Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Hebribii 10:1-39

10  Ni akɛni Mla lɛ ji nibii kpakpai ni baaba lɛ ahɔɔŋ* kɛkɛ, shi jeee nibii lɛ diɛŋtsɛ ni hewɔ lɛ, no nyɛŋ ekɛ* nakai afɔlei lɛ nɔŋŋ ni ayaa nɔ aŋɔhãa daa afi lɛ ahã mɛi ni bɛŋkɛɔ lɛ aye emuu kɔkɔɔkɔ.  Jeee nakai kulɛ, ani afɔ̃ŋ afɔlei lɛ kɛhãmɔ? Ejaakɛ mɛi ni ŋɔɔ sɔɔmɔ krɔŋŋ amɛhãa lɛ, eji aná atsuu amɛhe shi kome pɛ kulɛ, amɛleŋ eshai dɔŋŋ.*  Nɔ ni tamɔɔɔ nakai lɛ, afɔlei nɛɛ hãa akaiɔ eshai daa afi,  ejaakɛ anyɛŋ akɛ tsinahii kɛ abotiai alá ajie eshai kɛya.  No hewɔ lɛ, be ni Kristo baa je lɛ mli lɛ, ekɛɛ: “‘Afɔle kɛ nii ni aŋɔhãa lɛ osumɔɔɔ, shi gbɔmɔtso osaa ohã mi.  Okpɛlɛɛɛ shãa afɔlei kɛ esha he afɔlei anɔ.’  Kɛkɛ ni mikɛɛ: ‘Naa! miba (aŋma mihe sane yɛ wolokpo* lɛ mli) koni mibafee bo, Oo Nyɔŋmɔ, osuɔmɔnaa nii.’”  Be ni ekɛɛ klɛŋklɛŋ akɛ: “Osumɔɔɔ, ni asaŋ okpɛlɛɛɛ afɔlei kɛ nii ni aŋɔhãa kɛ shãa afɔlei kɛ esha he afɔlei anɔ”—afɔlei ni aŋɔhãa yɛ Mla lɛ naa lɛ—  no sɛɛ lɛ ekɛɛ: “Naa! miba koni mibafee osuɔmɔnaa nii.” Ejie klɛŋklɛŋ nɔ lɛ, bɔ ni afee ni enyɛ eto nɔ ni ji enyɔ lɛ shishi. 10  Yɛ nɛkɛ ‘suɔmɔnaa nii’ nɛɛ naa lɛ, atsɔ Yesu Kristo gbɔmɔtso lɛ ni eŋɔhã shi kome nyɔŋlo lɛ nɔ atsuu wɔhe. 11  Agbɛnɛ hu, osɔfo fɛɛ osɔfo lɛ, gbi fɛɛ gbi lɛ, edamɔɔ egbɛhe koni eŋɔ sɔɔmɔ krɔŋkrɔŋ ehã* ní eshã nakai afɔlei lɛ nɔŋŋ shii abɔ, afɔlei ni nyɛŋ ajie eshai kɛya kwraa lɛ. 12  Shi nuu nɛɛ ŋɔ eshai ahe afɔle kome ehã shi kome nyɔŋlo, ni eyata Nyɔŋmɔ ninejurɔ nɔ, 13  kɛjɛ no nɔ kɛbaa lɛ, eemɛ kɛyashi be ni abaaŋɔ ehenyɛlɔi lɛ afee enajiashi maaŋoo. 14  Ejaakɛ etsɔ afɔle kome ní eŋɔhã lɛ nɔ ehã mɛi ni afee amɛ krɔŋkrɔŋ* lɛ ye emuu shi kome nyɔŋlo. 