Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Galatiabii 4:1-31

4  Agbɛnɛ, miikɛɛ akɛ, gbii abɔ ni niyelɔ lɛ ji gbekɛ bibioo lɛ, srɔto ko bɛ ekɛ nyɔŋ teŋ, tsɛbelɛ lɛ ji nibii fɛɛ nuŋtsɔ,  shi eyɛ nɔkwɛlɔi kɛ shĩa nɔkwɛlɔi ashishi, kɛyashi gbi ni etsɛ etsɔ hiɛ eto lɛ.  Nakai nɔŋŋ hu be ni wɔji gbekɛbii lɛ, wɔ hu je lɛ shishijee nibii lɛ ye wɔ nyɔŋ.  Shi be ni be ni ato lɛ ba naagbee lɛ, Nyɔŋmɔ tsu e-Bi lɛ, mɔ ni yoo fɔ lɛ ní hi mla shishi lɛ,  koni ehé mɛi ni yɔɔ mla shishi lɛ ní ekɛkpɔ̃ amɛ, bɔ ni afee ni aŋɔ wɔ akɛ bii.  Agbɛnɛ, akɛni bii ji nyɛ hewɔ lɛ, Nyɔŋmɔ etsu e-Bi lɛ mumɔ lɛ kɛba wɔtsuii amli, ni no boɔ akɛ: “Aba,* Ataa!”  No hewɔ lɛ, jeee nyɔŋ ji bo dɔŋŋ, shi moŋ bi ji bo; ni kɛ́ bi ji bo lɛ, belɛ Nyɔŋmɔ efee bo niyelɔ hu.  Kɛ̃lɛ, be ni nyɛleee Nyɔŋmɔ lɛ, no mli lɛ mɛi ni jeee nyɔŋmɔi diɛŋtsɛ lɛ ye nyɛ nyɔŋ.  Shi amrɔ nɛɛ ni nyɛbale Nyɔŋmɔ, aloo moŋ lɛ, ní Nyɔŋmɔ ebale nyɛ nɛɛ, te feɔ tɛŋŋ ni nyɛkuɔ nyɛsɛɛ kɛyaa shishijee nibii ni egbede ní miiye ohia lɛ aŋɔɔ, ni nyɛmiitao ni amɛye nyɛ nyɔŋ lɛ? 10  Nyɛyeɔ gbii kɛ nyɔji kɛ bei ni ato kɛ afii fitsofitso. 11  Miishe gbeyei miihã nyɛ, akɛ yɛ gbɛ ko nɔ lɛ, yakatswaa migbo deŋme yɛ nyɛhe lɛ. 12  Nyɛmimɛi, miikpa nyɛ fai, nyɛtamɔa mi, ejaakɛ be ko ni eho lɛ, mi hu mitamɔ nyɛ. Nyɛfeko mi efɔŋ ko. 13  Shi nyɛle akɛ heloo mli hela ko ji nɔ ni hã miná klɛŋklɛŋ hegbɛ kɛbajaje sane kpakpa lɛ mitsɔɔ nyɛ lɛ. 14  Ni eyɛ mli akɛ miheloo mli hela lɛ bafee jaramɔ shihilɛ kɛhã nyɛ moŋ, shi nyɛnyaŋeee mi, ni asaŋ mihe efeee nyɛ taŋ;* shi moŋ nyɛhere mi tamɔ Nyɔŋmɔ bɔfo,* tamɔ Kristo Yesu. 15  Nɛgbɛ miishɛɛ ni no mli lɛ nyɛyɔɔ lɛ yɔɔ? Ejaakɛ miyeɔ nyɛhe odase akɛ, eji no mli lɛ ehiɔ feemɔ kulɛ, nyɛbaafamɔ nyɛhiŋmɛii tete ni nyɛkɛhã mi. 16  Belɛ, ani mitsɔ nyɛhenyɛlɔ akɛni mikɛɔ nyɛ anɔkwale lɛ hewɔ? 17  Jeee yiŋtoo kpakpa ko hewɔ amɛkɛ hiɛdɔɔ taoɔ akɛ amɛgbala nyɛ kɛba amɛgbɛfaŋ lɛ; amɛmiitao ni nyɛkpa yɛ misɛɛ, koni nyɛná he miishɛɛ akɛ nyɛbaanyiɛ amɛsɛɛ. 