  Eyɛ nyɛmi yoo ko hu ni atsɛɔ lɛ Maria, ni lɛ lɛ ebata Nuŋtsɔ lɛ najiashi ni etee nɔ ebo nɔ ni ewieɔ* lɛ toi. 40  Shi Marta hã nibii pii ahe nitsumɔ gbala ejwɛŋmɔ. No hewɔ lɛ, etsi eba Yesu ŋɔɔ ni ebakɛɛ: “Nuŋtsɔ, ani egbaaa onaa akɛ minyɛmi yoo lɛ eshi mi kome too koni matsu nibii ahe nii? Kɛɛmɔ lɛ ni ebaye ebua mi.” 41  Nuŋtsɔ lɛ hã lɛ hetoo akɛ: “Marta, Marta, oofee yeyeeye ni oohao ohe yɛ nibii pii ahewɔ. 42  Shi nibii fioo loo nɔ kome pɛ he hiaa. Maria lɛ, ehala nɔ ni ji ekpakpa lɛ,* ni ashɔŋ yɛ edɛŋ.”

Shishigbɛ Niŋmaa

Aloo “nyɛkafuaa mɔ ko yɛ ŋamɔ mli.”
Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
Sht. ŋm., “maná naanɔ wala akɛ gboshinii.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Sht. ŋm., “ewiemɔ.”
Aloo “nɔ ni hi fe fɛɛ lɛ.”