Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 13:1-25

13  Nyɛyaa nɔ nyɛhiɛa nyɛnyɛmimɛi asuɔmɔ lɛ mli.  Nyɛhiɛ akakpaa gbɔfeemɔ* nɔ, ejaakɛ no nɔ mɛi komɛi tsɔ amɛfee ŋwɛibɔfoi agbɔ ní amɛleee.  Nyɛkaia mɛi ni awo amɛ tsuŋ lɛ,* tamɔ nɔ ni awo nyɛ kɛ amɛ fɛɛ tsuŋ, kɛ mɛi ni afeɔ amɛ niseniianii lɛ hu, akɛni nyɛ diɛŋtsɛ hu nyɛyɛ gbɔmɔtso lɛ mli lɛ hewɔ.*  Awo gbalashihilɛ hiɛ nyam yɛ mɛi fɛɛ ateŋ, ni akabule gbalashihilɛ saa lɛ, ejaakɛ mɛi ni kɛ amɛhe woɔ bɔlɛnamɔ jeŋba sha* mli kɛ gbalafitelɔi lɛ, Nyɔŋmɔ baakojo amɛ.  Shikasuɔmɔ akaba nyɛshihilɛ mli, ni nyɛmii ashɛa nibii ni yɔɔ amrɔ nɛɛ he. Ejaakɛ ekɛɛ: “Mishiŋ bo, ni mikwaŋ bo kɔkɔɔkɔ.”  Koni wɔná ekãa babaoo ni wɔkɛɛ: “Yehowa* ji miyelikɛbualɔ; misheŋ gbeyei. Mɛni gbɔmɔ baanyɛ afee mi?”  Nyɛkaia mɛi ni nyiɛɔ hiɛ yɛ nyɛteŋ, ní wie Nyɔŋmɔ wiemɔ lɛ amɛtsɔɔ nyɛ lɛ, ni be ni nyɛkwɛɔ yibii kpakpai ni jɛɔ bɔ ni amɛbaa amɛjeŋ amɛhãa lɛ mli kɛbaa lɛ jogbaŋŋ lɛ, nyɛkasea amɛhemɔkɛyeli lɛ.  Yesu Kristo lɛ, bɔ ni eyɔɔ nyɛ lɛ, nakai nɔŋŋ eyɔɔ ŋmɛnɛ, ni nakai nɔŋŋ eyɔɔ kɛmiiya naanɔ.  Nyɛkahãa tsɔɔmɔi srɔtoi kɛ tsɔɔmɔi krokomɛi miihã nyɛmiidu gbɛ, ejaakɛ ehi akɛ abaatsɔ duromɔ nɔ awaje tsui lɛ moŋ fe nɔ ni abaatsɔ niyenii,* ní mɛi ni kɛ amɛjwɛŋmɔ fɛɛ maa nɔ lɛ náaa he sɛɛ ko lɛ, nɔ awaje lɛ. 10  Wɔyɛ afɔleshaa latɛ ko ní mɛi ni ŋɔɔ sɔɔmɔ krɔŋŋ amɛhãa yɛ buu lɛ mli lɛ bɛ hegbɛ akɛ amɛyeɔ enɔ nii. 11  Ejaakɛ nakai kooloi lɛ ní osɔfonukpa lɛ ŋɔɔ amɛlá kɛyaa he krɔŋkrɔŋ lɛ akɛ esha he afɔle lɛ agbohii lɛ, ayashãa yɛ nsara lɛ sɛɛ. 12  No hewɔ lɛ, Yesu hu na amanehulu yɛ maŋ lɛ agbó lɛ sɛɛ, bɔ ni afee ni ekɛ lɛ diɛŋtsɛ elá atsuu mɛi lɛ ahe. 13  Belɛ, nyɛhãa wɔyaa eŋɔɔ yɛ nsara lɛ sɛɛ, ni wɔtere ehorabɔɔ lɛ, 14  ejaakɛ wɔbɛ maŋ ni yaa nɔ ehiɔ shi yɛ biɛ, shi moŋ wɔkɛ hiɛdɔɔ miitao