Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 11:1-40

11  Hemɔkɛyeli ji nɔmimaa ni akɛkwɛɔ nii ni hiɛ kã nɔ lɛ gbɛ, eji nii ni anaaa lɛ ahe odaseyeli ni yɔɔ faŋŋ.*  Ejaakɛ no nɔ atsɔ aye mɛi ni hi shi yɛ blema* lɛ ahe odase kpakpa atsɔɔ amɛ diɛŋtsɛ.  Hemɔkɛyeli hewɔ wɔkɔɔ sɛɛ akɛ Nyɔŋmɔ wiemɔ lɛ akɛto shihilɛi agbɛjianɔtoi lɛ* ashishi, no hewɔ lɛ nii ni anaa lɛ jɛ nii ni anaaa lɛ mli kɛba.  Hemɔkɛyeli hewɔ Habel ŋɔ afɔle ni fe Kain nɔ lɛ ehã Nyɔŋmɔ, ni atsɔ nakai hemɔkɛyeli lɛ nɔ aye ehe odase atsɔɔ lɛ akɛ jalɔ ji lɛ, ejaakɛ Nyɔŋmɔ kpɛlɛ enikeenii lɛ anɔ,* ni eyɛ mli akɛ egbo moŋ, shi etsɔɔ ehemɔkɛyeli lɛ nɔ ewieɔ lolo.  Hemɔkɛyeli hewɔ ajie Henok kɛtee koni ekana gbele, ni anaaa lɛ yɛ he ko he ko ejaakɛ Nyɔŋmɔ jie lɛ kɛtee; ejaakɛ dani abaajie lɛ kɛya lɛ, aye ehe odase atsɔɔ lɛ akɛ esa Nyɔŋmɔ hiɛ jogbaŋŋ.  Kɛfata he lɛ, kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ, ejaakɛ mɔ fɛɛ mɔ ni bɛŋkɛɔ Nyɔŋmɔ lɛ, esa akɛ ehe eye akɛ eyɛ ni eji mɛi ni kɛ hiɛdɔɔ taoɔ esɛɛ gbɛ lɛ ajurolɔ.  Hemɔkɛyeli hewɔ be ni Nyɔŋmɔ bɔ Noa kɔkɔ yɛ nii ni anáko ana lɛ ahe lɛ, ejie Nyɔŋmɔ gbeyeishemɔ kpo ni ekpɛ adeka kɛhã eshĩabii lɛ ayiwalaheremɔ; ni etsɔ ehemɔkɛyeli lɛ nɔ ebu je lɛ fɔ, ni ebatsɔ jalɛ ni jɛɔ hemɔkɛyeli mli kɛbaa lɛ niyelɔ.  Hemɔkɛyeli hewɔ be ni atsɛ Abraham lɛ, ebo toi ni eyiŋ etee he ni enine baashɛ gboshinii ko nɔ yɛ lɛ; eyiŋ etee, tsɛbelɛ eleee he ni eyaa.  Hemɔkɛyeli hewɔ eyato gbɔ yɛ shikpɔŋ ni awo he shi lɛ nɔ oookɛɛ eyɛ maŋsɛɛ shikpɔŋ ko nɔ, ni ekɛ Isak kɛ Yakob, mɛi hu ni kɛ lɛ fɛɛ ji nakai shiwoo lɛ nɔŋŋ niyelɔi lɛ, hi bui ni ashi amli. 10  Ejaakɛ no mli lɛ eemɛ maŋ ni yɔɔ faneshii diɛŋtsɛ ní ehe ŋaatolɔ kɛ emalɔ ji Nyɔŋmɔ lɛ. 11  Hemɔkɛyeli hewɔ Sara hu ná hewalɛ kɛŋɔ hɔ,* be mli po ni efo fɔmɔ afii lɛ, ejaakɛ ebu mɔ ni wo shi lɛ akɛ anɔkwafo.