Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 12:1-29

12  No hewɔ lɛ, agbɛnɛ, wɔ hu, akɛni wɔyɔɔ odasefoi babaoo tamɔ atatu ni ebɔle wɔ hewɔ lɛ, nyɛhãa wɔshɛa nɔ fɛɛ nɔ ni tsii kɛ esha ní ewaaa akɛ eeelalaa wɔ lɛ wɔfɔ̃a, ní wɔkɛ shifimɔ ada foi ni kã wɔhiɛ lɛ,*  be mli ni wɔkwɛɔ wɔhemɔkɛyeli lɛ Hiɛnyiɛlɔ-Nukpa kɛ mɔ ni hãa wɔhemɔkɛyeli lɛ yeɔ emuu, ni ji Yesu lɛ waa lɛ. Ejaakɛ miishɛɛ ni kã ehiɛ lɛ hewɔ lɛ, efi shi yɛ piŋmɔ tso* nɔ, ni ebuuu hiɛgbele, ni eyata shi yɛ Nyɔŋmɔ maŋtsɛ sɛi lɛ ninejurɔ nɔ.  Anɔkwa, nyɛsusua mɔ ni yɛ shiteekɛwoo wiemɔi ni tamɔ nɛkɛ ni eshafeelɔi wie amɛshi lɛ, ní amɛkɛye amɛ diɛŋtsɛ amɛhe awui lɛ fɛɛ sɛɛ lɛ, efi shi shiŋŋ lɛ he jogbaŋŋ, koni ekatɔ nyɛ ní nyɛŋmɛɛ nibii ahe.*  Yɛ nɔmɔ ní nyɛkɛ nakai esha lɛ nɔɔ lɛ mli lɛ, nyɛnáko nyɛte shi nyɛwo no aahu kɛyashi aaashwie nyɛlá shi.  Ni nyɛhiɛ ekpa wiemɔ ní awie atsɔɔ nyɛ tamɔ akɛ bii wieɔ lɛ nɔ kwraa, akɛ: “Mibi, kaabu Yehowa* tsɔsemɔ lɛ akɛ nɔ ko bibioo, asaŋ kɛ́ ejaje bo lɛ, kaaŋmɛɛ nibii ahe;  ejaakɛ mɛi ni Yehowa* sumɔɔ lɛ, amɛ etsɔseɔ, anɔkwa, eyiɔ mɔ fɛɛ mɔ ni eŋɔɔ lɛ akɛ ebi lɛ.”*  Esa akɛ nyɛfi shi ejaakɛ no fata nyɛtsɔsemɔ* lɛ he. Nyɔŋmɔ kɛ nyɛ miiye akɛ bii. Ejaakɛ mɛɛ bi yɔɔ ni etsɛ tsɔseee lɛ?  Shi kɛ́ nyɛ fɛɛ nyɛnáko tsɔsemɔ nɛɛ mli gbɛfaŋnɔ lɛ, no lɛ, anɔkwa, ajwamaŋbii ji nyɛ, jeee bii diɛŋtsɛ.  Kɛfata he lɛ, no mli lɛ, wɔtsɛmɛi ni ji gbɔmɛi* lɛ tsɔseɔ wɔ, ni wɔbuɔ amɛ. Ani esaaa akɛ wɔba wɔhe shi babaoo fe nakai wɔhã wɔmumɔŋ Tsɛ lɛ* koni wɔyi aná wala? 10  Ejaakɛ amɛ lɛ, be kukuoo ko amɛtsɔse wɔ yɛ bɔ ni amɛsusuɔ akɛ ehi lɛ naa, shi lɛ lɛ, efeɔ nakai koni wɔná he sɛɛ, bɔ ni afee ni wɔná ekrɔŋkrɔŋfeemɔ lɛ mli gbɛfaŋnɔ. 11  Eji anɔkwale akɛ, tsɔsemɔ ko bɛ ní amrɔmrɔ lɛ efeɔ mɔ akɛ miishɛɛ nɔ, shi moŋ edɔɔ mɔ;* kɛ̃lɛ, sɛɛ mli lɛ, ewoɔ toiŋjɔlɛ yibii ni ji jalɛ ehãa mɛi ni etsɔ no nɔ amɛkase nɔ ko lɛ. 12  No hewɔ lɛ, nyɛwajea niji ni egbede kɛ nakutsei ni egbɔjɔ lɛ, 13  ni nyɛyaa nɔ nyɛjajea nyɛnajiashi gbɛi lɛ ní nyɛnyiɛa trɔmɔɔ, koni nɔ ni egbede lɛ akaje talɔ lɛ mli, shi moŋ atsa lɛ. 14  Nyɛtiua nyɛkɛ mɛi fɛɛ ateŋ toiŋjɔlɛ sɛɛ, kɛ agbɛnɛ hu hetsemɔ* ní kɛji mɔ ko bɛ eko lɛ enaŋ Nuŋtsɔ lɛ. 15  Nyɛkwɛa jogbaŋŋ koni mɔ fɛɛ mɔ nine ashɛ Nyɔŋmɔ duromɔ lɛ nɔ, koni shishifã ni ebɔɔ yɔɔ mli ko kwraa akakwɛ̃ ni ekɛ naagba ba ni no bule mɛi babaoo; 16  ni nyɛkwɛa koni mɔ ko ni kɛ ehe woɔ bɔlɛnamɔ jeŋba sha* mli, aloo mɔ ko ni hiɛ esɔɔɔ nibii ni yɔɔ krɔŋkrɔŋ, tamɔ Esau, mɔ ni ŋɔ ekromɔbi hegbɛi lɛ etsake niyenii kome lɛ akaba nyɛteŋ. 