Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Lɛ Yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ Kwɛmɔ afi 2013 nɔ̃ lɛ

Hebribii 7:1-28

EMLI SAJI

  • Melkizedek, maŋtsɛ kɛ osɔfo ni nɔ bɛ (1-10)

  • Kristo osɔfoyeli lɛ nɔ kwɔ fe fɛɛ (11-28)

    • Kristo nyɛɔ ehereɔ mɛi ayiwala kwraa (25)

7  Ejaakɛ nɛkɛ Melkizedek nɛɛ, ni ji Salem maŋtsɛ, Nyɔŋmɔ ni Nɔ Kwɔ Fe Fɛɛ lɛ osɔfo lɛ, kɛ Abraham kpe be ni Abraham kuɔ esɛɛ kɛjɛɔ maŋtsɛmɛi lɛ agbee lɛ mli lɛ, ni ejɔɔ lɛ,  ni Abraham hã lɛ nii lɛ fɛɛ* mlijai nyɔŋma mli ekome. Klɛŋklɛŋ lɛ, egbɛ́i lɛ shishitsɔɔmɔ ji “Jalɛ Maŋtsɛ,” ni no sɛɛ lɛ, eji Salem maŋtsɛ hu, ni no shishi ji, “Toiŋjɔlɛ Maŋtsɛ.”  Akɛni ebɛ tsɛ, ebɛ nyɛ, ebɛ wekutɔkpaa, ebɛ gbii ashishijee, asaŋ ebɛ wala naagbee, shi moŋ afee lɛ tamɔ Nyɔŋmɔ Bi lɛ hewɔ lɛ, eyaa nɔ ehiɔ shi akɛ osɔfo be fɛɛ be.*  Nyɛkwɛa bɔ ni nuu nɛɛ je agbo hã, mɔ ni Abraham, ni ji weku yitso lɛ* ŋɔ haanii kpakpai fe fɛɛ lɛ amlijai nyɔŋma mli ekome ehã lɛ lɛ.  Lɛɛlɛŋ, yɛ Mla lɛ naa lɛ, Levibii lɛ ateŋ mɛi ni náa osɔfoyeli gbɛnaa lɛ yɛ kitã ko akɛ amɛhe mlijai nyɔŋma mli ekome yɛ mɛi lɛ adɛŋ, ni tsɔɔ akɛ, kɛjɛ amɛnyɛmimɛi lɛ adɛŋ, tsɛbelɛ mɛi nɛɛ ji Abraham shwiei.*  Shi nuu nɛɛ ní jɛɛɛ amɛwekutɔkpaa lɛ mli lɛ he mlijai nyɔŋma mli ekome kɛjɛ Abraham dɛŋ ni ejɔɔ mɔ ni yɔɔ shiwoi lɛ.  Agbɛnɛ, ŋwanejee ko bɛ he akɛ, mɔ ni da lɛ, lɛ ejɔɔ mɔ ni edaaa lɛ.  Ni yɛ shihilɛ kome mli lɛ, gbɔmɛi ni gboiɔ lɛ ji mɛi ni heɔ mlijai nyɔŋma mli ekome lɛ, shi yɛ shihilɛ kroko lɛ mli lɛ, mɔ ko ni aye ehe odase akɛ ehiɛ kã lɛ ji mɔ ni he.  Ni abaanyɛ akɛɛ akɛ, Levi, mɔ ni heɔ mlijai nyɔŋma mli ekome lɛ po tsɔ Abraham nɔ eŋɔ mlijai nyɔŋma mli ekome ehã, 10  ejaakɛ be ni Melkizedek kɛ etsɛ lɛ kpe lɛ, no mli lɛ anáko afɔ lɛ akɛ etsɛ lɛ shwie.* 11  Agbɛnɛ, kɛ́ anyɛɔ atsɔɔ Levi osɔfoyeli lɛ nɔ ashɛɔ emuuyeli he lɛ (ejaakɛ eji Mla ni akɛhã mɛi lɛ mli nibii lɛ eko), no lɛ mɛɛ hiamɔ ehia lolo akɛ, osɔfo kroko ate shi yɛ Melkizedek gbɛ nɔ, ni akɛɛɛ akɛ, yɛ Aaron gbɛ nɔ? 12  Ejaakɛ kɛ́ aatsake osɔfoyeli lɛ, belɛ ehe ehia ni atsake Mla lɛ hu. 13  Ejaakɛ mɔ ni awie nibii nɛɛ yɛ ehe lɛ, ejɛ weku kroko mli, weku ni mɔ ko