Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Luka 1:1-80

1  Akɛni mɛi pii eŋɔfɔ̃ amɛnɔ akɛ amɛbaabua anɔkwa saji ni wɔmuɔ wɔfɔ̃ɔ nɔ* kwraa lɛ anaa,  tamɔ bɔ pɛ ni mɛi ni kɛ amɛhiŋmɛii na kɛjɛ shishijee ni amɛji sane lɛ he sɔɔlɔi lɛ ŋɔ enɛɛmɛi amɛhã wɔ lɛ hewɔ lɛ,  mi hu akɛni mitao nibii fɛɛ mli fitsofitso kɛjɛ shishijee hewɔ lɛ, mikpɛ mli akɛ mato naa jogbaŋŋ ni maŋma mahã bo, anunyamtsɛ Teofilo,  bɔ ni afee ni oná ole akɛ nibii ni akɛ naabu ewie etsɔɔ bo lɛ ji anɔkwale shiishi.  Yudea maŋtsɛ Herode* gbii lɛ amli lɛ, osɔfo ko hi shi ni atsɛɔ lɛ Zakaria ni jɛ Abia osɔfoiaku lɛ mli. Eyɛ ŋa ni jɛ Aaron biyei lɛ ateŋ, ni egbɛ́i ji Elizabet.  Amɛyi enyɔ lɛ fɛɛ lɛ, jalɔi ji amɛ yɛ Nyɔŋmɔ hiɛ ni shwamɔ ko bɛ amɛhe, ejaakɛ amɛnyiɛɔ yɛ Yehowa* kitãi lɛ kɛ emla naa taomɔ nii lɛ fɛɛ naa.  Shi amɛbɛ bi ko, ejaakɛ Elizabet lɛ, kene ni, ni amɛyi enyɔ lɛ fɛɛ lɛ, amɛdara yɛ afii amli.  Shi be ni shɛ ekuu lɛ nɔ, ni eetsu enitsumɔ akɛ osɔfo yɛ Nyɔŋmɔ hiɛ lɛ,  eshɛ enɔ akɛ ebote Yehowa* sɔlemɔtsu lɛ mli ni eyashã tsofa-kɛ-ŋma taakɛ osɔfoyeli kusum ni ato lɛ biɔ lɛ. 10  Ni mɛi babaoo lɛ fɛɛ miisɔle yɛ agbó lɛ naa yɛ tsofa-kɛ-ŋmashãa ŋmɛlɛtswaa lɛ nɔ. 11  Yehowa* bɔfo* jie ehe kpo etsɔɔ lɛ, ni edamɔ tsofa-kɛ-ŋmashãa latɛ lɛ ninejurɔgbɛ. 12  Shi be ni Zakaria na lɛ lɛ, ehao, ni gbeyei mɔ lɛ. 13  Shi ŋwɛibɔfo lɛ kɛɛ lɛ akɛ: “Kaashe gbeyei, Zakaria, ejaakɛ abo fai ní okɛ hiɛdɔɔ kpaa lɛ toi, ni oŋa Elizabet lɛ, ebaafɔ binuu ehã bo, ni obaawo lɛ gbɛ́i akɛ Yohane. 14  Obaaná miishɛɛ, ni omli baafili bo babaoo, ni mɛi babaoo baanya yɛ efɔmɔ lɛ hewɔ, 15  ejaakɛ ebaatsɔ agbo yɛ Yehowa* hiɛ. Shi esaaa akɛ enuɔ wein ko loo dãa ni wa ko kwraa, ni mumɔ krɔŋkrɔŋ baayi lɛ obɔ dani abaafɔ lɛ po,* 16  ni ebaakpale Israelbii pii kɛba Yehowa,* amɛ-Nyɔŋmɔ lɛ, ŋɔɔ. 17  Agbɛnɛ hu, ekɛ Elia mumɔ lɛ kɛ ehewalɛ lɛ baatsɔ ehiɛ ni ekɛyakpale tsɛmɛi atsuii kɛba bii ahe, kɛ toigbolɔi kɛba jalɔi ahiɛshikamɔ ni sa lɛ he koni ekɛsaa mɛi eto Yehowa.”* 18  Zakaria kɛɛ ŋwɛibɔfo lɛ akɛ: “Te mafee tɛŋŋ maná nɔmimaa yɛ enɛ he? Ejaakɛ migbɔ, ni miŋa hu eda yɛ afii amli.” 19  Ŋwɛibɔfo lɛ here nɔ ekɛɛ lɛ akɛ: “Miji Gabriel ni damɔɔ Nyɔŋmɔ hiɛ lɛ, ni atsu mi ni mikɛ bo abawie, ní majaje sane kpakpa nɛɛ matsɔɔ bo. 20  Shi naa! obaatɔ mu, ni onyɛŋ owie kɛyashi gbi nɔ ni nibii nɛɛ baaba mli, ejaakɛ oheee miwiemɔi ni baaba mli yɛ amɛbe ni ato lɛ mli lɛ oyeee.” 