17  Ejaakɛ nyɛle akɛ, sɛɛ mli be ni eetao enine ashɛ jɔɔmɔ lɛ nɔ lɛ, akpoo lɛ; ejaakɛ eyɛ mli akɛ ekɛ yaafonui bɔ mɔdɛŋ waa koni ehã atsake jwɛŋmɔ* moŋ, shi eyayeee omanye.* 18  Ejaakɛ nyɛtsiko nyɛbɛŋkɛko nɔ ko ní abaanyɛ ata he ní awo mli la, kɛ atatu ni ewo duŋ kɛ duŋ kpii kɛ ahum, 19  kɛ tɛtɛrɛmantɛrɛ gbɛɛmɔ kɛ gbee ni wieɔ wiemɔi, ní be ni mɛi lɛ nu lɛ, amɛkpa fai akɛ akawie eko afata he ahã amɛ dɔŋŋ lɛ. 20  Ejaakɛ amɛnyɛɛɛ kitã nɛɛ mli amɛmɔ, akɛ: “Kɛ́ kooloo ko po ta gɔŋ lɛ he lɛ, esa akɛ atswia lɛ tɛi.” 21  Agbɛnɛ hu, nɔ ni amɛna lɛ yɛ gbeyei aahu akɛ, Mose kɛɛ akɛ: “Miishe gbeyei, ni mihe miikpokpo.” 22  Shi nyɛtsi nyɛbɛŋkɛ Zion Gɔŋ kɛ Nyɔŋmɔ hiɛkãalɔ lɛ maŋ, ŋwɛi Yerusalem lɛ, kɛ ŋwɛibɔfoi akpei nyɔŋmai abɔ 23  ní ebɔ gwa, kɛ kromɔbii ni aŋma amɛgbɛ́ii yɛ ŋwɛi lɛ asafo lɛ, kɛ Nyɔŋmɔ ni ji mɛi fɛɛ a-Kojolɔ lɛ, kɛ jalɔi ní ahã amɛye emuu lɛ amumɔŋ wala lɛ, 24  kɛ Yesu, ni ji kpaŋmɔ hee ko teŋdamɔlɔ lɛ, kɛ lá ni ashwã lɛ, ní wieɔ yɛ gbɛ kpakpa nɔ fe Habel lá lɛ. 25  Nyɛkwɛa jogbaŋŋ ni nyɛkakpoa akɛ nyɛaabo mɔ ni wieɔ lɛ toi.* Ejaakɛ kɛ́ mɛi ni booo mɔ ni kɛ Nyɔŋmɔ kɔkɔbɔɔ hã yɛ shikpɔŋ lɛ nɔ lɛ toi lɛ ahe ejeee mli lɛ, belɛ wɔ hu, kɛ́ wɔkpale kɛje mɔ ni jɛɔ ŋwɛi ewieɔ lɛ he lɛ, ekã shi faŋŋ akɛ, wɔhe ejeŋ mli kɔkɔɔkɔ! 26  Nakai be lɛ mli lɛ, egbee hoso shikpɔŋ lɛ, shi amrɔ nɛɛ ewo shi akɛ: “Kɛ̃lɛ, mahoso shikpɔŋ lɛ shi kome ekoŋŋ, ni jeee shikpɔŋ lɛ kɛkɛ, shi ŋwɛi hu.” 27  Agbɛnɛ, wiemɔ ni ji ‘kɛ̃lɛ, shi kome ekoŋŋ’ lɛ tsɔɔ akɛ abaajie nibii ni ahosoɔ lɛ kɛya, nibii ni afee lɛ, bɔ ni afee ni nibii ni hosooo lɛ ahi shi. 28  No hewɔ lɛ, akɛni wɔna akɛ wɔnine baashɛ Maŋtsɛyeli ko ni anyɛŋ ahoso nɔ hewɔ lɛ, nyɛhãa wɔyaa nɔ wɔnáa duromɔ lɛ, nɔ ni wɔbaatsɔ nɔ wɔkɛ Nyɔŋmɔ gbeyeishemɔ kɛ woo aŋɔ sɔɔmɔ krɔŋŋ wɔhã Nyɔŋmɔ bɔ ni sa ehiɛ lɛ. 29  Ejaakɛ wɔ-Nyɔŋmɔ lɛ, la ni kpãtãa nii ahiɛ butuu ji lɛ.

Shishigbɛ Niŋmaa

Ni tsɔɔ akɛ, wɔkɛ shifimɔ ada foi ni ato ahã wɔ lɛ.
Kwɛmɔ Wiemɔi Titrii Amligbalamɔ lɛ.
Aloo “nyɛsusumai miitɔ biti.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “egbalaa mɔ fɛɛ mɔ ni eŋɔɔ lɛ akɛ ebi lɛ toi.”
Aloo “nyɛnikasemɔ.”
Sht. ŋm., “wɔheloo lɛ tsɛmɛi.”
Aloo “wɔmumɔŋ wala lɛ Tsɛ lɛ.”
Aloo “shi moŋ ehãa mɔ werɛ hoɔ ehe.”
Aloo “krɔŋkrɔŋfeemɔ.”
Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
Ni tsɔɔ akɛ, etsɛ jwɛŋmɔ.
Sht. ŋm., “enáaa he ko kɛhãaa no.”
Aloo “nyɛkajiea nyɛnaa nyɛtsɔa mɔ ni wieɔ lɛ; nyɛkakua nyɛhiɛ nyɛfɔ̃a mɔ ni wieɔ lɛ nɔ.”