18  Kɛ̃lɛ, be fɛɛ be lɛ, ehi akɛ mɔ ko kɛ hiɛdɔɔ atao nyɛsɛɛ gbɛ yɛ yiŋtoo kpakpa ko hewɔ, ni jeee be ni miyɔɔ nyɛŋɔɔ lɛ kɛkɛ, 19  mibii bibii, nyɛhewɔ lɛ, miikɔmɔ ekoŋŋ kɛyashi abaashɔ̃ Kristo* yɛ nyɛmli. 20  Miná ni kulɛ miyɛ nyɛŋɔɔ amrɔ nɛɛ nɔŋŋ, ní mikɛ nyɛ awie yɛ gbɛ kroko nɔ, ejaakɛ mihiɛ efee mi yaa yɛ nyɛhewɔ. 21  Nyɛkɛa mi, nyɛ mɛi ni nyɛmiitao nyɛhi mla shishi, Ani nyɛnuuu Mla lɛ? 22  Akɛ nɔkwɛmɔnɔ lɛ, aŋma akɛ Abraham ná bihii enyɔ, mɔ kome lɛ, ekɛ tsulɔ yoo lɛ fɔ lɛ, ni mɔ kome hu, ekɛ odehe yoo lɛ fɔ lɛ; 23  shi mɔ ni ekɛ tsulɔ yoo lɛ fɔ lɛ lɛ, afɔ lɛ tamɔ bɔ ni afɔɔ mɔ fɛɛ mɔ lɛ,* ni mɔ ni ekɛ odehe yoo lɛ fɔ lɛ lɛ, afɔ lɛ yɛ shiwoo naa. 24  Abaanyɛ aŋɔ nibii nɛɛ akɛ okadifeemɔŋ nifeemɔ ko; ejaakɛ yei nɛɛ damɔ shi kɛhã kpaŋmɔi enyɔ, ekome jɛ Sinai Gɔŋ lɛ nɔ, ni efɔɔ bii ewoɔ nyɔŋyeli mli, ni no ji Hagar. 25  Agbɛnɛ, Hagar damɔ shi kɛhã Sinai, gɔŋ ko ni yɔɔ Arabia lɛ, ni efeɔ Yerusalem ni yɔɔ ŋmɛnɛ lɛ he mfoniri, ejaakɛ Yerusalem kɛ ebii lɛ yɛ nyɔŋyeli mli. 26  Shi Yerusalem ni yɔɔ ŋwɛi lɛ, odehe ni, ni lɛ ji wɔnyɛ lɛ. 27  Ejaakɛ aŋma akɛ: “Bo yoo kene ní ofɔɔɔ, omii ashɛ ohe; bo yoo ni kɔmɔmɔi etaaa ohe, bolɔmɔ kɛ miishɛɛ babaoo; ejaakɛ yoo ni akpoo lɛ lɛ bii lɛ fa fe yoo ni yɔɔ wu lɛ bii lɛ.” 28  Agbɛnɛ, nyɛmimɛi, nyɛ lɛ, shiwoo lɛ bii ji nyɛ tamɔ Isak nɔŋŋ. 29  Shi bɔ ni no be lɛ mli lɛ, mɔ ni afɔ lɛ tamɔ bɔ ni afɔɔ mɔ fɛɛ mɔ* lɛ bɔi mɔ ni atsɔ mumɔ nɔ afɔ lɛ lɛ yiwaa lɛ, nakai nɔŋŋ hu eji amrɔ nɛɛ. 30  Kɛ̃lɛ, mɛni ŋmalɛ lɛ kɛɔ? “Shwiemɔ tsulɔ yoo lɛ kɛ ebinuu lɛ, ejaakɛ ebaŋ lɛ kɔkɔɔkɔ akɛ tsulɔ yoo lɛ binuu lɛ baafee niyelɔ kɛfata odehe yoo lɛ binuu lɛ he.” 31  No hewɔ lɛ, nyɛmimɛi, jeee tsulɔ yoo lɛ bii ji wɔ, shi moŋ odehe yoo lɛ bii ji wɔ.

Shishigbɛ Niŋmaa

Aramaik wiemɔ ni shishi ji “Mitsɛ!”
Aloo “nyɛfɛ̃ɛɛ lajɔ̃ nyɛshwieee yɛ mihewɔ.”
Aloo “ŋwɛibɔfo.”
Aloo “kɛyashi abaashɔ̃ Kristo su lɛ.”
Sht. ŋm., “afɔ lɛ yɛ heloo lɛ naa.”
Sht. ŋm., “afɔ lɛ yɛ heloo lɛ naa.”