21  Ni nakai be lɛ mli fɛɛ lɛ, mɛi lɛ miimɛ Zakaria, ni amɛhiɛ fee amɛ yaa ejaakɛ etsɛ yɛ sɔlemɔtsu lɛ mli. 22  Be ni eje kpo lɛ, enyɛɛɛ ekɛ amɛ awie, ni amɛkɔ sɛɛ akɛ eyana nii* yɛ sɔlemɔtsu lɛŋ. Nɔ pɛ ni efeɔ ji akɛ, ekɛ enine feɔ okadii etsɔɔ amɛ, shi enyɛɛɛ ewie. 23  Be ni esɔɔmɔ krɔŋkrɔŋ* gbii lɛ ba naagbee lɛ, eyiŋ etee eshĩa. 24  Gbii komɛi asɛɛ lɛ, eŋa Elizabet ŋɔ hɔ, ni etee ehe nyɔji enumɔ, ni ekɛɛ: 25  “Nɛkɛ ji bɔ ni Yehowa* kɛ mi eye yɛ nɛkɛ gbii nɛɛ amli. Egbala ejwɛŋmɔ kɛba minɔ koni ejie mihorabɔɔ lɛ yɛ gbɔmɛi ateŋ kɛya.” 26  Yɛ enyɔɔŋ ni ji ekpaa lɛ mli lɛ, Nyɔŋmɔ tsu bɔfo Gabriel kɛtee Galilea maŋ ko ni atsɛɔ lɛ Nazaret lɛ mli, 27  ní eya oblayoo fro ko ni atsɛ ehe baa* ahã nuu ko ni atsɛɔ lɛ Yosef ni jɛ David we lɛ ŋɔɔ, ni oblayoo fro lɛ gbɛ́i ji Maria. 28  Ni be ni ŋwɛibɔfo lɛ bote mli lɛ, ekɛɛ oblayoo fro lɛ akɛ: “Miiŋa bo, bo mɔ ni aduro bo babaoo, Yehowa* kɛ bo yɛ.” 29  Shi ŋwɛibɔfo lɛ wiemɔi lɛ hã ehao waa, ni ejwɛŋ nɔ ni ŋamɔ nɛɛ tsɔɔ lɛ nɔ. 30  No hewɔ lɛ, ŋwɛibɔfo lɛ kɛɛ lɛ akɛ: “Kaashe gbeyei, Maria, ejaakɛ ohiɛ eba nyam yɛ Nyɔŋmɔ hiɛ. 31  Ni naa! obaaná musu* ni obaafɔ binuu, ni obaawo lɛ gbɛ́i akɛ Yesu. 32  Mɔ nɛɛ baatsɔ agbo ni abaatsɛ lɛ Mɔ ni Nɔ Kwɔ Fe Fɛɛ lɛ Bi, ni Yehowa* Nyɔŋmɔ baaŋɔ etsɛ David maŋtsɛ sɛi lɛ ehã lɛ, 33  ni ebaaye Yakob we lɛ nɔ Maŋtsɛ kɛya naanɔ, ni e-Maŋtsɛyeli lɛ sɛɛ efoŋ.” 34  Shi Maria kɛɛ ŋwɛibɔfo lɛ akɛ: “Te enɛ baafee tɛŋŋ aba mli lɛ, akɛni mikɛ nuu náko bɔlɛ dã nɛɛ?” 35  Ni ŋwɛibɔfo lɛ hã lɛ hetoo akɛ: “Mumɔ krɔŋkrɔŋ baaba onɔ, ni Mɔ ni Nɔ Kwɔ Fe Fɛɛ lɛ hewalɛ lɛ baaha onɔ. Ni no hewɔ lɛ, abaatsɛ mɔ ni abaafɔ lɛ lɛ akɛ krɔŋkrɔŋ, Nyɔŋmɔ Bi. 36  Ni naa! owekunyo Elizabet, mɔ ni atsɛ lɛ kene lɛ hu hiɛ binuu hɔ, yɛ egbɔlɛ be nɛɛ mli, ni enyɔɔŋ ni ji ekpaa mli eyɔɔ lɛ; 37  ejaakɛ Nyɔŋmɔ gbɛfaŋ lɛ, wiemɔ ko* bɛ ni nyɛŋ aba mli.” 38  Kɛkɛ ni Maria kɛɛ: “Naa! Yehowa* nyɔŋ yoo ji mi! Bɔ ni owie lɛ, aba mli nakai ahã mi.” Kɛkɛ ni ŋwɛibɔfo lɛ shi lɛ etee. 39  No hewɔ lɛ, nakai gbii lɛ amli lɛ, Maria te shi ni ekɛ oyaiyeli fã gbɛ kɛtee Yuda maŋ ko mli, yɛ kpokpaa ni gɔji yɔɔ nɔ lɛ nɔ, 40  ni eyabote Zakaria we lɛ, ni eŋa Elizabet. 