nɔ ni baaba lɛ sɛɛ gbɛ. 15  Nyɛhãa wɔtsɔa enɔ wɔŋɔa yijiemɔ afɔle wɔhãa Nyɔŋmɔ be fɛɛ be, no ji wɔnaabui lɛ ayibii ni jajeɔ egbɛ́i lɛ tsɔɔ lɛ. 16  Kɛfata he lɛ, nyɛhiɛ akakpaa ekpakpafeemɔ nɔ, ni nyɛhiɛ akakpaa nɔ hu akɛ nyɛkɛ mɛi baaja nii ni nyɛyɔɔ lɛ, ejaakɛ afɔlei ni tamɔ nɛkɛ saa Nyɔŋmɔ hiɛ jogbaŋŋ. 17  Nyɛboa mɛi ni nyiɛɔ hiɛ yɛ nyɛteŋ lɛ atoi ní nyɛbaa nyɛhe shi nyɛhãa amɛ, ejaakɛ amɛmiibu nyɛhe,* ni amɛbaabu enɛ he akɔntaa, koni amɛkɛ miishɛɛ afee enɛ, shi jeee kɛ ŋtsɔidɔɔmɔ, ejaakɛ no baaye nyɛ awui. 18  Nyɛyaa nɔ nyɛsɔlea nyɛhãa wɔ, ejaakɛ wɔyɛ nɔmimaa akɛ wɔyɛ henilee kpakpa,* ni wɔmiisumɔ ni wɔkɛ anɔkwayeli aba wɔjeŋ yɛ nɔ fɛɛ nɔ mli. 19  Shi miiwo nyɛ hewalɛ waa akɛ nyɛsɔle koni aŋɔ mi ahã nyɛ ekoŋŋ oya. 20  Agbɛnɛ, toiŋjɔlɛ Nyɔŋmɔ lɛ, mɔ ni jie gwantɛŋi lɛ akwɛlɔ kpele lɛ, ni ji wɔ-Nuŋtsɔ Yesu ní hiɛ naanɔ kpaŋmɔ lá lɛ, kɛjɛ gbohii ateŋ lɛ, 21  asaa nyɛ kɛ nibii kpakpai fɛɛ koni nyɛfee esuɔmɔnaa nii, ní etsɔ Yesu Kristo nɔ etsu nɔ ni sa ehiɛ jogbaŋŋ yɛ wɔmli, lɛ aŋɔ anunyam ahã kɛyashi naanɔi anaanɔ. Amen. 22  Agbɛnɛ, nyɛmimɛi, miiwo nyɛ hewalɛ koni nyɛto nyɛtsui shi kɛbo hewalɛwoo wiemɔ nɛɛ toi, ejaakɛ miŋma nyɛ wolo kuku. 23  Miitao nyɛle akɛ ajie wɔnyɛmi Timoteo. Kɛ́ eba mra lɛ, no lɛ mikɛ lɛ baaba mabana nyɛ. 24  Nyɛŋaa mɛi fɛɛ ni nyiɛɔ hiɛ yɛ nyɛteŋ lɛ, kɛ mɛi krɔŋkrɔŋi lɛ fɛɛ nyɛhãa mi. Mɛi ni yɔɔ Italia lɛ miiŋa nyɛ. 25  Duromɔ lɛ kɛ nyɛ fɛɛ ahi shi.

Shishigbɛ Niŋmaa

Aloo “mlihilɛ kpo ní ajieɔ atsɔɔ gbɔi.”
Sht. ŋm., “mɛi ni afimɔ amɛ lɛ; mɛi ni yɔɔ gboklɛi amli lɛ.”
Aloo eeenyɛ efee akɛ, “tamɔ nɔ ni nyɛkɛ amɛ fɛɛ naa amanehulu lɛ.”
Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
Kwɛmɔ Wiemɔi Titrii Amligbalamɔ lɛ.
Ni tsɔɔ akɛ, niyenii ahe mlai.
Aloo “nyɛsusumai ahe.”
Aloo “henilee ni yeɔ anɔkwa.”