Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kolosebii 4:1-18

4  Nyɛ nuŋtsɔmɛi lɛ, nyɛkɛ nyɛnyɔji lɛ ayea yɛ gbɛ ni ja ni sa nɔ, ejaakɛ nyɛle akɛ nyɛ hu nyɛyɛ Nuŋtsɔ yɛ ŋwɛi.  Nyɛhiɛa sɔlemɔ mli daa, ni nyɛkãa he nyɛshia kpe yɛ mli kɛ shidaa.  Yɛ nakai be lɛ mli nɔŋŋ lɛ, nyɛsɔlea nyɛhãa wɔ hu, koni Nyɔŋmɔ agbele shinaa ko ahã wiemɔ lɛ, ní wɔnyɛ wɔjaje Kristo lɛ he teemɔŋ sane krɔŋkrɔŋ lɛ, nɔ hewɔ hu ni awo mi gboklɛi nɛɛ,  ní majaje lɛ faŋŋ bɔ ni sa akɛ mafee.  Nyɛyaa nɔ nyɛnyiɛa yɛ hiɛshikamɔ mli yɛ nyɛkɛ mɛi ni yɔɔ sɛɛ lɛ* ashãramɔ mli, ní nyɛkɛ nyɛbe atsu nii jogbaŋŋ.*  Nyɛhãa nyɛwiemɔ he abaa nyam daa, kɛ́ wɔɔkɛɛ lɛ, ŋoo ahi mli, koni nyɛle bɔ ni sa akɛ nyɛhãa mɔ fɛɛ mɔ hetoo.  Tihiko, minyɛmi nuu ni misumɔɔ kɛ sɔɔlɔ anɔkwafo, kɛ minaanyo nyɔŋ yɛ Nuŋtsɔ lɛ mli lɛ baagba nyɛ mihe saji lɛ fɛɛ.  Miitsu lɛ nyɛŋɔɔ koni nyɛle bɔ ni wɔyɔɔ, ní eshɛje nyɛtsuii amii.  Onesimo, minyɛmi nuu anɔkwafo ni misumɔɔ lɛ ní jɛ nyɛteŋ lɛ baafata ehe kɛba; amɛbaagba nyɛ nibii fɛɛ ni yaa nɔ yɛ biɛ lɛ. 10  Aristarko, minaanyo gboklɛfonyo lɛ, miiŋa nyɛ, ni Marko, Barnaba wekunyo lɛ* (mɔ ni nyɛnine shɛ gbɛtsɔɔmɔi anɔ akɛ kɛ́ eba nyɛŋɔɔ lɛ, nyɛherea lɛ atuu lɛ), 11  kɛ Yesu ní atsɛɔ lɛ Yusto lɛ, mɛi ni jɛ mɛi ni afolɔ amɛ ketia lɛ ateŋ lɛ, hu miiŋa nyɛ. Mɛnɛɛmɛi pɛ ji minanemɛi nitsulɔi yɛ Nyɔŋmɔ Maŋtsɛyeli lɛ gbɛfaŋ, ni amɛbatsɔmɔ mɛi ni shɛjeɔ mimii babaoo.* 12  Epafra ní jɛ nyɛteŋ ni ji Kristo Yesu nyɔŋ lɛ miiŋa nyɛ. Ekɛ hiɛdɔɔ sɔleɔ ehãa nyɛ be fɛɛ be, koni yɛ naagbee lɛ, nyɛdamɔ shi shiŋŋ akɛ mɛi ni edara* ní nyɛná nɔmimaa kwraa yɛ Nyɔŋmɔ suɔmɔnaa nii lɛ fɛɛ he. 13  Ejaakɛ miiye ehe odase akɛ ebɔɔ mɔdɛŋ naakpa yɛ nyɛ kɛ mɛi ni yɔɔ Laodikea kɛ mɛi ni yɔɔ Hierapoli lɛ ahe. 14  Luka, helatsalɔ ni asumɔɔ lɛ lɛ miiŋa nyɛ, ni Dema hu miiŋa nyɛ. 15  Nyɛŋaa nyɛmimɛi ni yɔɔ Laodikea lɛ kɛ nyɛmiyoo Nimfa kɛ asafo ni yɔɔ eshĩa lɛ nyɛhãa mi. 16  Ni kɛ́ akane wolo nɛɛ yɛ nyɛteŋ atã lɛ, nyɛtoa gbɛjianɔ koni akane yɛ Laodikeabii lɛ asafo lɛ mli hu, ní nyɛ hu nyɛkane nɔ ni jɛ Laodikea lɛ. 17  Agbɛnɛ hu, nyɛkɛa Arkipo akɛ: “Ohiɛ ahi sɔɔmɔ ni okpɛlɛ nɔ yɛ Nuŋtsɔ lɛ mli lɛ nɔ, bɔ ni afee ni otsu he nii kɛmɔ shi.” 18  Mi Paulo, mi diɛŋtsɛ mininenaa ŋamɔ nɛ. Nyɛhãa migboklɛi lɛ ahia nyɛjwɛŋmɔ mli daa. Duromɔ lɛ kɛ nyɛ ahi shi.

Shishigbɛ Niŋmaa

Aloo “mɛi ni bɛ Kristofoi asafo lɛ mli lɛ.”
Sht. ŋm., “nyɛhéa be ni ato lɛ.”
Barnaba tsɛkwɛ̃ binuu loo nyɛkwɛ̃ binuu.
Aloo “mɛi ni yeɔ amɛbuaa mi ní amɛwajeɔ mi.”
Aloo “mɛi ni eye emuu.”