Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 9:1-28

9  No mli lɛ, klɛŋklɛŋ kpaŋmɔ lɛ yɛ mla naa taomɔ nii kɛhã sɔɔmɔ krɔŋŋ, ni eyɛ he krɔŋkrɔŋ hu yɛ shikpɔŋ lɛ nɔ.  Ejaakɛ ashĩ buu ko ama shi, ni e-klɛŋklɛŋ pia lɛ mli kanetso lɛ kɛ okpɔlɔ lɛ kɛ aboloi ni akɛmaa Nyɔŋmɔ hiɛ* lɛ yɔɔ; ni atsɛɔ jɛmɛ akɛ He Krɔŋkrɔŋ.  Shi buu lɛ pia ni atsɛɔ lɛ He Krɔŋkrɔŋ Fe Fɛɛ lɛ yɛ muhɔɔ* ni ji enyɔ lɛ sɛɛ.  No mli lɛ, jɛmɛ shika tsuru tsofa-kɛ-ŋmashãa nɔ, kɛ kpaŋmɔ adeka lɛ ní akɛ shika tsuru eha he fɛɛ ní shika tsuru kpulu ní mana lɛ kɛ Aaron tso ni gbá afoforo lɛ kɛ kpaŋmɔ lɛ tɛi tɛtrɛbii* lɛ yɔɔ mli lɛ yɔɔ;  ni no nɔ anunyam kerubim ní amɛhɔɔŋ eha kpatamɔ naabumɔnɔ lɛ* nɔ lɛ yɔɔ. Shi amrɔ nɛɛ jeee be ni wɔkɛaawie nibii nɛɛ ahe fitsofitso.  Be ni afee nɛkɛ nibii nɛɛ yɛ nɛkɛ gbɛ nɔ agbe naa lɛ, osɔfoi lɛ boteɔ buu lɛ klɛŋklɛŋ pia lɛ mli daa koni amɛyatsu sɔɔmɔ krɔŋŋ lɛ he nitsumɔi lɛ;  shi osɔfonukpa lɛ kome too boteɔ pia ni ji enyɔ lɛ mli shi kome daa afi, ni eyaaa ní ehiɛɛɛ lá, nɔ ni ekɛyahãa yɛ lɛ diɛŋtsɛ ehewɔ kɛ agbɛnɛ hu yɛ eshai ni mɛi lɛ fee ni amɛleee lɛ ahewɔ lɛ.  No hewɔ lɛ, mumɔ krɔŋkrɔŋ lɛ hãa efeɔ faŋŋ akɛ be mli ni klɛŋklɛŋ buu lɛ ma shi lolo lɛ, belɛ anáko ajie gbɛ ni akɛyaa he krɔŋkrɔŋ lɛ kpo.  Nɛkɛ buu nɛɛ feɔ be ni yɔɔ amrɔ nɛɛ he nɔkwɛmɔnɔ, ni yɛ nakai gbɛjianɔtoo lɛ naa lɛ, aŋɔɔ nikeenii kɛ afɔlei fɛɛ ahãa. Shi nɛkɛ nibii nɛɛ nyɛɛɛ ahã mɔ ni ŋɔɔ sɔɔmɔ krɔŋŋ ehãa lɛ henilee aye emuu. 10  Nibii nɛɛ kɔɔ niyenii kɛ numɔnii kɛ kusum naa hejuu srɔtoi* ahe kɛkɛ. No mli lɛ amɛji gbɔmɔtso lɛ he mla naa taomɔ nii, ni ato akɛ afee kɛyashi be ni ato ní akɛbaajaje nibii lɛ baashɛ. 11  Kɛ̃lɛ be ni Kristo ba akɛ nibii kpakpai ni eba momo lɛ ahe osɔfonukpa lɛ, etsɔ buu ni je agbo ni eye emuu fe klɛŋklɛŋ nɔ lɛ mli, buu ni jeee niji akɛfee, ni tsɔɔ akɛ, no jeee je nɛŋ bɔɔ nii lɛ ateŋ eko. 12  Ebote he krɔŋkrɔŋ lɛ shi kome nyɔŋlo, jeee kɛ abotiai kɛ tsinahii bibii alá, shi moŋ kɛ lɛ diɛŋtsɛ elá, ni ekɛná naanɔ kpɔmɔ ehã wɔ. 13  Ejaakɛ kɛ́ abotiai kɛ tsinahii alá kɛ tsinayoo bibioo lamulu ni akɛshwãa mɛi ni amɛhe ewo muji lɛ anɔ lɛ tsuɔ amɛhe ni amɛhe tseɔ yɛ heloo gbɛfaŋ lɛ, 14  enyiɛ nɔŋŋ ni Kristo lɛ, mɔ ni tsɔ naanɔ mumɔ nɔ eŋɔ lɛ diɛŋtsɛ ehe ní kpa ko bɛ he lɛ ehã Nyɔŋmɔ lɛ, lá lɛ tsuŋ wɔhenilei lɛ ahe kɛjɛŋ nitsumɔi ni egboi amli, koni wɔŋɔ sɔɔmɔ krɔŋŋ wɔhã Nyɔŋmɔ hiɛkãalɔ lɛ? 15  No hewɔ ni eji kpaŋmɔ hee