Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Galatiabii 6:1-18

6  Nyɛmimɛi, kɛji mɔ ko kɔ gbɛ ko ni ejaaa ní eleee po lɛ, nyɛ mɛi ni nyɛji mɛi ni sa yɛ mumɔŋ* lɛ, nyɛbɔa mɔdɛŋ nyɛjajea nakai mɔ lɛ yɛ mlijɔlɛ mumɔ mli. Shi hã ohiɛ ahi bo diɛŋtsɛ ohe nɔ, koni bo hu akaka bo.  Nyɛyaa nɔ nyɛkpeekpea nyɛhe kɛterea nyɛjatsui ni tsiitsii lɛ, ni nɛkɛ gbɛ nɔ nyɛbaatsɔ nyɛwo Kristo lɛ mla lɛ obɔ.  Ejaakɛ kɛji gbɔmɔ ko susuɔ akɛ mɔ ko ji lɛ yɛ be mli ni ejeee mɔ ko lɛ, eelaka ehe.  Shi mɔ fɛɛ mɔ apɛi enifeemɔi amli ekwɛ, kɛkɛ lɛ ebaana nɔ ko ní baahã ená miishɛɛ yɛ lɛ diɛŋtsɛ ehe kɛkɛ, ni jeee ni ekɛ ehe baato mɔ kroko he.  Ejaakɛ mɔ fɛɛ mɔ baatere lɛ diɛŋtsɛ ejatsu.*  Kɛfata he lɛ, mɔ fɛɛ mɔ ni aatsɔɔ lɛ* Nyɔŋmɔ wiemɔ lɛ, ekɛ mɔ ni tsɔɔ lɛ nɛkɛ nii nɛɛ* aná nibii kpakpai fɛɛ mli gbɛfaŋnɔ.  Nyɛkalakaa nyɛhe: Nyɔŋmɔ jeee mɔ ni aliɔ lɛ. Ejaakɛ nɔ fɛɛ nɔ ni gbɔmɔ duɔ lɛ, no nɔŋŋ ebaakpa hu;  ejaakɛ mɔ ni duɔ nii ehãa eheloo lɛ baakpa fitemɔ kɛjɛ eheloo lɛ mli, shi mɔ ni duɔ nii ehãa mumɔ lɛ baakpa naanɔ wala kɛjɛ mumɔ lɛ mli.  No hewɔ lɛ, nyɛkahãa ekpakpafeemɔ miitɔa wɔ, ejaakɛ kɛ́ efeemɔ etɔɔɔ wɔ lɛ,* wɔbaakpa eyibii yɛ be ni sa mli. 10  Belɛ, gbii abɔ ni wɔyɔɔ hegbɛ* nɛɛ, nyɛhãa wɔfea mɛi fɛɛ ekpakpa, shi titri lɛ, mɛi ni etsɔmɔ wɔwekumɛi yɛ hemɔkɛyeli lɛ mli lɛ. 11  Nyɛkwɛa niŋmaa okadii agboi ni mikɛ mi diɛŋtsɛ minine eŋma nyɛ. 12  Mɛi fɛɛ ni taoɔ akɛ amɛhiɛ aba nyam yɛ heloo lɛ mli* lɛ ji mɛi ni bɔɔ mɔdɛŋ akɛ amɛnyɛ nyɛnɔ ni nyɛhã afolɔ nyɛ ketia lɛ, ni nɔ titri hewɔ ni amɛfeɔ nakai ji ní akawa amɛ yi yɛ Kristo lɛ piŋmɔ tso* lɛ hewɔ. 13  Ejaakɛ mɛi ni afolɔɔ amɛ ketia lɛ diɛŋtsɛ po yeee Mla lɛ nɔ, shi amɛmiitao ni afolɔ nyɛ ketia koni amɛná nɔ ko nɔ amɛdamɔ amɛkɛ nyɛheloo lɛ ashwã. 14  Shi mi lɛ, ekaba kɔkɔɔkɔ akɛ mashwã, ja yɛ wɔ-Nuŋtsɔ Yesu Kristo piŋmɔ tso* lɛ he kɛkɛ, mɔ ni atsɔ enɔ agbe je lɛ* yɛ migbɛfaŋ, ní agbe mi hu yɛ je lɛ gbɛfaŋ lɛ. 15  Ejaakɛ ketiafoo jeee nɔ ko, ni foo hu jeee nɔ ko, shi bɔɔ nɔ hee ji nɔ ko. 16  Shi mɛi fɛɛ ni nyiɛɔ jogbaŋŋ yɛ jeŋba he mla nɛɛ naa lɛ, toiŋjɔlɛ kɛ mɔbɔnalɛ aba amɛnɔ, hɛɛ, aba Nyɔŋmɔ Israel lɛ nɔ. 17  Kɛjɛ be nɛɛ nɔ kɛyaa lɛ, mɔ ko mɔ ko akagba minaa dɔŋŋ, ejaakɛ gbɛ̃i yɛ migbɔmɔtso he ni kadiɔ mi akɛ Yesu nyɔŋ. 18  Nyɛmimɛi, wɔ-Nuŋtsɔ Yesu Kristo duromɔ lɛ kɛ mumɔ ni nyɛjieɔ lɛ kpo lɛ ahi shi. Amen.

Shishigbɛ Niŋmaa

Sht. ŋm., “nyɛ mɛi ni nyɛji mumɔŋ gbɔmɛi.”
Aloo “ejatsu ni ji esɔ̃.”
Aloo “akɛ naabu miitsɔɔ lɛ.”
Aloo “mɔ ni kɛ enaabu tsɔɔ lɛ nɛkɛ nii nɛɛ.”
Aloo “kɛ́ wɔŋmɛɛɛ nibii ahe lɛ.”
Sht. ŋm., “be ni ato.”
Aloo “mɛi ni miitao amɛsa mɛi ahiɛ yɛ kponɔgbɛ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “agbe je lɛ yɛ tso jaŋŋ lɛ nɔ.”