* 12  Enɛ hewɔ lɛ, ajɛ nuu kome ní tamɔ mɔ ni egbo momo lɛ mli afɔ bii ni fa babaoo tamɔ ŋwɛi ŋulamii, ni asaŋ tamɔ ŋshɔnaa shia ni anyɛɛɛ akane lɛ. 13  Hemɔkɛyeli mli mɛnɛɛmɛi fɛɛ gboi yɛ, tsɛbelɛ amɛnine shɛɛɛ shiwoi lɛ amlibaa lɛ nɔ; shi amɛna nomɛi yɛ shɔŋŋ ni amɛkɛ miishɛɛ kpɛlɛ nɔ, ni amɛjaje amɛtsɔɔ yɛ faŋŋ akɛ amɛji mɛikpɔji kɛ gbɔi yɛ shikpɔŋ lɛ nɔ. 14  Ejaakɛ mɛi ni wieɔ yɛ nakai gbɛ nɔ lɛ hãa efeɔ faŋŋ akɛ amɛmiitao amɛ diɛŋtsɛ amɛshihilɛhe kɛ hiɛdɔɔ. 15  Ni kɛ̃lɛ, eji amɛtee nɔ amɛkai he ni amɛjɛ kɛba lɛ kulɛ, amɛbaaná hegbɛ amɛku amɛsɛɛ. 16  Shi agbɛnɛ amɛmiitao he ko ni hi fe no, ni tsɔɔ akɛ, he ko ni ji ŋwɛi nɔ. No hewɔ lɛ, efeee Nyɔŋmɔ hiɛgbele akɛ aaabo atsɛ lɛ akɛ amɛ-Nyɔŋmɔ, ejaakɛ esaa maŋ ko eto amɛ. 17  Hemɔkɛyeli hewɔ be ni aka Abraham lɛ, etamɔ nɔ ni eŋɔ Isak ehã momo—nuu ni mɔ shiwoi lɛ amli kɛ miishɛɛ lɛ ka akɛ ebaaŋɔ ebi koome lɛ ehã— 18  eyɛ mli moŋ akɛ akɛɛ lɛ akɛ: “Mɔ ni abaatsɛ lɛ oseshi* lɛ baajɛ Isak mli.” 19  Shi emu sane naa akɛ Nyɔŋmɔ baanyɛ atee lɛ shi kɛjɛ gbohii ateŋ tete, ni enine shɛ enɔ kɛjɛ jɛmɛ yɛ okadifeemɔŋ. 20  Hemɔkɛyeli hewɔ Isak hu jɔɔ Yakob kɛ Esau yɛ nibii ni baaba lɛ ahe. 21  Hemɔkɛyeli hewɔ be ni Yakob baagbo lɛ, ejɔɔ Yosef bii lɛ ateŋ mɔ fɛɛ mɔ, ni ejá Nyɔŋmɔ be mli ni ema eyi shi yɛ edɛhiɛmɔ tso lɛ nɔ lɛ. 22  Hemɔkɛyeli hewɔ be ni Yosef miibɛŋkɛ egbele lɛ,* ewie Israelbii lɛ ashimɔ kɛmiije Ejipt lɛ he, ni ekɛ gbɛtsɔɔmɔi* hã yɛ ewui lɛ ahe* lɛ. 23  Hemɔkɛyeli hewɔ Mose fɔmɔ sɛɛ lɛ, efɔlɔi lɛ ŋɔ lɛ tee nyɔji etɛ lɛ, ejaakɛ amɛna akɛ gbekɛ bibioo lɛ he yɛ fɛo, ni amɛsheee maŋtsɛ lɛ famɔ lɛ gbeyei. 24  Hemɔkɛyeli hewɔ be ni Mose da lɛ, ekpoo akɛ eeehã atsɛ lɛ Farao biyoo lɛ bi lɛ, 25  ni ehala akɛ afee lɛ kɛ Nyɔŋmɔ webii lɛ niseniianii moŋ fe nɔ ni eeeye esha mli ŋɔɔmɔ be kukuoo ko lɛ, 26  ejaakɛ ebu Kristo lɛ ahorabɔɔ lɛ akɛ ninámɔ kpele fe Ejipt jwetrii lɛ, ejaakɛ ekwɛ juromɔnɔ lɛ ní enine baashɛ nɔ lɛ waa. 27  Hemɔkɛyeli hewɔ eshi Ejipt, ni esheee maŋtsɛ lɛ mlifu lɛ gbeyei, ejaakɛ etee nɔ efi shi shiŋŋ tamɔ nɔ ni eena mɔ ni anaaa lɛ lɛ. 28  Hemɔkɛyeli hewɔ eye Hehoo lɛ ni ekɛ lá diki shinaatsei lɛ anɔ lɛ, koni hiɛkpatalɔ lɛ akaye amɛkromɔbii lɛ awui.* 29  Hemɔkɛyeli hewɔ amɛtsɔ Ŋshɔ Tsuru lɛ mli tamɔ amɛnyiɛ shikpɔŋ gbiŋ nɔ lɛ, shi be ni Ejiptbii lɛ hu ka nakai feemɔ lɛ, emii amɛ. 30  Hemɔkɛyeli hewɔ Yeriko gbogboi lɛ kumɔ shwie shi be ni mɛi lɛ shi akoŋ kɛbɔle gbogboi lɛ gbii kpawo lɛ. 31  Hemɔkɛyeli hewɔ Rahab, ashawo yoo lɛ, hiɛ kpãtãaa eshiii mɛi ni gbo toi lɛ anɔ lɛ, ejaakɛ ehere shikpálɔi lɛ yɛ toiŋjɔlɛ mli. 32  Ni mɛni ekoŋŋ makɛɛ? Ejaakɛ be eŋmɛŋ mi gbɛ bɔ ni mikɛaaya nɔ magba Gideon, Barak, Samson, Yefta, David, kɛ agbɛnɛ hu Samuel kɛ gbalɔi krokomɛi lɛ ahe sane. 33  Mɛi nɛɛ tsɔ hemɔkɛyeli nɔ amɛye maŋtsɛyelii anɔ kunim, amɛhã jalɛ he shi, amɛnine shɛ shiwoi anɔ, amɛtsimɔ jatai anaa, 34  amɛgbe la hewalɛ, amɛjo klante naa foi, ahã amɛhe wa be ni amɛfee gbedee, amɛtsɔmɔ mɛi ni he wa yɛ ta mli, amɛfee asraafoi akui ni tutua amɛ lɛ butuu. 35  Yei anine shɛ amɛmɛi ni egboi anɔ kɛtsɔ gbohiiashitee nɔ, shi mɛi krokomɛi lɛ, apiŋ amɛ ejaakɛ amɛkpɛlɛɛɛ ni atsɔ kpɔmɔnɔ ko nɔ ajie amɛ, bɔ ni afee ni amɛná gbohiiashitee ni hi fe no. 36  Hɛɛ, mɛi krokomɛi hu na amɛmanehulu kɛtsɔ amɛhe fɛo ni aye kɛ kpelebii ni ayi amɛ lɛ nɔ, anɔkwa, nɔ ni fe nakai lɛ, awo amɛ kɔsɔŋkɔsɔi ni awo amɛ tsuŋ. 37  Atswia amɛ tɛi, aka amɛ, akɛ saalai gbala amɛmli enyɔ,* akɛ klante gbe amɛ, amɛwo gwantɛŋi ahewoji kɛ abotiai ahewoji kɛnyiɛ be mli ni ehia amɛ, amɛna amanehulu, afee amɛ niseniianii; 38  ni je lɛ esaaa amɛ. Amɛtsomlo yɛ shia ŋai kɛ gɔji anɔ kɛ tɛkploi kɛ shikpɔŋ nɔ bui amli. 39  Ni kɛ̃lɛ, mɛnɛɛmɛi fɛɛ lɛ, eyɛ mli akɛ aye amɛhe odase kpakpa atsɔɔ amɛ yɛ amɛhemɔkɛyeli lɛ hewɔ moŋ, shi amɛnine shɛɛɛ shiwoo lɛ mlibaa lɛ nɔ, 40  ejaakɛ Nyɔŋmɔ kpɛ mli eto akɛ ebaahã wɔ nɔ ko ni hi fe no, koni amɛkaye emuu ní wɔfataaa he.

Shishigbɛ Niŋmaa

Aloo “nii ni anaaa lɛ ahe odaseyeli ni hãa mɔ yiŋ tsɔɔ.”
Aloo “wɔtsɛmɛi.”
Aloo “yinɔi lɛ.” Kwɛmɔ Wiemɔi Titrii Amligbalamɔ lɛ.
Aloo “Nyɔŋmɔ ye odase kɛtsɔ enikeenii lɛ anɔ ni ekpɛlɛ lɛ nɔ.”
Sht. ŋm., “ná hewalɛ kɛŋɔ dumɔwu hɔ.”
Aloo “Mɔ ni abaanyɛ amu afɔ̃ enɔ.”
Sht. ŋm., “odumɔwu.”
Aloo “enaagbee lɛ.”
Aloo “famɔ.”
Aloo “efuu lɛ he.”
Sht. ŋm., “akata amɛkromɔbii lɛ ahe.”
Aloo “akɛ saalai gbala amɛmli.”