Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kolosebii 3:1-25

3  Shi kɛ́ atee nyɛ kɛ Kristo lɛ fɛɛ shi lɛ, nyɛyaa nɔ nyɛtaoa nibii ni yɔɔ ŋwɛi, he ni Kristo lɛ ta Nyɔŋmɔ ninejurɔ nɔ yɛ lɛ.  Nyɛyaa nɔ nyɛhãa nyɛjwɛŋmɔ ahia nibii ni yɔɔ ŋwɛi lɛ anɔ, jeee nibii ni yɔɔ shikpɔŋ lɛ nɔ lɛ anɔ.  Ejaakɛ nyɛgboi, ni aŋɔ nyɛwala atee kɛfata Kristo lɛ ní kɛ Nyɔŋmɔ efee ekome lɛ he.  Kɛ́ ajie Kristo lɛ, ni ji wɔwala lɛ, kpo lɛ, kɛkɛ lɛ abaajie nyɛ hu kpo afata ehe yɛ anunyam mli.  No hewɔ lɛ, nyɛgbea nyɛgbɔmɔtso lɛ henii ni yɔɔ shikpɔŋ lɛ nɔ lɛ, yɛ bɔlɛnamɔ jeŋba sha,* muji nii, bɔlɛnamɔ he akɔnɔ ní atiuɔ sɛɛ ní ayeee he nɔ, nɔ fɔŋ ní ashweɔ, kɛ amimyeli ni ji amagajamɔ lɛ, gbɛfaŋ.  Nibii nɛɛ ahewɔ lɛ, Nyɔŋmɔ mlifu lɛ miiba.  Nakai ji bɔ ni nyɛ hu kulɛ nyɛbaa nyɛjeŋ* yɛ nyɛtsutsu shihilɛ lɛ mli.*  Shi amrɔ nɛɛ, esa akɛ nyɛjie nibii nɛɛ fɛɛ yɛ nyɛhe nyɛshɛrɛ nyɛshwie: mlifu, mlila, efɔŋfeemɔ, wiemɔ fɔŋ, ní nyɛjie yakayaka wiemɔ kɛjɛ nyɛdaaŋ.  Nyɛkamalemalea nyɛhe. Nyɛjiea subaŋ* momo lɛ kɛ enifeemɔi lɛ yɛ nyɛhe, 10  ní nyɛwo subaŋ* hee lɛ ní atsɔɔ nilee krɔŋŋ nɔ ahãa efeɔ ehee daa yɛ mɔ ni bɔ lɛ lɛ henɔ lɛ naa lɛ, 11  he ni Helanyo loo Yudafonyo bɛ dɔŋŋ, ketiafoo loo foo bɛ dɔŋŋ, maŋsɛɛnyo, Skitenyo,* nyɔŋ, loo odehe ko hu bɛ dɔŋŋ lɛ; shi Kristo ji nibii fɛɛ ni eyɛ fɛɛ mli. 12  No hewɔ lɛ, akɛ mɛi ní Nyɔŋmɔ ehala amɛ, ní yɔɔ krɔŋkrɔŋ, ní asumɔɔ nyɛ lɛ, nyɛwoa musuŋtsɔlɛ kpele, mlihilɛ, heshibaa,* mlijɔlɛ, kɛ tsuishitoo. 13  Kɛ́ mɔ ko yɛ sane ko eshi mɔ kroko po lɛ, nyɛyaa nɔ nyɛnáa tsui nyɛhãhãa nyɛhe ní nyɛkɛfafaa nyɛhe tswaa. Bɔ ni Yehowa* kɛfa nyɛ tswaa lɛ, esa akɛ nyɛ hu nyɛfee nakai nɔŋŋ. 14  Shi enɛɛmɛi fɛɛ sɛɛ lɛ, nyɛwoa suɔmɔ tamɔ atade, ejaakɛ eji kpãa ni feɔ mɛi ekome yɛ gbɛ ni eye emuu nɔ. 15  Agbɛnɛ hu, nyɛhãa Kristo lɛ toiŋjɔlɛ lɛ ayea nɔ yɛ nyɛtsuii amli,* ejaakɛ atsɛ nyɛ yɛ gbɔmɔtso kome mli kɛba nakai toiŋjɔlɛ lɛ he. Ni nyɛfea nyɛhe mɛi ni le shidaa. 16  Nyɛhãa Kristo lɛ wiemɔ lɛ ahia nyɛmli babaoo yɛ hiɛshikamɔ fɛɛ mli. Nyɛyaa nɔ nyɛtsɔɔtsɔa nyɛhe nii ní nyɛwowoo nyɛhe hewalɛ* kɛ lalai, Nyɔŋmɔ yijiemɔ lalai, mumɔŋ lalai ní akɛ hiɛsɔɔ láa,* ni nyɛláa nyɛhãa Yehowa* yɛ nyɛtsuii amli. 17  Nɔ fɛɛ nɔ ni nyɛfeɔ yɛ wiemɔ loo nifeemɔ gbɛfaŋ lɛ, nyɛfea fɛɛ yɛ Nuŋtsɔ Yesu gbɛ́i mli, ni nyɛtsɔa enɔ nyɛdaa Nyɔŋmɔ, ni ji Tsɛ lɛ shi. 18  Nyɛ ŋamɛi lɛ, nyɛŋɔa nyɛhe nyɛwoa nyɛwumɛi ashishi, ejaakɛ no sa yɛ Nuŋtsɔ lɛ mli. 19  Nyɛ wumɛi lɛ, nyɛyaa nɔ nyɛsumɔa nyɛŋamɛi, ni nyɛmli akafua amɛ kɛ joomɔ.* 20  Nyɛ bii lɛ, nyɛboa nyɛfɔlɔi atoi yɛ nɔ fɛɛ nɔ mli, ejaakɛ enɛ sa Nuŋtsɔ lɛ hiɛ jogbaŋŋ. 21  Nyɛ tsɛmɛi lɛ, nyɛkawoa nyɛbii amli la,* koni amɛtsui akakumɔ.* 22  Nyɛ nyɔji lɛ, nyɛboa nyɛnuŋtsɔmɛi ni ji gbɔmɛi* lɛ atoi yɛ nɔ fɛɛ nɔ mli, jeee be ni amɛmiina nyɛ pɛ koni nyɛkɛsa gbɔmɛi ahiɛ kɛkɛ,* shi moŋ kɛ tsui krɔŋŋ, kɛ Yehowa* gbeyeishemɔ. 23  Nɔ fɛɛ nɔ ni nyɛfeɔ lɛ, nyɛkɛ nyɛsusuma muu fɛɛ* atsua tamɔ Yehowa* nyɛtsuɔ nyɛhãa, shi jeee gbɔmɛi, 24  ejaakɛ nyɛle akɛ Yehowa* dɛŋ nyɛbaaná gboshinii lɛ yɛ akɛ juromɔnɔ. Nyɛsɔmɔa Nuŋtsɔ lɛ, ni ji Kristo lɛ akɛ nyɔji. 25  Ekã shi faŋŋ akɛ mɔ ni feɔ efɔŋ lɛ, abaato lɛ najiaŋ yɛ efɔŋ ní efee lɛ he, ni hiɛiaŋkwɛmɔ ko bɛ mli.