15  Kɛfata he lɛ, mumɔ krɔŋkrɔŋ lɛ hu yeɔ wɔ odase, ejaakɛ ekɛɛ akɛ: 16  “‘Enɛ ji kpaŋmɔ ni mikɛ amɛ baakpaŋ yɛ nakai gbii lɛ asɛɛ lɛ,’ Yehowa* kɛɛ. ‘Mikɛ mimlai lɛ baawo amɛtsuii amli, ni maŋma mawo amɛjwɛŋmɔi amli.’” 17  Ni no sɛɛ lɛ, ekɛɛ: “Mikaiŋ amɛhe eshai lɛ kɛ amɛmlatɔmɔ nifeemɔi lɛ dɔŋŋ.” 18  Agbɛnɛ, he ni akɛ enɛɛmɛi efa yɛ lɛ, eshai ahe afɔleshaa ko bɛ jɛmɛ dɔŋŋ. 19  No hewɔ lɛ, nyɛmimɛi, akɛni Yesu lá lɛ hewɔ lɛ, wɔyɛ ekãa* ní wɔkɛaatsɔ gbɛ ní yaa he krɔŋkrɔŋ lɛ mli lɛ nɔ hewɔ lɛ, 20  gbɛ ni egbele* ehã wɔ akɛ gbɛ hee ni hiɛ kã kɛtsɔ muhɔɔ* lɛ, ni ji eheloo lɛ mli lɛ, 21  ni akɛni wɔyɛ osɔfo kpele yɛ Nyɔŋmɔ we lɛ nɔ hewɔ lɛ, 22  nyɛhãa wɔkɛ tsui krɔŋŋ kɛ hemɔkɛyeli ni ama nɔ mi kɛmɔ shi abɛŋkɛa, be mli ni ashwã wɔtsuii anɔ* ni ehe etse ni ebɛ henilee fɔŋ ko, ni wɔgbɔmɔtsei lɛ hu, akɛ nu ni mli tse eju he lɛ. 23  Nyɛhãa wɔhiɛa wɔhiɛnɔkamɔ ní wɔjajeɔ wɔtsɔɔ lɛ mli kpɛŋŋ ní wɔkagbugbaa, ejaakɛ mɔ ni wo shi lɛ, anɔkwafo ni. 24  Ni nyɛhãa wɔteŋ mɔ fɛɛ mɔ asusua enyɛmi he* bɔ ni afee ni wɔkanyakanyaa wɔhe* koni wɔjie suɔmɔ kpo ní wɔtsu nitsumɔi kpakpai, 25  ni wɔkakwa kpe ni wɔkpeɔ kutuu lɛ, tamɔ bɔ ni eji mɛi komɛi asu lɛ, shi moŋ wɔwowoo wɔhe hewalɛ, ni titri lɛ, akɛni nyɛmiina akɛ gbi lɛ miibɛŋkɛ nɛɛ. 26  Ejaakɛ kɛ́ wɔjeɔ gbɛ wɔfeɔ esha, be ni wɔná anɔkwale lɛ he nilee krɔŋŋ lɛ sɛɛ lɛ, belɛ eshai ahe afɔle ko bɛ dɔŋŋ, 27  shi moŋ kojomɔ gbɛkwɛmɔ ní yɔɔ gbeyei, kɛ mlifu ní miitso tamɔ la ní baashã shiteekɛwolɔi lɛ ni yɔɔ. 28  Mɔ fɛɛ mɔ ni kuɔ ehiɛ efɔ̃ɔ Mose Mla lɛ nɔ lɛ, adamɔɔ mɛi enyɔ loo mɛi etɛ odaseyeli nɔ agbeɔ lɛ ní anaaa lɛ mɔbɔ. 29  Belɛ, kɛ́ mɔ ko naanaa Nyɔŋmɔ Bi lɛ nɔ ni ebu kpaŋmɔ lɛ lá lɛ ni akɛtsuu ehe lɛ akɛ nɔ ko ni sɛɛnamɔ ko tsɔ bɛ he, ni ekɛ musubɔɔ wo duromɔ mumɔ lɛ mlifu lɛ, te nyɛsusuɔ akɛ toigbalamɔ ni sa lɛ lɛ mli baawa ahã tɛŋŋ? 30  Ejaakɛ wɔle mɔ ni kɛɛ akɛ: “Minɔ ji oweletɔɔ lɛ; mi mato najiaŋ.” Ni asaŋ: “Yehowa* baakojo emɛi lɛ.” 31  Eyɛ gbeyei waa akɛ mɔ aaagbee