Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 4:1-16

YITSEI LƐ AMLI SAJI

  • Eyɛ oshara kɛji mɔ boteee Nyɔŋmɔ hejɔɔmɔ lɛ mli (1-10)

  • Awo hewalɛ akɛ abote Nyɔŋmɔ hejɔɔmɔ lɛ mli (11-13)

    • Nyɔŋmɔ wiemɔ lɛ hiɛ kã (12)

  • Yesu, osɔfonukpa kpeteŋkpele lɛ (14-16)

4  Belɛ, akɛni ehejɔɔmɔ lɛ mlibotemɔ he shiwoo yɛ lolo hewɔ lɛ, nyɛhãa wɔkwɛa jogbaŋŋ* koni ekaba lɛ akɛ nyɛteŋ mɔ ko shɛɛɛ he.  Ejaakɛ wɔ hu ajaje sane kpakpa lɛ atsɔɔ wɔ, tamɔ bɔ ni ajaje atsɔɔ amɛ lɛ nɔŋŋ; shi wiemɔ lɛ ni amɛnu lɛ he eyabaaa sɛɛnamɔ ko hãaa amɛ, ejaakɛ amɛkɛ mɛi ni bo toi lɛ efeee ekome yɛ hemɔkɛyeli mli.  Ejaakɛ wɔ mɛi ni wɔjieɔ hemɔkɛyeli kpo lɛ, wɔmiibote hejɔɔmɔ lɛ mli, tamɔ bɔ ni ekɛɛ lɛ akɛ: “No hewɔ lɛ mikã kitã yɛ mimlifu lɛ mli akɛ, ‘Amɛboteŋ mihejɔɔmɔ lɛ mli,’” tsɛbelɛ agbe enitsumɔi lɛ anaa kɛjɛ be ni ato je lɛ shishi lɛ.*  Ejaakɛ bɔ ni ewie yɛ he ko yɛ gbi ni ji gbi kpawo lɛ he nɛ: “Ni Nyɔŋmɔ jɔɔ ehe yɛ gbi ni ji gbi kpawo lɛ nɔ kɛjɛ enitsumɔi lɛ fɛɛ mli,”  ni esaa ekɛɛ yɛ biɛ nɛɛ akɛ: “Amɛboteŋ mihejɔɔmɔ lɛ mli.”  No hewɔ lɛ, akɛni emlibotemɔ lɛ yɛ lolo kɛhã mɛi komɛi, ni mɛi ni ajaje sane kpakpa lɛ atsɔɔ amɛ klɛŋklɛŋ lɛ boteee mli yɛ toigbele hewɔ lɛ,  esaa eto gbi ko ekoŋŋ yɛ no sɛɛ be kplaŋŋ be ni ekɛɛ yɛ David lala lɛ mli akɛ, “Ŋmɛnɛ” lɛ; tamɔ bɔ ni awie kɛtsɔ hiɛ lɛ, “Ŋmɛnɛ lɛ, kɛji nyɛbo egbee toi lɛ, nyɛkakpiliŋa nyɛtsuii” lɛ.  Ejaakɛ eji Yoshua nyiɛ amɛhiɛ kɛtee hejɔɔmɔhe ko kulɛ, fee sɛɛ lɛ Nyɔŋmɔ ewieŋ gbi kroko he dɔŋŋ.  No hewɔ lɛ, hejɔɔmɔgbiyeli ko yɛ lolo kɛhã Nyɔŋmɔ webii lɛ. 10  Ejaakɛ mɔ ni ebote Nyɔŋmɔ hejɔɔmɔ lɛ mli lɛ, lɛ hu ejɔɔ ehe kɛjɛ lɛ diɛŋtsɛ enitsumɔi amli, tamɔ bɔ ni Nyɔŋmɔ jɔɔ ehe kɛjɛ enɔ lɛ mli lɛ. 11  No hewɔ lɛ, nyɛhãa wɔbɔa mɔdɛŋ fɛɛ ni wɔɔnyɛ koni wɔbote nakai hejɔɔmɔ lɛ mli, koni mɔ ko mɔ ko akagbee shi tamɔ nakai toigbele he nɔkwɛmɔnɔ lɛ nɔŋŋ. 12  Ejaakɛ Nyɔŋmɔ wiemɔ lɛ hiɛ kã ni eyɛ hewalɛ ni enaa ba fe klante fɛɛ klante kɛ enaa nta, ni egbuɔ kɛboteɔ mli aahu kɛyashiɔ egbalaa susuma* kɛ mumɔ* mli, kɛ agbɛnɛ hu talɔi kɛ wuiaŋfɔ lɛ mli, ni enyɛɔ ekɔɔ tsui lɛ mli susumɔi kɛ yiŋtoi asɛɛ. 13  Ni ateee bɔɔ nɔ ko yɛ ehiɛ, shi nibii fɛɛ he kã ni agbele nɔ kpetekplee yɛ lɛ mɔ ni esa akɛ wɔbu wɔhe akɔntaa wɔhã lɛ lɛ hiŋmɛiiaŋ. 14  No hewɔ lɛ, akɛni wɔyɔɔ osɔfonukpa kpeteŋkpele ni efoŋ kɛtsɔ ŋwɛiiaŋ, ni ji Yesu, Nyɔŋmɔ Bi lɛ hewɔ lɛ, nyɛhãa wɔhiɛa jajemɔ ni wɔjajeɔ lɛ wɔtsɔɔ lɛ mli kpɛŋŋ. 15  Ejaakɛ osɔfonukpa ni wɔyɔɔ lɛ, ejeee mɔ ni nyɛɛɛ anu wɔgbedemɔi lɛ ahe ehã wɔ, shi moŋ eji mɔ ni aka lɛ yɛ nibii fɛɛ gbɛfaŋ tamɔ wɔ nɔŋŋ, ni kɛ̃lɛ esha ko bɛ ehe. 16  Belɛ, nyɛhãa wɔkɛ wiemɔ ni awieɔ kɛ nɔmimaa abɛŋkɛa duromɔ sɛi lɛ, koni wɔnine ashɛ mɔbɔnalɛ nɔ ni wɔná duromɔ ni baaye abua wɔ yɛ be ni sa mli.

Shishigbɛ Niŋmaa

Sht. ŋm., “wɔshea gbeyei.”
Sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.