Shishigbɛ Niŋmaa

Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “kulɛ nyɛnyiɛɔ.”
Aloo “be ni nyɛhiɔ shi yɛ nakai gbɛ nɔ lɛ.”
Sht. ŋm., “gbɔmɔ.”
Sht. ŋm., “gbɔmɔ.”
“Skitenyo” tsɔɔ mɔ ko ní hiŋmɛi gbeleko.
Aloo “heshibaa jwɛŋmɔ.”
Kwɛmɔ Wiemɔi Titrii Amligbalamɔ lɛ.
Aloo “akudɔa nyɛtsuii.”
Aloo “nyɛwiewiee nyɛtsɔa nyɛhe.”
Aloo “aláa yɛ gbɛ ni yɔɔ nyam nɔ.”
Kwɛmɔ Wiemɔi Titrii Amligbalamɔ lɛ.
Aloo “nyɛyi akawaa yɛ amɛnɔ.”
Aloo “Nyɛkawoa nyɛbii amli fu; nyɛkawoa nyɛbii atsui la.”
Aloo “amɛnijiaŋ akaje wui.”
Sht. ŋm., “nyɛheloo gbɛfaŋ nuŋtsɔmɛi.”
Sht. ŋm., “jeee kɛ hiɛiaŋhiɛiaŋ sɔɔmɔ akɛ gbɔmɛi ahiɛsalɔi.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ, “Susuma.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.