Nyɔŋmɔ hiɛkãalɔ lɛ dɛŋ. 32  Kɛ̃lɛ, nyɛyaa nɔ nyɛkaia gbii ni eho lɛ, be ni la lɛ tso yɛ nyɛnɔ lɛ, bɔ ni nyɛfi shi yɛ nɔmɔ kpele kɛ amanehului amli lɛ. 33  Nakai bei lɛ ekomɛi amli lɛ, abɔɔ nyɛ ahora ni ahãa nyɛnaa amanehului hu yɛ mɛi ahiɛ,* ni bei komɛi hu lɛ, nyɛkɛ mɛi ni tsɔmɔɔ shihilɛi ni tamɔ nɛkɛ mli lɛ náa amɛshihilɛi lɛ amli gbɛfaŋnɔ.* 34  Ejaakɛ nyɛmusuŋ shã nyɛ yɛ mɛi ni awo amɛ tsuŋ lɛ ahewɔ, ni nyɛkɛ miishɛɛ kpɛlɛ nyɛnii ni aha lɛ hu nɔ, akɛni nyɛle akɛ nyɛyɛ jwetri ni hi fe no ni hiɔ shi daa lɛ hewɔ. 35  No hewɔ lɛ, nyɛkashɛa ekãa ni nyɛyɔɔ* lɛ nyɛfɔ̃a, ejaakɛ eyɛ juromɔnɔ babaoo. 36  Ejaakɛ shifimɔ he ehia nyɛ, koni be ni nyɛfee Nyɔŋmɔ suɔmɔnaa nii nyɛgbe naa lɛ, nyɛnine ashɛ shiwoo lɛ mlibaa lɛ nɔ. 37  Ejaakɛ “be fioo kɛkɛ eshwɛ” ni “mɔ ni baa lɛ baaba ni esɛɛ etsɛŋ.” 38  “Shi mitsulɔ jalɔ lɛ, ebaaya nɔ ehi shi yɛ hemɔkɛyeli hewɔ,” ni “kɛ́ egbala ehe shi lɛ, mináŋ* ehe miishɛɛ.” 39  Shi wɔ lɛ, jeee mɛi ni gbalaa amɛhe shi kɛyaa hiɛkpatamɔ mli lɛ ateŋ mɛi komɛi ji wɔ, shi moŋ wɔji mɛi ni yɔɔ hemɔkɛyeli ní hãa abaa wɔwala* yi lɛ ateŋ mɛi komɛi.

Shishigbɛ Niŋmaa

Aloo “ahe mfoniri.”
Aloo eeenyɛ efee akɛ, “gbɔmɛi nyɛŋ amɛkɛ.”
Aloo “amɛnuŋ he dɔŋŋ akɛ esha yɛ amɛhe.”
Wolo kakadaŋŋ ni akotaa awoɔ tso he.
Aloo “eŋɔ sɔɔmɔ ní asɔmɔɔ yɛ mɛi krokomɛi ahilɛkɛhamɔ hewɔ ehã.”
Aloo “asaa amɛ ato ahã Nyɔŋmɔ.”
Kwɛmɔ Wiemɔi Titrii Amligbalamɔ lɛ.
Aloo “nɔmimaa.”
Sht. ŋm., “eto shishi.”
Kwɛmɔ Mat 27:51 sh. niŋ.
Ni tsɔɔ akɛ, akɛ lá eshwã wɔtsuii anɔ.
Aloo “ajwɛŋa enyɛmi he jogbaŋŋ; jwɛŋmɔ ahia enyɛmi nɔ.”
Aloo “wɔwowoo wɔhe hewalɛ.”
Kwɛmɔ Wiemɔi Titrii Amligbalamɔ lɛ.
Sht. ŋm., “oookɛɛ akɛ nyɛ miitsɔɔ yɛ nikwɛmɔhe.”
Aloo “nyɛdamɔ mɛi ni tsɔmɔɔ shihilɛi ni tamɔ nɛkɛ mli lɛ amasɛi kpaakpa.”
Sht. ŋm., “wiemɔ ni nyɛwieɔ kɛ nɔmimaa.”
Aloo “misusuma náŋ.”
Aloo “wɔsusumai.”