Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Galatiabii 3:1-29

EMLI SAJI

  • Mla nitsumɔi lɛ kɛ hemɔkɛyeli (1-14)

    • Jalɔ baaya nɔ ehi shi yɛ hemɔkɛyeli hewɔ (11)

  • Jeee Mla nɔ atsɔ awo Abraham shi (15-18)

    • Abraham seshi lɛ, Kristo (16)

  • Mɔ ni hã Mla lɛ kɛ yiŋtoo hewɔ ní akɛhã (19-25)

  • Nyɔŋmɔ bii yɛ hemɔkɛyeli hewɔ (26-29)

    • Abraham seshi lɛ, mɛi ni ji Kristo nii lɛ (29)

3  Oo Galatiabii ni bɛ jwɛŋmɔ! Namɔ ná nyɛnɔ hewalɛ fɔŋ nɛɛ, nyɛ ni atɛŋ Yesu Kristo faŋŋ yɛ nyɛhiɛ akɛ mɔ ni akala lɛ akpɛtɛ tso jaŋŋ he lɛ?  Nɔ kome nɛɛ miitao mabi nyɛ:* Ani nyɛtsɔ mla nitsumɔi anɔ nyɛnine shɛ mumɔ lɛ nɔ aloo nyɛnine shɛ nɔ yɛ hemɔkɛyeli ni nyɛná yɛ nɔ ni nyɛnu lɛ mli lɛ hewɔ?  Ani nɛkɛ nyɛbɛ jwɛŋmɔ kwraa? Ní nyɛje shishi yɛ mumɔŋ gbɛ nɔ* lɛ, ani nyɛmiigbe naa yɛ heloŋ gbɛ nɔ?*  Amanehului babaoo ni nyɛna lɛ, yakatswaa nyɛna lo? Miyɛ nɔmimaa waa akɛ jeee yakatswaa nyɛna amanehului lɛ.  No hewɔ lɛ, ani mɔ ni hãa nyɛ mumɔ lɛ, ní etsuɔ hewalɛ nitsumɔi yɛ nyɛteŋ lɛ feɔ nakai yɛ nyɛmla nitsumɔi ahewɔ, aloo hemɔkɛyeli ni nyɛná yɛ nɔ ni nyɛnu lɛ mli lɛ hewɔ?  Tamɔ bɔ ni Abraham “ná hemɔkɛyeli yɛ Yehowa* mli, ni abu no jalɛ ahã lɛ” lɛ.  Ekã shi faŋŋ akɛ, nyɛle akɛ mɛi ni kpɛtɛɔ hemɔkɛyeli he lɛ, amɛji Abraham bii.  Agbɛnɛ, akɛni ŋmalɛ lɛ na eto akɛ Nyɔŋmɔ baatsɔ hemɔkɛyeli nɔ ebu jeŋmajiaŋbii lɛ jalɔi hewɔ lɛ, etsɔ hiɛ ejaje sane kpakpa lɛ etsɔɔ Abraham akɛ: “Abaatsɔ onɔ ajɔɔ jeŋmaji lɛ fɛɛ.”  No hewɔ lɛ, aajɔɔ mɛi ni kpɛtɛɔ hemɔkɛyeli he lɛ taakɛ ajɔɔ Abraham ní ná hemɔkɛyeli lɛ. 10  Mɛi fɛɛ ni ŋɔɔ amɛhiɛ amɛfɔ̃ɔ mla nitsumɔi anɔ lɛ yɛ loomɔ shishi, ejaakɛ aŋma akɛ: “Alomɔ mɔ fɛɛ mɔ ni eyaaa nɔ ehiii shi yɛ nibii fɛɛ ni aŋmala yɛ Mla lɛ wolokpo* lɛ mli lɛ mli, ní eye emli kitãi lɛ anɔ lɛ.” 11  Kɛfata he lɛ, ekã shi faŋŋ akɛ atsɔɔɔ mla nɔ abuuu mɔ ko mɔ ko jalɔ yɛ Nyɔŋmɔ hiɛ, ejaakɛ “jalɔ lɛ, ebaaya nɔ ehi shi yɛ hemɔkɛyeli hewɔ.” 12  Agbɛnɛ, Mla lɛ, edamɔɔɔ hemɔkɛyeli nɔ. Moŋ lɛ, “mɔ ni yeɔ emli kitãi lɛ anɔ lɛ baatsɔ nomɛi anɔ eya nɔ ehi shi.” 13  Kristo hé wɔ, ni ekɛ no kpɔ̃ wɔ kɛjɛ Mla lɛ loomɔ lɛ mli, akɛni etsɔ mɔ ni alomɔ lɛ yɛ wɔnajiaŋ lɛ hewɔ, ejaakɛ aŋma akɛ: “Alomɔ mɔ fɛɛ mɔ ni asɛŋ lɛ yɛ tso jaŋŋ nɔ.” 14  Enɛ ba lɛ nakai koni atsɔ Kristo Yesu nɔ akɛ Abraham jɔɔmɔ lɛ aba jeŋmaji lɛ anɔ, koni wɔtsɔ wɔhemɔkɛyeli lɛ nɔ wɔná mumɔ ni awo he shi lɛ. 15  Nyɛmimɛi, mikɛ gbɔmɛi anɔkwɛmɔnɔ miitsu nii kɛmiiwie: Kɛ́ ama kpaŋmɔ ko nɔ aduatsɔ lɛ, kɛ́ gbɔmɔ po ni fee nakai lɛ, mɔ ko mɔ ko eguuu no, ni asaŋ mɔ ko mɔ ko kɛ nibii krokomɛi fataaa he. 16  Agbɛnɛ, atsĩ shiwoi lɛ atã atsɔɔ Abraham kɛ eseshi* lɛ. Ekɛɛɛ akɛ, “kɛ oseshibii lɛ,”* tamɔ nɔ ni ekɔɔ mɛi babaoo ahe. Moŋ lɛ, ekɛɛ, “kɛ oseshi* lɛ,” ni tsɔɔ akɛ, ekɔɔ mɔ kome pɛ he, mɔ ni ji Kristo lɛ. 17  Kɛfata he lɛ, nɔ ni mikɛɔ nɛ: Mla lɛ ni aŋɔhã afii ohai ejwɛ kɛ nyɔŋmai etɛ sɛɛ lɛ eguuu kpaŋmɔ ni Nyɔŋmɔ tsɔ hiɛ efee lɛ, ní ehã shiwoo lɛ afee yaka. 18  Ejaakɛ kɛ́ gboshinii lɛ damɔ mla nɔ lɛ, belɛ edamɔɔɔ shiwoo ko nɔ dɔŋŋ; shi Nyɔŋmɔ jɛ mlihilɛ mli etsɔ shiwoo ko nɔ ekɛhã Abraham. 19  Belɛ, mɛni hewɔ akɛ Mla lɛ hã mɔ? Akɛfata he koni ehã mlatɔmɔi afee faŋŋ, kɛyashi seshi* lɛ ní atsĩ shiwoo lɛ tã atsɔɔ lɛ lɛ baaba; ni atsɔ ŋwɛibɔfoi anɔ akɛhã kɛtsɔ teŋdamɔlɔ ko nine nɔ. 20  Agbɛnɛ, kɛ́ ekɔɔ mɔ kome pɛ he lɛ, teŋdamɔlɔ ko he ehiaaa, shi Nyɔŋmɔ lɛ, mɔ kome ji lɛ. 21  Belɛ, ani Mla lɛ teɔ shi ewoɔ Nyɔŋmɔ shiwoi lɛ? Dabida! Ejaakɛ eji akɛ mla ko ni baanyɛ ahã wala hã kulɛ, jalɛ baatsɔ mla nɔ kɛba lɛɛlɛŋ. 22  Shi Ŋmalɛ lɛ ŋa nibii fɛɛ yi ewo esha shishi, koni akɛ shiwoo ní jɛɔ hemɔkɛyeli yɛ Yesu Kristo mli kɛbaa lɛ ahã mɛi ni jieɔ hemɔkɛyeli kpo lɛ. 23  Kɛ̃lɛ, dani hemɔkɛyeli lɛ ba lɛ, abu wɔhe akɛ mɛi ni aŋa amɛyi awo mla shishi, ni wɔmiikwɛ hemɔkɛyeli lɛ ní aaba abajie lɛ kpo lɛ gbɛ. 24  No hewɔ lɛ, Mla lɛ batsɔ wɔgbɛtsɔɔlɔ* ni nyiɛɔ wɔhiɛ kɛyaa Kristo ŋɔɔ, koni atsɔ hemɔkɛyeli nɔ abu wɔ jalɔi. 25  Shi amrɔ nɛɛ ní hemɔkɛyeli lɛ eba lɛ, wɔbɛ gbɛtsɔɔlɔ* ko shishi dɔŋŋ. 26  Anɔkwa, nyɛ fɛɛ lɛ, Nyɔŋmɔ bii ji nyɛ kɛtsɔ hemɔkɛyeli ni nyɛyɔɔ yɛ Kristo Yesu mli lɛ nɔ. 27  Ejaakɛ nyɛ mɛi fɛɛ ni abaptisi nyɛ awo Kristo mli lɛ, nyɛwo Kristo tamɔ atade. 28  Yudafonyo bɛ lɛ, Helanyo hu bɛ dɔŋŋ; nyɔŋ bɛ lɛ, odehe hu bɛ dɔŋŋ; nuu bɛ lɛ, yoo hu bɛ dɔŋŋ; ejaakɛ nyɛ fɛɛ lɛ mɔ kome ji nyɛ, ni nyɛ kɛ Kristo Yesu efee ekome. 29  Kɛfata he lɛ, kɛ́ Kristo nii ji nyɛ lɛ, belɛ Abraham seshi* ji nyɛ lɛɛlɛŋ, niyelɔi yɛ shiwoo ko naa.

Shishigbɛ Niŋmaa

Sht. ŋm., “makase kɛjɛ nyɛŋɔɔ.”
Sht. ŋm., “nyɛje shishi yɛ mumɔ mli.”
Sht. ŋm., “nyɛmiigbe naa yɛ heloo lɛ mli?”
Kwɛmɔ Wiemɔi Titrii Amligbalamɔ lɛ.
Wolo kakadaŋŋ ni akotaa awoɔ tso he.
Sht. ŋm., “edumɔwu.”
Sht. ŋm., “odumɔwui.”
Sht. ŋm., “odumɔwu.”
Sht. ŋm., “dumɔwu.”
Aloo “wɔkwɛlɔ.”
Aloo “kwɛlɔ.”
Sht. ŋm., “dumɔwu.”