41  Ni be ni Elizabet nu Maria ŋamɔ lɛ, abifao lɛ ni yɔɔ emusuŋ lɛ tumɔ, ni mumɔ krɔŋkrɔŋ yi Elizabet obɔ, 42  ni ebo kɛ gbee ni wa ekɛɛ: “Ajɔɔ bo yɛ yei ateŋ, ni ajɔɔ omusuŋ bi lɛ! 43  No hewɔ lɛ, te fee tɛŋŋ ni miná hegbɛ nɛɛ, akɛ mi-Nuŋtsɔ lɛ nyɛ eba miŋɔɔ nɛɛ? 44  Ejaakɛ naa! be ni oŋamɔ lɛ gbɛɛ yɛ mitoiiaŋ lɛ, abifao lɛ ni yɔɔ mimusuŋ lɛ tumɔ kɛ miishɛɛ. 45  Bo yoo ni ohe oye lɛ hu yɛ miishɛɛ, ejaakɛ nakai nibii ní jɛ Yehowa* ŋɔɔ, ní awie atsɔɔ bo lɛ fɛɛ baaba mli.” 46  Ni Maria kɛɛ: “Misusuma* miiwó Yehowa* nɔ gojoo, 47  ni mimumɔ mli miifili lɛ babaoo yɛ Nyɔŋmɔ, mi-Yiwalaherelɔ lɛ hewɔ, 48  ejaakɛ ebakwɛ enyɔŋ yoo lɛ gbɛhe ni baa shi lɛ. Ejaakɛ naa! kɛjɛ be nɛɛ nɔ kɛyaa lɛ, yinɔi fɛɛ baajaje akɛ miyɛ miishɛɛ, 49  ejaakɛ Hewalɛtsɛ lɛ efee nibii wuji ehã mi, ni krɔŋkrɔŋ ji egbɛ́i, 50  ni emɔbɔnalɛ yɛ mɛi ni sheɔ lɛ gbeyei lɛ anɔ kɛyashi yinɔi ayinɔi. 51  Ekɛ enine etsu hewalɛ nitsumɔ; egbɛ mɛi ni wóɔ amɛhe nɔ yɛ amɛtsuiiaŋ yiŋtoi amli lɛ eshwã. 52  Ekpa hii ni yɔɔ hegbɛi kpelei kɛjɛ maŋtsɛ sɛii anɔ, ni ewó mɛi ni ji humii lɛ anɔ; 53  ehã mɛi ni hɔmɔ yeɔ amɛ lɛ etɔrɔ kɛ nibii kpakpai, ni eshwie niiatsɛmɛi lɛ kɛ amɛdɛ̃ folo. 54  Eye ebua etsulɔ Israel, ekai shi ni ewo akɛ ebaajie mɔbɔnalɛ kpo 55  etsɔɔ Abraham kɛ eseshi* lɛ kɛya naanɔ, taakɛ ekɛɛ wɔtsɛmɛi lɛ.” 56  Maria kɛ lɛ hi shi aaafee nyɔji etɛ, ni eku esɛɛ etee lɛ diɛŋtsɛ eshĩa. 57  Agbɛnɛ Elizabet fɔmɔ be shɛ, ni efɔ binuu. 58  Ni akutsoŋbii lɛ kɛ ewekumɛi lɛ nu akɛ Yehowa* ena lɛ mɔbɔ babaoo, ni amɛkɛ lɛ nya. 59  Gbi ni ji gbi kpaanyɔ lɛ nɔ lɛ, amɛba gbekɛ bibioo lɛ ketiafoo, ni kulɛ amɛkɛ etsɛ gbɛ́i Zakaria lɛ yaawo lɛ. 60  Shi enyɛ here nɔ ekɛɛ: “Dabida! shi abaatsɛ lɛ Yohane moŋ.” 61  Kɛkɛ ni amɛkɛɛ lɛ akɛ: “Mɔ ko bɛ owekumɛi lɛ ateŋ ni atsɛɔ lɛ nakai.” 62  Kɛkɛ ni amɛkɛ amɛnine fee okadii kɛbi etsɛ bɔ ni esumɔɔ akɛ atsɛ lɛ. 63  No hewɔ lɛ, ebi ni ahã lɛ tao, ni eŋma akɛ: “Yohane ji egbɛ́i.” Ni enɛ fee amɛ fɛɛ naakpɛɛ. 