Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 2:1-18

2  No hewɔ ni esa akɛ wɔkɛ wɔjwɛŋmɔ ama nibii ni wɔnuɔ lɛ anɔ jogbaŋŋ fe bɔ ni wɔfeɔ daa lɛ, koni wɔkakplaŋ kɔkɔɔkɔ.  Ejaakɛ kɛ́ wiemɔ ni atsɔ ŋwɛibɔfoi anɔ awie lɛ fee nɔ ni ma shi shiŋŋ, ni akɛ toigbalamɔ ni ja hã yɛ mlatɔmɔ fɛɛ mlatɔmɔ kɛ toigbele fɛɛ toigbele he lɛ,  te wɔbaafee tɛŋŋ wɔjo toigbalamɔ naa foi lɛ, kɛji wɔku wɔhiɛ wɔshwie nɛkɛ yiwalaheremɔ kpele nɛɛ nɔ? Ejaakɛ wɔ-Nuŋtsɔ lɛ nɔ atsɔ abɔi he wiemɔ, ni mɛi ni nu nɔ ni ewie lɛ hu ma nɔ mi amɛhã wɔ,  ni Nyɔŋmɔ hu kɛ okadii kɛ naakpɛɛ nii* kɛ hewalɛ nitsumɔi srɔtoi kɛ mumɔ krɔŋkrɔŋ lɛ ní eja ehã yɛ esuɔmɔ naa lɛ hu miiye odase miishi nɔ.  Ejaakɛ jeee ŋwɛibɔfoi ashishi eŋɔ shikpɔŋ ni baaba, ní wɔwieɔ he lɛ ewo.  Shi odasefonyo ko wie yɛ he ko akɛ: “Mɛni ji gbɔmɔ ní ohãa ehiɔ ojwɛŋmɔŋ, aloo gbɔmɔ bi ní osusuɔ ehe?  Ohã eba shi fioo fe ŋwɛibɔfoi; okɛ anunyam kɛ woo fi lɛ akekere, ni owó lɛ oto oninenaa nitsumɔi lɛ anɔ.  Oŋɔ nibii fɛɛ owo enajiashi.” Kɛ́ akɛɛ Nyɔŋmɔ ŋɔ nibii fɛɛ ewo eshishi lɛ, etsɔɔ akɛ, eshwɛɛɛ nɔ ko nɔ ko ni eŋɔwooo eshishi. Shi amrɔ nɛɛ, wɔnaaa akɛ nibii fɛɛ yɛ eshishi.  Shi wɔnaa Yesu, mɔ ni ahã eba shi fioo fe ŋwɛibɔfoi lɛ, ní amrɔ nɛɛ akɛ anunyam kɛ woo efi lɛ akekere, ejaakɛ ena amanehulu kɛtee gbele mli lɛ koni yɛ Nyɔŋmɔ duromɔ naa lɛ esa enaa gbele ehã mɔ fɛɛ mɔ. 10  Ejaakɛ esa jogbaŋŋ akɛ, mɔ hewɔ ni nibii fɛɛ yɔɔ kɛ mɔ nɔ ni nibii fɛɛ tsɔ kɛba lɛ, bɔ ni afee ní eŋɔ bii babaoo kɛba anunyam mli lɛ, ehã amɛyiwalaheremɔ lɛ Hiɛnyiɛlɔ-Nukpa lɛ tsɔ amanehului amli koni eye emuu. 11  Ejaakɛ mɔ ni tsuɔ mɛi ahe lɛ kɛ mɛi ni atsuɔ amɛhe lɛ fɛɛ jɛ mɔ kome mli, ni no hewɔ lɛ, efeee lɛ hiɛgbele akɛ ebaatsɛ amɛ nyɛmimɛi, 12  taakɛ ekɛɛ akɛ: “Majaje ogbɛ́i lɛ matsɔɔ minyɛmimɛi lɛ; asafo teŋ malá majie oyi yɛ.” 13  Ni asaŋ: “Maŋɔ mihiɛ mafɔ̃ enɔ.” Ni asaŋ: “Naa! Mi kɛ gbekɛbii bibii ní Yehowa* ŋɔhã mi lɛ.” 14  No hewɔ lɛ, akɛni “gbekɛbii bibii” lɛ hiɛ heloo kɛ lá hewɔ lɛ, nakai nɔŋŋ lɛ hu eŋɔ nomɛi nɔŋŋ eko tamɔ amɛ, koni etsɔ egbele lɛ nɔ ekpãtã mɔ ni baanyɛ agbe mɔ, ni ji Abonsam lɛ hiɛ, 15  koni mɛi ni gbele gbeyeishemɔ hã amɛtsɔmɔ nyɔji yɛ amɛwala be fɛɛ mli lɛ, ehã amɛye amɛhe.* 16  Ejaakɛ yɛ anɔkwale mli lɛ, jeee ŋwɛibɔfoi eyeɔ ebuaa lɛ, shi moŋ eeye eebua Abraham seshi* lɛ. 17  No hewɔ lɛ, ehe bahia ni etsɔ tamɔ ‘enyɛmimɛi’ lɛ yɛ gbɛ fɛɛ gbɛ nɔ, koni etsɔ osɔfonukpa mɔbɔnalɔ kɛ anɔkwafo yɛ nibii ni kɔɔ Nyɔŋmɔ he lɛ amli, bɔ ni afee ni eŋɔ kpatamɔ afɔle* ehã yɛ mɛi lɛ ahe eshai lɛ ahewɔ. 18  Ni akɛni lɛ diɛŋtsɛ lɛ, be ni aaka lɛ lɛ ena amanehulu hewɔ lɛ, enyɛɔ eyeɔ ebuaa mɛi ni aaka amɛ lɛ.

Shishigbɛ Niŋmaa

Aloo “gbalɛ okadii.”
Kwɛmɔ Wiemɔi Titrii Amligbalamɔ lɛ.
Aloo “ekpɔ̃ amɛ.”
Sht. ŋm., “dumɔwu.”
Aloo “afɔle ni akɛsaa gbɔmɛi kɛ Nyɔŋmɔ teŋ.”