Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 5:1-14

5  Ni osɔfonukpa fɛɛ osɔfonukpa ni ahala lɛ kɛjɛ gbɔmɛi ateŋ lɛ, awó lɛ osɔfonukpa yɛ amɛhewɔ yɛ nibii ni kɔɔ Nyɔŋmɔ he lɛ agbɛfaŋ, koni eŋɔ nikeenii kɛ afɔlei ehã yɛ eshai ahewɔ.  Enyɛɔ ekɛ mɛi ni leee nɔ ko ni amɛtɔ̃ɔ* lɛ yeɔ yɛ musuŋtsɔlɛ naa,* ejaakɛ lɛ hu egbedemɔi lɛ jwere ehiɛ,*  ni no hewɔ lɛ, esa akɛ eŋɔ afɔlei ehã yɛ lɛ diɛŋtsɛ ehe eshai lɛ ahewɔ, tamɔ bɔ ni efeɔ yɛ mɛi lɛ anɔ lɛ he lɛ nɔŋŋ.  Gbɔmɔ ko eŋɔɔɔ woo nɛɛ ehãaa lɛ diɛŋtsɛ ehe, akɛ ja Nyɔŋmɔ etsɛ lɛ, tamɔ bɔ ni etsɛ Aaron hu lɛ, dani enine shɛɔ nɔ.  Nakai nɔŋŋ Kristo lɛ hu, jeee lɛ diɛŋtsɛ ewó ehe osɔfonukpa ni ekɛwo lɛ diɛŋtsɛ ehiɛ nyam, shi moŋ mɔ ni kɛɛ lɛ akɛ: “Mibi ji bo; ŋmɛnɛ lɛ, mitsɔ otsɛ” lɛ ji mɔ ni wo ehiɛ nyam.  Tamɔ bɔ ni ekɛɛ yɛ he kroko hu akɛ, “Osɔfo ji bo kɛmiiya naanɔ yɛ Melkizedek gbɛ nɔ” lɛ.  Be ni Kristo yɔɔ shikpɔŋ lɛ nɔ lɛ,* ekɛ bolɔmɔi ni naa wa kɛ yaafonui ŋɔ faikpamɔi ni yɔɔ hiɛdɔɔ kɛ nibimɔi hu ehã mɔ ni baanyɛ ahere eyiwala kɛjɛ gbele mli lɛ, ni abo lɛ toi hu ejaakɛ esheɔ Nyɔŋmɔ gbeyei.  Eyɛ mli akɛ bi ji lɛ moŋ, shi ekase toiboo kɛjɛ amanehului ni ena lɛ amli.  Ni be ni ahã eye emuu sɛɛ lɛ, etsɔ mɔ ni hãa mɛi fɛɛ ni boɔ lɛ toi lɛ náa naanɔ yiwalaheremɔ, 10  ejaakɛ Nyɔŋmɔ wó lɛ osɔfonukpa yɛ Melkizedek gbɛ nɔ. 11  Wɔyɛ nibii babaoo ni wɔɔkɛɛ yɛ ehe, ni emlitsɔɔmɔ hu wa, ejaakɛ nyɛyɛ shɔ̃ɔ yɛ nyɛniiashishinumɔ mli.* 12  Ejaakɛ nyɛ ni kulɛ benɛ nɛɛ* esa akɛ nyɛtsɔmɔ tsɔɔlɔi lɛ, ehe ehia akɛ mɔ ko aje shishi atsɔɔ nyɛ Nyɔŋmɔ wiemɔi krɔŋkrɔŋi lɛ amli shishijee nibii lɛ ekoŋŋ, ni nyɛsaa nyɛtsɔmɔ mɛi ni fufɔ he ehia amɛ, shi jeee niyenii ni wa. 13  Ejaakɛ mɔ fɛɛ mɔ ni yaa nɔ eyeɔ fufɔ lɛ, eleee jalɛ wiemɔ lɛ, ejaakɛ gbekɛ bibioo ji lɛ. 14  Shi mɛi ni edara lɛ anɔ ji niyenii ni wa, mɛi ni kɛ amɛsanesɛɛkɔmɔ nyɛmɔi lɛ tsuɔ nii ni no etsɔse nyɛmɔi nɛɛ ni amɛle ekpakpa kɛ efɔŋ mlikpamɔ.

Shishigbɛ Niŋmaa

Aloo “amɛduɔ gbɛ.”
Aloo “yɛ mlijɔlɛ naa; ehiɛɔ amɛ blɛoo.”
Aloo “lɛ hu eyɛ egbedemɔi.”
Sht. ŋm., “Yɛ Kristo heloo gbii lɛ amli lɛ.”
Aloo “nyɛyɛ shɔ̃ɔ yɛ nyɛninumɔ mli.”
Sht. ŋm., “yɛ be lɛ naa lɛ.”