64  Amrɔ lɛ, enaabu gbele, ni elilɛi fɛne ni ebɔi wiemɔ, ni ejie Nyɔŋmɔ yi. 65  Ni gbeyei mɔmɔ amɛkutsoŋbii lɛ fɛɛ, ni abɔi nibii nɛɛ fɛɛ ahe wiemɔ yɛ Yudea kpokpaa ni gɔji yɔɔ nɔ lɛ nɔ fɛɛ. 66  Ni mɛi ni nu lɛ fɛɛ kɛto amɛtsuii amli amɛkɛɛ: “Mɛni po gbekɛ bibioo nɛɛ baatsɔ?” Ejaakɛ Yehowa* nine kã ehe lɛɛlɛŋ. 67  Kɛkɛ ni mumɔ krɔŋkrɔŋ yi etsɛ Zakaria obɔ, ni egba ekɛɛ: 68  “Ajie Yehowa,* Israel Nyɔŋmɔ lɛ yi, ejaakɛ egbala ejwɛŋmɔ kɛba emɛi lɛ anɔ ni ekpɔ̃ amɛ. 69  Ni etee yiwalaheremɔ akolonto* shi yɛ etsulɔ David we lɛ ehã wɔ, 70  taakɛ etsɔ egbalɔi krɔŋkrɔŋi ni hi shi kɛjɛ blema lɛ anɔ ewie 71  yiwalaheremɔ kɛmiijɛ wɔhenyɛlɔi kɛ mɛi fɛɛ ni he tsɛ̃ɔ wɔ lɛ adɛŋ lɛ he lɛ; 72  koni ena mɔbɔ yɛ wɔtsɛmɛi lɛ ahewɔ, ní ekai ekpaŋmɔ krɔŋkrɔŋ lɛ, 73  kitã ni ekã wɔtsɛ Abraham lɛ, 74  koni kɛ́ ajie wɔ kɛjɛ henyɛlɔi adɛŋ lɛ, ehã wɔ hegbɛ ni wɔkɛ sɔɔmɔ krɔŋŋ ahã lɛ ní gbeyeishemɔ ko bɛ mli 75  yɛ anɔkwayeli kɛ jalɛ mli yɛ ehiɛ wɔgbii fɛɛ. 76  Shi bo, gbekɛ bibioo nɛɛ, abaatsɛ bo Mɔ ni Nɔ Kwɔ Fe Fɛɛ lɛ gbalɔ, ejaakɛ obaatsɔ Yehowa* hiɛ oyasaa egbɛi lɛ oto, 77  koni oŋɔ yiwalaheremɔ he nilee ohã emɛi lɛ kɛtsɔ amɛhe eshaifaa nɔ, 78  yɛ wɔ-Nyɔŋmɔ lɛ musuŋtsɔlɛ lɛ hewɔ. Musuŋtsɔlɛ nɛɛ hewɔ lɛ, jetsɛremɔ ni jɛ ŋwɛi baaba abasara wɔ, 79  koni ehã la akpɛ ahã mɛi ni tara duŋ mli kɛ gbele hɔɔŋ mli lɛ, ni ekudɔ wɔnaji kɛya toiŋjɔlɛ gbɛ lɛ nɔ.” 80  Ni gbekɛ bibioo lɛ da ni ehe bawa yɛ mumɔ mli, ni etee nɔ ehi shia ŋa nɔ kɛyashi gbi nɔ ni ejie ehe kpo faŋŋ etsɔɔ Israel.

Shishigbɛ Niŋmaa

Aloo “saji ni wɔyɔɔ nɔmimaa yɛ he.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “ŋwɛibɔfo.”
Kwɛmɔ Wiemɔi Titrii Amligbalamɔ lɛ.
Aloo “kɛjɛ enyɛ musuŋ tɔ̃ɔ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “eyana ninaa ko.”
Aloo “sɔɔmɔ ní esɔmɔɔ yɛ mɛi krokomɛi ahilɛkɛhamɔ hewɔ.”
Kwɛmɔ Wiemɔi Titrii Amligbalamɔ lɛ.
Aloo “awo lɛ shi kɛhã gbalashihilɛ.”
Kwɛmɔ Wiemɔi Titrii Amligbalamɔ lɛ.
Aloo “obaaŋɔ hɔ.”
Kwɛmɔ Wiemɔi Titrii Amligbalamɔ lɛ.
Aloo “nɔ ko nɔ ko.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “Migbɔmɔtso muu lɛ fɛɛ.” Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Sht. ŋm., “edumɔwu.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “yiwalaherelɔ ko ni yɔɔ hewalɛ kpele.” Kwɛmɔ Wiemɔi Titrii Amligbalamɔ lɛ, “Akolonto.”
Kwɛmɔ Wiemɔi Titrii Amligbalamɔ lɛ.