teŋdamɔlɔ lɛ, bɔ ni afee ni mɛi ni atsɛ amɛ lɛ nine ashɛ naanɔ gboshinii ni awo he shi lɛ nɔ, ejaakɛ mɔ ko egbo akɛ kpɔmɔnɔ koni akɛjie amɛ kɛjɛ klɛŋklɛŋ kpaŋmɔ lɛ nɔ mlatɔmɔi lɛ amli. 16  Ejaakɛ kɛ́ akpaŋ kpaŋmɔ ko lɛ, esa akɛ ama nɔ mi akɛ gbɔmɔ ni kpaŋ kpaŋmɔ lɛ egbo, 17  nɔ hewɔ ji akɛ, kpaŋmɔ lɛ, ja agbo dani etsuɔ nii, ejaakɛ gbii abɔ ni gbɔmɔ ni kpaŋ kpaŋmɔ lɛ hiɛ kã lolo lɛ, kpaŋmɔ lɛ tsuuu nii. 18  No hewɔ ni ashiii lá sɛɛ ahãaa klɛŋklɛŋ kpaŋmɔ lɛ abɔi nitsumɔ* lɛ. 19  Ejaakɛ be ni Mose wie Mla lɛ mli kitãi lɛ fɛɛ he etsɔɔ mɛi lɛ egbe naa lɛ, eŋɔ tsinahii kɛ abotiai lɛ alá, kɛ nu, kooloo hetsɔi ni tsuɔ waa, kɛ hisopo, ni ekɛshwã wolo* lɛ, kɛ mɛi lɛ fɛɛ nɔ 20  ekɛɛ: “Kpaŋmɔ lɛ ni Nyɔŋmɔ efã nyɛ akɛ nyɛye nɔ lɛ lá lɛ nɛ.” 21  Nakai nɔŋŋ hu ekɛ lá lɛ shwã buu lɛ kɛ nibii fɛɛ ni akɛtsuɔ sɔɔmɔ krɔŋkrɔŋ* lɛ he nii lɛ nɔ. 22  Hɛɛ, yɛ Mla lɛ naa lɛ, akɛ lá tsuɔ nibii kpotoo he, ni kɛ́ afɔseee lá ashwieee shi lɛ, aŋɔfaaa. 23  No hewɔ lɛ, ehe bahia ni akɛ enɛɛmɛi atsuu nibii ni ji ŋwɛi nii lɛ ahenɔi lɛ ahe, shi ŋwɛi nii lɛ diɛŋtsɛ lɛ, afɔlei ni hi kwraa fe nomɛi akɛtsuɔ he. 24  Ejaakɛ jeee he krɔŋkrɔŋ ni akɛ niji fee, ni ji nii lɛ diɛŋtsɛ lɛ henɔ lɛ mli, Kristo yabote lɛ, shi moŋ eyabote ŋwɛi diɛŋtsɛ, ni no hewɔ lɛ, amrɔ nɛɛ, eyɛ Nyɔŋmɔ hiɛ yɛ wɔhewɔ. 25  Afeee enɛ koni eŋɔ ehe ehã shii abɔ, tamɔ bɔ ni osɔfonukpa lɛ yaboteɔ he krɔŋkrɔŋ lɛ daa afi kɛ lá ni jeee lɛ diɛŋtsɛ enɔ lɛ. 26  Eji nakai kulɛ, esa akɛ ena amanehulu shii abɔ kɛjɛ be ni ato je lɛ shishi* beebe. Shi amrɔ nɛɛ, ejie ehe kpo shi kome nyɔŋlo yɛ shihilɛi agbɛjianɔtoi lɛ* anaagbee gbii lɛ amli, koni etsɔ lɛ diɛŋtsɛ ehe ni ekɛshã afɔle lɛ nɔ ejie esha kɛya. 27  Ni tamɔ bɔ ni ekã shi hã gbɔmɛi akɛ amɛgboi shi kome nyɔŋlo, shi no sɛɛ lɛ, akojo amɛ lɛ, 28  nakai nɔŋŋ aŋɔ Kristo lɛ hu ahã shi kome nyɔŋlo koni etere mɛi babaoo ahe eshai; ni nɔ ni ji shii enyɔ nɔ ni ebaapue lɛ, jeee esha hewɔ ebaapue,* ni mɛi ni kɛ miishɛɛ kwɛɔ lɛ gbɛ kɛhã amɛyiwalaheremɔ lɛ baana lɛ.

Shishigbɛ Niŋmaa

Aloo “aboloi ní akɛtsɔɔ.”
Kwɛmɔ Mat 27:51 sh. niŋ.
Aloo “taoi.”
Aloo “kpatamɔhe lɛ.”
Sht. ŋm., “baptisimɔi srɔtoi.”
Sht. ŋm., “atooo klɛŋklɛŋ kpaŋmɔ lɛ shishi.”
Aloo “wolokpo.”
Aloo “sɔɔmɔ ní asɔmɔɔ yɛ mɛi krokomɛi ahilɛkɛhamɔ hewɔ.”
Sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
Aloo “yinɔi lɛ.” Kwɛmɔ Wiemɔi Titrii Amligbalamɔ lɛ.
Aloo “jeee koni ebatsu esha he nii.”