ejɛko mli ebasɔmɔko yɛ afɔleshaa latɛ lɛ he pɛŋ. 14  Ejaakɛ eyɛ faŋŋ akɛ wɔ-Nuŋtsɔ lɛ jɛ Yuda mli, shi Mose ewieee nɔ ko kwraa akɛ osɔfoi baajɛ nakai weku lɛ mli. 15  Ni nɔ ni hãa enɛ feɔ faŋŋ fe tsutsu lɛ ji be ni osɔfo kroko te shi ni tamɔ Melkizedek lɛ, 16  mɔ ni jeee mla naa taomɔ nɔ ni damɔ heloonaa wekutɔkpaa lɛ nɔ ebatsɔ osɔfo yɛ, shi moŋ yɛ wala ni anyɛŋ akpãtã hiɛ lɛ hewalɛ naa lɛ. 17  Ejaakɛ aye ehe odase akɛ: “Osɔfo ji bo kɛmiiya naanɔ yɛ Melkizedek gbɛ nɔ.” 18  No hewɔ lɛ, akɛni kitã ni tsɔ hiɛ lɛ egbede ni enyɛɛɛ etsu nii hewɔ lɛ, agu. 19  Ejaakɛ Mla lɛ hãaa nɔ ko nɔ ko aye emuu, shi hiɛnɔkamɔ ni hi fe no ní akɛba ní wɔtsɔɔ nɔ wɔbɛŋkɛɔ Nyɔŋmɔ lɛ fee nakai. 20  Agbɛnɛ hu, gbii abɔ ni akã kitã kɛfee enɛ lɛ, 21  (ejaakɛ, anɔkwa, mɛi yɛ ni awó amɛ osɔfoi ní akãaa kitã ko, shi mɔ nɛ lɛ atsɔ kitã ní mɔ ni kɛɛ yɛ ehe akɛ: “Yehowa* ekã kitã, ni etsakeŋ ejwɛŋmɔ,* ‘Osɔfo ji bo kɛmiiya naanɔ’” lɛ kã lɛ nɔ awó lɛ osɔfo), 22  belɛ, Yesu ebatsɔ mɔ ni maa kpaŋmɔ ko ni fe no nɔ aduatsɔ.* 23  Kɛfata he lɛ, akɛni gbele hãaa osɔfoi lɛ aya nɔ asɔmɔ akɛ osɔfoi hewɔ lɛ, mɛi babaoo baye amɛsɛɛ akɛ osɔfoi, 24  shi lɛ lɛ, akɛni eyaa nɔ ehiɔ shi kɛyaa naanɔ hewɔ lɛ, mɔ ko ebayeŋ esɛɛ akɛ osɔfo. 25  No hewɔ lɛ, enyɛɔ ehereɔ mɛi ni tsɔɔ enɔ amɛbɛŋkɛɔ Nyɔŋmɔ lɛ ayiwala kwraa, ejaakɛ ehiɛ kã daa koni ekpa fai ehã amɛ. 26  Ejaakɛ osɔfonukpa ni tamɔ nɛkɛ lɛ sa wɔ, eji anɔkwafo, efɔŋ ko bɛ ehe, muji ko bɛ ehe, etse ehe kɛje eshafeelɔi ahe, ni awó enɔ ahã ekwɔ fe ŋwɛii. 27  Akɛ mɔ ni tamɔɔɔ nakai osɔfonukpai lɛ, ehe ehiaaa ni eŋɔ afɔlei ehã daa gbi, klɛŋklɛŋ lɛ, yɛ lɛ diɛŋtsɛ ehe eshai ahewɔ, kɛ no sɛɛ lɛ, yɛ mɛi lɛ anɔ lɛ hewɔ, ejaakɛ efee enɛ shi kome nyɔŋlo be ni eŋɔ lɛ diɛŋtsɛ ehe ehã lɛ. 28  Ejaakɛ Mla lɛ wóɔ gbɔmɛi ni yɔɔ gbedemɔi akɛ osɔfonukpai, shi wiemɔ ni akɛkã kitã yɛ Mla lɛ sɛɛ lɛ wó bi ní ahã eye emuu kɛmiiya naanɔ lɛ.

Shishigbɛ Niŋmaa

Sht. ŋm., “ja nii lɛ fɛɛ ni ehã lɛ.”
Aloo “daa.”
Aloo “blematsɛ lɛ.”
Sht. ŋm., “jɛ Abraham hɛ mli.”
Sht. ŋm., “eyɛ etsɛ lɛ hɛ mli lolo.”
Kwɛmɔ Wiemɔi Titrii Amligbalamɔ lɛ.
Aloo “eshwaŋ ehe.”
Aloo “mɔ ni akɛhã akɛ kpaŋmɔ ko ni fe no lɛ he shiŋmɛɛnɔ.”